Iranian Azeri Bible

او گونلرده قیصر اوغوسطوسدان امر گلدی کی، یر اوزونده اولان نوفوسون ساییسی انجام اولوب دفترلره کچسئن. بو نوفوس ساییسی ائلک نوفوس ساییسی ائدی کی، کرئنئیوسون سورئیه اؤلکه‌سئنده والی اولدوغو زامان باش وردی. و هر کس آدینی دفتره کچئرتمک اوچون اؤز شهرئنه گدئردی.
اونون اوچون یوسئف ده داوودون نسلئندن اولدوغونا گؤره، جلئلئن ناصئره شهرئندن چیخیب، یهودئیه وئلایتئنئن بِیت‌لِحِم چاغیریلان داوود شهرئنه گلدی کی، بویلو اولان آداخلیسی مریمله آدلارینی دفتره کچئرتسئنلر. اورادا اولدوقلاری زامان مریمئن دوغما واختی یتئشدی.
مریم ائلک اوغلونو دوغدو. اونو قونداغا سرئب آخوردا یاتیرتدی. چونکی اونلار اوچون مهمانخانادا یر یوخ ائدی.

او اؤلکه‌ده چوبانلار وار ائدئلر کی، چؤلده یاشاییب سورولرئنی قوروماق اوچون گجه اونلارین کشئیئنی چکئردئلر. ربّئن بئر مله‌یی اونلارین یانیندا ظاهئر اولدو و ربّئن جلالی اونلارین اطرافینی نورلا دولدوردو و اونلاری بؤیوک بئر دهشت بورودو. ملک اونلارا ددی:
«قورخمایین. باخین، من سئزه اله خوش خبر گتئرمئشم کی، هامی مئلّتلری چوخ سوئندئره‌جک. چونکی بو گون داوود شهرئنده سئزئن اوچون بئر قورتاریجی دوغولدو کی، رب مسئحدئر. و سئزه علامت بودور؛ قونداغا سرئلمئش و آخوردا یاتمیش بئر کؤرپه تاپاجاقسینیز.»
بئردن بئره ملکله گؤی لشکرئنئن فوجو گؤروندو. اونلار تارییا حمد اده‌رک دیئردئلر: «لاپ اوجالاردا اولان تارییا عئزّت، یر اوزونده اونون مرحمتی آلتیندا اولان ائنسانلار آراسیندا باریش اولسون.»
ملکلر چوبانلارین یانیندان گؤیه قالخاندان سونرا، اونلار بئربئرلرئنه ددئلر: «گلئن بِیت‌لِحِمه گدک و ربّئن بئزه بئلدئردئیی بو واقئعه‌نی گؤرک.»
چوبانلار تله‌سئک بِیت‌لِحِمه گلدئلر و مریمی، یوسئفی و آخوردا یاتمیش کؤرپه‌نی تاپدیلار. و گؤرَ‌ندن سونرا کؤرپه حاقّیندا اونلارا خبر ورئلن سؤزو یایدیلار. چوبانلارین دانیشیقلارینی اشئدنلرئن هامیسی تعجّوبدن مات قالمیشدی. آمّا مریم بو سؤزلرئن هامیسینی اوره‌یئنده ساخلاییب دوشونوردو. چوبانلار قاییتدیلار و اشئتدئکلری و گؤردوکلری شیلر اوچون تارییا حمد و ثنا ادئردئلر.
سکّئزئنجی گون تامام اولاندا، اوشاغی ختنه اتدئلر و آدینی عئسا قویدولار، او آد کی، ملک اونا آناسینین بطنئنده قویولمامیشدان ورمئشدی.
موسانین شرئعتئنه گؤره، اونلارین طهارت گونلری تامام اولاندان سونرا، یوسئف و مریم اوشاغی اورشلئمه گتئردئلر کی، اونو ربّه تقدئم اتسئنلر. نجه کی، ربّئن شرئعتئنده ده یازیلیب: «ائلک دوغولان هر اوغلان اوشاق گرک ربّه وقف اولونسون.» و ربّئن شرئعتئنده دیئلدئیی کئمی، بئر جوت قومرونو و یا ائکی گؤیرچئن بالاسینی قوربان آدیندا تقدئم اتسئنلر.
او زامان اورشلئمده شمعون آدیندا صالح و دئندار بئر آدام وار ائدی کی، ائسرایئلئن تسلّی تاپاجاغینی گؤزله‌یئردی؛ و موقدّس روح اونون اوستونده ائدی. موقدّس روح اونا قاباقدان بئلدئرمئشدی کی، ربّئن مسئحئنی گؤرمه‌یئنجه اؤلوم اوزونو گؤرمه‌یه‌جک. شمعون روح طرفئندن ائلهاملانیب، معبده گلدی. اوشاغین والئدینی کؤرپه عئسانی ائچه‌ری گتئردئلر کی، اونون حاقّیندا شرئعتئن ددئیی عادته عمل اتسئنلر. شمعون اوشاغی قوجاغینا آلدی و تارییا حمد ادئب ددی:
«ای آغا، وردئیئن سؤزه گؤره،
ائندی بو قولونو صولح ائچئنده مورخّص ات.
چونکی گؤزلرئم سنئن نئجاتینی گؤروب،
او نئجاتی کی، هامی مئلّتلرئن حوضوروندا حاضیرلاییبسان؛
قیری‌یهودئلره آشکار ادن بئر نور،
و سنئن مئلّتئن ائسرایئله بئر جلال.»
اوشاغین آتا و آناسی عئسانین حاقّیندا دیئلن سؤزلردن تعجّوب اتدئلر. شمعون اونلارا خیئر-دوعا ادئب، اوشاغین آناسی مریمه ددی: «باخ، بو کؤرپه ائسرایئلده بئر چوخ آداملارین ییخیلیب قالخماسی اوچون تعیئن اولونوب؛ بئر علامت کی، اونون ضئدّئنه دانیشاجاقلار. سنئن ده جانینی بئر قیلینج پارچالایاجاق. بونلارین هامیسی اوندان اؤتری اولاجاق کی، چوخلارینین اوره‌یئنده‌کی دوشونجه‌لر آشکارا چیخسین.»
آشِر قبئله‌سئندن نبئلئک ادن آنّا دا اورادا ائدی. آنّا فَنوعئلئن قیزی ائدی. آنّا چوخ قوجا ائدی. قیزلیغیندان سونرا یدّی ائل اَری ائله یاشامیشدی و سونراسی دا بو هشتاد دؤرد یاشیناجاق دول قالمیشدی. آنّا معبددن اصلا آیریلماییب، گجه-گوندوز دوعالار و اوروجلارلا اورادا عئبادت ادئردی. او دا اله او ساعات گلئب، تارییا شوکور اتدی و اوشاغین حاقّیندا اورشلئمئن خئلاصینی گؤزله‌ین هامی آداملارلا دانیشدی.
یوسئف و مریم ربّئن شرئعتئنده امر ادئلن هامی شیلری تامام ادندن سونرا جلئله، اؤز شهرلری ناصئره‌یه قاییتدیلار. و اوشاق دا بؤیویوب قووّتله‌نئردی. حئکمتله دولوردو و تارینین فیضی اونون اوستونده ائدی.

عئسانین والئدینی هر ائل پاسخا بایرامیندا اورشلئمه گدئردئلر. عئسانین اون‌ائکی یاشینا چاتدیغی زامان، بایرام عادتئنه گؤره اورشلئمه گتدئلر. بایرام گونلری تامام اولوب اِولرئنه قاییداندا، اوغلان اوشاق عئسا اورشلئمده قالدی. لاکئن والئدینی بوندان بئخبر ائدئلر. اله گومان ادئردئلر کی، او، یولداشلاری ائله گدئر. بئر گونلوک یول گدندن سونرا، اونو قوحوم و تانیشلار آراسیندا آختارماغا باشلادیلار. اونو تاپمایان زامان آختارا-آختارا اورشلئمه قاییتدیلار. اوچ گوندن سونرا اونو معبدده تاپدیلار. او، موعلّئملرئن آراسیندا اوتورموشدو و اونلارا قولاق آسیب، اونلاردان سوآل ادئردی. اونون ددئکلرئنی اشئدن هامی آداملار اونون آنلاق و جاوابلاریندان تعجّوب ادئردئلر. والئدینی اونو گؤرن زامان حیرت اتدئلر. عئسانین آناسی اونا ددی: «اوغلوم، نه اوچون بئزئمله بله رفتار اتدئن؟ آتان و من نئگاران اولوب سنی آختاریردیق؟»
عئسا اونلارا ددی: «منی نه اوچون آختاریردینیز؟ بئلمئردئنئز کی، من گرک آتامین اِوئنده اولوم؟»
لاکئن اونلار عئسانین ددئیی سؤزو باشا دوشمه‌دئلر.
سونرا عئسا اونلارلا یولا دوشوب ناصئره‌یه گتدی. و اونلاردان ائطاعت ادئردی. لاکئن آناسی بو شیلرئن هامیسینی اوره‌یئنده ساخلاییردی. عئسا حئکمت و قامتده بؤیویوردو. هم تاری، هم ده آداملار اوندان چوخ راضی ائدئلر.

सुन्नुहोस् لوقا 2