He Ekeny Gál Alb Fimiká 9
9
Sáwul hát Yíésu iiy yieká
1Bár kinaal Sáwul lali Máá Guđoká ˈgíérích he ki maanyjasuoká hátlé hol gaa ˈgeˈgedhe-, af tune-, kieye, Gálallá afo yú ki beđita, yegieká. Aaléka máá méte suoryoká ˈdú sedhe, 2mú yiete, giri muí warˈgasam ki vereno-, warˈgasam egeet-, warˈgasam ény ˈdiiyiminy ˈDamaskaská ˈdú egeetká. Warˈgasam kinaallá in mú fargogínt shigie, giri gál yaab yíekaʼ, gál ˈdiet yíekaʼ, giri Yíésu iiy yie-, gaalí Gál ˈGierichká yegieká muí kí ˈgiiliˈgaw-, gáál muí Yerúsalem ká sisidhoká.
3Aalé Sáwul warˈgasam shuunne, sedhe. Mu sienylé gaa igire-, ˈjien ˈDamaskas kí ˈjobondheká, toomareka edhum úr yé gáá ˈdie, hí ˈdinnam lulle gaa veere. 4Mu đo le ˈdoy, ˈdéé hót hí geđicheká maale, ˈdéé hót kieye, Sáwul, Sáwul, háteka kó ye maanyjasichóol? ˈdéé hót hí chie. 5Aalé Sáwul kieye, Máá Guđóóllo, kuun mááya? yie. ˈDéé hót kieye, Yú he Yíésu giri kuun hí maanyjasichóóllá. 6Le gaa keʼ, é mé naʼ, hé ekemeychoká ény kinaallá ha gaalí ko gaa geđia, ˈdéé hót hí mú chie.
7Aalé gál Sáwul hol ˈgieká birge, he af ˈdabe, ˈdéé hót kinaallá tákáma he maale, gaal hé máá níínní argeká mán. 8Aalé Sáwul le gaa kie, in fuoreká biiy má gaa argo. Gaal mú gíl mé chiˈde, mú ˈDamáskas ˈdú eedhdhe. 9Mu kulich seđ in gaa ˈdabe, hé hé geere ma kôny, kor úba hé hé imi ma îny.
10Aalé mú tikiˈd máá lali Yiesu-, gaalí Ananías yegie mare ˈDamáskaso úba he gaa ije. Máá kinaallá hát amadhyoká Máá Guđoká hí vie, mu kieye, Ananías! muí yie. Aalé Ananías vedhdhe, kieye, Wuoy! Yú hállá, Máá Guđo, yie. 11Máá Guđoká mú geey, kieye, Keʼ, ény ˈgíéríchle gaalí ˈGíérích Lođuđugul Yaalká yegetallá nú, máá ˈjien Tarsos giri Sáwul léká ˈbíl Yuuˈdas álle gaa yíéso. Mu hé ál kinaallá gaa ijo, ye vivisat. 12Mu visanlé kinaallá máá gaalí Ananías yegetká hí ˈdu gáá yiimet-, hí gil ˈdú fuo-, mu geđi biiy gaa aargiroká hé gaa arge, Máá Guđoká hí yie.
13Aalé Ananías mú ˈdéé hol ˈdú nie, kieye, Máá Guđo, gál burnayká máá kinaallá hé ˈdeđew-, muí gál kua Yerúsalem gaa ijoká ki eekemeyká he ye fayamle shie. 14Aalé káána mu ˈDamáskas ka yimíéllá mú gál guguđo-, suoryoká hí ali gáá kaay, giri mu gáláát lullé ko vivisatká ˈgiiliˈgawká, Ananías hí yie. 15Aalé Máá Guđoká mú geey, kieye, Mú ˈdú sí, mu íín he faˈd chia yú galay-, meenychú gál kaansúoká, ubaa kidhlé, tá gál Yisirayel lulle mamalsuoká. 16Mú aalé ˈdaa meenychú ˈdugaka hé burnay-, il hí mú aargiˈdoká mú ha yú aargisia, Máá Guđoká hí yie.
17Aalé Ananías kie, Sáwul ˈdú sedhe. Mu ˈbíl Sáwul hí gaa ijeká hile, mú gil iifie, kieye, Nyárchia Sáwul, Máá Guđo Yíésu giri kúún ˈgierich gaa igiˈdeká ko yé ˈdu gáá ˈdieká yú ko ye ali ˈdu gáá kaay, giri kúún geđi biiy gaa aargiˈdo-, Hím Naasan Waaˈgiet ko higilloká, Ananías hí mú yie. 18Ál tikiˈde kinaallá hé béé hinych ki ég mare đo Sáwul in gáá okoˈde, mu geđi biiy gaa arge. Mu đo les gaa kie, gaalí bie gim nie. 19Aalé mú gaalí hé geere shie, mú gon hí hol ká naate.
Sáwul ˈdeeny Waaˈgiet ˈDamáskas gálaat gaa onisie
Sáwul ˈDamáskas ram gaa rafe, gál Yíésu iiy yie-, láli-, ál kinaal gaa ijeká hol af yíéđie. 20Mu af kinaal đo ény ˈdiiyiminyká gerle Yíésu hát he Iny Waaˈgietká gaa ˈdiiyime. 21Gál mú af maaleká lulle he af ˈdabe, hol heegete, kieye, Hééllá hé máá Yerúsalem álléétí gál máá Yíésu léél viviteká yegieská muunîny? Mu káána hé ˈgíérích tikiˈde he gáál ki ˈgiiliˈgaw-, gáál gál guguđo-, suoryoká ˈdú egeetká ál ma kí yímen? gaalí yie. 22Aalé Sáwul he onisinyle súm fargogoyye, mu Yíésu hát he Messíyaká#9:22 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. gáál Warˈgat Waaˈgiet gaa argisie, gáál eiy ki nie. Gál Yuuˈdi ˈDamáskas gaa ijeká ˈdeeny mú hol ˈdú nannieká ˈdabe.
23Aalé rám ilishká ˈgiteká gál Yuuˈdi kinaal hol af ká yíéđie, ˈgíérích he Sáwul ki yegeská hol geey. 24Aalé Sáwul ooslé gaalí hol geđieká hemle gaalí ki buraay. Gál mú oosle hol geđie kinaal kulich ubaa chúúrélle é karanollée he af higile, giri mú yegeská. 25Chúúre tikiˈd Sáwul gállé ˈdeeny Yiesu onisieká hí eedhdhe. Gaal mú kulidh guđo-, ongʼolich ká taal mare gaa kaay, mú đír ˈdér gaalí é ki madie mare állé il ˈgayyo mare gaalí ki leesie, gaalí đír sug ˈdaatí koy.
Sáwul Yerúsalem hol ˈdú nadhe
26Sáwul Yerúsalem hol ˈdú nadheká mu gál láliká hurt higileká he fede. Aalé gál láliká mu hát máá laliká hé iiy ma yéen, gaal mú kiadhe. 27Aalé Barnábas Sáwul eedhdhe, mú gál alb fimiká ˈdú eey. Mu Sáwul hát he ˈgierich gaa igire-, Máá Guđoká arge-, tá Máá Guđoká hí geeyká gáál geey. Mu ˈDamáskas álle Sáwul hát nyaalimiká meeny Yiesu gáál ki ˈdiiyimeká úba gáál geey.
28Aalé Sáwul gál alb fimiká hol af yíéđie, ˈjien Yerusalem lulle gaa sedhe, Máá Guđo Yíésu meenyle hát nyaalimiká ˈdiiyime. 29Sáwul gál Yuuˈdi af Hellen onnoy mare hol geey, hol ki falme. Kor gál kinaal íín ˈgíérích mú ki yegieská he hol gaa ˈgeˈgedhe. 30Gál Yíésu iiy yieká yaalmitéél argeká, gaal Sáwul Kaisária eey, mú ˈjien Tarsos ali ˈdú kaay.
31Aalé af kinaal gál Kiristo lés Yuuˈdia ubaa lés Galilaaya tá lés Samaria gaa ijeká lulle hím a níínni mare nie. Gaal Hím Naasan Waaˈgiet hí fargogonoyche, mú ˈdúˈjímle gaa yíéđie, Máá Guđoká a maale, met gaa keekeme, úba heere.
Bétiro Lúúˈda ubaa Yóóba hé gáál af ˈdaˈdabsieká gaa ekey
32Aalé Bétiro sienylé hol gaa sesemeká, mu kulich tikiˈd gál Yíésu iiy yie-, Lúúˈda gaa ijeká ˈdú sedhe, gáál af kí ˈdie. 33Ál kinaal mu máá gaalí Enías yegie-, héljo-, warram síet lokodo ˈdú iife mare arge. 34Bétiro mú geey, kieye, Enías, Yiesu Kirísto hé ko bisie, le gaa keʼ, lokoˈdkú máro, yie. Ál tikiˈde kinaal Enías đo midhandhe, les gaa kie. 35Aalé gál Lúúˈda ubaa Sáron gaa ijeká lulle Enías argeká, Máá Guđoká iiy yie.
36Aalé Yóóba álle min lali Yiesu-, gaalí Tabídha yegie mare hí gaa iđe. Min meenylé kinaallá af gál Hellenka ˈDórkaso gaalí yeedhe. (Tabídha tá ubaa ˈDórkas hélle kieye, Ginte.) Min aadh lulle hé midhabká gálaat ki ekemeyche, gál he maamanká he shigiche. 37Bár kinaal kulich tikiˈd min kulnate, min đo mán chie. Min mán chieká gaalí ˈjie, gaalí ˈbíl ˈdug yiel mare gaa iifie.
38Yóóba hé Lúúˈda ma gaa faganany. Aalé gál Yíésu iiy yie-, láli-, Yóóba gaa ijeká Bétiro hát he Lúúˈda gaa ijeká maaleká, gaal mú gáál naam ali ˈdú fie. Aalé gál gaalí ali fieká sedhe, gaal mú af kí ˈdieká mú geey, kieye, Gillo nyí ko ki efiyye, káde, káánallá kí hol eet, gaalí yie. 39Aalé Bétiro đo kie, gáál hol eedhdhe. Mu ali nyuoreká mú gaalí ˈbíl biiy ˈdug yielká eey.
Aalé mu ˈbíl hileká mú ˈdeg híyes mare lulle hí ki maˈde, ˈdég buoyye, đafaraam ˈDórkas hí tág ki niiyyeká mú aargisiche. 40Aalé Bétiro gáál lulle yíé ˈdeey, les kurram veere, Waag vite. Aalé mu min giri mán chieká bala ˈdú nie, kieye, Tabídha, le gaa keʼ, yie. Aalé min in fuoˈde, Bétiro argiyyeká lođuđul yíéđiyye. 41Bétiro gíl helie, min gíl chiˈde, min les gaa eey. Aalé mu gál Yíésu iiy yieká ubaa ˈdeg híyeská ká vie. Gaal ka yimieká Bétiro min hát luolká gáál argisie, kor gáál min hol ˈdú nie. 42Fayaméél ˈjien Yooba lulle eiy bash ki chie, gál burnayká Máá Guđoká iiy yie.
43Aalé Bétiro ubaa máá issam ubaa lokodo gaa dhudhuˈge-, gaalí Símon yegie mare rám ilishká Yóóba hol a yíéđie.
अहिले सेलेक्ट गरिएको:
He Ekeny Gál Alb Fimiká 9: dsh
हाइलाइट
शेयर गर्नुहोस्
तुलना
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
