यहोशू 22:1-9
यहोशू 22:1-9 नेपाली नयाँ संशोधित संस्करण (NNRV)
तब यहोशूले रूबेनी, गादी, र मनश्शेको आधा कुललाई बोलाए, र तिनीहरूलाई भने, “परमप्रभुका दास मोशाले तिमीहरूलाई दिएका सबै आज्ञा तिमीहरूले पालन गरेका छौ, र मैले अह्राएका सबै कुरामा मेरो वचन मानेका छौ। धेरै समयदेखि तिमीहरूले आजसम्म आफ्ना दाजुभाइहरूलाई छोड़ेका छैनौ, तर परमप्रभु आफ्ना परमेश्वरले दिनुभएको काम पूरा गरेका छौ। अब परमप्रभु तिमीहरूका परमेश्वरले भन्नुभएबमोजिम तिम्रा दाजुभाइहरूलाई विश्राम दिनुभएको छ। यसकारण अब तिमीहरू फर्केर परमप्रभुका दास मोशाले यर्दन पारि तिमीहरूका अधिकारको निम्ति तिमीहरूलाई दिएका देशमा आ-आफ्ना डेरामा जाओ। परमप्रभु तिमीहरूका परमेश्वरलाई प्रेम गर्नू, उहाँका सबै मार्गहरूमा चल्नू, उहाँकै आज्ञाहरू पालन गर्नू, उहाँमै लीन भएर रहनू, तिमीहरूका पूर्ण हृदय र प्राणले उहाँकै सेवा गर्नू भनी परमप्रभुका दास मोशाले तिमीहरूलाई दिएका आज्ञा र व्यवस्था पूरा ध्यान दिएर पालन गर।” तब यहोशूले तिनीहरूलाई आशीर्वाद दिएर बिदा गरे, र तिनीहरू आ-आफ्नो डेरामा गए। (मनश्शेको आधा कुललाई त मोशाले बाशानमा अधिकार दिएका थिए, तर अर्को आधालाई यहोशूले यर्दन वारि पश्चिमपट्टि तिनीहरूका दाजुभाइहरूका बीचमा दिए।) तिनीहरूलाई आ-आफ्ना डेराहरूमा जान बिदा दिँदा यहोशूले तिनीहरूलाई आशीर्वाद पनि दिए, र तिनीहरूलाई यसो भने, “धेरै धन-सम्पत्ति, र प्रशस्त बस्तुहरू लिएर सुन, चाँदी, काँसो, फलाम र धेरै लुगाफाटाहरू लिएर आ-आफ्ना डेराहरूमा फर्केर जाओ। तिमीहरूका शत्रुहरूबाट लुटेका सबै आफ्ना भाइहरूमा भागबन्डा गर।” तब रूबेनी, गादी र मनश्शेको आधा कुल, परमप्रभुको आज्ञामुताबिक मोशाद्वारा तिनीहरूले पाएका अधिकारको देश गिलादमा जानलाई इस्राएलीहरूसँग बिदा भएर कनान देशको शीलोबाट फर्के।
यहोशू 22:1-9 पवित्र बाइबल, नेपाली समकालीन संस्करण (NCV)
तब रूबेनीहरू, गादीहरू र मनश्शेको आधा कुललाई यहोशूले बोलाए। अनि तिनीहरूलाई भने, “तिमीहरूले याहवेहका सेवक मोशाले आज्ञा गरेका सबै थोक गरेका छौ, र मैले तिमीहरूलाई आज्ञा दिएका हरेक कुरा पालन गरेका छौ। यतिका दिनदेखि लिएर आजसम्मै तिमीहरूका दाजुभाइहरूलाई नत्यागी तिमीहरूले याहवेह तिमीहरूका परमेश्वरले दिनुभएका सबै आज्ञाहरू पूरा गरेका छौ। अब याहवेह तिमीहरूका परमेश्वरले प्रतिज्ञा गर्नुभएअनुसार उहाँले तिमीहरूका दाजुभाइहरूलाई विश्राम दिनुभएको छ। याहवेहका सेवक मोशाले तिमीहरूलाई यर्दनपारि दिएका आ-आफ्ना देशमा भएका तिमीहरूका घरमा फर्केर जाओ। तर तिमीहरूले याहवेहका सेवक मोशाले दिएका आज्ञाहरू बडो होसियारीसाथ पालन गर्नू। याहवेह तिमीहरूका परमेश्वरलाई प्रेम गर्नू, उहाँमा आज्ञाकारी हुनू, उहाँको आज्ञापालन गर्नू; उहाँमा लागिरहनू। तिमीहरूका सारा हृदयले र सारा प्राणले उहाँको सेवा गर्नू।” त्यसपछि यहोशूले तिनीहरूलाई आशिष् दिए, र पठाइदिए। अनि तिनीहरू आ-आफ्ना घरतिर गए। (मनश्शेको आधा कुललाई मोशाले बाशानमा ठाउँ दिएका थिए। तिनीहरूको अर्को आधा कुललाई यहोशूले तिनीहरूका दाजुभाइहरूसँग यर्दनको पश्चिमतिरको ठाउँ दिए।) जब यहोशूले तिनीहरूलाई आ-आफ्ना घरमा पठाए, तब तिनीहरूलाई आशिष् दिए। अनि तिनीहरूलाई भने, “तिमीहरू प्रशस्त सम्पत्ति, गाईबस्तुको ठूलो बथान, सुन, चाँदी, काँसो, फलाम र धेरै मात्रामा लुगाफाटाहरू लिएर आफ्ना घरमा फर्क। अनि तिमीहरूका शत्रुहरूबाट लुटेका मालसामानहरू आफ्ना दाजुभाइहरूसँग बाँडफाँड गर।” यसकारण रूबेनीहरू, गादीहरू र मनश्शेको आधा कुलले इस्राएलीहरूलाई शीलोमा छोडे। अनि याहवेहले मोशाद्वारा आज्ञा दिनुभएअनुसार तिनीहरूले प्राप्त गरेका आफ्नै देश गिलादतिर फर्कन कनानबाट हिँडे।
यहोशू 22:1-9 पवित्र बाइबल (NERV)
त्यसपछि यहोशूले रूबेन, गाद अनि मनश्शे कुल समूहहरूका सबै मानिसहरूलाई सभामा बोलाए। “परमप्रभुका दाश मोशाले तिमीहरूलाई दिएका ती सबै आदेश पालन गर्यौ, अनि तिमीहरूले मेरो सबै आदेशहरू पनि पालन गर्यौ। तिमीहरूले अरू इस्राएली कुल समूहहरूलाई छोडिदियौ। सबै आदेशहरू सावधानीसित पालन गर्यौ जुन परमप्रभु तिनीहरूका परमेश्वरले तिमीहरूलाई दिनुभएको थियो। परमप्रभु तिमीहरूका परमेश्वरले इस्राएलका मानिसहरूलाई शान्ति प्रदान गर्ने प्रतिज्ञा दिनुभएको थियो र परमप्रभुले उहाँको वचन अहिले पुरागर्नु भयो। यसर्थ अब तिमीहरू घर जान सक्छौ। परमप्रभुका दास मोशाले तिमीहरूलाई यर्दन नदीको पूर्व तर्फको भूमि दिएका छन्। अब तिमीहरू त्यस भूमिमा आफ्नो घरमा जान सक्छौ। तर याद राख-त्यो नियम पालन गर्नु पर्छ जो मोशाले तिमीहरूलाई दिएका थिए। तिमीहरूले परमप्रभु तिमीहरूका परमेश्वरलाई प्रेम गर्नु पर्छ अनि उहाँका आज्ञाहरूको सदा-सर्वदा पालन गर्नु पर्छ। तिमीहरूले लगातार अनुशरण अनि लगातार उत्तम प्रकारले उहाँको सेवालाई जारिराख्नु पर्छ।” तब यहोशूले तिनीहरूलाई बिदा दिए र तिनीहरू घर फर्के। मोशाले मनश्शेका आधा कुल समूहलाई बाशान भूमि दिएका थिए। यहोशूले मनश्शेका अर्को आधा कुल समूहलाई यर्दन नदीको पश्चिम तफर्को भूमि दिए। यहोशूले तिनीहरूलाई आशीर्वाद दिए अनि तिनीहरूलाई घर पठाई दिए। तिनले भने, “तिमीहरू अत्यन्त धनी भएका छौ। तिमीहरूसित अनेक पशुहरू छन्। तिमीहरूका धेरै सुन अनि चाँदी अनि बहुमूल्य मणिहरू छन्। तिमीहरूसित धेरै सुन्दर बस्त्रहरू छन्। तिमीहरूले तिम्रा शत्रुहरूबाट अनेक वस्तुहरू लग्यौ। तिमीहरू घर जाऊ अनि ती वस्तु तिमीहरू माझ विभाजन गर।” यसरी रूबेन, गाद अनि मनश्शेका आधा कुल समूहहरूका मानिसहरूले इस्राएलका अन्य मानिसहरूलाई छाडेर कनानको शीलोमा गए। तिनीहरूले त्यो स्थान छोडे अनि गिलादमा फर्के। तिनीहरू आफ्नै भूमिको घरमा गए तिनीहरूलाई त्यो भूमि मोशाले दिएका थिए। परमप्रभुले त्यो भूमि तिनीहरूलाई दिनु भनी मोशालाई आज्ञा गर्नु भएको थियो।
यहोशू 22:1-9 सरल नेपाली पवित्र बाइबल (सरल नेपाली)
त्यसपछि यहोशूले रूबेन, गाद र पूर्वी-मनश्शे कुलहरूलाई एक ठाउँमा भेला गरे। उनले तिनीहरूलाई भने, “परमप्रभुका सेवक मोशाले आज्ञा गरेका सबै काम तिमीहरूले सक्यौ र मेरो पनि सबै आज्ञापालन गर्यौ। यति दिन तिमीहरूले आफ्ना इस्राएली बन्धुहरूलाई कहिल्यै त्यागेनौ। तिमीहरूले होशियारीसित परमप्रभु आफ्ना परमेश्वरका आज्ञाहरू पालन गर्यौ। अब परमप्रभु तिम्रा परमेश्वरले आफ्नो प्रतिज्ञाअनुसार तिम्रा इस्राएली बन्धुहरूलाई शान्ति दिनुभएको छ। यसकारण अब घर फर्केर तिमीहरूले आफ्ना अधीनमा गरेका ठाउँमा, जुन परमप्रभुका सेवक मोशाले तिमीहरूलाई यर्दनका पूर्वपट्टि दिएका थिए, त्यहाँ जाओ। मोशाले आज्ञा गरेका नियमहरू मान्ने पक्का निश्चय गर। परमप्रभु आफ्ना परमेश्वरलाई प्रेम गर, उहाँका इच्छा र आज्ञाहरू पालन गर, उहाँका विश्वासयोग्य प्रजा बन र आफ्ना पूरा हृदय र प्राणले उहाँको सेवा गर।” यहोशूले तिनीहरूलाई आशीर्वाद दिई यसो भनी पठाए, “तिमीहरू अति धनी भई धेरै गाई-वस्तु, चाँदी, सुन, काँसा, फलाम र लुगाफाटाहरू साथमा लिई घर फर्कंदै छौ। तिम्रा शत्रुहरूबाट लिएका जति कुरा छन्, ती आफ्ना कुलका भाइ-बन्धुहरूसित बाँडचुँड गर।” त्यसपछि तिनीहरू घर फर्के। मनश्शेका आधा कुललाई मोशाले यर्दनका पूर्वमा ठाउँ दिएका थिए तर अर्को आधा कुललाई चाहिँ यहोशूले यर्दनका पश्चिममा अरू कुलहरूसित ठाउँ दिएका थिए। यसकारण रूबेन, गाद र पूर्वी-मनश्शे कुलका मानिसहरू घर फर्के। इस्राएलका बाँकी मानिसहरूलाई कनान देशको शीलोमा छोडेर तिनीहरू आफ्ना देश गिलादतिर लागे। परमप्रभुले मोशाद्वारा आज्ञा गर्नुभएअनुसार तिनीहरूले गिलादको भूमि आफ्ना अधीनमा लिएका थिए।