YouVersion လိုဂို
ရှာရန် အိုင်ကွန်

CHABANGCHAM 1

1
Damkhaibo Racham
1Paphibangga, Tingwang niu ting-kadih damsubo tingga,#1.1: Paphibangga....ting-kadih maksai Tingwang niu ting-kadih damsubo tingga. 2Kadih hai palun thiumakjiu khatdi wadi hajiu bamniu-e. Kasuakjiu bambo duinai khuan siniu wahinatu gomnam lujiu tamiuting bamniu-e, siga Tingwang pumtan#1.2: Tingwang hiupuina; maksai Tingwang pumtan; maksai Tingwang khugasu tingkai; maksai kapingbo tingthung chiujiu ariak kasiaga raokhai-e. siniu tadui rigase tadmariu bamniu-e. 3#2 Co 4.6.Siga Tingwang niu chamtan pikhaide, “Kabenbo padmilo” sichiugap kabenbose padmide. 4Sise Tingwang paniu ngaoluboga pachun wimide, Sichiujiu paniu tamiubo gasu kabenbo situ kamtam khai bide. 5Sichiu paniu kabenbo situ “N-nien” khatdi tamiubo situ, “Nchun” kukhaide. Nchun loijiu nsuan padlanbo situ raithubo tingmik kumide.
6-7 # 2 Pe 3.5. Sibosai Tingwang niu chamtan pikhaide, “Tadui situ pabam nia thiujiu njan padmira tingpuk padmilo” siga sichiu padmide. Sichiujiu Tingwang niu tingpuk damkhai lujiu, sibo hangga khatdi sibo lungga taduitu njantam khai mide. 8Paniu tingpuk situ “Tinggen” kukhaide. Nchun loijiu nsuan padlanbo situ paniabo tingmik kumide.
9Sibosai Tingwang niu chamtan pikhaide, “Tingpuk hangga bambo dui hai pabam khatga wang aruang milo, chiujiu rampumgen padmilo” siga sise padmide. 10Paniu rampumgen situ “Kadih” khatdi tadui wang aruangbo situ “Duipui” kukhaide. Khatdi Tingwang paniu ngaoboga palung kimde. 11Sibosai paniu chamtan pikhaide, “Kadihpiriga singbang, chapiubuan hina padmilo khatdi sise pabuan bonjiu pasy masi milo,” siga sise padmide. 12Sijengniu kadihpiri gahai singbang, chapiubuan hina padmide, sise Tingwang paniu ngaoboga palung kim mide. 13Nchun loijiu nsuan padmide, sise pasumbo tingmik mide.
14Sibosai Tingwang niu chamtan pikhaide, “Tingpuk ga kabenbo hai padmilo, sichiujiu nchun nai n-nien situ njantam padlujiu tingmikdung, tingkumdung maksai pating pawan#1.14: Pating pawan: maksai chakhuang changee thiubo wan chiubo-e. silura pawan lenkhailo, 15sichiujiu paliu siniu tingpuk gasu kadihpiriga pabiuse pikhai milo,” siga sise padmide. 16Haichiujiu Tingwang niu di-nkiubo kabenbo nia damkhaijiu naimik siniu n-nientu khatdi chahiu siniu nchuntu mawangra damkhaide; paniu chagandung tudi damkhai bide. 17Paniu kadihpiriga kabenbodung siniu pabiu thaokhai raleng tingpukga pibam khaide. 18Sichiujiu nchun n-nien saomakjiu mawang bamra, tamiubo gasu kabenbo situ kamtam khaide. Khatdi Tingwang niu ngaoboga palung kimde. 19Nchun loijiu nsuan padlande, haise pamadaibo tingmik mide.
20Sibosai Tingwang niu chamtan pikhaide, “Taduiga pijiu karingbo khaoringdung siniu phuimilo, khatdi pijiu tingkai gase thingnadungniu phuimilo”. 21Sichiujiu Tingwang niu duipui gu kadibo khaoringdung khatdi tadui jiuga lungbo khaoring pajat hina khatdi thingna pajat hinatu damkhaide. Khatdi Tingwang paniu sise ngaoboga palung kim mide. 22Paniu paliu mathiutu thoikhaide, sichiujiu tadui jiuga lungbo khaoringdung hinatu king-kajiu duipui gase lungphui mira thoikhai bide, paniu thingnadung hinatudi king-kajiu lungra thoikhai bide. 23Nchun loijiu nsuan padmide, sise pamangiubo tingmik mide.
24Sibosai Tingwang niu chamtan pikhaide, “Kadihpiriga khaoring-khaona jat hina, chaky-khaorui tadi, nkan khaoring tadi, katidi, kadidi pijiu padmilo” siga sise padmide. 25Sichiujiu Tingwang niu wahinatu damkhai lujiu, sise paniu ngaoboga palung kimde.
26 # 1 Co 11.7. Sigasu Tingwang niu dinsude, “Tuhoira aliuniu chamainatu damsune; paliura aliu kumrabo-e khatdi aliu lun luirabo-e, Paliuniu chakha riga, thingna riga khatdi chaky-khaorui tadi nkan khaoring tadi#1.26: Nkan khaoring maksai kadihpiri pakhiangna riga. kati kadi pakhiangna riga pumtan bamrabo-e”. 27#Chab 5.1,2. #Mt 19.4; Mk 10.6.Sichiujiu Tingwang niu chamainatu pakum gapjiu damkhaide. Paniu npiumai khatdi npuimaitu damkhaide.
28Panaitu thoikhaijiu din-e, “Nanai kai-kik kengjiu lunglo, sichiujiu nanai kai-kikdung siniu kadihpiri thinjiu lungrabo-e. Iniu nanaitu wakhao hina riga, thingnadung riga khatdi khaoring-khaona hina riga pumtan bamra pikhaibo-e. 29Iniu nanaileng alin-tara hina khatdi charasy hina tiura pikhaibo-e. 30Chiudi khaoring khaona khatdi thingna hina lengra chapiubuan chaganniwse paliu tatek leng pikhaibo-e” siga sise padmide. 31Tingwang paniu damkhaibo hinatu ngaolujiu palung kimchang kim mide, Nchun loijiu nsuan padlande--sise pacharukbo tingmik mide.

လက်ရှိရွေးချယ်ထားမှု

CHABANGCHAM 1: LIANBSI

အရောင်မှတ်ချက်

မျှဝေရန်

ကူးယူ

None

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

YouVersion သည် သင့်အတွေ့အကြုံကို စိတ်ကြိုက်ပြင်ဆင်ရန် ကွတ်ကီးများကို အသုံးပြုသည်။ ကျွန်ုပ်တို့၏ဝဘ်ဆိုဒ်ကိုအသုံးပြုခြင်းဖြင့် ကျွန်ုပ်တို့၏ ကိုယ်ရေးကိုယ်တာမူဝါဒတွင်ဖော်ပြထားသည့်အတိုင်း ကျွန်ုပ်တို့၏ cookies အသုံးပြုမှုကို သင်လက်ခံပါသည်။