San Mateo 6
6
Ri Jesús xub'ij su mow k'an che u'anik jun utzil
1»Runjel jumpa utzil ki'ano, xa mitzjoj, xa mi'an chikuch mnaq. We xa jare kiwaj ix che kixkkil mnaq echi' ki'an jun utzil, ot su kri' jun tojb'aliwe kuya iQaw Dios o chla' chkaj.
2»Xa rmal, we kiwaj kito' mnaq chintaq o nmister chke, xa misik'b'aj iwib' che ub'ixik, mal ustaj. Xaw nk'aj mnaq che xa keb' kiplaj jala kik'ano. Jala kik'an ptaq rchoch Dios, soq jala kik'an xo'l taq b'e. Xa jare kkaj ke che koksax k'ij kmal mnaq, pures che jala kik'ano. Per ruk' saqlaj tzij kimb'ij chiwe che ke, ya kik'mom chik tojb'alke. 3Echi' kito' mnaq che o nmister chke, xa mib'ij chke mnaq miskini' iwich'il iwib' kuk'. 4Jare utz we ot chin jun kurit'amaj che kito' mnaq che o nmister chke, peche mow xa rech el'al kito'o. Ri iQaw kurilo runjel jumpa sutaq'ik k'anik che xa rech el'al, y kuya na jun tojb'aliwe.
Ri Jesús xyutjoj nk'aj udiscípulo che u'anik ch'ab'al ruk' Dios
(Lc 11:2-4)
5»Echi' ki'an ich'ab'al ruk' Dios, xa mi'an iwe peche kik'an nk'aj mnaq che xa keb' kiplaj. Ke utz kikkilo kiyitk'e' ptaq rchoch Dios che u'anik kch'ab'al ruk' Dios, soq kiyitk'e' chitaq k'iyb'al che u'anik kch'ab'al ruk' Dios. Xa jare kkaj ke che kb'ix chke che puro isk'um chjuch Dios, pures che jala kik'ano. Per ruk' saqlaj tzij kimb'ij chiwe che ke, ya kik'mom chik tojb'alke. 6Echi' ki'an ich'ab'al ix ruk' Dios, xa chixok pja y kitz'apij uchija, tik'ri ki'an ich'ab'al ruk' iQaw che o iwuk', miskini' kiwil t uwuch. Xa jala' ri iQaw kurilo runjel jumpa sutaq'ik che xa rech el'al, y kuya na jun tojb'aliwe.
7»Echi' ki'an ich'ab'al ruk' Dios, xa mib'ij k'ilaj taq tzij che ot uptan, mal ustaj. Xaw nk'aj mnaq che kikjom t utzij Dios jala kik'ano. Ke jala kik'ano mal jare kikb'ij ke che mas ktatjik, per ktataj t mas. 8Xa mi'an iwe peche kik'an ke, mal iQaw rit'am chik su nmister chiwe echi' mja kita che. 9Echi' ki'an ich'ab'al ruk' Dios, nmister che jawa ki'an che ri':
“QaQaw o la chla' chkaj,
choksax ij la.
10Chpit b'a ri utzlaj atb'altzij la
chi' chikxo'l mnaq.
Jaretb'a ri sutaq'ik kaj la,
k'antaj chi' chuchlew,
jala peche k'antaj chla' chkaj.
11Y'a la chqe jumpa qawa ku'on nmister chqe rech runjel ij.
12Kyu la qamak,
jala peche kqa'an qo'j, kqakuy kmak
kunjel jumpa kinom k'ax chqe.
13Xa mya la chqe kujtzaq chpam mak,
xani chuj'esaj la
pu'ab' nitzel,
mal ech la ri nim atb'altzij,
rich'il runjel jumpa chu'ab',
rich'il unmirsaxik ij la,
runjel jumpa uwu ijsaq.
Amén”.#6:13 O nk'aj ujer taq wuj rech Tyox Wuj manuscrito kb'ix che, che tz'ib'tal taj mal ech la ri nim atb'altzij, rich'il runjel jumpa chu'ab', rich'il unmirsaxik ij la, runjel jumpa uwu ijsaq. Amén chpam.
Jala kib'ij ti kixch'aw ruk' Dios», xche Jesús chke.
14Tik'ri xub'ij chik chke: «We kikuy kmak mnaq ix, soq kukuy imak ix iQaw o chla' chkaj. 15Per we kikuy t kmak mnaq ix, soq mowni kukuy imak ix iQaw Dios».#Mr 11:25-26. Jala xub'ij Jesús chke nk'aj udiscípulo.
Ri Jesús xub'ij su mow k'an che u'anik ayuno
16Ri Jesús xub'ij chik: «Echi' kich'ij inumik rech ki'an ich'ab'al ruk' Dios, ayuno kb'ix che, xa mi'an che iplaj che xa kib'sonik, mal xaw nk'aj mnaq che xa keb' kiplaj jala kik'ano. Ke kik'an che kiplaj che xa kib'sonik, rech k'aljan chke che kikch'ij knumik. Per ruk' saqlaj tzij kimb'ij chiwe che ke, ya kik'mom chik tojb'alke. 17Echi' kich'ij inumik ix rech ki'an ich'ab'al ruk' Dios, chixya iwi' y kich'aj iplaj. 18Rech jala' kikkil taj mnaq chiwe we kixtjinik kich'ij inumik rech ki'an ich'ab'al ruk' iQaw Dios, rech jala' xaw Re kurilo, che k'aljan taj jachi k'wi. Per Re kuya na tojb'aliwe mal kurilo runjel jumpa sutaq'ik k'antjik che xa rech el'al». Jala xub'ij Jesús.
Jarewa ri b'oymal o chla' chkaj
(Lc 12:33-34; 11:34-36; 16:13)
19Ri Jesús xub'ij chik: «Xa mimol ub'itaqiwe chi' chuchlew che kixu'on b'yom rmal, mal xa kpok'rik, xa kipsurik soq xa kikkel'aj nk'aj el'om. 20Mas utz che jare kimol ib'oymal chla' chkaj, mal chla' ot su kok ruk' che ku'on k'ax che, kpok'ar taj, soq kipsur taj, y soq ot jun el'om kikunik kurel'aj. 21Chna'taj chiwe che chla' jachi k'wi ib'oymal, soq chla' b'enaq wi ik'u'x.
22»Nuwuch jun mnaq xaq jnam ruk' peche jtzuk' chaj kitluwik kuya saq. Jare nuwuch jun kuya saq chjuch. We utz unom iwuch, runjel saq o iwuk', psaq ixk'wi. 23Per we ustaj unom awuch, xa pqu'm ixk'wi. We xa chupnoq un chaj che o iwuk', xa chpam jun tzatzlaj qu'm ixk'wi.
24»Ot jun kikunik ku'on keb' che upatrón, mal we xa jala ku'ono, xa jun k'ax uk'u'x che, nun chik xa tzel kurilo. Xa jun, utz u'anik ku'on che uchak, nun chik kikjon t mas chwu'ab'. Soq jala' ot mow kiya iwib' che u'anik uchak Qajaw Dios, we xa jare b'enaq ik'u'x ruk' irjil.
Ri Dios kyuchjij ralk'al
(Lc 12:22-34)
25»Xa rmal, kimb'ij chiwe che xaq m'e ik'u'x ruk' ik'asnmal chi' chuchlew, xaq mixb'son sutaq kitijo rech kitzuq iwib'. Xaq mixb'son ruk' iwitz'yaq kikojo. ¿Le xa jare t k'ut ik'asnmal mas nim reqlem chjuch su kitijo rech kitzuq iwib' ruk'? ¿Le xa jare t k'ut icuerpo mas nim reqlem chjuch iwitz'yaq? Qtzij che ri ik'asnmal mas nim reqlem chjuch su kitijo, soq jala icuerpo mas nim reqlem chjuch iwitz'yaq. 26Chiwlampe taq tz'kin kiyixk'in chkaj: ke ot tiko'n kiktiko, mowni kikkol uwuch ktiko'n chpam uk'olb'al. Per NiQaw o chla' chkaj kyutzuqu. Ni ix jare mas nim iweqlem chikuch nk'aj tz'kin. 27We o jun chiwi'x che mas kub'soj uk'asnmal mal jare kraj Re kik'se' na ch'in chik, kikun taj, miskini' jala ku'ono.
28»¿Suche mas kixb'sonik xa ruk' che ot iwitz'yaq? Chikjo retal su kik'an taq kotz'i'j, ti kik'iy loq chutaq jyub'. Ke kiyichkun taj mowni kik'an kitz'yaq, per jwert laj utz kika'yik. 29In kimb'ij chiwe: o jun achi ujer mas nim reqle'n, jare re rey Salomón. Re xukoj utzlaj taq atz'yaq che mas utz ka'yik. Per miskini' jala xu'ono, mas utz na ka'y taq kotz'i'j chjuch ritz'yaq re xukojo. 30Ri Dios, peche mow kukoj utzlaj taq kitz'yaq chkij taq kotz'i'j kiriqtaj ptaq 'yes, che xaw pwa'ij iy'o chutaq jyub', ni chwe'q xa kti' p'a'. We jala ku'on chke taq kotz'i'j, xa pyor b'ari ku'on chiwe ix iximnaq. Kuya k'ut chiwe su nmister chiwe, mal mas kixuchjij ix chikuch taq kotz'i'j. ¡Per ix ot mas ikojb'al ruk' Dios! 31Xa mib'soj, xa mib'ij wari': “¿Su lo kqatij che qawa, su lo kqatij che qami'na', jachi lo kqama qitz'yaq chi'?” Jala taj kib'ij chiwuch. 32Ni nk'aj chik mnaq iy'o chi' chuchlew che kiyikjon taj chjuch Dios, xa jare o chrij kk'u'x runjel jumpa sutaq ile'. Xani mib'soj ix, mal rit'am chik iQaw chla' chkaj su nmister chiwe. 33Per xani nmister che kiya iwib' che utzlaj atb'altzij rech Dios, rech ki'ano sutaq kub'ij chiwe. We kiya iwib' pu'ab' Re, tik'ri kuya na chiwe runjel jumpa nmister chiwe. 34Xa mib'soj su kiriq na chwe'q, mal chpam un ij chwe'q o na ri k'ax ruk'am loq. Xa jala' ot uk'isik, mal runjel ij jaljoj uwuch k'ax ruk'am loq». Jala xub'ij ri Jesús chke nk'aj udiscípulo.
လက္ရွိေရြးခ်ယ္ထားမွု
San Mateo 6: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global