होशे 9:1-9
होशे 9:1-9 नेपाली नयाँ संशोधित संस्करण (NNRV)
ए इस्राएल, नरमाओ। अरू जाति-जातिहरूझैँ आनन्दले नरमाओ, किनकि तिमी आफ्ना परमेश्वरप्रति अविश्वासी भएका छौ! अन्नको प्रत्येक खलामा वेश्यावृत्तिको ज्याला लिन तिमीलाई मन पर्छ। अन्नका खला र दाखबारीका कोलले मानिसहरूलाई खुवाउनेछैनन्, नयाँ दाखमद्य तिनीहरूका निम्ति अपुग हुनेछ। तिनीहरू परमप्रभुको देशमा बस्नेछैनन्। एफ्राइम मिश्रदेशमा फर्किजानेछ, र अश्शूरमा अशुद्ध खानेकुरा खानेछ। तिनीहरूले परमप्रभुको सामु अर्घको रूपमा दाखमद्य खनाउनेछैनन्, न त तिनीहरूका बलिदानले उहाँ प्रसन्न हुनुहुनेछ। यस्ता बलिदानहरू तिनीहरूका लागि मरेकाहरूका निम्ति शोक गर्नेको रोटीझैँ हुनेछ। ती खाने सबै अशुद्ध हुनेछन्। यस्ता भोजन तिनीहरूका आफ्नै लागि हुनेछ, त्यो परमप्रभुको मन्दिरमा आउनेछैन। तिमीहरूका नियुक्त चाड़हरूका दिन, परमप्रभुका उत्सवका दिनमा तिमीहरू के गर्नेछौ? तिनीहरू सर्वनाशदेखि भागे तापनि मिश्रदेशले तिनीहरूलाई बटुल्नेछ, र मोपका मानिसहरूले तिनीहरूलाई गाड्नेछन्। तिनीहरूका चाँदीको धन-सम्पत्ति काँढ़ाघारीले पुर्नेछ। तिनीहरूका पालहरू काँढ़ाका झाँगहरूले भरिनेछन्। दण्ड दिने दिनहरू नजिकै छन्, प्रतिशोधका दिनहरू आइरहेछन्। इस्राएलले त्यो थाहा पाऊन्। तिम्रा धेरै पाप र ठूलो वैरभावको कारणले तिम्रो लागि अगमवक्ताचाहिँ मूर्ख र आत्माले प्रेरित भएको मानिसचाहिँ बौलाहासरह हुनेछ। अगमवक्ता मेरा परमेश्वरको साथसाथै एफ्राइमको रखवाली गर्ने हो, तापनि त्यसका सबै बाटोमा पासोहरू थापिएका छन्, र त्यसका परमेश्वरको भवनमा त्यसप्रति दुश्मनी छ। गिबाका दिनमा झैँ तिनीहरू आफूले आफैलाई साह्रै भ्रष्ट पारेका छन्। परमेश्वरले तिनीहरूका अधर्मको सम्झना गर्नुहुनेछ। उहाँले तिनीहरूका पापको दण्ड दिनुहुनेछ।
होशे 9:1-9 पवित्र बाइबल, नेपाली समकालीन संस्करण (NCV)
हे इस्राएल, रमाइलो नगर्; अरू राष्ट्रहरूजस्तै हर्षले उत्सव नमना। किनकि तँ आफ्ना परमेश्वरप्रति विश्वासघाती भएको छस्; तैँले हरेक खलामा वेश्यावृत्तिको ज्याला मन पराएको छस्। खला र दाखरसको कोलहरूले मानिसहरूलाई खुवाउने छैनन्; तिनीहरूलाई नयाँ दाखरसको अभाव हुनेछ। तिनीहरू याहवेहको देशमा बस्नेछैनन्; एफ्राइम फेरि इजिप्टतिर फर्कनेछ, र अश्शूरमा अशुद्ध भोजन खानेछ। तिनीहरूले याहवेहकहाँ दाखरसको भेटी चढाउनेछैनन्, न त तिनीहरूका बलिदानहरूले उहाँलाई खुशी तुल्याउनेछ। यस्ता बलिदानहरू तिनीहरूका निम्ति विलाप गर्नेहरूको रोटीजस्ता हुनेछन्; ती रोटी खाने सबै अशुद्ध हुनेछन्। त्यो भोजन तिनीहरूकै भोकको निम्ति मात्र हुनेछ; त्यो याहवेहको मन्दिरमा आउनेछैन। “तेरा निम्ति तोकिएका चाडहरूको दिनमा, याहवेहका चाडका दिनहरूमा, तैँले के गर्नेछस्? यदि तिनीहरू विनाशबाट भागे तापनि इजिप्टले तिनीहरूलाई जम्मा गर्नेछ, र मेम्फिसका मानिसहरूले तिनीहरूलाई गाड्नेछन्। तिनीहरूका चाँदीका भण्डारहरूलाई सिस्नुघारीले छोप्नेछ, र तिनीहरूका पालहरूलाई काँडाघारीले ढाक्नेछ। इस्राएलले यो कुरा थाहा गरोस्, दण्डका दिनहरू आइरहेका छन्; प्रतिशोधका दिनहरू ज्यादै नजिकै छन्। किनभने तेरा पापहरू अति धेरै छन्, तेरो शत्रुता धेरै भएको कारण तैँले अगमवक्तालाई मूर्ख र प्रेरणा पाएको मानिसलाई बौलाहासरह ठान्छस्। अगमवक्ता मेरा परमेश्वरको साथसाथै एफ्राइमको पनि पहरेदार हो; तरै पनि त्यसका सबै बाटोहरूमा त्यसलाई पासो र त्यसका परमेश्वरको भवनमा शत्रुताले पर्खिरहेको हुन्छ। तिनीहरू गेबाका दिनमा जस्तै, भ्रष्टाचारमा चुर्लुम्म डुबेका छन्। परमेश्वरले तिनीहरूको दुष्टता याद गर्नुहुनेछ, र उहाँले तिनीहरूका पापको निम्ति दण्ड दिनुहुनेछ।
होशे 9:1-9 पवित्र बाइबल (NERV)
हे इस्राएल, तिमी अरू देशका मानिसहरूले मनाए जस्तै खुशी नमनाऊ। तिमी खुशी न हौ। किनभने तिमीले आफ्ना परमेश्वरलाई त्यागेर वेश्यावृत्ति गर्न लागेको छौ। तिमीले प्रत्येक खलोमा वेश्यावृत्ति गरेको छौ। किनकि त्यो खेतमा उब्जेको अन्नले इस्राएललाई प्रर्याप्त भोजन दिन सक्दैन। इस्राएलका निम्ति दाखरस पनि प्रर्याप्त छैन। इस्राएलका मानिसहरू परमप्रभुको देशमा बस्ने छैनन्। एप्रैम मिश्रदेशमा फर्किजानेछ। अश्शूरमा उनीहरूले यस्तो खाना खाने छन् जुन खाना उनीहरूले नखानु पर्नेथियो। इस्राएलका मानिसहरूले परमप्रभुलाई अर्धको रूपमा दाखरस चढाउने छैनन्। न त उनीहरूले बलि नै चढाउँन पाउनेछन्। यो बलिदान उनीहरूको निम्ति मरेकाहरूका निम्ति शोक गर्ने रोटी जस्तै हुनेछ। त्यो खानेहरू सबै अशुद्ध हुनेछन्। परमप्रभुको मन्दिरमा उनीहरूको त्यो रोटी जान पाउँदैन। उनीहरूसँग त्यति मात्र रोटी हुन्छ जसले उनीहरू मात्र जीवित रहन सक्छन्। परमप्रभुको पवित्र महा-सभाको दिन अनि परमप्रभुको चाड मनाउँदा तिमी के गर्न जाँदैछौ? इस्राएलीहरू पूर्ण रूपले नष्ट हुने डरले भाग्नेछन्, तर मिश्रदेशले तिनीहरूलाई बटुल्नेछ। अनि मोपका मानिसहरूले तिनीहरूलाई गाड्नेछन्। तिनीहरूको बहुमूल्य चाँदीका वस्तुहरूको वरिपरि झारपात उम्रनेछ। तिनीहरूका पालहरूमा काँढा उम्रनेछ। अगमवक्ता भन्छन्, “हे इस्राएल यो कुराहरूलाई बुझि राख, दण्ड दिने समय आएको छ। जुन नराम्रो कामहरू तिमीले गरेको छौ त्यसको भोग गर्ने समय आएको छ।” किनकि इस्राएलीहरू भन्छन्, “अगमवक्ता मूर्ख छ र परमेश्वरको आत्मा भएको मानिस चाँहि बौलाह सरह छ।” अगमवक्ता भन्छन्, “तिम्रो नराम्रो कामको लागि तिमीलाई दण्ड दिइनेछ। तिम्रो धृणित कामको निम्ति तिमीलाई दण्ड दिइनेछ।” परमेश्वर र अगमवक्ताको प्रजामाथिबाट एप्रैमको रखवाली गर्ने हो। किनकि उसको सबै बाटोमा शिकारी पासो थापिएकोछ, अनि उसको परमेश्वरको भवनमा त्यसप्रति दुश्मनी छ। गिबाका दिनमा झैं तिनीहरू आफैंले आफैंलाई साहै भ्रष्ट पारेकाछन्। परमप्रभुले इस्राएलीहरूको पापको सम्झना गर्दै तिनीहरूको पापकोलागि दण्ड दिनुहुन्छ।
होशे 9:1-9 सरल नेपाली पवित्र बाइबल (सरल नेपाली)
हे इस्राएलका मानिसहरू हो, तिमीहरूले मूर्तिपूजकहरूले जस्तै चाडहरू मनाउन छोड। तिमीहरू आफ्ना परमेश्वरबाट तर्की गएका छौ र उहाँसित विश्वासघात गरेका छौ। वेश्याहरूझैँ तिमीहरूले देशभरि आफूलाई बाल देवताका हातमा बेचिसकेका छौ र त्यसले दाम तिरी किनेको अन्न भन्ठानी त्यसलाई तिमीहरूले प्रेम गर्छौ। तर अब चाँडै यस्तो समय आउनेछ, तिमीहरूलाई अन्न र जैतुनको तेल पुग्दो हुनेछैन र एक थोपा दाखमद्य पनि पाउनेछैनौ। इस्राएलका बासिन्दाहरू परमप्रभुको देशमा बसोबास गर्नेछैनन्। तर तिनीहरू मिश्रमा फर्की जानुपर्नेछ र अश्शूर देशमा अशुद्ध खाना खानुपर्नेछ। तिनीहरूले विदेशी भूमिमा परमप्रभुलाई दाखमद्य र अन्य बलिहरू चढाउन सक्नेछैनन्। तिनीहरूका भोजन खाने हरेक मानिस अशुद्ध हुनेछ। त्यो मलामीलाई दिइएको मृत्यु-भोज जस्तो हुनेछ। त्यो भोक मेट्नलाई मात्र चलाइनेछ, त्यसबाट कति पनि परमप्रभुको मन्दिरमा भेटी चढाउन लगिनेछैन। अनि परमप्रभुको सम्मान्मा तोकिएका चाडको समय आएपछि तिनीहरूले के गर्लान्? जब विपद् आइलाग्छ र मानिसहरू छरपष्ट हुनेछन्, तब मिश्रीहरूले तिनीहरूका लाश बटुलेर नोपमा गाड्नेछन्। तिनीहरूका चाँदीका बहुमूल्य वस्तुहरू र घर बनाइएका जग्गाहरू सिस्नुघारी र बेकामका झार-पातले भरिनेछन्। दण्डको समय आइपुग्यो। मानिसले के पाउनुपर्छ त्यो समय आयो। यी कुराहरू इस्राएलले थाहा पाउनेछ। तिमीहरू भन्छौ, “यो अगमवक्ता मूर्ख छ। त्यो प्रेरित पागल हो।” तिमीहरूको पाप ठूलो भएकोले तिमीहरू मलाई ज्यादै घृणा गर्छौ। परमेश्वरले, आफ्ना प्रजा इस्राएललाई चेतावनी दिन मलाई अगमवक्ता बनाएर पठाउनुभयो। तरै पनि जहाँ म जाँदछु, त्यहाँ तिमीहरू चरालाई झैँ मलाई पासोमा पार्न चेष्टा गर्दछौ। आफ्नै परमेश्वरको मन्दिरमा पनि मानिसहरू अगमवक्ताका शत्रु भएका छन्। तिनीहरूका काम औधी खराब छन्, गिबामा झैँ तिनीहरू साह्रै भ्रष्ट भएका छन्। परमेश्वरले तिनीहरूका पापको सम्झना गर्दै तिनीहरूलाई दण्ड दिनुहुनेछ।