विलाप 1:1-5
विलाप 1:1-5 नेपाली नयाँ संशोधित संस्करण (NNRV)
मानिसहरूले भरिएको सहर अब कस्तो सूनसान भयो। त्यो त एक विधवाजस्तो भएको छ। जो एक पल्ट जाति-जातिहरूमा महान् र प्रदेशहरूमा राजकुमारीजस्तै थियो, अब त्यो दासत्वमा परेको सहर भएको छ। रातभरि त्यो धुरुधुरु रुन्छ, त्यसका गालामा आँसु बगिरहन्छ। त्यसका सबै प्रियहरूमध्ये, त्यसलाई सान्त्वना दिने कोही पनि छैन। त्यसका सबै मित्रहरूले त्यसलाई धोका दिएका छन्, र तिनीहरू त्यसका वैरीहरू बनेका छन्। दु:ख र कठोर दासत्वपछि यहूदा प्रवास लगियो। अब त्यो अन्यजातिहरूका बीचमा रहन्छ, त्यसले कुनै विश्रामको स्थान पाउँदैन, त्यसलाई खेदो गर्नेहरू सबैले दु:खको बीचमा त्यसलाई पक्रेका छन्। सियोन जाने बाटोहरूले विलाप गरिरहेका छन्, किनभने ठहराइएका चाड़हरूमा कोही पनि आउँदैन। त्यसका सबै मूल ढोकाहरू उजाड़ छन्, त्यसका पूजाहारीहरू सुस्केरा मार्दछन्। त्यसका कुमारीहरू दु:खित छन्, अनि त्यो कठोर वेदनामा छ। त्यसका शत्रुहरू त्यसका मालिक भएका छन्, त्यसका विरोधीहरू आराममा छन्, त्यसका धेरै पापहरूले गर्दा परमप्रभुले त्यसलाई दु:ख दिनुभएको हो। त्यसका बालकहरू शत्रुहरूका अगि कैदमा लगिएका छन्।
विलाप 1:1-5 पवित्र बाइबल, नेपाली समकालीन संस्करण (NCV)
एक समय मानिसले भरिएको त्यो सहर, अहिले कस्तो सुनसान भएको छ! त्यो सहर एक समयमा राष्ट्रहरूको बीचमा महान् राजकुमारी थिई, अहिले त्यो विधवाजस्ती भएकी छे! प्रदेशहरूको बीचमा त्यो रानीजस्ती थिई, अहिले दासत्वमा परेकी छे। रातभरि त्यो धुरुधुरु रुन्छे; त्यसका गालामा आँसु बगिरहन्छ। त्यसका सबै प्रेमीहरूमध्ये त्यसलाई सान्त्वना दिने कोही पनि छैन। त्यसका सबै साथीहरूले त्यसलाई विश्वासघात गरेका छन्; तिनीहरू सबै त्यसका शत्रु भएका छन्। कष्ट र कठोर परिश्रमपछि यहूदालाई निर्वासनमा लगिएको छ। अब त्यो राष्ट्रहरूको बीचमा रहन्छे; त्यसले आराम गर्ने ठाउँ पाउँदिन। त्यसलाई खेद्नेहरू सबैले त्यसलाई आपत् परेकै बेला पक्रेका छन्। सियोनमा जाने बाटोहरूले शोक गर्छन्; किनकि त्यसका तोकिएका चाडहरूमा कोही पनि आउँदैनन्। त्यसका सबै मूलढोकाहरू उजाड भएका छन्; त्यसका पुजारीहरू सुस्केरा हाल्छन्, त्यसका जवान केटीहरू शोक गर्छन्; अनि त्यो कठोर वेदनामा छे। त्यसका शत्रुहरू त्यसका मालिक भएका छन्; त्यसका शत्रुहरू विजयी भएका छन्; त्यसका धेरै पापहरूको कारण याहवेहले त्यसलाई दुःखमा पार्नुभएको छ। त्यसका छोराछोरीहरू शत्रुहरूकै सामु निर्वासनमा लगिएका छन्।
विलाप 1:1-5 पवित्र बाइबल (NERV)
हाय! यरूशलेम मानिसहरूको भीडले भरिएको शहर थियो। तर अहिले यो शहर नितान्त शुन्य भएको छ। यरूशलेम एक समयमा संसारको प्रख्यात शहरहरूमध्ये एक थियो, तर अहिले यो एउटी शोकाकुल विधवा जस्तो भएकी छे। यो शहर एक समयमा संसारका शहरहरूको बीचमा एउटी राजकुमारी जस्ती थिई। तर अहिले यो नोकर जस्तो भएकी छे। त्यो रातभरी साह्रै दु:ख मानी रून्छे। उसको गालामा आँसुको धारा बगिरहन्छ। उसलाई सान्त्वना दिने अहिले कोही पनि छैन यद्यपी एक समयमा विभिन्न जातिका मानिसहरू यसका साथीहरू हुने गर्थे। उसका सारा मित्रहरूले उसपट्टि पिठ्यूँ फर्काए। तिनीहरू अहिले उसको शत्रुहरू भएका छन्। यहूदा अति नै पीडीत भयो, अनि यहूदालाई कैदी बनाइयो। यहूदा अन्य जातिहरू माझमा बस्थे। तर उनले कतै शान्ति पाएनन्। मानिसहरू जसले उनलाई खेदे अनि समाते तिनीहरूले उसलाई साँघुरो खाडलमा समाते। सियोन जाने बाटो एकदम उदास छ। तिनीहरू दु:खी छन् किनभने विदाको समयमा त्यहाँ कोही पनि आँउदैनन्। सियोनका सारा प्रवेशद्वारहरू भत्काईए। सियोनका सारा पूजाहारीहरू सुस्केरा मार्छन् सियोनका तरूनी केटीहरूलाई उठाएर लगियो। अनि यी सबै कुराहरूले सियोनप्रति आघात पार्छ। यरूशलेमका शत्रुहरू विजय भएका छन्। उनीहरू सफल भएका छन्। यरूशलेमले थुप्रै पापहरू गरेकाले परमप्रभुले दण्ड दिनुभएको छ। उसका नानीहरू शत्रुहरूद्वारा पक्रेर टाढा लगिए।
विलाप 1:1-5 सरल नेपाली पवित्र बाइबल (सरल नेपाली)
एक समय मानिसहरूले भरिएको यरूशलेम, अब कस्तो सुनसान भएको छ! एक समय संसारले इज्जत गरेको, अब त्यो विधवाजस्तै भएको छ; सहरहरूकी राजकुमारी दासत्वमा परेकी छे। रातभरि त्यो धुरुधुरु रुन्छे; त्यसका गालामा आँसु बगिरहन्छ। त्यसका अघिका सबै साथीहरूमध्ये त्यसलाई सान्त्वना दिने कोही पनि छैन। त्यसका साथीहरूले त्यसलाई विश्वासघात गरेका छन् र अब सबै नै त्यसका विरोधमा छन्। यहूदाका मानिसहरू असहाय दासहरू भएका छन्, घर-घरबाट जबरजस्ती लगिएका छन्। तिनीहरू अर्काको देशमा रहन्छन्। तिनीहरूको आफ्नो ठाउँ भन्नु कहीँ छैन। शत्रुहरूद्वारा घेरिएका छन्, कुनै भाग्ने बाटो छैन। अब पवित्र दिनहरूमा आराधना गर्न मन्दिरमा कोही पनि आउँदैन। केटीहरूले त्यहाँ दु:खका गीत गाउँदछन् र पूजाहारीहरूले सुस्केरा मात्र मार्दछन्। सहरका मूल-ढोकाहरू रित्ता भएका छन् र सियोनचाहिँ वेदनामा परेको छ। त्यसका शत्रुहरू सफल भएका छन्; तिनीहरूले त्यसलाई अधिकारमा पारेका छन्। परमप्रभुले त्यसलाई त्यसका धेरै पापहरूले गर्दा दु:खमा पार्नुभएको छ; त्यसका सन्तानहरू कैद गरेर लगिएका छन्।