San Juan 10
10
Jun k'amb'al n'oj chrij jun kral chij
1Echi' xurqa jun chik ij, ri Jesús xub'ij: «Qatz qtzij, qatz qtzij, kimb'ij chiwe: chin jun mnaq che jare t uchikral kutzkuj echi' kok chpam jun kral rech chij, we xa wa'l kok wi, xa el'om, xa kukoj u'ab'. 2Chin jun mnaq che chpam uchikral kok wi, jare re ajyu' chkij nk'aj chij. 3Ni najchjal, kutor uchikral chjuch, ni najyu', kub'ij kb'i' nk'aj chij echi' kyusk'ij, ni taq chij kit'am uch'ab'al un kajyu'. Kyuresaj b'i chpam un kral. 4Echi' kiyel b'i kunjel nk'aj uchij najyu', knab'aj b'i chikuch. Ni ke kyitrij b'i chrij, mal kit'am uch'ab'al un kajyu'. 5Ni jun che kit'am t uwuch, kiyitrij taj chrij, xani kiyanmaj chjuch, mal kikch'ob' t uch'ab'al jun che kit'am t uwuch», xche Jesús chke.
6Jarewa jun k'amb'al n'oji' xub'ij Jesús chke, per ni ke xikch'ob' taj su kilwi sutaq xub'ij chke.
Ri Jesús jare utzlaj ajyu'
7Ri Jesús xub'ij chik chke: «Qatz qtzij, qatz qtzij kimb'ij chiwe che in wa' ri uchikral kech nk'aj chij. 8Kunjel nk'aj che nab'e xipi chinwuch in, xa i'el'om, xa iyajb'nal taq k'ax. Ni nk'aj chij xikta t ktzij. 9In nuchikral. Chin jun mnaq che jare knutzkuj in rech kok wuk' chpam un kral rech Dios, jare re kkoltjik. Kuriq wa' peche kuriq jun chij che kok chpam un kral, tik'ri kel b'ik, kuriq recha'. 10Un el'om jare pitnaq rech kyurel'aj b'i nk'aj chij, kyukamsaj soq ku'on k'ax chke. Ni in npitnaq che uya'ik k'asnmal, che jare jun je'lik laj k'asnmal che ot uk'isik.
11»In ri' un utzlaj ajyu'. Jun utzlaj ajyu' kukuyu miskini' kkamsxik rech kuto'b'aj ke nk'aj uchij. 12Jun ajyu' che xaq xaw tojb'alre kub'soj, jare taj re rjaw nk'aj chij, echi' kurilo che pitnaq un utiw, xa kanmjik b'ik, kyuya kan nk'aj chij. Nun utiw kyuroqtaj taq chij, kyutukb'lej b'ik. 13Ni jun che xa tjom u'ij, xa kanmaj b'ik, mal xa tjom u'ij, kyub'soj taj taq chij.
14»In ri' ri utzlaj ajyu'. Wit'am kwuch taq nchij, ke soq kit'am nwuch in. 15Jala peche nQaw rit'am nwuch in, in soq wit'am uwuch Re. In kinya nk'asnmal kmal taq chij. 16O nk'aj chik nchij che iy'o taj chpam un krali'. Ke nmister che soq kyink'am loq. Ke kikta na ntzij, rech xa jun kwuch nchij, soq xa jun ajyu' chkij. 17Knul'oj nQaw, mal kinya wib' kinkamsxik, rech kink'ut nchu'ab' che kink'astaj chna chikxo'l nk'aj kamnaq. 18Ot chin jun kikun che resxik nk'asnmal, we kinya t wib' che kinkamsxik. Chpam wanma' in kpi wi che kinya wib' kinkamsxik. Pin'ab' in k'wi che kinya wib' kinkamsxik, soq pin'ab' in k'wi che kinwa'laj chik chikxo'l nk'aj kamnaq. Jarewa un taqnik xya chwe rmal nQaw», xche Jesús chke.
19Ni nk'aj aj Israel, xaw xikta utzij Jesús, xikmaj uchapik kib' jmul chik chikuch ruk' ktzij, wa'l kub'ij jun, wa'l kub'ij un chik. 20Ik'i chke nk'aj aj Israel xikb'ij: «Xa itzel espíritu o ruk', xa xujal loko'. ¿Su uptan kitatb'ej utzij?» xicha'.
21O nk'aj chik aj Israel xikb'ij: «Ot jun mnaq che jala kch'awik we xa o itzel espíritu ruk'. ¿Xatb'a kikun jun itzel espíritu kuknaj uwuch jun mnaq che kka'y taj?» xiche chke nk'aj kich'il.
Nk'aj aj Israel xiyikjon taj Jesús
22Xo'pan ij che kik'an nim'ij nk'aj aj Israel chla' Jerusalén, rech na'tb'alre ij che xk'is u'anik nimlaj rchoch Dios. Ptaq 'laj kuriqo. 23Ri Jesús kwa'kat chla' chpam nimlaj rchoch Dios, chla' k'wi ruk' un rqinja che rech u Salomón kb'ix che. 24Ni nk'aj aj Israel xkistuj kib' chrij Jesús, xikb'ij che:
—¿Jumpa katu'xan che usachik qak'u'x? —xiche che.
—We qatz qtzij che at atCristo,#10:24 Cristo kel kub'ij jun chaytajnaq rmal Dios. Un tzij Mesías xaq jnam kilwi. chb'ij chqe ruk' saqlaj tzij, —xiche che.
25Ri Jesús xub'ij chke:
—Nb'im chik chiwe, xa ix kikoj taj. Runjel sutaq kin'ano, pub'i' nQaw kin'an wi. Ruk' sutaq kin'ano, kuk'utu nchin in. 26Ni ix kikoj taj, mal ixwech taj. Jala peche nb'im chiwe, ixinchij taj. 27Nk'aj nchij kikta nch'ab'al. In wit'am kwuch, ni ke kiyitrij chwij. 28Ni in kinya jun k'asnmal chke che ot uk'isik. Ksach t kwuch, mowni ot chin kikun che kesxik pin'ab'. 29NQaw che xyuya chwe, jare Re mas nim chikuch kunjel. Ot chin jun kikunik kyuresaj pu'ab' nQaw. 30In rich'il nQaw xa uj jun, —xche chke.
31Ni nk'aj aj Israel, jmul chik xiksik' ab'aj rech kikk'eq che Jesús. 32Ri Jesús xub'ij chke:
—K'i utzlaj taq chak rech nQaw ninom chiwuch. ¿Chinchke jun chke che rmal knik'eq chab'aj? —xche chke.
33Ni nk'aj aj Israel xikb'ij che:
—Rmal taj nk'aj utzlaj taq chak katqak'eq chab'aj. Katqak'eq chab'aj mal xa xawetz'b'ej uwuch Dios. At xa atimnaq, tik'ri at Dios kakoj awib', —xiche che Jesús.
34Ri Jesús xub'ij chke:
—¿Le xa tz'ib'tal taj chpam ipxab' che kub'ij: “In ximb'ij che ix jare ixtaq dios?”#Sal 82:6. Jala xub'ij Dios chke mnaq. 35Jare Dios xub'ij “dios” chke ujer taq mnaq che xub'ij utzij chke, soq qit'am che sutaq tz'ib'tal chpam Tyox Wuj, ot mow che kk'exik. 36We jare in xnuchay Dios rech xnutaq loq chi' chuchlew che u'anik uchak Re, ¿suche che kib'ij chwe che kinwetz'b'ej uwuch Dios xa rmal che kimb'ij chiwe che in nuK'jol Dios? 37We jare t uchak nQaw kin'ano, xa mikoj ntzij. 38Per we jare kin'ano, miskini' kixkjon taj chwe in, chixkjon che nk'aj k'utb'al kin'ano, rech kiwit'amaj, soq rech kikojo che jare nQaw o wuk' in, soq in, n'o ruk' nQaw, —xche Jesús chke.
39Ni nk'aj aj Israel, xiktij uk'amik b'i jmul chik Jesús pkarsa, per ni Re x'aljan taj jachi x'e wi.
40Ri Jesús x'e jmul chik ch'qap che un nim ja' che Jordán ub'i', chla' jachi xu'on qasna' u Wan nab'e kanoq, xkanaj kan chla'. 41Ik'i mnaq xib'e che rilik, xikb'ij: «U Wan ajb'nal qasna', ot jun k'utb'al xu'ono, per runjel sutaq xub'ij chrij nachi ri', qtzij elnaq», xiche chikuch. 42Ik'i mnaq xiyikjon che Jesús chla'.
လက္ရွိေရြးခ်ယ္ထားမွု
San Juan 10: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global