Hechos 27
27
Xtaq b'i u Pablo chpam tinmit Roma
1Echi' xchomxik che kuj'e pukwent Italia, xjach u Pablo rich'il nk'aj chik mnaq iy'o pkarsa, pu'ab' jun achi tk'al pkijlom jun ciento soldado, Julio ub'i'. Re, tk'al pkijlom jpuq soldado rech u César, che rech u Augusta kb'ix chke. 2Xa jala', xujok chpam un barco kpi chpam tinmit Adramitio, che o chuchi' mar. Un barco ri', b'enam ku'ono k'e ptaq tinmit pukwent Asia. O jun achi x'e quk' Aristarco ub'i', jala kpi chpam tinmit Tesalónica che o pukwent Macedonia.
3Chkab' ij chik, xujo'pan chpam tinmit Sidón che o chuchi' mar. U Julio xu'on jun utzil che u Pablo chla', xuya che x'e kuk' nk'aj mnaq che mas kkaj kib' ruk', rech kikya che su nmister che. 4Tik'ri xujel chub'i chpam tinmit Sidón, xqataqej qab'e xuj'e puwi mar, per sk'um taj xuj'ek mal mas k'qi' pitnaq piqsuk'mal, xa rmal che xa jawa xuj'ax putlok' jun ch'qap ulew o nk'aj mar Chipre ub'i'. 5Echi' uj'axnaq chik puwi mar che o chjuch un lyar Cilicia rich'il un lyar Panfilia, xujo'pan chpam un tinmit Mira che o pukwent nim tinmit Licia.
6Nachi che tk'al pkijlom jun ciento soldado, xuriq jun barco chla' che kpi chpam tinmit Alejandría. Un barco le', b'enam ku'ono k'e pukwent Italia, ena xub'ij chqe che kujok chpam. Ena xujok chpam, xqataqej qab'e xuj'e chik. 7K'i ij xqab'inb'ej mal mas nojim ujb'enaq chpam un barco, xaq ruk' k'ax xujo'pan chjuch un lyar Gnido. Jare taj qab'e xqataqej mal xa o jun k'qi' xuju'atij, xuya taj chqe xuj'axik, xa rmal che xa jawa xuj'ax putlok' jun ch'qap ulew o nk'aj mar Creta ub'i', chjuch un tinmit Salmón. 8Xqataqej qab'e xuj'e chik, per xaq ruk' k'ax xuj'ax putlok' un lyar Creta. Jala qanom xujo'pan chpam un tinmit Buenos Puertos che o chunqaj un tinmit Lasea.
9K'i ij chik b'enaq che, che kujtjin che qab'e. Mas xujb'oytjik, mal mas xib'al'ib' chik che kb'in mnaq puwi mar, soq xujal ij che, che kukuy knumik mnaq, ayuno kb'ix che, y ya mer kqaj 'laj. Ena xyupixb'ej u Pablo, xub'ij chke: 10«Achjab', in kinwilo che mas xib'al'ib' we kqataqej qab'e. Pent ktzaq un barco chpam mar y kuriq k'ax rich'il reqa'n, soq rich'il qo'j jumpa uj'o chpam un barco kujkamik», xche chke.
11Per ni nachi che tk'al pkijlom jun ciento soldado, xukoj taj su xub'ij u Pablo, xa jare xukojo su xub'ij nachi che kub'insaj un barco, rich'il su xub'ij un rjaw un barco. 12Ni laj tinmit jachi ujk'wi, ustaj we o mnaq kik'axij 'laj chla'. Xa rmal, ik'i chke xikb'ij che jare utz we kqataqej qab'e, rech pent kujkunik kujo'pan chpam tinmit Fenicia#27:12 Fenicia soq kb'ix Fenice che. che o pukwent un lyar Creta. Un tinmiti', chla' k'wi pusuk'mal jachi kel loq ij, y soq pusuk'mal jachi kqaj wi.
Xpi jun nimlaj k'qi' jab' pujlom mar
13Echi' xpi ch'in k'qi' putlok' jachi kel loq ij, xikchomaj che o mow kiktaqej kb'e. Ena xikwa'lsaj chapb'alre un barco, tik'ri xib'e chik puwi mar, xi'ax putlok' un lyar Creta ub'i' che o nk'aj mar. 14Per xa ch'in qab'e qatjom pnoq, ti xaq t'et xpi jun nimlaj k'qi', xu'sij rib' chrij un barco. Nordeste ub'i' un k'qi'. 15Un k'qi' xutakpij b'i un barco, mal xikun taj un barco xutij uchu'ab' ruk'. Xa rmal, xqaya qib' che, xujuk'am b'ik. 16Tik'ri xuj'ax putlok' jun laj ulew Clauda,#27:16 Jun laj ulew Clauda soq kb'ix Cauda che. che o nk'aj mar; chla' ot mas uchu'ab' k'qi'. Per xaq apena xujkunik xqawa'lsaj un laj barco che quk'am b'ik, rech kqato' qib' chpam we xa kujtzaq chpam mar. 17Echi' kiy'om chik un bote chpam un barco, xikxim un barco ruk' klob' rech kpax taj, per xaq qax'em qib' ruk' mal pent kupuj rib' un barco chutaq sinyab' chla' chpam un lyar che Sirte kb'ix che. Tik'ri xikqasaj nk'aj k'ul pujlom un barco, y xikya che un barco che xk'am b'i rmal k'qi'. 18Mas uchu'ab' k'qi' che kupuj rib' chqij. Xa rmal, chkab' ij xkesaj nk'aj eqa'n chpam un barco, xikk'eq kan chpam mar, rech kko'ptaj ra'lal reqa'n un barco. 19Churox ij chik, jare qo'j mismo ruk' qa'ab' xqak'eq kan nk'aj uchukb'al un barco chpam mar. 20Mas k'i ij chik b'enaq che, che qalom t uwuch ij, rich'il ch'mil. Ni k'qi' ku'xan taj, xa kitjinik kinmir mas un k'ax chqij, ena xqachomaj qo'j che su kujkamik.
21K'i ij chik b'enaq che, che ot qawa qatjom. Ena xitk'e' u Pablo chiqxo'l, xub'ij: «Achjab', jare utz wet xikojo su ximb'ij chiwe, mitji ni xujel loq chpam un lyar Creta, kqariq taj un k'ax che qarqom chanim y ot su kuriq nk'aj eqa'n. 22Per chewa chanim, kimb'ij chiwe che xa mix'ej iwib'. Xa china jun kowlaj k'u'x, mal ot jun chiwe kkamik, xaw un barco ksachtaj uwuch. 23Cha'ab' myer o jun ángel rech Dios xuk'ut rib' chinwuch, ri Dios che utqom loq un ángel, pu'ab' Re nik'wi y soq jare Re kin'an uchak. 24Nun ángel xub'ij chwe: “Xa max'ej awib', Pablo, mal nmister kato'pan na chjuch u César rech ku'on atb'altzij pajlom. Xa awmal at, ri Dios kyuto' na kunjel jumpa mnaq iy'o awuk' chpam un barco”, xche chwe. 25Xa rmal, china jun kowlaj k'u'x, achjab', mal in nkub'am nk'u'x chrij Dios. Kinkojo che qtzij jala na k'antjik peche xub'ij un ángel chwe. 26Per nmister che kqamin qib' chpam ch'qap ulew o nk'aj mar». Jala xub'ij u Pablo chke nk'aj rich'il iy'o chpam un barco.
27Echi' b'enaq chkeb' semana che, che kujtjin che qab'e puwi mar che Adriático ub'i', ptaq nk'aj a'ab', xikna' nk'aj ajb'insalre un barco che ya mer kujo'pan chunqaj uwuchlew. 28Ena xikqasaj un pajb'al chpam mar rech kikpajo we mas cho, soq we cho t mas. Echi' xikpajo, xkilo che kawnaq (40) vara o che un cho qajnaq chuxe' mar. Xujb'in pnoq b'i chik, xikpaj jun b'welt chik y xkilo che xa ju'wnaq ljuj (30) vara chik un cho qajnaq chuxe' mar. 29Per mas kix'em kib' nk'aj ajb'insalre un barco mal kikna'o che su kupuj rib' un barco chutaq ab'aj. Ena xikqasaj b'i kjeb' (4) chapb'alre un barco chpam mar, rech kutak'b'a un barco. Ena xik'an kch'ab'al ruk' Dios rech kikta che, che chanim kisqarik. 30Ni nk'aj ajb'insalre un barco, jare kkaj ke wet kiyikunik kiyanmaj b'ik. Ena xa rmal, xikqasaj b'i un laj barco chpam mar rech kikto' kib' chpam, per xik'ano peche mow xa jare nk'aj chapb'alre un barco xikqasaj b'i chpam mar. 31Tik'ri xub'ij u Pablo che nachi tk'al pkijlom jun ciento soldado, soq xub'ij chke nk'aj soldado, jawa xub'ij chke ri': «We xa kikanaj t kan nk'aj ajb'insalre un barco chpam un barco, kixkun taj ix kito' iwib'», xche chke. 32Ena xikram nk'aj klob' nk'aj soldado che kjom che ximb'alre un laj barco, xikya che xqaj chuxe' mar, xa jala' ot jun mnaq kikunik kanmaj b'i chpam.
33Echi' ya mer kisqarik, xub'ij u Pablo chke kunjel jumpa mnaq iy'o chpam un barco, che utz we kiktij kwa. Jawa xub'ij chke ri': «Kmik kuk'is keb' semana che ixwarnaq taj mal iwi'em we o su kqariqo, y soq ot su kri' jun wa itjom. 34Mi'ani' chitja iwa. Nmister che o su kitijo rech kixkunik kik'asb'a iwib', mal ot jun chiwe che ksachtaj uwuch, mowni ktzaq jun uwi' che ujlom», xche chke.
35Echi' xb'itaj rmal u Pablo, xuk'am qaj wa, xutyoxij che Dios chikuch kunjel jumpa mnaq iy'o chpam un barco, tik'ri xupiro y xok che utijwik. 36Tik'ri k'ut kunjel xik'an jun kowlaj k'u'x y xiktij kwa kunjel. 37Qunjel jumpa qawuch uj'o chpam un barco, jare ujkeb' ciento ruk' oxk'al waqljuj (276). 38Echi' xtitaj kwa, xkesaj nk'aj k'ej chpam un barco, tik'ri xikk'eq kan chpam mar rech kko'ptaj ra'lal reqa'n un barco.
Un barco xuriq k'ax
39Echi' xisqarik, xikch'ob' taj su ub'i' un lyar che iy'o chpam, xaw xkilo che o jun u'ab' mar oknaq b'i chuchi' nk'aj sinyab'. Ena xikchomaj kiktak'b'a un barco chla' we kiyikunik. 40Ena xikram nk'aj chapb'alre un barco, xikk'eq kan chpam mar y xiktur nk'aj klob' che kjom che jun b'insalre. Tik'ri xikwa'lsaj un k'ul che o puwi un barco y xikrip chjuch tew tik'ri xib'e chpam nu'ab' mar jachi k'wi nk'aj sinyab'. 41Per nun barco, chla' xupuj rib' jachi k'wi keb' ub'e ja' y xutnij rib' chpam nk'aj sinyab'. Jare nujlom un barco xumin b'i rib' chpam nk'aj sinyab', y su chla' xkanaj kan wi, otchich chin jun kikunik kuslib'saj. Xu'on k'ax un rij un barco rmal uchu'ab' mar che xupuj rib' chrij.
42Ena xikchomaj nk'aj soldado che kikkamsaj nk'aj preso che kuk'am chpam un barco, rech ot jun kmuxnik kanmaj b'ik. 43Per ni nachi che tk'al pkijlom jun ciento soldado, jare kraj re kuto' uwi' u Pablo, ena xuya t lyar chke nk'aj soldado che kik'an k'ax chke nk'aj preso. Xa xub'ij chke, che chintaq kiyikunik kimuxnik kikk'eq b'i kib' nab'e puwi mar rech kiyel chuchi' mar. 44Ni nk'aj chik che kiyikun taj kimuxnik, o mow kib'e pujlom taq tz'lom, soq o mow kib'e pujlom nk'aj uch'qa'pil taq che' rech un barco. Jala xub'ij chqe, ena jala xqa'ano. Xa jala' qunjel utz qawuch xujel chuchi' mar.
လက္ရွိေရြးခ်ယ္ထားမွု
Hechos 27: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global