Gén 1
1
Ri rutikeribel ronojel ri k'o
1Ri pa rutikeribel, ri Dios xuben ri kaj y ri ruwach'ulew. 2Y toq ri ruwach'ulew kan k'a man jun ruchojmilal y kan k'a man jun k'o chuwech, ri q'equ'm rutz'apen ruwi' ronojel ri nimalej taq palou y ri Espíritu richin ri Dios nisilon pa ruwi'.
3Y ri Dios xubij: Tik'oje' saqil; y kan jari' xk'oje' ri saqil. 4Y xutz'et k'a chi ri saqil kan yalan wi utz y xuch'er k'a ri saqil y ri q'equ'm. 5Y chire ri saqil xubij paq'ij, y chire ri q'equ'm xubij chaq'a', y keri' xk'oje' k'a ri chaq'a' y ri paq'ij; y jari' xtz'aqet ri nabey q'ij.
6K'ari' xubij ri Dios: Tik'oje' rukojol ri ya' richin nuch'er-ri' pa ka'i'. 7Y xuben k'a chi xk'oje' rukojolil ri ya', ri k'o pa xulan y ri k'o chikaj. 8Y kaj k'a ri rubi' ri xuya' chire ri rukojolil. Y kere' k'a xtz'aqet ri chaq'a' y ri paq'ij richin ri ruka'n q'ij.
9Y ri Dios xubij chuqa': Xa jun tubana' ri ya' ri k'o chuxe' ri kaj y tiq'alajin-pe ri ruwach'ulew chaqi'j. Y kan keri' k'a xbanatej.
10Y chire ri chaqi'j xubij ruwach'ulew, y chike ri ya' ri xkik'uaj kan ki' xubij palou, y rija' xutz'et k'a chi yalan utz xuben. 11Chirij re' xubij chuqa': Ri ruwach'ulew tiwachin rik'in ronojel ruwech tiko'n, q'ayis ri nuya' ija'tz, che' ri nuya' ruwech achi'el ri rubanikil, xcha' ri Dios. Y kan keri' k'a xbanatej.
12Y ri ruwach'ulew kan xuya' k'a ronojel ruwech tiko'n, rex taq q'ayis ri nikiya' ija'tz achi'el ri kibanik, y che' ri k'o kiwech y rik'in ija'tz, y ri Dios kan yalan utz xutz'et ri xuben. 13Y kere' k'a xtz'aqet ri chaq'a' y ri paq'ij richin ri rox q'ij.
14Y ri Dios xubij k'a: Kek'oje' ri yesaqirisan ri kaj richin ri rukojolil ri paq'ij y ri chaq'a'; y xtik'atzin richin retal ri ik', ri q'ij, y ri juna'. 15Jari' ri xkesaqirisan-pe ri chikaj richin nikiya' saqil chuwech ri ruwach'ulew, xcha' ri Dios. Y kan keri' k'a xbanatej.
16Y xuben k'a ri q'ij y ri ik' ri yeya'on saqil, ri q'ij richin nisaqirisan paq'ij y ri ik' richin nisaqirisan chaq'a' y jari' toq xeruben chuqa' ri ch'umila'. 17Ri q'ij, ri ik' y ri ch'umila' xeruya' ri Dios ri chikaj richin nikiya' ri saqil pa ruwi' re ruwach'ulew, 18richin yesaqirisan paq'ij y chaq'a' y richin nuya' rukojolil ri saqil y ri q'equ'm. Y kan yalan k'a utz xutz'et ri xuben. 19Y kere' k'a xtz'aqet ri chaq'a' y ri paq'ij richin ri rukaj q'ij.
20Y ri Dios xubij: Kan kek'oje' k'a pa ruk'iyal ronojel kiwech chikopi' ri pa taq ya', chuqa' kek'oje' aj-xik' taq chikopi' ri yexik'an pa kaq'iq', xcha'.
21Ri Dios kan xeruben-wi k'a ri nimalej taq chikopi' ri ek'o pa ya' y ri jalajoj kiwech chikopi' ri k'o kaqen y e richin chuqa' ya' y ronojel kiwech aj-xik' taq chikopi'. Y ri Dios kan utz xutz'et. 22Kan xerurtisaj k'a y xubij chike: Kixalan y tinojisaj ri nimalej taq palou; y chuqa' kek'iyer ri aj-xik' taq chikopi' chuwech re ruwach'ulew, xcha'.
23Y kere' xtz'aqet k'a ri chaq'a' y ri paq'ij richin ri ro' q'ij.
24K'ari' ri Dios xch'on chik y xubij: Kek'oje' jalajoj kiwech taq chikopi' richin k'echelaj y ri ye'awajix y ri chikopi' ri e jepejeq, xcha' ri Dios. Y kan keri' k'a xbanatej. 25Ri Dios kan xeruben-wi k'a jalajoj kiwech chikopi', richin k'echelaj y ri jalajoj kiwech chikopi' ri ye'awajix y ri jalajoj kiwech chikopi' ri e jepejeq. Y ri Dios xutz'et chi kan utz wi.
Toq ri Dios xutz'uk ri wineq
26K'ari' xubij ri Dios: Wakami k'a tiqabana' ri wineq kan achi'el ri qabanik roj y ja rija' ri xtik'oje' pa kiwi' ronojel kiwech chikopi', ri ek'o pa ya', ri aj-xik' taq chikopi', ri chikopi' ri ye'awajix, ri chikopi' ri ek'o pa k'echelaj y ri chikopi' ri e jepejeq, xcha'.
27Toq ri Dios xuben ri wineq kan xuben achi'el rubanik rija', chi achij chi ixoq xeruben.
28Y ri Dios kan xerurtisaj y xubij chike: Kixalk'ualan y kixk'iyer y kan tinojisaj k'a ruwech chijun ruwach'ulew y ja rix xkixk'oje' pa kiwi' ri chikopi' ri ek'o pa ya', chikopi' ri yebe pa kaq'iq' y ri chikopi' ri ek'o chuwech re ruwach'ulew, xcha'.
29Y ri Dios xubij chike: Yin ninya' chiwe ronojel ruwech tiko'n richin nitej ri ruwech o nitej ri rija'tz. 30Jak'a chike ronojel kiwech chikopi' ninya' ronojel ruwech q'os richin nikitej: Chike ri aj pa k'echelaj, chike ri aj-xik' taq chikopi' y chike ri e jepejeq taq chikopi', xcha'. Y kan ja na wi ri' ri nikitej.
31Y jare' k'a ri rusamaj ri xuben ri Dios y xutz'et chi ronojel ri xuben kan janila wi utz. Y rik'in ri' xtz'aqet ri chaq'a' y ri paq'ij richin ri ruwaq q'ij.
လက်ရှိရွေးချယ်ထားမှု
Gén 1: KQC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Kaqchikel Bible © Bible Society in Guatemala, 2003.