San Lucas 20
20
Ri Jesús o atb'altzij pu'ab'
(Mt 21:23-27; Mr 11:27-33)
1Chpam jun ij, kitjin Jesús che ktojxik mnaq chuja che nimlaj rchoch Dios. Soq kitjin che ub'ixik utzlaj taq rson chrij Qajaw echi' xiyo'pan ntachjab' ruk'. Ke jare nk'aj ajk'mal b'e chke rajchak Dios, rich'il nk'aj ajtojnel rech upxab' Dios, soq rich'il nk'aj chik ajk'mal b'e chke iyaj Israel. 2Ena xikta che, xikb'ij:
—Chb'ij chqe, ¿jachir pitnaq atb'altzij o pa'ab' che jala katitjin che u'anik chpam nimlaj rchoch Dios? ¿Chin xya'wre chawe che jala ka'ano? —xiche che.
3Ni Jesús xuk'ul uwuch ktzij, xub'ij chke:
—In soq kinta jun tzij chiwe. Chib'ij chwe su kinta chiwe. 4¿Chin xutaq u Wan che u'anik qasna' chke mnaq? ¿Le jare Dios, o jare mnaq? —xche chke.
5Ena xikmaj utayik chikuch, xikb'ij:
—¿Sur kqab'ij che? We kqab'ij che, che jare Dios xutaqo, kuta na chqe: “¿Suche k'ut che xikoj t utzij?” kche chqe. 6Ni we kqab'ij che, che jare mnaq xiktaqo, ena kunjel jumpa mnaq kujkkamsaj chab'aj, mal ke kikb'ij che u Wan jare jun ajb'il utzij Dios. —Jala xikb'ij chikuch. 7Ena xikb'ij che Jesús:
—Qit'am taj chin xutaq u Wan che u'anik qasna', —xicha'.
8Tik'ri xub'ij chik Jesús chke:
—In soq kimb'ij taj chiwe chin uy'om atb'altzij pin'ab' che jala kin'ano, —xche chke.
Ri Jesús xub'ij jun k'amb'al n'oj chkij nk'aj ajchkib' che xa iyitzel mnaq
(Mt 21:33-46; Mr 12:1-11)
9Tik'ri', ri Jesús xumaj ub'ixik jun k'amb'al n'oj chke mnaq, xub'ij: «O jun achi xutik utiko'n chjuch jun rlew. Nk'aj tiko'n xutiko jare uva. Tik'ri xuya kan un rlew pqajik chke nk'aj ajchkib'. Ni re x'e chnaj, mas ma'tan tik'ri xitzlij loq. 10Echi' xuriq tiempo che kkixluj uwuch nk'aj tiko'n, un rjaw tiko'n xutaq loq jun utaqo'n kuk' nk'aj ajchkib' rech kikjach b'i che jumpa nk'aj uwuch uva che rech re. Per ni nk'aj ajchkib' xa xikch'ayo, xiktaq chub'ik, ot su xikya b'i che. 11Tik'ri', un rjaw xutaq chuloq jun chik umoso, per soq jala xik'an chik che re. Xikch'ayo, xikb'ij k'axlaj taq tzij che; xiktaq chub'ik, ot su xikya b'i che. 12Un rjaw tiko'n xutaq chuloq nurox umoso. Ni nk'aj ajchkib' soq xik'an k'ax che, xiksoko, tik'ri xkesaj b'ik.
13»Tik'ri', un rjaw tiko'n xuchomaj puk'u'x, xub'ij: “¿Sur kin'ano? Jare utz we kintaq b'i un nik'jol che mas k'ax nk'u'x che. Echi' kikkilo, pent kikkoj utzij re”, xcha', ena xutaq b'i nuk'jol. 14Per echi' xkil nk'aj ajchkib' nuk'jol, xikb'ij chikuch: “Jare re kkanaj kan chjuch nulew. Jo qakamsaj, rech jare qo'j kqechb'ej kan nulew”, xicha'. 15Ena xkesaj loq chpam nk'aj tiko'n, tik'ri xikkamsaj». Jarela jun k'amb'al n'oj xub'ij Jesús chke mnaq. Tik'ri xuta chik chke, xub'ij:
«¿Su ku'on chik un rjaw ulew chke nk'aj ajchkib' che xa iyitzel mnaq? 16Kpi che kkamsxik nk'aj ajchkib'. Nun rlew kuya chik chke nk'aj chik ajchkib'», xche Jesús chke.
Echi' xikta nk'aj mnaq che jala xub'ij, tik'ri xikb'ij:
—Qast mitji jala k'antjik, —xicha'.
17Ni Jesús xyuka'yej, xub'ij chke:
—¿Su k'ut kilwi che tz'ib'tal chpam Tyox Wuj che kub'ij:
“Nab'aj#20:17 Ri Jesús jare peche nab'aje'. che xkixtuj kan nk'aj ajykal ja,
jare xoksax che utk'alb'al ja?” kcha'. (Sal 118:22)
18Chin jun mnaq ktzaq pujlom nab'aje', ksoktaj na. Niw jare nab'aj ktzaq chrij jun, soq ksoktajik, per su kumuchu, peche uk'ej b'aq ku'on che. —Jala xub'ij Jesús chke mnaq.
19Nk'aj ajk'mal b'e chke nk'aj rajchak Dios, rich'il nk'aj ajtojnel rech upxab' Dios jaret xkaj ke wet xiyikunik xikchap Jesús mismo chanim, mal xikch'ob'o che chkij ke xch'aw wi ti xub'ij un k'amb'al n'oj. Per xkix'ej kib' chikuch mnaq.
Nk'aj mnaq xikta che Jesús we nmister ktoj alkawal
(Mt 22:15-22; Mr 12:12-17)
20Xikk'ak'lej Jesús y xiktaq b'i nk'aj mnaq che kikkoj kib' che i'utzlaj taq mnaq, per xa ch'anik kik'ano. Ke, xa jare kkaj kikk'ot uchi' Jesús, rech, we o jun tzij che ustaj kub'ij chke, kikjach pu'ab' un atb'altzij, che gobernador kb'ix che. 21Xa rmal, xikb'ij che:
—Ajtojnel, qit'am che utz runjel jumpa kab'ij soq rich'il sutaq kyatjoj mnaq che; soq ot jun mnaq che nim kawil chjuch jun chik, xaq jnam ka'an che kilik; soq puro saqlaj tzij runjel jumpa kab'ij chrij utzij Dios. 22Chb'ij k'ut chqe: ¿le utz chjuch Dios che kqatoj alkawal che un nimlaj atb'altzij César, o ustaj? —xiche che.
23Ni Jesús rit'am chik che xa ruk' keb' kiplaj kich'aw ruk'; ena xub'ij chke:
—¿Suche kik'ot nchi' ruk' itzij? ¿Le xa jare kiwaj ix kinqaj pi'ab' rmal jun tzij kimb'ij? 24Chik'tumpe jun rqan pwaq chinwuch. ¿Chin uretrato o chjuch un pwaq? ¿Chin ub'i' tz'ib'tal chjuch? —xche chke.
Ke xikb'ij che:
—Jare rech unmal atb'altzij César, —xiche che.
25Xub'ij k'ut Jesús chke:
—Jare chiy'a che u César chinchke rech re, soq chiy'a che Dios chinchke rech Re, —xche chke.
26Xa jala', xiyikun taj xiksach Jesús ruk' jun tzij kub'ij chikuch mnaq; xa mas xikmiyma' rmal mel mas utz xu'on che uk'ulik uwuch ktzij, xich'aw t chik, otchich jun tzij xikb'ij che.
Xikta che Jesús we kk'astaj chna nk'aj kamnaq
(Mt 22:23-33; Mr 12:18-27)
27Iy'o nk'aj mnaq iyaj Israel, saduceo kb'ix chke. Ke kikkoj taj che kk'astaj kwuch kamnaq. Ena xiqib' ruk' Jesús rech kikk'ot uchi', xikb'ij che:
28—Ajtojnel, u Moisés utz'ib'am kanoq chqe chpam Tyox Wuj, che we o jun achi kkamik che ot ralk'al kuya kan chrij rixqil, nmister che jare un rachlal kik'le' ruk' un b'yu't ixoq, rech jala' kuya ralk'al chrij y ku'on na che, che peche ralk'al un rachlal xkamik,#Dt 25:5-6. —xicha'.
29Tik'ri xikb'ij chik:
—Jala' iy'o jqub' (7) achjab' iy'al. Un nab'a'al xik'le' ruk' jun ixoq. Echi' xkam nachi ri', ot jun kalk'al xkil uwuch ruk' rixqil. 30Ena xik'le' chik nucha' ruk' un b'yu't ixoq, per soq xkam chik nachi le', y soq mowni o ralk'al xuya kan ruk' nixoq. 31Ni nurox cha'xel soq xik'le' chik ruk' nixoq. Jala xik'an kunjel jqub' (7) achjab' che iy'al chikuch. Xiyik'le' ruk' nixoq, per kunjel xikamik, ot kalk'al xikya kan ruk' nixoq. 32K'isb'alre, xkam chik nixoq. 33Chewa chanim, kqata chawe: echi' kk'astaj kwuch nk'aj kamnaq, ¿chin jun chke jqub' (7) achjab' kuk'am nixoq rech rixqil, mal ijqub' (7) xiyik'le' ruk'? —Jala xikb'ij che Jesús.
34Ni Jesús xuk'ul uwuch ktzij, xub'ij chke:
—Chi' chu'ij saq, kiyik'le' mnaq, soq kikya kalk'al pk'ulnem. 35Per nk'aj mnaq che tqal chke kikriq junalik k'asnmal chla' ruk' Dios, soq che kk'astaj kwuch chikxo'l nk'aj kamnaq, kiyik'le' t chik chla' soq kikya t chik nk'aj kalk'al pk'ulnem. 36Mal kikam t chik, xaq jala chik peche nk'aj ángel che kiyik'le' taj mowni kikamik. Ke jare iralk'al Dios, mal kk'astaj kwuch chikxo'l nk'aj kamnaq. 37Jare mismo qari'jal Moisés xuk'ut chiquch che nk'aj kamnaq kik'astaj chna. Chla' tz'ib'tal wi chpam Tyox Wuj chrij jwi' k'ix umjom a'.#Éx 3:1-6. Tz'ib'talik che ri Qajaw Dios, jare Re uDios qari'jal Abraham, soq jare Re uDios qari'jal Isaac, y soq jare uDios qari'jal Jacob.#20:37 Echi' jawa xub'ij, nk'aj achjab'e' ya ikamnaq chik. 38Ri Qajaw Dios, jare t Dios kech kamnaq, jare Dios kech ik'aslik, mal chjuch Re, kunjel mnaq ik'aslik.#20:38 Jala xub'ij, mal ksachtaj t uwuch ranma' jun mnaq, xaq xaw ucuerpo che ksachtaj uwuch. Jumpa mnaq che iralk'al Dios, kilik che ik'as na, miskini' xkam kan kicuerpo. —Jala xub'ij Jesús chke.
39Tik'ri, iy'o nk'aj ajtojnel rech upxab' Dios, xikb'ij che Jesús:
—Ajtojnel, puro utz peche xab'ij, —xiche che.
40Xa jala', xik'an t chich kwil xikk'ot uchi' Jesús.
Ri Jesús xub'ij chin uQaw o chla' chkaj
(Mt 22:41-46; Mr 12:35-37)
41Tik'ri xub'ij Jesús chke:
—¿Su mow kikb'ij mnaq che ri Cristo#20:41 Cristo kel kub'ij jun chaytajnaq rmal Dios. Un tzij Mesías xaq jnam kilwi. jare ri'y umam un rey David? 42Tz'ib'tal chpam Tyox Wuj Salmos che jare mismo u David xub'ij:
Jare Qajaw Dios xub'ij che Qajaw,
“Katku'l pni'b'im,
43ast retal echi' kinya che kyach'ako
jumpa nk'aj awajch'oj, kyatk'alb'ej chaqan”, kche che. (Sal 110:1)
Jala xub'ij u David. 44U David kub'ij “Wjaw” che ri Cristo. ¿Su mow, k'ut, che jawa kub'ij che, we ri Cristo jare ri'y umam re? —Jala xub'ij Jesús chke.
Ri Jesús xub'ij su kmak nk'aj ajtojnel rech ujer atb'altzij
(Mt 23:1-36; Mr 12:38-40; Lc 11:37-54)
45Kunjel mnaq kiyitjin che utatb'xik Jesús echi' xyuch'ab'ej udiscípulo, jawa xub'ij: 46«China kwent iwib' chikuch nk'aj ajtojnel rech upxab' Dios. Ke utz kikkilo xaq kiwa'ktik, kikjom utzlaj taq atz'yaq che qajnaq chqul kqan; utz kikkilo che kya rtzil kwuch kmal mnaq ptaq k'iyb'al. Jare kkaj ke che koksax k'ij kmal mnaq. Solo jare kkitzkuj nk'aj nab'e taq tem kech mnaq che nmaq keqle'n, rech kiyikb'e' chjuch chla' chpam nk'aj rchoch Dios. Soq jala kik'ano ti kib'e che utijwik kwa ptaq nim'ij, kkitzkuj kk'olb'al mnaq che nmaq keqle'n. 47Tik'ri', jare ke kikmaj kan kchoch nk'aj b'yu't ixqib'. Naj kik'an che u'anik kch'ab'al ruk' Dios, rmal xa jare kkaj ke che “utzlaj taq mnaq” kb'ix chke. Jare ke kikriq na jun nimlaj k'ejsb'al kwuch echi' ku'on atb'altzij Dios pkijlom». Jala xub'ij Jesús chke.
လက္ရွိေရြးခ်ယ္ထားမွု
San Lucas 20: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global