Mateyu 12
12
Ɛnwomenlelielɛ Kenle ne amenle
1Mekɛ ne anu, mɔɔ ɛnee Gyisɛse nee ye ɛdoavolɛma ne mɔ bɛlua abɛlɛ ɛya bie anu wɔ Ɛnwomenlelielɛ Kenle ne, mɔɔ le Dwuuma ɛzonlenlɛ kenle ne la, ɛhɔne hunle ye ɛdoavolɛma ne mɔ; ɛhye ati bɛbubule abɛlɛ ne bie bɛlile.
2Na Falasiima ne mɔ bie nwunle bɛ la, ɛya hunle bɛ na bɛzele ye kɛ, “Wɔ ɛdoavolɛma ne mɔ bɛyɛ mɔɔ ɛnva mɛla nu a. Bɛbubu aleɛ wɔ Ɛnwomenlelielɛ Kenle ne.”
3Na Gyisɛse buale bɛ kɛ, “Bɛtɛkengale deɛ mɔɔ Belemgbunli Devidi yɛle wɔ mekɛ mɔɔ ɛhɔne hunle ɔdaye nee ɔ gɔnwo mɔ la ɔ? 4Ɔhɔle Asɔne sua ne anu, na bɛlile kpanwo nwuanzanwuanza ne mɔɔ azɛlɛvolɛ ne mɔ angomekye ala a bɛmaa bɛ adenle kɛ bɛli la. Ɛhye noko tia mɛla ne. 5Anzɛɛ bɛtɛkengale ye wɔ Mosisi mɛla ne anu kɛsi mɔɔ azɛlɛvolɛ ne mɔ mɔɔ wɔ gyima nu wɔ Asɔne sua ne anu la yɛ gyima wɔ Ɛnwomenlelielɛ Kenle ne la ɔ? 6Na nɔhalɛ nu, awie ko wɔ ɛke mɔɔ ɔle kpole ɔtɛla Asɔne sua ne a! 7Na saa bɛdele zɛhae Nyamedwɛkɛ kpɔkɛ ne mɔɔ se, ‘Mekulo kɛ bɛse anwunvɔne kpalɛ, bɛtɛla bɛ azubɔlɛ mɔɔ mekpondɛ la’ abo a, anrɛɛ bɛnrɛbua bɛdabɛ mɔɔ bɛnli fɔlɛ la fɔlɛ. 8Ɔluakɛ, Sonla Ra ne le Ɛnwomenlelielɛ Kenle ne noko amenle.”
9Na ɔvile ɛkɛ ne ɔhɔle na akee ɔhɔle ayia sua ne anu, 10Na ɔnwunle nrenyia ko mɔɔ asa ko ɛdwe la wɔ ɛkɛ. Na Falasiima ne mɔ bizale Gyisɛse kɛ, “Ɔfa mɛla adenle zo kɛ bɛkɛyɛ ayile wɔ Ɛnwomenlelielɛ Kenle ne ɔ?” Nɔhalɛ, ɛnee bɛlɛ anyelazo kɛ ɔkɛze kɛ, “ɛhɛe”, na bɛ sa aha ye bɛahye ye. 11Na ye nyelebɛnloa mɔɔ ɔvale ɔmaanle bɛ la a le ɛhye: “Saa bɛ boane ko pɛ ala na ɔtɔ, bula nu wɔ Ɛnwomenlelielɛ Kenle ne anu a, ɛnrɛyɛ gyima kenle ko ne ɔnrɛlie ye ngoane anzɛɛ ɛnrɛzɔ ye nu ɛnrɛmaa ye zo ɔ? Nɔhalɛ, ɛbaye. 12Anzɛɛ sonla ɛnzonle bolɛ ɛndɛla boane ɔ? Nɔhalɛ, ɔle kpalɛ kɛ ɛkɛyɛ kpalɛ wɔ Ɛnwomenlelielɛ Kenle ne.” 13Akee ɔzele nrenyia ne kɛ, “Tenrɛ ɛ sa kpɔma ne.” Na ɔbɔle ɔ bo kɛ ɔyɛ la, ɔ sa ne yɛle kpalɛ kɛ ko ne ala la pɛ.
14Na akee Falasiima ne mɔ vɛlɛle ayia kɛ bɛfa Gyisɛse ɛhyelɛ nee ye ɛhunlɛ nwo akpame. 15Noko akee ɔnwunle bɛ adwenle, na ɔvile ayiasua ne anu, na menli dɔɔnwo ne ala doale ye. Ɔyɛle bɛ nuhua ne mɔ mɔɔ bɛnde kpɔkɛ la ayile, 16na ɔbɔle bɛ kɔkɔ, kɛ bɛmmafa nwanwanedeɛ ne mɔɔ yeyɛ la anwo edwɛkɛ bɛkponde. 17Ɛhye maanle Ayezaya kapezonli ne edwɛkɛ ne mɔɔ ɔhanle mɔɔ fale ɔ nwo la yɛle zɔ, kɛ: 18“Nea me sonvolɛ ne mɔɔ meye ye la. Yemɔ a le me Ra ne mɔɔ mekulo ye na me ɛkɛla ne anye Sɔ ye a. Mebava me sunsum ne meagua ɔ nwo zo, na yeabua maanle maanle ndɛne. 19Ɔnrɛho anzɛɛ ɔnredeɛdea nu na awie biala ade ɔ ne wɔ awɔlɔne ne mɔ azo. 20Ɔnrɛbubu menli mɔɔ anwo ɛbɛlɛ bɛ la, anzɛɛ ɔnrɛmaa bɛ anyelazo ekyi ne bɔbɔ ɛnrɛyɛ gyɛne; ɔbamaa mgbonde muala abɔ aze kɔkpula mekɛ mɔɔ ɔkɛmaa ndɛnebualɛ kɛli konim wɔ amozi kenle ne la anu; 21na ye duma bayɛ ewiade amra kosooti bɛ anyelazo.”
22Akee bɛvale nrenyia mumule, anyezinliravolɛ bie mɔɔ sunsum evinli ɛwolo ye nu la bɛrɛlɛle Gyisɛse, na Gyisɛse yɛle ye ayile ɔmaanle ɔdendɛle na ɔnwunle debie. 23Na ɔyɛle menli dɔɔnwo ne ala azibɛnwo na bɛdeɛdeanle nu na bɛzele kɛ, “Wɔannea a ɔkɛyɛ kɛ, Gyisɛse yɛɛ a le Ngoanedievolɛ ne a.”
24Na mɔɔ Falasiima ne mɔ dele nwanwanedeɛ ne anwo edwɛkɛ la bɛzele kɛ, “Ɔkola ɔtu mbɔnsam ɔluakɛ ɔdaye mumua ne ɔle Biyɛlezɛbɛle, mbɔnsam bɛ kpanyinli.”
25Gyisɛse nwunle bɛ adwenle ne mɔ, na ɔbuale nwolɛ kɛ, “Belemgbunli maanle biala ko tia ɔ nwo a maanle ne ɛngola ɛngyinla; ɔbubu dwɔkɔdwɔkɔ, yɛɛ sua kpole anzɛɛ aako mɔɔ nuhua menli noko ko tia bɛ nwo la ɛngola ɛngyinla. 26Ɔti saa Abɔnsam tu ɔ gɔnwo Abɔnsam a, ɛnee ɔlɛko yeatia ɔ ngomekye ɔ nwo, na eza ɔlɛsɛkye ɔdaye ɔ ngome ye belemgbunli maanle. 27Na saa mame melua Biyɛlezɛbɛle anwo zo, anzɛɛ mbɔnsam tumi zo a metu mbɔnsam a, ɛnee duzu tumi a bɛ mra ne mɔ dua zo tu mbɔnsam a? Ɛhye ati bɛmɛ a bɛbayɛ bɛ ndɛnebuavolɛma a. 28Na saa melua Nana Nyamenle Sunsum duma nu yɛɛ metu mbɔnsam a, ɛnee Nana Nyamenle Anwuma belemgbunli maanle ne ɛnyia ɛra bɛ avinli. 29Kɛ ɔkɛyɛ na sonla ahola awolo sonla mɔɔ anwo yɛ se la sua nu ahɔwua ye ninyɛne ɛ? Kyesɛ ɔdumua ɔkyekye ye kolaa. 30Awie biala mɔɔ ɛmboa me la ɛnee ɔtia me.
31-32“Awie biala mɔɔ kɛdendɛ kɛtia me bɔbɔ, anzɛɛ kɛyɛ ɛtane gyɛne biala la, bɛbava ye ɛtane bɛahyɛ ye; na emomu, awie biala mɔɔ kɛdendɛ kɛtia Sunsum Nwuanzanwuanza ne la ɔnrɛnyia ɛtane fakyɛ ɛlɛ wɔ ewiade ɛhye anu anzɛɛ ewiade ne mɔɔ bara la anu.
33“Bɛnea baka ye ma na bɛanwu ye baka holɛ. Baka mɔɔ vi mbaka ekpunli kpalɛ nu la so ma kpalɛ; na mbaka mɔɔ vi ekpunli ɛtane nu la ɛnzo ma kpalɛ. 34Nwɔlɛ mɔɔ le kɛ bɛmɛ! Kɛ ɔkɛyɛ na bɛadendɛ boɛ, wɔ mekɛ mɔɔ bɛle ɛtanevolɛma la ɛ? Ɔluakɛ mɔɔ ɛbu zo wɔ sonla ye ahonle nu la, yemɔ a ɔ nloa ka a. 35Sonla kpalɛ biala ye ɛdendɛlɛ a maa ye ninyɛne kpalɛ ne mɔɔ vea ye nu la da ali a. Sonla mɔɔ ye ahonle nu le evinli la, ayidane ɛyi ye tɛkɛɛ, na ye ɛdendɛlɛ noko kile. 36Na meka meahile bɛ kɛ, bɛbabu edwɛkɛ mgbane biala mɔɔ bɛhanle la anwo mgbonda wɔ Ndɛnebualɛ Kenle ne. 37Bɛ ɛdendɛlɛ yɛɛ bahile bɛ gyinlabelɛ a; ɔboalekɛ wɔ edwɛkɛ zo, yɛɛ bɛbanlea nwo bɛabua wɔ benle a; yɛɛ wɔ edwɛkɛ zo noko yɛɛ bɛbanlea nwo bɛabua wɔ fɔlɛ a.”
Yɛ maa yɛnlea
38Kenle ko bie Dwuuma mgbanyima ne mɔ bie mɔɔ Falasiima bie mɔ boka nwo la rale Gyisɛse anwo ɛkɛ na bɛzele ye kɛ, “Kilehilevolɛ, yɛ nwanwane debie maa yɛnlea.”
39-40Gyisɛse noko buale bɛ zele kɛ, “Kyesɛ munzule maanle mɔɔ ɛnlɛ diedi la ala na akpondɛ sɛkɛlɛneɛ; na bɛnrɛhile bɛ nuhua biala sɛkɛlɛneɛ biala, kɛ kapezonli Dwona sɛkɛlɛneɛ ne angome! Na kɛsi Dwona lile kenle kɔkɔlɛ nsa alehyenlɛ nee aledwolɛ wɔ nyevizonle kunlu la, zɔhane ala noko yɛɛ Mame Ngoanedievolɛ ne mebali kenle nsa alehyenlɛ nee aledwolɛ wɔ azɛlɛ ye abo a. 41Nenɛvɛ maanlema ne badwazo maanle ɛhye anwo zo wɔ ndɛnebualɛ mekɛ na bɛabua bɛ fɔlɛ. Ɔluakɛ mekɛ mɔɔ Dwona hanle Nyamedwɛkɛ ne hilele bɛ la bɛnlunle bɛ nwo, na bɛliele Nyamenle bɛlile, na bɛhwenle bɛ nwo bɛvile bɛ ɛtane ne mɔ anu. Na nea, mɔɔ le kpole tɛla Dwona la wɔ ɛke, noko akee bɛkpo kɛ bɛkɛlie ye bɛkɛli. 42Hyiba Belemgbunli Raalɛ ne badwazo maanle ɛhye anwo zo wɔ ndɛnebualɛ mekɛ ne, na yeabua bɛ fɔlɛ. Ɔluakɛ ɔvi maanle zo moamoa nehane ɔrale ɔradiele Sɔlɔmɔn nrɛlɛbɛ edwɛkɛ ne; na kɛkala bɔbɔ, mɔɔ le kpole tɛla Sɔlɔmɔn la wɔ ɛke noko akee bɛkpo kɛ bɛkɛlie ye bɛkɛli.
43-45“Munzule maanle ɛhye le kɛ nrenyia bie mɔɔ sunsum evinli ɛwolo ye nu la. Ɔluakɛ saa sunsum evinli ne fi ye nu a zɔhane sunsum ko ne ala kɔ ɛsɛlɛ ne mɔ azo ɔkɔkpɔsa kɛ ɔkalie ɔ menle bie, na saa yeannyia ɛleka a akee ɔse kɛ, ‘Mebazia meahɔ nrenyia ne mɔɔ menvile ye lɔ membale la ɛkɛ.’ Ɔti ɔsia ɔba a, ɔbato ahonle ne mgbane, ɔluakɛ bɛkpoɔkpoa nu na bɛziezie nuhua! Akee sunsum evinli ne sia kɔ na ɔfɛlɛvɛlɛ sunsum gyɛne nsuu mɔɔ yɛ se tɛla ye la maa bɛba na bɛ muala bɛbatɛnla nrenyia ne nu. Na akee nrenyia ne tɛnlabelɛ nu yɛ ɛtane bo dɛba ne anwo zo.”
46-47Mɔɔ Gyisɛse wɔ zo mɔɔ ɔtendɛ yeahile menli dɔɔnwo bie wɔ sua bie anu la, ɛnee ɔ nli nee ɔ mediema ne mɔ gyi su ne anzi na bɛkpondɛ kɛ bɛ nee ye tendɛ. Na mɔɔ bɛzele kɛ ɔ nli nee ɔ mediema ne mɔ kpondɛ ye la 48ɔzele kɛ, “Ɔmɔ a le nwane? Yɛɛ me mediema ne mɔ noko a le nwane mɔ?” 49Akee ɔdendenle ɔ sa wɔ ɛdoavolɛma ne mɔ anwo zo, na ɔzele kɛ, “Bɛnlea! ɛhye mɔ yɛɛ a le me nli nee me mediema a.” 50Akee ɔvale ɔzɔle zolɛ kɛ, “Awie biala mɔɔ yɛ me Ze ne mɔɔ wɔ anwuma la ɛhulolɛdeɛ la le me diema nrenyia, me diema raalɛ nee ɔmɔ!”
လက္ရွိေရြးခ်ယ္ထားမွု
Mateyu 12: ONEN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
Mateyu 12
12
Ɛnwomenlelielɛ Kenle ne amenle
1Mekɛ ne anu, mɔɔ ɛnee Gyisɛse nee ye ɛdoavolɛma ne mɔ bɛlua abɛlɛ ɛya bie anu wɔ Ɛnwomenlelielɛ Kenle ne, mɔɔ le Dwuuma ɛzonlenlɛ kenle ne la, ɛhɔne hunle ye ɛdoavolɛma ne mɔ; ɛhye ati bɛbubule abɛlɛ ne bie bɛlile.
2Na Falasiima ne mɔ bie nwunle bɛ la, ɛya hunle bɛ na bɛzele ye kɛ, “Wɔ ɛdoavolɛma ne mɔ bɛyɛ mɔɔ ɛnva mɛla nu a. Bɛbubu aleɛ wɔ Ɛnwomenlelielɛ Kenle ne.”
3Na Gyisɛse buale bɛ kɛ, “Bɛtɛkengale deɛ mɔɔ Belemgbunli Devidi yɛle wɔ mekɛ mɔɔ ɛhɔne hunle ɔdaye nee ɔ gɔnwo mɔ la ɔ? 4Ɔhɔle Asɔne sua ne anu, na bɛlile kpanwo nwuanzanwuanza ne mɔɔ azɛlɛvolɛ ne mɔ angomekye ala a bɛmaa bɛ adenle kɛ bɛli la. Ɛhye noko tia mɛla ne. 5Anzɛɛ bɛtɛkengale ye wɔ Mosisi mɛla ne anu kɛsi mɔɔ azɛlɛvolɛ ne mɔ mɔɔ wɔ gyima nu wɔ Asɔne sua ne anu la yɛ gyima wɔ Ɛnwomenlelielɛ Kenle ne la ɔ? 6Na nɔhalɛ nu, awie ko wɔ ɛke mɔɔ ɔle kpole ɔtɛla Asɔne sua ne a! 7Na saa bɛdele zɛhae Nyamedwɛkɛ kpɔkɛ ne mɔɔ se, ‘Mekulo kɛ bɛse anwunvɔne kpalɛ, bɛtɛla bɛ azubɔlɛ mɔɔ mekpondɛ la’ abo a, anrɛɛ bɛnrɛbua bɛdabɛ mɔɔ bɛnli fɔlɛ la fɔlɛ. 8Ɔluakɛ, Sonla Ra ne le Ɛnwomenlelielɛ Kenle ne noko amenle.”
9Na ɔvile ɛkɛ ne ɔhɔle na akee ɔhɔle ayia sua ne anu, 10Na ɔnwunle nrenyia ko mɔɔ asa ko ɛdwe la wɔ ɛkɛ. Na Falasiima ne mɔ bizale Gyisɛse kɛ, “Ɔfa mɛla adenle zo kɛ bɛkɛyɛ ayile wɔ Ɛnwomenlelielɛ Kenle ne ɔ?” Nɔhalɛ, ɛnee bɛlɛ anyelazo kɛ ɔkɛze kɛ, “ɛhɛe”, na bɛ sa aha ye bɛahye ye. 11Na ye nyelebɛnloa mɔɔ ɔvale ɔmaanle bɛ la a le ɛhye: “Saa bɛ boane ko pɛ ala na ɔtɔ, bula nu wɔ Ɛnwomenlelielɛ Kenle ne anu a, ɛnrɛyɛ gyima kenle ko ne ɔnrɛlie ye ngoane anzɛɛ ɛnrɛzɔ ye nu ɛnrɛmaa ye zo ɔ? Nɔhalɛ, ɛbaye. 12Anzɛɛ sonla ɛnzonle bolɛ ɛndɛla boane ɔ? Nɔhalɛ, ɔle kpalɛ kɛ ɛkɛyɛ kpalɛ wɔ Ɛnwomenlelielɛ Kenle ne.” 13Akee ɔzele nrenyia ne kɛ, “Tenrɛ ɛ sa kpɔma ne.” Na ɔbɔle ɔ bo kɛ ɔyɛ la, ɔ sa ne yɛle kpalɛ kɛ ko ne ala la pɛ.
14Na akee Falasiima ne mɔ vɛlɛle ayia kɛ bɛfa Gyisɛse ɛhyelɛ nee ye ɛhunlɛ nwo akpame. 15Noko akee ɔnwunle bɛ adwenle, na ɔvile ayiasua ne anu, na menli dɔɔnwo ne ala doale ye. Ɔyɛle bɛ nuhua ne mɔ mɔɔ bɛnde kpɔkɛ la ayile, 16na ɔbɔle bɛ kɔkɔ, kɛ bɛmmafa nwanwanedeɛ ne mɔɔ yeyɛ la anwo edwɛkɛ bɛkponde. 17Ɛhye maanle Ayezaya kapezonli ne edwɛkɛ ne mɔɔ ɔhanle mɔɔ fale ɔ nwo la yɛle zɔ, kɛ: 18“Nea me sonvolɛ ne mɔɔ meye ye la. Yemɔ a le me Ra ne mɔɔ mekulo ye na me ɛkɛla ne anye Sɔ ye a. Mebava me sunsum ne meagua ɔ nwo zo, na yeabua maanle maanle ndɛne. 19Ɔnrɛho anzɛɛ ɔnredeɛdea nu na awie biala ade ɔ ne wɔ awɔlɔne ne mɔ azo. 20Ɔnrɛbubu menli mɔɔ anwo ɛbɛlɛ bɛ la, anzɛɛ ɔnrɛmaa bɛ anyelazo ekyi ne bɔbɔ ɛnrɛyɛ gyɛne; ɔbamaa mgbonde muala abɔ aze kɔkpula mekɛ mɔɔ ɔkɛmaa ndɛnebualɛ kɛli konim wɔ amozi kenle ne la anu; 21na ye duma bayɛ ewiade amra kosooti bɛ anyelazo.”
22Akee bɛvale nrenyia mumule, anyezinliravolɛ bie mɔɔ sunsum evinli ɛwolo ye nu la bɛrɛlɛle Gyisɛse, na Gyisɛse yɛle ye ayile ɔmaanle ɔdendɛle na ɔnwunle debie. 23Na ɔyɛle menli dɔɔnwo ne ala azibɛnwo na bɛdeɛdeanle nu na bɛzele kɛ, “Wɔannea a ɔkɛyɛ kɛ, Gyisɛse yɛɛ a le Ngoanedievolɛ ne a.”
24Na mɔɔ Falasiima ne mɔ dele nwanwanedeɛ ne anwo edwɛkɛ la bɛzele kɛ, “Ɔkola ɔtu mbɔnsam ɔluakɛ ɔdaye mumua ne ɔle Biyɛlezɛbɛle, mbɔnsam bɛ kpanyinli.”
25Gyisɛse nwunle bɛ adwenle ne mɔ, na ɔbuale nwolɛ kɛ, “Belemgbunli maanle biala ko tia ɔ nwo a maanle ne ɛngola ɛngyinla; ɔbubu dwɔkɔdwɔkɔ, yɛɛ sua kpole anzɛɛ aako mɔɔ nuhua menli noko ko tia bɛ nwo la ɛngola ɛngyinla. 26Ɔti saa Abɔnsam tu ɔ gɔnwo Abɔnsam a, ɛnee ɔlɛko yeatia ɔ ngomekye ɔ nwo, na eza ɔlɛsɛkye ɔdaye ɔ ngome ye belemgbunli maanle. 27Na saa mame melua Biyɛlezɛbɛle anwo zo, anzɛɛ mbɔnsam tumi zo a metu mbɔnsam a, ɛnee duzu tumi a bɛ mra ne mɔ dua zo tu mbɔnsam a? Ɛhye ati bɛmɛ a bɛbayɛ bɛ ndɛnebuavolɛma a. 28Na saa melua Nana Nyamenle Sunsum duma nu yɛɛ metu mbɔnsam a, ɛnee Nana Nyamenle Anwuma belemgbunli maanle ne ɛnyia ɛra bɛ avinli. 29Kɛ ɔkɛyɛ na sonla ahola awolo sonla mɔɔ anwo yɛ se la sua nu ahɔwua ye ninyɛne ɛ? Kyesɛ ɔdumua ɔkyekye ye kolaa. 30Awie biala mɔɔ ɛmboa me la ɛnee ɔtia me.
31-32“Awie biala mɔɔ kɛdendɛ kɛtia me bɔbɔ, anzɛɛ kɛyɛ ɛtane gyɛne biala la, bɛbava ye ɛtane bɛahyɛ ye; na emomu, awie biala mɔɔ kɛdendɛ kɛtia Sunsum Nwuanzanwuanza ne la ɔnrɛnyia ɛtane fakyɛ ɛlɛ wɔ ewiade ɛhye anu anzɛɛ ewiade ne mɔɔ bara la anu.
33“Bɛnea baka ye ma na bɛanwu ye baka holɛ. Baka mɔɔ vi mbaka ekpunli kpalɛ nu la so ma kpalɛ; na mbaka mɔɔ vi ekpunli ɛtane nu la ɛnzo ma kpalɛ. 34Nwɔlɛ mɔɔ le kɛ bɛmɛ! Kɛ ɔkɛyɛ na bɛadendɛ boɛ, wɔ mekɛ mɔɔ bɛle ɛtanevolɛma la ɛ? Ɔluakɛ mɔɔ ɛbu zo wɔ sonla ye ahonle nu la, yemɔ a ɔ nloa ka a. 35Sonla kpalɛ biala ye ɛdendɛlɛ a maa ye ninyɛne kpalɛ ne mɔɔ vea ye nu la da ali a. Sonla mɔɔ ye ahonle nu le evinli la, ayidane ɛyi ye tɛkɛɛ, na ye ɛdendɛlɛ noko kile. 36Na meka meahile bɛ kɛ, bɛbabu edwɛkɛ mgbane biala mɔɔ bɛhanle la anwo mgbonda wɔ Ndɛnebualɛ Kenle ne. 37Bɛ ɛdendɛlɛ yɛɛ bahile bɛ gyinlabelɛ a; ɔboalekɛ wɔ edwɛkɛ zo, yɛɛ bɛbanlea nwo bɛabua wɔ benle a; yɛɛ wɔ edwɛkɛ zo noko yɛɛ bɛbanlea nwo bɛabua wɔ fɔlɛ a.”
Yɛ maa yɛnlea
38Kenle ko bie Dwuuma mgbanyima ne mɔ bie mɔɔ Falasiima bie mɔ boka nwo la rale Gyisɛse anwo ɛkɛ na bɛzele ye kɛ, “Kilehilevolɛ, yɛ nwanwane debie maa yɛnlea.”
39-40Gyisɛse noko buale bɛ zele kɛ, “Kyesɛ munzule maanle mɔɔ ɛnlɛ diedi la ala na akpondɛ sɛkɛlɛneɛ; na bɛnrɛhile bɛ nuhua biala sɛkɛlɛneɛ biala, kɛ kapezonli Dwona sɛkɛlɛneɛ ne angome! Na kɛsi Dwona lile kenle kɔkɔlɛ nsa alehyenlɛ nee aledwolɛ wɔ nyevizonle kunlu la, zɔhane ala noko yɛɛ Mame Ngoanedievolɛ ne mebali kenle nsa alehyenlɛ nee aledwolɛ wɔ azɛlɛ ye abo a. 41Nenɛvɛ maanlema ne badwazo maanle ɛhye anwo zo wɔ ndɛnebualɛ mekɛ na bɛabua bɛ fɔlɛ. Ɔluakɛ mekɛ mɔɔ Dwona hanle Nyamedwɛkɛ ne hilele bɛ la bɛnlunle bɛ nwo, na bɛliele Nyamenle bɛlile, na bɛhwenle bɛ nwo bɛvile bɛ ɛtane ne mɔ anu. Na nea, mɔɔ le kpole tɛla Dwona la wɔ ɛke, noko akee bɛkpo kɛ bɛkɛlie ye bɛkɛli. 42Hyiba Belemgbunli Raalɛ ne badwazo maanle ɛhye anwo zo wɔ ndɛnebualɛ mekɛ ne, na yeabua bɛ fɔlɛ. Ɔluakɛ ɔvi maanle zo moamoa nehane ɔrale ɔradiele Sɔlɔmɔn nrɛlɛbɛ edwɛkɛ ne; na kɛkala bɔbɔ, mɔɔ le kpole tɛla Sɔlɔmɔn la wɔ ɛke noko akee bɛkpo kɛ bɛkɛlie ye bɛkɛli.
43-45“Munzule maanle ɛhye le kɛ nrenyia bie mɔɔ sunsum evinli ɛwolo ye nu la. Ɔluakɛ saa sunsum evinli ne fi ye nu a zɔhane sunsum ko ne ala kɔ ɛsɛlɛ ne mɔ azo ɔkɔkpɔsa kɛ ɔkalie ɔ menle bie, na saa yeannyia ɛleka a akee ɔse kɛ, ‘Mebazia meahɔ nrenyia ne mɔɔ menvile ye lɔ membale la ɛkɛ.’ Ɔti ɔsia ɔba a, ɔbato ahonle ne mgbane, ɔluakɛ bɛkpoɔkpoa nu na bɛziezie nuhua! Akee sunsum evinli ne sia kɔ na ɔfɛlɛvɛlɛ sunsum gyɛne nsuu mɔɔ yɛ se tɛla ye la maa bɛba na bɛ muala bɛbatɛnla nrenyia ne nu. Na akee nrenyia ne tɛnlabelɛ nu yɛ ɛtane bo dɛba ne anwo zo.”
46-47Mɔɔ Gyisɛse wɔ zo mɔɔ ɔtendɛ yeahile menli dɔɔnwo bie wɔ sua bie anu la, ɛnee ɔ nli nee ɔ mediema ne mɔ gyi su ne anzi na bɛkpondɛ kɛ bɛ nee ye tendɛ. Na mɔɔ bɛzele kɛ ɔ nli nee ɔ mediema ne mɔ kpondɛ ye la 48ɔzele kɛ, “Ɔmɔ a le nwane? Yɛɛ me mediema ne mɔ noko a le nwane mɔ?” 49Akee ɔdendenle ɔ sa wɔ ɛdoavolɛma ne mɔ anwo zo, na ɔzele kɛ, “Bɛnlea! ɛhye mɔ yɛɛ a le me nli nee me mediema a.” 50Akee ɔvale ɔzɔle zolɛ kɛ, “Awie biala mɔɔ yɛ me Ze ne mɔɔ wɔ anwuma la ɛhulolɛdeɛ la le me diema nrenyia, me diema raalɛ nee ɔmɔ!”
လက္ရွိေရြးခ်ယ္ထားမွု
:
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.