Ruka 2
2
Eributwa ra Yesu
(Mat 1.18-25)
1Mu biranga mbyo, Kaisari#2.1 Kaisari: Rina ra kinsi mwami wasimanirenga echuo cha ku Roma. Okisito wa ku Roma wakuto momba mbu baanse ebea b'ebyuo biti byasimanire we. 2Emwanso ngo nge waroso waronjiwanga, mu matu Kurenio nti nge wasimanire echuo cha ku Suria. 3Ebea bati benda kiandikisha kira mwea murubungu rwae rw'ebubutwa. 4Yosefu nae watuka murubungu rwa ku Nasareti, mu chuo cha ku Ngariraya, n'ienda mu chuo cha ku Yundea murubungu rw'emubake Ndauti, erubikirwange mbu Beterehemu. Wendanga nko bushwa wabesenga uma mu bana b'eruanda rwa Ndauti. 5Wenda kiandikisha nko hima na Maria muchumba wae, na nti murito. 6Barekia bari ku Beterehemu, ematu ae erikwikokora arumira. 7Wabuta mwana, entangi yae. Wamubumbe byeri n'imuraamya mu muringa w'eririshie esanyama, bushwa barukwanga buari mu nkambi y'ebeni.
Maraika wasaire ebasumba
8Na mu chuo ncho, kwabesenga basumba mu michacha nti barangangǎ ebituana byabo mutu. 9Maraika wa Nyere Kuritu wasaire bo nsisu, na chaka ch'ebusime bwa Nyere Kuritu chabumbe bo. Nabo basubaha nguru. 10Ina emaraika were bo mbu: «Anga musubaha, bushwa naburishie Mwasi Wakonda eusekokomya nguru ebea bati. 11Runotu runo Rukombora wamabutwa bushwa ninu murubungu rwa Ndauti, iwe nge Kirisitu na nge tu Nyere Kuritu. 12Na mukumuteerera buno: mukukumana ekabonsobonso kabumbirwa mu byeri na nti kekinde kumunda n'emuringa w'eririshie ebituana.»
13Nampo hasungwa kikembe kikiri cha bamaraika ituka mu mbingu, bakumana emaraika ngo, nti batatange Ongo n'ieba mbu:
14«Ongo watatwe mu mbingu,
na buhoro mu chuo kuri ebea mbi ebashima we.»
Ebasumba benda ku Beterehemu
15 Ebamaraika barekia bamakuruka mu mbingu, ebasumba babucha ierane mbu: «Eo, twendi ku Beterehemu kongo twasunga echakusaa ko, inchi echakutwire Nyere Kuritu.» 16Ngebumbo, benda tete, bakumana Maria na Yosefu, n'emwana wikinde mu muringa w'eririshie mo ebituana. 17Barekia bamasunga ekabonsobonso, batura emyasi nji yakianga emaraika were bo bushwa n'emwana ngo. 18Ebea bati mbi barukiranga emwasi ngo ewaturanga ebasumba, bashishara. 19Ina Maria iwe, waranganga ebinwa biti mbyo kumunda n'emutima wae n'ianikira mu byo nguru. 20Nampo, ebasumba bakuruka nti batatange Ongo n'imumoe bushwa n'ebinwa biti ebyarukiranga bo n'ebyamasunga bo, bushwa mbu ebiti byakweta imbu ebwaturirwanga bo byo n'emaraika.
Emwana waninkwa rina ra Yesu
21Emwana warekia wamarumisha matu munani wabutwa, bamumonesha.#2.21 Bayuta babesenga bamoneshanga emwana w'emuyu erotu rw'emunani wabutwa. Bamuninka rina mbu nge Yesu. Erina ndo nge raninkwanga we n'emaraika, nina nti tinensi murito.
Yesu washeiwa mu Numba ya Ongo
22Ematu erihoswa#2.22 Soma Bar 12.1-8. ra Maria na Yosefu akia arumira, itukana n'ebweba emyomba ya Musa, benda n'emwana ku Yerusaremu kongo bamuninkana kuri Nyere Kuritu. 23Bushwa raandikwa mu Myomba ya Nyere Kuritu mbu: «Kinsi ntangi ya muyu iseninkanwayo kwa Nyere Kuritu.#2.23 Soma Ituk 13.2.» 24Basibura tumpite tubi na byana bibi bya pisho imbu bweba emyomba ya Nyere Kuritu.
Ebutahwa bwa Simioni
25Mu matu ngo, ku Yerusaremu kwarikanga mwea uma wabikirwa mbu Simioni. Emwea ngo wabesenga waombokara na ntwasubaha Ongo. Wabesenga urindirengi na mbusha y'erisunga erishukara ra Baisiraeri. eMutima Washurukara nti uri hima nae, 26wabesenga wamamushea mbu iwe watakwi kuba nensi nt'wasunga Kirisitu ingu usetumwayo na Nyere Kuritu. 27Simioni wenjiwa n'eMutima Washurukara mu Numba ya Ongo. Ebabuti ba Yesu bamurisha mo kongo bamuronjee imbu bweba eMyomba. 28Simioni waangirira emwana Yesu mu mine, watata Ongo, weba mbu:
29«Eo ke Nyere Kuritu,
umabereresha ebwaraanga ǒngo,
ngie umanireke ani mukori wabe
nikwe rani mu buhoro,
30bushwa namisungire ani kisine emuramya watuka kuri ǒngo,
31ingu watayarishanga ǒngo mu makako ebea bati,
32na ngo Muramya ng'usebeseyo echaka ch'ebyuo,
nae ng'waserishayo ebusime mu bea babe Baisiraeri.»
33Mu rirukira ebinwa mbyo ebyebange Simioni bushwa n'emwana, ebabuti ba Yesu bashishara. 34Simioni wakasane bo, were Maria, nina w'emwana mbu: «Emwana uno wamabutwa kongo wakiria n'isimanya bea bingi ku Isiraeri. Wasebese kiteerere chatuka kwa Ongo ekisetinwa n'ebea, 35kongo emihaki y'ebea bingi eyarebiswa itabukare. Na ǒngo Maria, ukurukirayo bwae buri mwea wasoswa itumo mu mutima.»
Emutahwa Ana
36Kwabesenga mutahwa uma mumina, erina rae Ana, kikumi cha Fanueri, w'eruanda rwa Aseri. Wabesenga nti wamakunguha nguru. Warikanga na moke myaka irinda ho itukire babingana. 37Kuruma nampo, wamana myaka makumi munani na inye mu bushumbakari. Warika mu Numba ya Ongo nti umukorengi mutu na mumwishi, nt'urekenga ebio na nti uhemange. 38Weya mu ntambi njo, wabucha itata Ongo. Watura emyasi y'emwana kuri ebea bati ebabesenga barindirengi imbu busekiayo Ongo washukaya ebea ba ku Yerusaremu.
Ebabuti ba Yesu bakuruka ku Nasareti
39Ebabuti ba Yesu barekia bamakinda ironja imbu bweba eMyomba ya Nyere Kuritu, bakuruka hima nae mu chuo cha ku Ngariraya, murubungu rwabo rwa ku Nasareti.
40Emwana ngo wabesenga woshukange n'ibese na maa, nti urisere butesa, n'enchumo ya Ongo yabesenga hima nae.
Yesu mu Numba ya Ongo
41Kira mwaka, ebabuti ba Yesu nti bendanga ku Yerusaremu mu rotu rukiri rw'ePasaka.
42Yesu warekia wabese na myaka ikumi na ibi, wenda hima nabo ekunkumanano y'erotu rukiri itukana n'emwenjo w'eBayuta#2.42 EkuBayuta, emwana wamarumisha myaka ikumi na ibi, nti timwana tu. Ngerieba mbu ngie wamukomenwǎ ieya hari ebamakunguhe mu binwa bya Ongo.. 43Ematu ePasaka arekia ameta, bakuruka ku kwabo, ina emwana Yesu iwe wasia ku Yerusaremu n'ebabuti bae nti tibosi. 44Babesenga banikirange mbu kuti uri hima nambi ebendanga nabo. Barekia bamenda uendo rw'otu ruma, babucha imusondekanyie kuri banachabo na kuri mbi bamosi. 45Ina bushwa ntíbamusunganga, bakuruka tu ku Yerusaremu nti bamusondekanyange. 46Kuruma na matu ashatu, bamukumana mu Numba ya Ongo, nt'warika munkati n'ebahani b'eMyomba, nti urukirange bo n'ishisha bo binwa. 47N'ebati mbi bamurukiranga bashishara murisunga ebwenge bwae n'emisubyo yae. 48Ebabuti bae barekia bamamusunga, bashishara nguru. Nina wamushisha mbu: «Emwana'ni, bushwanki utukore biri buno? Ani na iso twamakusonda na nti twatingirwa na koha.» 49Yesu wasako bo mbu: «Banu munisonderengi inki? Ntibanu mosi rero mbu rakomenwa nibesi mu numba ya Tita?» 50Ina batateereri ekinwa ncho chakianga were bo.
51Ngerikia ke Yesu wakuruka hima nabo ku Nasareti, wenderana irukire bo. Nina wabesenga nt'usubukianga ebinwa biti mbyo kumunda n'emutima wae. 52Yesu wenderana ibese na butesa, nt'oshukange n'ikokomya Ongo hima n'ebea.
လက္ရွိေရြးခ်ယ္ထားမွု
Ruka 2: nyj
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
2025 GAPLCDI, Group of Associations for the Promotion of Languages, Cultures for Integral Development