YouVersion လိုဂို
ရှာရန် အိုင်ကွန်

Lukahtar 1

1
A anglunipe. O angjelo sikavel o bijandipe e Jovanohko, e Krstiteljehko. O angjelo Gavrilo sikavel o bijandipe e Hristohko. E Marija paša e Jelisaveta. E Marijaći ašarimahći gjili. O bijandipe thaj o sunetipe e Jovanohko. E Zarijahko prorokovipe.
1But džene lije te den vorba golehtar so sah thaj so nakhlah paša amende.
2Gadija sar phende amengje gola save dikhleha gova sa thaj save seha e kandine sluge e alavehće.
3Thaj lijem vi me te sićivav sa so ćerdah pe thaj lijem te piši, te ramosarav tuće, paćivale Teofileja, sa po rîndo sar kaj saha.
4Te pindžareh o čačipe gole alavengo save sićilan.
5Ande gola brša kana sah o Irodo thagar, kana sah vov o anglutno ande Judeja, sah varesavo lilvarno, nesavo rašaj katar o rîndo e Avijahko. Lehko anav sah Zarija, a lehće r̄omnjako anav Jelisaveta, savi sah jekh katar e Aronohće čheja.
6A liduj džene seha paša o Del čače odjehće thaj kandena e Devlehće alava ande sa e buća thaj seha bidošengje, bibangjimahće thaj paćamne.
7Thaj naj sah len čhavor̄e, kaj e Jelisaveta sah bičhavor̄engji katar piro ternipe, a von solduj džene phurile.
8Thaj gadija, djive po djive ćerindo bući angla o Del, pe piro rîndo.
9Iklistah vi vov te del andre ande khangjiri te kadi, te ćerel thuv.
10A e manuša savor̄e ačhile avri molindo pe e Devlehće dži kaj vov kadisardah e thuveha.
11Thaj pe jekhvar sikadilo lehće katar o Del jekh angjelo thaj ačhilo pe čači rig katar o oltari, ačhilo čačal kaj o thuv ćerdola.
12A kana dikhlah le o Zarija, lijah le e dar, daraljah.
13A o angjelo phendah lehće: Ma dara, Zarija, o Del ašundah ći molitva thaj ći r̄omni bijanela jekhe murušane čhave, jekhe murušor̄e, a tu thov lehće anav Jovano.
14Thaj kam avel tuće bah̄ thaj vestipe thaj but džene kam veselisajvon lehće bijandimahće.
15Kaj kam avel vov baro angla o Del thaj niči kam pijel ni mol ni aver jagalo pipe, thaj vadžaj ande pe dako por̄ kam pherdinajvol e Svetone Duhoha, e Sumnale Odjeha.
16Thaj vov kam irisarel bute čhaven Izrailjehćeren pe lengje Devlehći rig.
17Thaj vov kam angle džal angla lehte ande Ilijahko odji thaj ande lehko zuralipe. Vov ćerela gadija te pale zavolisajvon thaj te boldinajvon e dada pire ilenca ke pe čhavor̄e, a e bipaćamne te pherdinajvon pale e čače godjaverimaha thaj gadija te lačharel vov e Devlehće e manušen.
18Thaj mothodah o Zarija e angjelohće: Pe sohte kam me gova pindžarav? Me sem phuro, a mrni r̄omni si phuri.
19Thaj dindo svato o angjelo phendah lehće: Me sem o Gavrilo savo ačhav angla o Del, thaj bičhaldino sem te dav tuha vorba thaj te anav tuće gaj veselija.
20Thaj, ake, tu ačheha bivaćarimahko thaj našti kam deh vorba dži ke gov djive dži kaj gova sa niči ćerdol, kaj tu niči paćajan me alavengje save kam pherdinajvon ande piro djive.
21A e manuša ažućarde e Zarija thaj čudisalje pala sohte vov gaći ačhilah ande khangjiri.
22A kana iklistah avri, našti dijah lengje vorba, a von haćarde kaj vareso sikadilo lehće ande khangjiri, thaj vov lijah te ćerel e jakhenca pe lende, kaj ačhilah bi e vorbako.
23Thaj kana ikliste e djivesa lehće bućaće, vov gjelo tar ke piro ćher.
24A kana nakhle gala djivesa, lehći r̄omni, e Jelisaveta, ačhili khamni, thaj garuvela gova pandž čhon vaćarindo.
25Gadija ćerdah mae o Del ande gala djivesa kana dikhlah pe mande, te ikalel man andar o ladžavipe maškar e manuša.
26Thaj ando šovto čhon bičhaldah o Del e angjelo e Gavrilo ande Galilejako foro, po anav Nazareto.
27Ke jekh rakhli savi saha manglini pala jekh manuš savehko anav sah Josifo, a savo sah andar o ćher e Davidohko, a e rakhljako anav sah Marija.
28Kana dijah andre o angjelo late, mothodah laće: Raduvisajvo, tu savi san pherdi e lačhimaha! O Del si tuha, blagoslovime san tu maškar e manušnja.
29A voj, kana dikhlah le, daralji lehće alavehtar thaj niči džanglah savi gav vorba šaj avela.
30Thaj phendah laće o angjelo: Ma dara, Marija, tu arakhlan lačhipe paša o Del.
31Thaj, ake, tu kam ačheh khamni thaj kam bijaneh muršune čhavor̄e, thaj thov lehće anav Isuso.
32Vov kam avel baro thaj kam den le anav o Čhavo e Maj Barederehko, thaj kam del lehće o Del o prestolo, e bešaldi e Davidohći, lehće dadehći.
33Thaj vov kam avel o šorutno, o thagar, ando ćher e Jakovohko, a lehće thagarimahće agor niči kam avel.
34A e Marija mothodah e angjelohće: Sar kam gova avel, kana me niči džanav pala o r̄om.
35Thaj dindo vorba o angjelo phendah laće: O Sveto Duho, o Sumnal Odji, kam avel pe tu thaj o kadar̄ipe e Maj Barederehko kam učhalinarel tu. Pala golehte vi gova so kam bijandol, kam avel sveto, sumnalo, thaj kam den lehće anav o Čhavo e Devlehko.
36Thaj, eke, ći bibi, e Jelisaveta, vi voj ačhili khamni jekhe čhavor̄eha ande piro phuripe, a gava si o šovto čhon laće, pala sajvate dije vorba kaj si bibijanimahći manušni, kaj našti khamnjol.
37Thaj ko Del šaj avel sa so vov phenel.
38A e Marija dijah vorba: Aketalem, e Devlehći kandini. Nek avel mae pe ćo alav. Thaj o angjelo gjelo tar latar.
39A e Marija uštili gov djivesa thaj gjeli tar sigo ande upruni phuv, ande jekh them e Judejako.
40Thaj dijah ando ćher e Zarijahko thaj phučlah pe e Jelisavetaha.
41Thaj kana e Jelisaveta ašundah e Marijaći vorba, ćinosaljo o čhavor̄o ande lako por̄, a e Jelisaveta pherdili e Svetone Odjeha.
42Thaj andar sa o krlo zurale dijah vorba: Blagoslovime san tu maškar e r̄omnja, thaj blagoslovime si vi o čhavor̄o će por̄ehko.
43Thaj katar mae gava, pa te avel mande mrne Devlehći dej.
44Thaj, dikh, kana ašundem ande me kan ći gugljardi vorba, ande mo por̄ o čhavor̄o h̄uklah, ćheldah e dragostimahtar.
45Bah̄tali si goja savi paćaja, kaj kam ćerdol sa gova so o Del phendah laće.
46Thaj vaćardah e Marija: Mrno odji bajrarel, ašarel e Devle.
47Thaj obradujisaljo mrno dji e Devlehće, e spasohće, mrne bah̄taće.
48Kaj dikhlah po ciknjor̄ipe, po h̄arnjor̄ipe pire kandinjako. Kaj, dikh, sa e manuša kam phenen mae kaj putavol mi bah̄.
49Kaj gova savo si baro, ćerdah manca bare buća, ćerdah baripe mandar.
50Thaj lehko lačhipe kam avel golengje savor̄engje save daran lehtar.
51Vov sikadah pire vasteha o zuralipe piro thaj tradijah golen savor̄en save ćerena pe barimahće, barikane ande pire ile.
52Huljardah e zuralen katar e prestolujra, a vazdijah golen save ćerena pe cikne.
53E bokhalen čaljardah e lačhimaha, a e barvalen muklah čučen, nangjen.
54Pomožisardah pire kandine, e Izrailjo, dindo pe godji, reparindo pe, lehće lačhimahtar.
55Sar kaj del vorba amare dadengje, e Avramohće thaj lehće čhavor̄engje, dži ko maj paluvno djive.
56A e Marija bešela laha trin čhon thaj irisaljah palpale ke po ćher.
57A e Jelisavetaće avilah o djive te bijanel, thaj bijandah voj muruše čhavor̄e.
58Thaj ašunde laće ćherutne thaj laće perutne, e pašutne, kaj o Del sikadah piro baro lačhipe pe late thaj pherdile lengje odja vestimaha thaj seha bah̄tale laha.
59Thaj o oh̄toto djive avile te osunetin e murušor̄e, te ćhinen lehći ladžavipni morćhor̄i. Athoska lije te thoven lehće o anav lehće dadehko, e Zarijahko.
60Thaj dindo vorba lehći dej phendah pe gova: Na, nek avel lehko anav Jovano.
61Thaj phende laće: Ande sa ćiro rodo naj khonik te avel gasavo lehko anav.
62Thaj phučle e jakhenca lehće dade, sar vov kamela te thoven lehće anav.
63A vov manglah jekh phaljor̄i thaj ramosardah, pišisardah dindo vorba: Jovano si lehko anav. Thaj saijekh začudisalje, ćerde bare jahka.
64Jekhvarimahtar putaljah lehko muj thaj lehći čhib thaj dijah vorba, ašarindo e Devle.
65Thaj o darape dijah ande lengje perutne, savor̄e, thaj pe sa e upruni Judeja ašundilah sa gova so avilah pe.
66Thaj savor̄e save ašunde, lije gova ande pe ile, dindo vorba: So kam avel gav čhavor̄ehtar, thaj vi e Devlehko va sah leha.
67Thaj o Zarija, lehko dad, pherdilo e Sumnale Odjeha, thaj dijah vorba prorokovindo.
68Te avel blagoslovime o Del e Jakovohko kaj avilah thaj ikaldah pire manušen andar o džungalipe.
69Savo vazdijah amengje o šing e spasohko ando ćher e Davidohko, pire slugahko, kandimahćerehko.
70Sar kaj dijah vorba pire sumnale prorokongje moha katar o anglunipe.
71Kaj kam ikalel amen katar amare džungale dušmaja thaj andar e va e savor̄e golengje, e jakhalengje save našti dikhen amen.
72Kaj kam ćerel lačhipe amare dadengje thaj niči kam bistarel piro sumnalo alav.
73Sar h̄alah sovel, sar thodah sovli amare dadehće, e Avramohće, kaj kam del ame.
74Te ikalah amen andar amare dušmanongje va thaj te kandah le bi e darako.
75Ando sumnalipe thaj čačipe angla lehte dži kaj god sam džuvinde.
76A vi tu, čhavor̄eja, kam aveh pindžardo thaj ašundo sar proroko e Maj Barederehko, kaj tu kam džah angle angla o muj e Devlehko te ćereh lehće o drom.
77Te deh o džanglipe e spasohko lehće manušengje pala lengje grehongo mukipe.
78Po baro lačhipe amare Devlehko pe savo avilo amende o djivesipe, o kham e učimahtar.
79Te strafinisareh, te parnjareh golen save bešen ando mulikano kalipe thaj ando tunjariko, ande merimahći učhalin, thaj te phiraveh amare prne po drom e lačhimahko.
80A o čhavor̄o bajrola thaj zurajvola e godjaha thaj sah ando korkor̄ipe bi nikahko dži gothe, dži kaj niči sikadilo e Izrailjehće.

လက်ရှိရွေးချယ်ထားမှု

Lukahtar 1: GURB1938

အရောင်မှတ်ချက်

မျှဝေရန်

ကူးယူ

None

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

YouVersion သည် သင့်အတွေ့အကြုံကို စိတ်ကြိုက်ပြင်ဆင်ရန် ကွတ်ကီးများကို အသုံးပြုသည်။ ကျွန်ုပ်တို့၏ဝဘ်ဆိုဒ်ကိုအသုံးပြုခြင်းဖြင့် ကျွန်ုပ်တို့၏ ကိုယ်ရေးကိုယ်တာမူဝါဒတွင်ဖော်ပြထားသည့်အတိုင်း ကျွန်ုပ်တို့၏ cookies အသုံးပြုမှုကို သင်လက်ခံပါသည်။