San Juan 12
12
K'ok'laj kumb'al xtix pujlom Jesús rmal jun ixoq
(Mt 26:6-13; Mr 14:3-9)
1Waqib' (6) ij na kraj rech kurqa un nim'ij Pascua, echi' xo'pan Jesús jala chpam un kanton Betania. Chla' xo'pan wi jachi k'wi rchoch u Lázaro, jare nachi che xkamik che xuk'suj chna ri Jesús chikxo'l nk'aj kamnaq. 2Chla' qaj'ij, xik'an wa rech kitjiw cha'ab', rech kojb'alre u'ij Jesús. Jare il Marta ku'axij kwa chu mixa, nu Lázaro ku'l ruk' Jesús chu mixa. 3I Mri'y xuma nk'aj litro k'ok'laj kumb'al che mas kar rjil, perfume kb'ix che. Un kumb'ale' mas k'ok' ruxlab', kotz'i'j kjom che amb'alre, nardo ub'i'. Ena xu'ij chrij rqan Jesús, tik'ri xusu' ruk' uwi'. Runjel un ja xnoj che ruxlab' un k'ok'laj kumb'al.
4Jun chke nk'aj udiscípulo, jare u Judas Iscariote, uk'jol u Simón, jare jun che kujach na ri Jesús, xub'ij:
5—Xatni xik'ix un k'ok'laj kumb'ale' che mas kar rjil, che jala rjil peche pwaq kuch'ak jun mnaq chpam jun jnab' chak.#12:5 Tyox Wuj kch'aw chrij uxib' ciento (300) denario. Jun pwaq che denario kb'ix che, jare jun saq pwaq che kikjom ujer. Rjil peche kuch'ak jun achi che jun ij chak jare jun denario. Xjach tni pwaq chikuch mnaq che xa ipobre. —Jala xub'ij u Judas.
6U Judas, rmal taj che kuril to'b'al kwuch mnaq che xa ipobre che jala xub'ij. Jala xub'ij mal xa el'om. Jare re kukol pwaq mal ruk' re k'wi uk'olb'al. Xa jare kraj re che o su kurel'aj kan che pwaq, mal k'manaq che jala ku'ono. 7Ri Jesús xub'ij che:
—¡Chiy'a kanoq! Un k'ok'laj kumb'ali' che uklom, xa rech muqb'alwe wa' rmal.#12:7 K'manaq chke mnaq iyaj Israel kikkoj k'ok'laj kumb'al chkij nk'aj kkamnaq. 8Ix runjel ij iy'o nk'aj mnaq iwuk' che xa ipobre,#Dt 15:11. per ni in runjel ij taj n'o iwuk', —xche Jesús chke.
Xikchomaj ukamsxik u Lázaro
9Ik'i mnaq iyaj Israel xikta rson jachi k'wi Jesús. Ena xipi ruk', per xaw t rmal Jesús che xipitik, soq rmal che kkaj kikkil uwuch u Lázaro, che xik'sux rmal Jesús chikxo'l nk'aj kamnaq. 10Ni nk'aj ajk'mal b'e chke nk'aj rajchak Dios xikchomaj che soq kikkamsaj u Lázaro, 11mal xa rmal u Lázaro, ik'i chke nk'aj aj Israel kiyitjinik kiktas kib' chkij ke, rech kiyikjon che Jesús.
Nk'aj mnaq xkik'laj Jesús ruk' nim'ij chpam tinmit Jerusalén
(Mt 21:1-11; Mr 11:1-11; Lc 19:28-40)
12Ik'i mnaq xib'e Jerusalén che rilik nim'ij Pascua. Echi' xo'pan ukab' ij che un nim'ij, xikta rson che pitnaq Jesús jawa'. 13Xikket uxaq taq che' palma ub'i', xikk'am b'i che uk'alxik Jesús. Ko xich'awik, xikb'ij:
—¡Hosanna!#12:13 Un tzij Hosanna kel kub'ij chujt'o la. Le mnaq soq kikkojo rech kikya u'ij Dios. ¡Tyox k'mow che Dios!
¡Nimlaj utzil pujlom nachi ri' che pitnaq ruk' uchu'ab' Qajaw Dios!
¡Nimlaj utzil pujlom nachi tk'al pqajlom qo'j ujaj Israel! (Sal 118:25-26)
—Jala xikb'ij nk'aj mnaq.
14Ri Jesús pre xuriq pnoq jun laj b'uru, xukjej, mal ri Tyox Wuj kub'ij:
15«Mix'ej iwib', mnaq chpam un tinmit Sion.#12:15 Un tinmit Jerusalén soq kb'ix Sion che.
¡Chiwla'! Pitnaq Jun
che kitqan na pijlom,
ukjem jun laj b'uru», kcha'. (Zac 9:9)
16Chpam nk'aj ije', nk'aj udiscípulo Jesús, xqaj taj pkijlom su kitjin u'anik. Echi' xinmirsax u'ij Jesús, tik'ri xna'taj chke che runjel jumpa xkilo, jare su tz'ib'am loq chrij Jesús, soq jala x'an che Jesús peche tz'ib'talik.
17Ni nk'aj mnaq che iy'o ruk' Jesús echi' xusk'ij u Lázaro chpam muqb'al, rech xuk'suj chikxo'l nk'aj kamnaq, kiyitjin che ub'ixik su xu'on Jesús. 18Ik'i mnaq xipitik xkik'laj, mal ktom rson che xu'on jun nimlaj k'utb'al ruk' u Lázaro. 19Ni nk'aj fariseo kich'aw chikuch, xikb'ij: «Chiwlampe', ot su kujkun che u'anik. Kunjel jumpa mnaq, ruk' Re ib'enaq wi», xiche chikuch.
Ri Jesús xub'ij che kkam na
20Jumpa mnaq che ipitnaq che uk'ulik nim'ij chla' chpam un tinmit Jerusalén, iy'o nk'aj aj Grecia chikxo'l. 21Nk'aj mnaqi', xiqib' koq ruk' u Pelipe, che kpi jala Betsaida rech Galilea, xikb'ij che:
—Achi, kqaj kqil uwuch Jesús, —xiche che.
22U Pelipe xub'ij che u Trix. Ikeb', u Pelipe ruk' u Trix, xib'e che ub'ixik che Jesús. 23Ri Jesús xub'ij chke:
—Xo'pan ij che, rech kinmirsax u'ij nAchi nuK'jol Dios. 24Qatz qtzij, qatz qtzij kimb'ij chiwe che we jun uwuch ija' rech triko, we kqaj taj chpam ulew, we kkam taj, junlik wa' xa jun uwuch triko olik. Nmister che kkam na rech o mow kuya k'i uwuch. 25Chin jun che kub'soj uk'asnmal chi' chuchlew, ksach na uwuch, per chin jun che kub'soj taj uk'asnmal rech chi' chuchlew, jare re kuriq na jun uk'asnmal che ot uk'isik. 26We o jun kraj kichkun wuk', chnutrimb'ej, rech jachi kinkjew in, soq chla' kikjew re. Chin jun che kichkun wuk', koksax na u'ij rmal nQaw o chla' chkaj, —xche Jesús chke.
27Xub'ij chik:
«Ni le', ki'xow wanma'. ¿Sut kimb'ij? ¿Le jare kimb'ij: “NQaw, chnit'o la ruk' k'ax pitnaq chwij”? Jala taj kimb'ij, mal jare niptan npitnaq», xub'ij Jesús. 28Tik'ri xub'ij chik:
—NQaw, k'tu la ri nimlaj chu'ab' la, —xcha'.
Tik'ri xtataj jun ch'ab'al chkaj, xub'ij:
—In nik'tum chik nimlaj nchu'ab' soq kink'ut na jmul chik, —xche ri ch'ab'al xtataj chkaj.
29Ik'i mnaq iy'o chla', xikta un ch'ab'al che xch'aw loq chkaj, xikb'ij:
—Xa jab' xo'ik, —xicha'.
O nk'aj chik xikb'ij:
—Jun ángel xch'aw ruk', —xicha'.
30Ri Jesús xub'ij chke:
—Un ch'ab'ali' che xito, wmal t in xch'awik, xani iwmal ix xch'awik. 31Ile' xuriq ij che Dios ku'on atb'altzij pujlom uwuchlew. Kesax na un rjaw atb'altzij rech uwuchlew chpam reqle'n. 32Ni in echi' kinwa'lsax b'ik,#Jn 3:14-15; 8:28. kunjel jumpa mnaq kyinsuk'maj loq wuk', —xche Jesús chke.
33Ruk' nk'aj tziji' che xub'ij, jare xuya ub'ixik su kik'an na che ukamsxik chu un cruz. 34Ni nk'aj mnaq xikb'ij che:
—Qo'j qatom chpam qawuj rech upxab' Dios chrij Cristo#12:34 Cristo kel kub'ij jun chaytajnaq rmal Dios. Un tzij Mesías xaq jnam kilwi. che kkam taj, xani kik'se' runjel jumpa uwu ijsaq. ¿Su mow k'ut kb'ij la che nAchi nuK'jol Dios nmister kwa'lsax nub'i chkaj? ¿Chin k'la nAchi nuK'jol Dios? —xiche che.
35Ri Jesús xub'ij chke:
—Xaq ejtal ij chik che o saq iwuk'. Chixb'inoq etajni' o na ri saq iwuk', rech kixkanaj t kanoq chpam qu'm. Chin jun che xa chpam qu'm kb'in wi, kuch'ob' taj jachi k'e wi. 36Chixkjon che ri saq, etajni' o na chixo'l, rech qatz qtzij ixralk'al saq, —xche Jesús chke.
Xaw xb'itaj nk'aj tziji' rmal Jesús, x'e chla' chpam jun lyar jachi k'aljan taj jachi k'wi.
Nk'aj aj Israel xiyikjon taj che Jesús
37Ri Jesús, miskini' xu'on k'ilaj taq k'utb'al chikuch, per mowni ruk', xiyikjon taj che. 38Nmister k'antaj na su tz'ib'tal kanoq rmal nujer ajb'il utzij Dios che Isaías ub'i', che kub'ij:
«Qajaw, ¿chin kjonaq che, su xqab'ij?
¿Chin chjuch k'tum wi uchu'ab' Qajaw?» kcha'. (Is 53:1)
39Xiyikun taj xiyikjonik, mal soq peche xutz'ib'aj u Isaías chpam jun chik uxaq wuj che kub'ij:
40«Ri Dios xu'on chke che peche ipotz',
xu'on ko che kanma',
rech kika'y taj ruk' kwuch,
rech soq kikch'ob' taj chpam kanma',
mowni xikk'ex t kmow chinwuch.
Kkaj taj kiyikjon chwe rech kiyinknaj», xcha'. (Is 6:10)
41U Isaías jala xub'ij mal xurilo che nim u'ij Jesús. Re xch'aw chrij su xuril chrij Jesús.
42Miskini' jala, ik'i nk'aj aj Israel xiyikjon che Jesús, soq iy'o nk'aj che o keqle'n chikxo'l, xiyikjon che. Per kik'an t kwil kikb'ij mal kkix'ej kib' chikuch nk'aj fariseo, we xa kikkesaj b'i chpam rchoch Dios. 43Jare utz kikkil ke che xa mnaq kkinmirsaj k'ij, jare taj kkitzkuj che Dios kunmirsaj k'ij.
Ri utzij Jesús jare ku'on atb'altzij pkijlom mnaq
44Ri Jesús, ko xch'awik xub'ij chke: «Chin jun kikjon chwe, xaw taj in knukojo, xani soq kukoj nQaw che nutqom loq. 45Chin jun knuril in, soq kitjin che rilik Jun che xnutaq loq. 46In ri' ri saq npitnaq chi' chuchlew, rech chin jun kukub'a uk'u'x chwij, kikje taj chpam qu'm. 47Chin jun kuta ntzij, per we kukoj taj, in kin'an t atb'altzij pujlom. Npitnaq taj che u'anik atb'altzij pkijlom mnaq chi' chuchlew. Xani jare npitnaq che kto'ik mnaq iy'o chi' chuchlew rech kikoltaj na. 48Chin jun che xa knuxtuj in, soq mowni kuk'am ntzij, o chin ku'on atb'altzij pujlom. Jare ntzij ku'on na atb'altzij pujlom, echi' ko'pan un k'isb'al ij rech uwuchlew. 49Nk'aj tzij ximb'ij chiwe, chpam taj nchomnik in xpi wi. Jare nQaw che nutqom loq, ub'im chwe su nmister kimb'ij chiwe, soq xub'ij chwe su nmister kixintjoj che. 50In wit'am che utaqnik nQaw jare kuya k'asnmal che ot uk'isik. Xa rmal che runjel jumpa tzij kimb'ij, jala kin'an che ub'ixik peche ub'im loq nQaw chwe», xche Jesús chke.
လက္ရွိေရြးခ်ယ္ထားမွု
San Juan 12: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global