हिब्रू 1:5-9
हिब्रू 1:5-9 नेपाली नयाँ संशोधित संस्करण (NNRV)
“तिमी मेरा पुत्र हौ, मैले नै आज तिमीलाई जन्माएको छु” भनी के कुनै स्वर्गदूतलाई परमेश्वरले कहिल्यै भन्नुभयो? र फेरि, “म तिनका पिता हुनेछु, र तिनी मेरा पुत्र हुनेछन्” भनी कुनै स्वर्गदूतलाई कहिल्यै भन्नुभयो? आफ्नो प्रथम जन्मेकालाई संसारमा ल्याउनुहुँदा उहाँ फेरि भन्नुहुन्छ, “परमेश्वरका सारा स्वर्गदूतहरूले उहाँलाई नै पुजून्।” स्वर्गदूतका विषयमा उहाँ भन्नुहुन्छ, “उहाँले आफ्ना स्वर्गदूतहरूलाई बतास र आफ्ना दासहरूलाई आगोको ज्वाला तुल्याउनुहुन्छ।” तर पुत्रको विषयमा चाहिँ उहाँ भन्नुहुन्छ, “हे परमेश्वर, तपाईंको सिंहासन सदासर्वदाको निम्ति रहिरहन्छ, र न्यायको राजदण्ड तपाईंका राज्यको राजदण्ड हो। तपाईंले धार्मिकतालाई प्रेम गर्नुभएको छ, र अधर्मलाई घृणा गर्नुभएको छ। यसकारण परमेश्वर, तपाईंका परमेश्वरले तपाईंलाई आफ्ना साथीहरूभन्दा बढ्ता गरेर हर्षको तेलले अभिषेक गर्नुभएको छ।”
हिब्रू 1:5-9 पवित्र बाइबल, नेपाली समकालीन संस्करण (NCV)
स्वर्गदूतहरूमध्ये कसलाई चाहिँ परमेश्वरले कहिल्यै यसो भन्नुभयो: “तिमी मेरा पुत्र हौ, आज म तिम्रो पिता भएको छु?” अथवा फेरि, “म तिनका पिता हुनेछु, र तिनी मेरा पुत्र हुनेछन्?” परमेश्वरले आफ्ना प्रथम जन्मेकालाई संसारमा फेरि ल्याउनुहुँदा उहाँ भन्नुहुन्छ, “परमेश्वरका सारा स्वर्गदूतहरूले उहाँको आराधना गरून्।” स्वर्गदूतहरूका विषयमा उहाँ भन्नुहुन्छ, “उहाँले आफ्ना स्वर्गदूतहरूलाई बतास, र आफ्ना सेवकहरूलाई आगोको ज्वाला बनाउनुहुन्छ।” तर पुत्रको विषयमा उहाँ भन्नुहुन्छ, “हे परमेश्वर, तपाईंको सिंहासन सदाको निम्ति रहनेछ; तपाईंको राज्यको राजदण्ड न्यायको राजदण्ड हुनेछ। तपाईंले धार्मिकतालाई प्रेम र दुष्टतालाई घृणा गर्नुभयो; यसकारण परमेश्वर, तपाईंका परमेश्वरले तपाईंलाई तपाईंका सङ्गीहरूभन्दा उच्च पार्नुभएको छ र हर्षको तेलले अभिषेक गर्नुभएको छ।”
हिब्रू 1:5-9 पवित्र बाइबल (NERV)
परमेश्वरले यी कुरा कुनै पनि स्वर्गदूतहरूलाई भन्नुभएको थिएन: “तिमी मेरा पुत्र हौ, आज म तिम्रो पिता बनेको छु।” उहाँले कुनै स्वर्गदूतलाई यो कुरो भन्नु भएन, “म तिनका पिता बन्नेछु र तिनी मेरा पुत्र बन्नेछन्।” अनि जब परमेश्वरले आफ्नो पहिलो पुत्रलाई यस संसारमा चिनाउनुहुन्छ, उहाँ भन्नुहुन्छ, “परमेश्वरका सारा स्वर्गदूतहरूले उहाँलाई आराधना गरून्।” स्वर्गदूतहरूको बारेमा परमेश्वर भन्नुहुन्छ: “परमेश्वरले आफ्ना स्वर्गदूतहरूलाई बतास जस्तो बनाउनुभयो, अनि आफ्ना दासहरूलाई आगोको ज्वाला जस्तो बनाउनुभयो।” तर आफ्ना पुत्रको बारेमा परमेश्वरले भन्नुभयो: “हे परमेश्वर, तपाईंको सिंहासन सदा सर्वदा रहिरहने छ। न्यायपूर्वक तपाईंले आफ्नो राज्य चलाउनु हुनेछ। तपाईंले धार्मिकतालाई प्रेम गर्नुहुन्छ अनि दुष्टतालाई घृणा गर्नुहुन्छ, त्यसैले हे परमेश्वर, तपाईंका परमेश्वरले तपाईंलाई, तपाईंका साथीहरूलाई दिएको भन्दा महान आनन्द दिनु भएको छ।”
हिब्रू 1:5-9 सरल नेपाली पवित्र बाइबल (सरल नेपाली)
परमेश्वरले कुनै स्वर्गदूतलाई यसो भन्नुभएन, “तिमी मेरा पुत्र हौ, आज मैले तिमीलाई जन्माएको छु।” फेरि के कुनै स्वर्गदूतको बारेमा यसरी भन्नुभएको छ र, “म तिनका पिता हुनेछु, तिनी मेरा पुत्र हुनेछन्।” परमेश्वरले आफ्ना प्रथम जन्मेकालाई पृथ्वीमा पठाउनुहुँदा भन्नुहुन्छ, “मेरा सबै स्वर्गदूतहरूले उनलाई पुजून्।” स्वर्गदूतहरूका बारेमा चाहिँ यसरी भनिएको छ, “परमेश्वरले आफ्ना स्वर्गदूतहरूलाई बतास बनाउनुहुन्छ। अनि आफ्ना काम गर्नेहरूलाई आगोका ज्वाला बनाउनुहुन्छ।” तर पुत्रको बारेमा परमेश्वर भन्नुहुन्छ, “हे परमेश्वर, तपाईंको राज्य सधैँभरि रहनेछ। तपाईंले न्यायसँग राज्य गर्नुहुन्छ। ठीक कुरा तपाईं मन पराउनुहुन्छ र झूटो कुरालाई तपाईंले घृणा गर्नुहुन्छ। त्यसैकारण परमेश्वरले, अँ, तपाईंका परमेश्वरले तपाईंलाई छान्नुभयो अनि तपाईंका साथीहरूभन्दा कता हो कता बढ्ता सम्मानको आनन्द तपाईंलाई दिनुभयो।”