मर्कूस 16:1-9

पवित्र विश्रामको दिन बितिसकेपछि त्‍यही बेलुका मरियम मग्‍दलिनी, याकूबकी आमा मरियम र सलोमीले येशूको लाशमा लगाउन सुगन्‍धित तेलहरू किने। भोलिपल्‍ट हप्‍ताको पहिलो दिन बिहानै घाम झुल्‍कँदा तिनीहरू येशूलाई राखिएको चिहानमा गए। बाटोमा जाँदा तिनीहरूले ‘चिहानको मुखमा लगाएको ढुङ्गाचाहिँ कसले हटाइदेला?’ भन्‍दै थिए। तर चिहानमा पुग्‍दा त त्‍यत्रो ठूलो ढुङ्गालाई पनि अघिबाट नै हटाइसकेको रहेछ। तिनीहरूले चिहानभित्र पसेर हेर्दा त्‍यहाँ एक जना सेतो लुगा लगाएको जवान मानिस चिहानको दाहिनेपट्टि बसिरहेको थिए। यो देखेर तिनीहरू तर्सिए। तर ती जवान मानिसले तिनीहरूलाई भने, “नडराओ, तिमीहरू क्रूसमा मारिनुभएको नासरतका येशूलाई खोजिरहेका छौ। तर हेर, येशू यहाँ हुनुहुन्‍न, उहाँ त बिउँतिएर गइसक्‍नुभयो! तिनीहरूले उहाँलाई राखेको ठाउँ यही हो, हेर त! तर अब गएर उहाँका चेलाहरू र खास गरी पत्रुसलाई ‘येशू अघिबाटै गालीलमा गइसक्‍नुभएको छ। उहाँले भन्‍नुभएजस्‍तै तिमीहरूले उहाँलाई त्‍यहीं देख्‍नेछौ’ भनेर भनिदेओ।” त्‍यति बेला तिनीहरू एकदमै अत्‍यास मानेर काम्‍दै चिहानबाट निस्‍केर भागे अनि यसरी डराएका हुनाले तिनीहरूले यो कुरा कसैलाई पनि भनेनन्। येशू आइतवार बिहानै मरेकाबाट बिउँतनुभएपछि सबैभन्दा पहिले मरियम मग्‍दलिनीकहाँ देखा पर्नुभयो। तिनै मरियमबाट उहाँले सात वटा भूत निकाल्‍नुभएको थियो।