San Mateo 8
8
Ri Jesús xuknaj jun achi o jun yab'il che awas ub'i'
(Mr 1:40-45; Lc 5:12-16)
1Echi' xqaj loq Jesús pujlom un jyub', jwert ik'i nk'aj mnaq itrin chrij. 2O jun achi xok ruk' Jesús, che o jun uyab' peche ch'a'k, awas ub'i'. Xixke' chjuch Jesús, xub'och'ij ujlom, xub'ij che:
—Qajaw, we kaj la, o mow kinknaj la, rech ku'on saq ntz'umal, —xche che.
3Ri Jesús xulik' u'ab', xuchap koq, xub'ij che:
—Kwaj katinknaj. ¡Chatik'chojoq! —xche che.
Xaq ruk' jala xub'ij che, su chanim xel nk'aj awas chrij. Xu'on saq utz'umal, xik'chojik. 4Ri Jesús xutaq b'i nachi, xub'ij b'i che:
—¡Chitampe'! Xaq o mab'ij wi che xatinknaj, xaw jat ruk' un rajchak Dios, jak'tu awib' chjuch rech katurilo che ot chayab'. Chiy'a jun asipnik che, rech kuya re chjuch Dios, jala peche xub'ij kan u Moisés ujer.#Lv 14:1-32. Jare k'utb'alre chikuch mnaq che xatik'chojik. —Jala xub'ij b'i che.
Ri Jesús xuknaj rajchak jun achi tk'al pkijlom nk'aj soldado
(Lc 7:1-10; Jn 4:43-54)
5Echi' xok Jesús chpam tinmit Capernaúm, o jun kjaw soldado kpi chpam un tinmit Roma xo'pan ruk' rech kuta jun utzil che. Ena xub'ij che:
6—Qajaw, o jun wajchak o kan chuja, xa jwert laj yab', skirnaq ch'qap che ub'qil y jwert chaptajnaq rmal u'xom, —xche che.
7Ri Jesús xub'ij che:
—In kimb'e ruk' rech kinknaj, —xche che.
8Nachi che tk'al pkijlom nk'aj soldado xub'ij chik che Jesús:
—Qajaw, tqal taj chwe che kok loq la chiwchoch, per xaq ruk' we kb'ij la che kik'choj un wajchak, re kik'chojik. 9Wit'am che jala k'antjik mal in n'o ptaqnik, soq iy'o soldado pin'ab'. We kimb'ij che jun chke nk'aj soldado: “¡Jat!” kinche che, re k'ek. We kimb'ij che jun chik: “¡Tjusaj!” kinche che, re kpitik. Soq we o su kintaq un wajchak che u'anik, re ku'ono. —Jala xub'ij un kjaw soldado che Jesús.
10Echi' xuta Jesús su ub'im un kjaw soldado, mas xumiyma'. Ena xub'ij chke nk'aj mnaq che itrin chrij:
—Ruk' saqlaj tzij kimb'ij chiwe che ot jun mnaq nirqom chikxo'l nk'aj aj Israel che nim ukojb'al chwij peche ukojb'al nachi ri' che aj Israel taj. 11Kimb'ij chiwe che paja kipin ik'i mnaq. Ik'i mnaq kipi na pusuk'mal jachi kel loq ij, soq ik'i kipi na pusuk'mal jachi kqaj ij. Kunjel kikriq kib' chla' chkaj chpam nim'ij jachi k'wi Qajaw Dios. Kunjel jumpa mnaq iyoknaq chpam utzlaj atb'altzij rech Dios jnam kikriq kib' chla' ruk' u Abraham, rich'il u Isaac, soq rich'il u Jacob rech kiyikb'e' chu mixa, kiwa'ik. 12Per ni nk'aj che kchomam kiyok chla' chkaj ruk' Dios, xa kiyitrix loq chpam jun tzatzlaj qu'm, mal xikkoj t utzij. Chla' k'ut kiyo' na, soq kkiqch'uch'ej uwuke rmal kiwal echi' kikkilo che iyoknaq taj chla' ruk' Qajaw Dios. —Jala xub'ij Jesús chke nk'aj mnaq.
13Tik'ri xub'ij chik Jesús che nachi che tk'al pkijlom nk'aj soldado:
—Jat chawchoch. Kik'choj nawajchak, jala peche xakojo che k'antjik, —xche che.
Ena su chanim xik'choj un rajchak un kjaw soldado.
Ri Jesús xuknaj uji' u Simón
(Mr 1:29-31; Lc 4:38-39)
14Echi' xok Jesús chirchoch u Lu', xurilo che jwert yab' nuji' ixoq u Lu', ktz'ol chu ch'at, o a' chrij. 15Ri Jesús xuchap koq u'ab', ena chanim xel a' chrij. Tik'ri xwa'laj nixoq, xok che uya'ik chke su nmister chke.
Ik'i nk'aj yab' xyuknaj Jesús
(Mr 1:32-34; Lc 4:40-41)
16Echi' xqaj ij, ik'i nk'aj mnaq xikk'am b'i ruk' Jesús che xa o itzel taq espíritu chke, soq rich'il nk'aj chik che xa iyab'. Xaq ruk' jun tzij xub'ij Jesús, xyuresaj nk'aj itzel taq espíritu, soq kunjel jumpa yab' xyuknaj. Ena kunjel xiyik'chojik. 17Jala x'antjik rech k'alnik che Jesús xuk'is u'anik su kilwi utzij che ub'im kan najb'il utzij Dios ujer che Isaías ub'i'. Re xub'ij kanoq:
«Jare Re xuk'am b'ik jumpa yab'il o chqe,
soq jare Re xuresaj jumpa k'ax o chqe», xcha'. (Is 53:4)
Ri Jesús xub'ij che k'ax kutij jun we kitrij chrij Re
(Lc 9:57-60)
18Echi' xuril Jesús che jwert ik'i nk'aj mnaq kistum kib' chrij, xub'ij chke nk'aj udiscípulo:
—Jo kuj'ax b'i ch'qap che nu'ab' mar, —xche chke.
19O jun chke nk'aj ajtojnel rech upxab' Dios xok ruk' Jesús, xub'ij che:
—Ajtojnel, in kwaj kimb'e uk' la runjel jachi taq k'e la chi', —xche che.
20Ri Jesús xub'ij che:
—Nk'aj par o kjul, soq o ksok nk'aj tz'kin, per ni in, nAchi nuK'jol Dios, ot jachi kinkotz'b'a nijlom rech kinwarik. We katpi wuk', kariq na k'ax peche le', —xche che.
21O jun chik chke nk'aj udiscípulo Jesús xub'ij:
—Qajaw, kya la chwe che nab'e kinmqu kan nqaw echi' kkamik, tik'ri kimb'e awuk', —xche che.
22Ri Jesús xub'ij chik che:
—Tjusaj wuk', katitrij chwij. Chiy'a chke mnaq che isachnaq chpam kmak kikmuq nk'aj kkamnaq, —xche che.
Ri Jesús xu'atij nimlaj tew rich'il uchu'ab' mar
(Mr 4:36-41; Lc 8:22-25)
23Ri Jesús rich'il nk'aj udiscípulo jnam xiyok chpam un barco. 24Echi' kiyitjin che kb'e pujlom ja' ti kikna'o xpi jun nimlaj tew pujlom mar. Ena xa'n ja' chkaj, xpitik, kok chpam un barco, per ni Jesús warnaq chik chpam un barco.
25Nk'aj discípulo xiqib' ruk' Jesús, xkik'suj, xikb'ij che:
—Qajaw, chujat'o', mal kuj'ji' chpam mar, —xiche che.
26Ri Jesús xub'ij chke:
—¿Le xa mja kikub'a ik'u'x chwij? ¿Suche che kix'ej iwib'? —xche chke.
Tik'ri xwa'laj Jesús, xuyaj nimlaj tew rich'il ja', xu'atij. Tik'ri xu'xan k'qi' rich'il uchu'ab' mar, runjel xu'xnik.
27Jumpa nk'aj udiscípulo, mas xikmiyma' su xu'on Jesús. Ena xikb'ij chikuch:
—¿Chin lo nachi ri' che kikjon tew chjuch y kikjon nu'ab' mar chjuch? —xicha'.
Ri Jesús xyuknaj keb' achjab' che o itzel taq espíritu chke
(Mr 5:1-20; Lc 8:26-39)
28Echi' xi'ax Jesús ch'qap che nu'ab' mar, xiyo'pan chpam klew aj Gadara. Echi' iy'o chla', iy'o keb' achjab' xiyel loq pkampo santo, jachi kimuq wi kamnaq. Ke xa o itzel taq espíritu chke. Kik'an k'ax chke mnaq, xa rmal ot jun mnaq ku'on kwil k'ax chla'. 29Ri keb' achjab' xiksik'b'aj kib' che Jesús, xikb'ij che:
—¿Su kawaj chqe, at atuK'jol Dios? ¿Le xa atpitnaq che u'anik k'ax chqe? Qo'j mja kuriq ij che k'an k'ax chqe, —xiche che.
30Chla' chkinqaj pnoq, iy'o k'ilaj taq aq kuk'am kib', kiyitjin che utzukxik kecha' chpam 'yes. 31Ena mas xkitz'noj nk'aj itzel che Jesús, xikb'ij:
—We xa kujawesaj b'ik, chujatqa b'i kuk' nk'aj aq. Chiy'a chqe kujok pikpam, —xiche che.
32—Jix chixok pikpam, —xche Jesús chke.
Ena xiyel b'i nk'aj itzel taq espíritu chke nk'aj achjab', xib'e kuk' nk'aj aq, xiyok pikpam. Ena kunjel jumpa nk'aj aq xiyanmjik, xkitrij b'i kib' chuchi' un ch'kilik jyub', xiqaj chpam ja', xiji'ik, xikamik.
33Ni nk'aj ajy'ul aq anim xib'e ptinmit, xiyok che ub'ixik sutaq xkilo, soq xikb'ij sutaq x'an chke keb' achjab' che o itzel taq espíritu chke nab'e. 34Ena kunjel mnaq chpam tinmit xipi ruk' Jesús. Echi' xkil uwuch, xikb'och'ij ujlom Jesús rech kel b'i chla' chpam klew ke.
လက္ရွိေရြးခ်ယ္ထားမွု
San Mateo 8: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global