YOANE 16
16
1«Nabala na nu bea tine osaka kinani edimeli. 2Bobudjeakabini ta ba Sinagoga. Edabi ta ehole emɔti eduabi, bato bowabini, balɛdjɛbi boo na bokɔ bea, basaleaka Ndjakomba. 3Bakɔkɔ bea tine baidjebaka Sesa ko mbi. 4Endolo nabalaka na nu bea, ehole ekimeabi, lɛdjɛni meako mibalaka mbi na nu.»
Mosala mo Mwembo Mosɛnɔke
«Nabalaka na nu meako mi donga mbangi, tine boo nadaka na nu.»
Mosala mo Mwembo Mosɛnɔke
Nabalakiti bea donga ta mbangi, tengasa nadaka na nu. 5Edɛdi, nakɛi adi yona olomani ko pɛ moto ta ndanda e bino obwani bohɔdjɔni: «Okɛi djɔɔ?» 6Endolo tine notɔndeini bea, ndjokwa elumi na nu ta milema. 7Enakobea, Mbi notɔndeini soti: edi bopele tine mbi boyana; na bea namiti yana, yona obwani bodua elenge Mobaeli abwaniti bodua. 8Endolo ehole eduabi yo, adjebedjabi adi bato mabunga ma bobo ta tina e mabe, ta bodjo ko ta bosambedja bo Ndjakomba#16, 8 Endja pongono ta Bik 24, 25.. 9Ta tina e modjɔ moendji bobe, edi tine boo batadimeakani#16, 9 Endja pongono ta 8, 21-24; 9, 41; 15, 22-24.; 10ta tine e modjɔ moendji bodjo, edi tine boo nakɛkɛ adi Sesa ko oenɛtebinini naikina; 11ta tine modjɔ moendji bodjo, edi tine boo mokondji o ngondo ye asambedjama ehele.
12«Nadi na meako minɛnɛ mi botɔndeani, endolo otabwanakeni bomihɔnɔ edɛdi. 13Ehole eduabi Mwembo mosoti, aodaledjabini ta bosoti bosusu. Abaletebi na kombe e nde mɛnɛ, endolo abalabi misusu imiokaka yo ko aotɔndeabini meako maduake. 14Ainedjabi ekumu e mbi, tengasa adiabi yena edi adi mbi ko aodjebedjakabini. 15Losusu lopeli Sesa lodi pongono lo mbi. Na tina emina nabali boo Mwembo atombakabi imidi adi mbi ko aodjebakabini.»
Ndjokwa ehombanabi sepi
16«Ngɔngɔ mweka otenɛkenini, namoehole mokɛkɛ oenɛkenini naikina.» 17Ekenge e batingami ba nde babaleanaka: «Apalaka yo abale nde? “Ngɔngɔ mweka otenɛkenini, na moehole mokɛkɛ oenɛkenini naikina”, ko pongono: “edi tine boo nakɛke adi Sesa.” 18Mibalo mi etingodjaka mo nde? “Na moehole mokɛkɛ” Lotasipoaka meako mabalaka yo.» 19Yesu asipoaka boo bapalaka bamohɔdje. Abalaka na bu: «Edi tine mibalo mi: ngɔngɔ mweka otenɛkenini, na moehole mokɛkɛ oenɛkenini naikina; wapalakani bosahɔdjɔ?» 20Okobea, nabalaka na nu, edi soti: oyeabini ko osatungeabini, enakobea bato ba ngondo badabi na sepi. Odabini na ndjokwa, endolo ndjokwa e bino ehombanabi sepi. 21Ehole ahombaka mwali abote, akaime bosatungea, tine boo ehole e nde e saya eimei. Endolo ehole eboti yo mwana, abosi saya isusu ko alumi na mongandi boenɛ boo moto adoi ta ngondo na ndjea e nde. 22Oko moda momina, ino pongono wasatungeakeni edɛdi. Endolo noenɛbini naikina ko milema mi bino misepabi, na bea moto o bokatoani sepi emina adaetebi. 23«Ehole eimeabi busa bomina, ohɔdjetebini nongo eka. Soti, nabalaka na nu, edi soti: Sesa aopabini misusu mihɔdjɔkɔbino ta kombe e mbi. 24Mbunoko edɛdi, opakitini ahɔdjɔ eka na kombe e mbi. Sengeni ko wadiakeni, na bea sepi e bino eimeake e bokoka.»
Yesu molongi o ngondo
25«Nabalaka na nu meako misusu na masɛ. Ehole eduake nataake bala naikina masɛ, endolo nodjebedjakeni bohu mɛnɛ ta tina e Sesa. 26Ta busa bomina, osɛngɛkɛbini Sesa na kombe e mbi; ko nabaliti na nu boo naongɔnɔke Sesa ta tina e bino, 27tengasa Sesa yo mɛnɛ akopaleni. Akopaleni tine boo ino okapalenini ko okadimeni boo nadonga adi Ndjakomba. 28Nadonga adi Sesa ko naimei ta ngondo. Edɛdi nadongi ta ngondo ko nasɔmbi adi Sesa.» 29Na bea batingami ba nde babalaka: «Endja edɛdi obali bohu mɛnɛ, napɛ bobala na masɛ! 30Edɛdi losipoi boo wɛ okadjebe meako misusu ko oditi na posa boamba bohɔdje. Na tina emina lodimi boo odonga adi Ndjakomba.» 31Yesu asɔmbedjaka: «Odimini edɛdi? 32Ehole edoi, eimei ehele, wapatanganakeni moto na moto ta dɔngɔ idonga yo, ko wakinakenini mbi mɛnɛ. Endolo naditi mbi mɛnɛ, tengasa Sesa adi na mbi engbanga. 33Nodjebedjakani meako misusu bɛngi odaeni bogo iputo na mbi. Wenɛkɛni saya ta ngondo. Endolo sapingedjani! Mbi nalongi ngondo!»
လက္ရွိေရြးခ်ယ္ထားမွု
YOANE 16: ngc
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)