Ruka 17
17
Yesu uhanange bushwa n'esansambi n'emusasiro
(Mat 18.6-7,21-22; Mar 9.42)
1Yesu were ebanafunsi bae mbu: «Ebinwa byerikiria ebea mu sansambi bisenda bibesengi ho ko, ina emwea ngu usingwange bampe bakire mu sansambi waherwa! 2Rakomenwa rero kuri emwea ngo waminwe osho mu rikoti n'imutaa mu nyansa, kukia wakiria uma mumbi ebakeke bano.#17.2 Hano, kuri bea bima bahakange mbu ebakeke mbo nti nge bari n'erisimira rikeke. 3Mukohyanga! Kuba munakinu wakora kibi umuhananga. Na kuba wasia ebubi bwae umusasiranga. 4Kuba wakuronjee bubi meta arinda mu rotu na ukweyerengi ho meta arinda kakukonga musasiro, umusasiranga ho.»
Yesu uhanange bushwa n'erisimira
5Kuruma nampo, esantumwa sere Nyere Kuritu mbu: «eNyere Kuritu, tuongereri erisimira.» 6Nae wasako mbu: «Kuba mumabesengi n'isimira rirengekane n'ekambuto k'eharandari, mumakochange iere emuti uno mbu wikutu mpo hari o, na wendi kwikome mu nyansa, na o wamuburukirengi.»
Emukobe wahwa ikore nyere kurwabo
7Yesu weba tu mbu: «Kuba uma mu banu uri na mukobe umuhingengi abe umurangengi bituana, entambi wamusunga ukurukange ekwishwa, mbeni nyere kurwabo wamumushishǎ mbu weye na warɨse? 8Anga! Buno nge busemwire we: ‹Nironjei kasa bio, kuruma nampo mbara nchangi sakoma kongo unishee ebio. Entambi nji nasekinda irisa n'iomo, n'ongo ke nturisa n'iomo.› 9Mbeni banu mwanikirange mbu nyere kurwabo w'emukori ngo wamamutata bushwa mbu wakukora ebyakumwirenga we? Anga! 10Nge bubo hotu na banu. Entambi mukora biti ebwakubuhema Ongo ikora, mwendi mweba mbu: ‹Bate bakobe ho busa, twamakora ho imbi ebyakongwa bate ikora.›»
Yesu waramya babembi ikumi
11Yesu wakianga wendange ku Yerusaremu, wetere mu byati by'echuo cha ku Samaria na cha ku Ngariraya. 12Entambi wakianga wamakime mu kubungu kima, babembi ikumi beya kuri we. Basimana kore nae,#17.12 Itukana n'eMyomba ya Musa, emubembi ntwakomenwanga ieya kwihi n'ebea. Soma Bar 13.46. 13na nti bakuange mbu: «eYesu Nyere Kuritu, tukwiri bonso!»
14Yesu warekia wamasunga bo, were bo mbu: «Mwendi kishea kuri ebakuhani.» Barekia bendange ko, barama. 15-16Uma mu bo wabesenga Musamaria. eMusamaria ngo warekia wamasunga mbu wamarama, iwe wakuruka kuri Yesu na nt'utatange Ongo mu murenge mukiri. Windamya embaso yae kwansi mu makako a Yesu. 17Nampo ke Yesu washisha mbu: «Mbeni ntí bea ikumi nge bakurama? Ebampe mwenda bari kuni? 18Mbeni kusira umpe munkati nabo wakuruka katata Ongo irenga emweni uno?» 19Yesu were eMusamaria ngo mbu: «Simana, iiri rabe. Erisimira rabe ramakuramya.»
Buni nge buseyayo eMwana w'eMwea
(Mat 24.23-28,37-41)
20Kuruma nampo, eBafarisayo bashisha Yesu mbu: «Mbeni eBwami bwa Ongo buseyayo mu ani matu?»
Wasako bo mbu: «eBwami bwa Ongo butangeya buri kikai kisungwange mu meso. 21Kusira mwea wasebayo mbu: ‹Mukai, nge buno!› Abe: ‹Nge bubo!› Murukire, eBwami mbo ngie buri munkati ninu.»
22Kuruma nampo, Yesu were ebanafunsi bae mbu: «Kuseyayo ntambi nji mukusondekanyayo inisunga ani eMwana w'eMwea, nakiro mu otu ruma ho, ina mutunisungiyo. 23Ebea basebwireyo mbu: ‹Mukai, nge uo kuko!› Abe mbu: ‹mukai, nge uno kuno!› Ina kiro mumisayo bo. 24Bushwa mbu ani eMwana w'eMwea nasekia nakuruka, nisesungwayo buri kimpenya bukianga chasungwa mu sankaro siti n'irisha chaka mu chuo kiti. 25Ina nakomenwa kasa inuba nguru n'itinwa n'ebea b'ekiranga kino. 26Ebyabesenga mu matu a Noa, nge bisebeseyo hotu mu matu ngi asekiayo ani eMwana w'eMwea nauruka. 27Bushwa mbu mu matu ngo, ebea babesenga barisange n'iomo, babingange n'ibingwa ieya na mu rotu ndu rwakianga Noa wakime mu bwato. Nampo, mbura nyankende yake, yarisia echuo n'ishiria ebea bati. 28Ngebumbo bwabesenga hotu mu biranga bya Roti. Ebea babesenga barisange n'iomo, nti bachurange n'ichuya, nti bekange n'iumba. 29Ina erotu rwakianga Roti watuka ku Sondoma, Ongo wahicha rungere rwa kasha ituka mu mbingu n'ishiria ebea bati.#17.29 Soma Ntan 18.20-33; 19.1-25. 30Ngebumbo hotu busebeseyo erotu ruseyayo ani eMwana w'eMwea.
31«Erotu ndo, kuba mwea uri hamambio watasikiyo tu mwikime mu numba mbu waringe mo bikai. Na kuba mwea usebeseyo ekwishwa watakurukiyo tu ku kwae. 32Mwanikiranga mukari wa Roti#17.32 Soma Ntan 19.26.! 33Kinsi mwea ngu wasehunayo iranga ebuingo bwae, waseriminyayo bo. Ina ingu waseriminyayo bo, waseramyayo bo. 34Nibwirengi banu: Bea babi basebeseyo mu ntange nima mutu, uma waseringwayo na umpe wasesiayo mpo. 35Bamina babi basebeseyo boorange hima, uma waserierwayo na umpe wasesiayo. [ 36Bea babi basebeseyo mwishwa rima, uma waserierwayo na umpe wasesiayo.]»
37Ebanafunsi bamushisha mbu: «eNyere Kuritu, mbeni ebinwa bino bisetayo kuni?»
Yesu wasako bo mbu: «Ehasebeseyo ekinda nge hasekiayo esanju sakumanana.»
လက္ရွိေရြးခ်ယ္ထားမွု
Ruka 17: nyj
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
2025 GAPLCDI, Group of Associations for the Promotion of Languages, Cultures for Integral Development