YOANE 13
13
Yesu asosi mako ma batingami ba nde
1Edaka boso bo tɛkɛ e Pasika. Yesu adjebaka boo ehole e nde emei tina e bokina ngondo ye ko bokɛ adi Sange e nde. Yo apalaka bato ba nde ibadaka ta ngondo, ko abainedjaka epaeli egbasoake epɛ suka#13, 1 Mbunoko ta suka Makoma makina Na bonɔ mbunoko ta suka.. 2Yesu na batingami ba nde bayaka mia ma mɔmɔkɔ. Djabulu akweaka ehele bopangoa molema mo Yudasi, mwana o Simo Isikaliota, bokaba Yesu. 3Yesu adjebaka bo yo mɛnɛ adongaka adi Ndjakomba ko asɔmbɔke adi Ndjakomba. Adjebaka pongono boo Sesa apaka misusu ta bokondji bo nde. 4Asongɔdjɔkɔ ta mesa, adongedjaka mokoto mo nde, atombi ehakoi ko asadingaka ta bongo bo nde. 5Ngɔngɔ, i boisa madiba ta ebaeli ko abangaka bososa mako ma batingami ba nde; ngɔngɔ abahakoaka na ehakoi emina. 6Ehole eimeaka engbanga e Simo Piɛlɛ, yo abalaka na Yesu: «Kumu, wapalaka ososeni mako!» 7Yesu amosɔmbedjaka: «Edɛdi odjebiti eka epali mbi bokɔ, endolo wadjebake ngɔngɔ.» 8Piɛlɛ abalaka na nde: «Ngasa, otasosakani oto mako!» Yesu amosɔmbedjaka: «Namiti ososa mako, oditi na ibondo ta bodieli bo seko.» 9Simo Piɛlɛ abalaka na nde: «Na bea, Kumu, otasosakani oto mako, endolo sosani pongono mɔmɔ na molo!» 10Yesu abalaka na nde: «Yona osasosi aditi na tina na bosasosa, emiti da oko mako; tengasa asɛnɔi mɛnɛ. Omeini basɛnɔke, endolo editi no basusu.» 11Yesu adjebaka moto yona amokabake; na tina emina abalaka: «Oditini no basusu basɛnɔke.»
12Ngɔngɔ ibobasosa bo basusu mako, Yesu alwaka esendja e nde, adaka naikina ta mesa ko abalaka na bu: «Odjebini meako misokɔni mbi? 13Okabenini “Molehi” ko “Kumu”, ko odini na molonga, tengasa nadi mɛnɛ. 14Ibea ekada mbi, Kumu ko Molehi, nososini mako, ino pongono otungini bosasosani mako. 15Noinedjini moda mo mbi bɛngi ino pongono okwaneni elenge ekɔini mbi. 16Okobea, notɔndeini, edi soti: mosali ta nɔe mokondji o nde ko molomani ta nɔe yona omolomaka#13, 16 Kokanedja ta milɔngɔ 12-16 ko Luk 22, 24-27.. 17Edɛdi odjebini meako mi mina; wadakeni bato basepi, okasaledeani meako mimina. 18Natabalaka tina e no basusu; nadjebaka bia ibahɔ mbi. Endolo etungi ikomi i mobalo ikokedjame: “Yona ayaka na mbi sani emɔti, aimei moloni o mbi#13, 18 Ndj 41, 10..” 19Oko edɛdi nabali na nu, boso bo midjɔ mimina mikɔmee, tine ehole ekɔmɔkemo, dimani boo “nadi”. 20Okobea, nabali na nu, edi soti: moto oasɔi yona olomi mbi, asɔini pongono; ko yona oasɔini, asɔi yona olomani.»
Yesu adjebedji boo Yudasi amokabake
(Endja pongono ta Mat 26, 20-25; Mlk 14, 17-21; Luk 22, 21-23)
21Ngɔngɔ i Yesu bobala bea, mwembo mo nde asatungeaka ta tei e molema ko abalaka: «Okobea, nabali na nu, edi soti: Omɔti o bino akabakeni.» 22Batingami baimeaka bosedjana ko bosahɔdjɔnɔ tine bodjeba moto obalaka yo. 23Omɔti o batingami, yona opalaka Yesu, adaka mbuti na nde. 24Simo Piɛlɛ amoniteaka bɛngi ahɔdje Yesu amotɔndee moto yona obalaka tina e nde. 25Motingami omina aekɛmɛkɛ adi Yesu ko amohɔdjɔkɔ: «Kumu, omina nda?» 26Yesu asɔmbedjaka: «Nadoi adubea ekenge e mwɛmbɛ ta mosua: yona apake mbi, edi yo.» Yesu atombaka ekenge e mwɛmbɛ, adubeaka ko eapaka na Yudasi, mwana o Simo Isikaliota. 27Na bea ehole etombaka Yudasi ekenge e mwɛmbɛ, Satana akweaka ta tei e nde. Yesu abalaka na nde: «Modjɔ mopalaka wɛ okɔe, mokɔ pɛpɛlɛ!» 28Pɛ nongo omɔti adi bia ibadaka ta mesa, odjebaka tina epalaka Yesu bobala bea. 29Elenge apeaka Yudasi tɔmbi e iputo, banɛnɛ balɛdjɛkɛ boo Yesu amohɔdjɔkɔ akɛe asomba leka ilobwanaka na tɛkɛ, kaoko akɛe apa ikabo adi batakeli. 30Na bea Yudasi atombaka ekenge e mwɛmbɛ ko aimaka mbala emɔti. Edaka na bulu.
Mobeko mo yanie
31Ngɔngɔ i Yudasi boima, Yesu abalaka: «Edɛdi ekumu e Mwana o Moto enɛmi ko ekumu e Ndjakomba asinedji adi yo. 32[Ekada ekumu e Ndjakomba esinedji ta tei e nde,]#13, 32 Makomi makina maditi na kombe Ko ekumu e Ndjakomba esinedji adi yo. Ndjakomba pongono, apake ekumu adi Mwana ko ainedjake napɛ ekoka. 33Bana ba mba, nadi na nu baasu bakɛkɛ. Ohombabini, endolo nabalaka na nu edɛdi elenge ebalaka mbi na bayuda: Otakokakeni bokɛ ta dɔngɔ lakɛke mbi#13, 33 Endja pongono ta 7, 34.. 34Naopakani mobeko moyanie: palanani ino na ino. Etungi opalaneni moda mopalani mbi. 35Ekada bo opalanini ino na ino, na bea bato basusu badjebake boo odini batingami ba mbi.»
Yesu adjebedji boo Piɛlɛ amoinganake
(Endja pongono ta Mat 26, 3-35; Mlk 14, 27-31; Luk 22, 3-34)
36Simo Piɛlɛ amohɔdjɔkɔ: «Kumu, akɛke wɛ djɔ?» Yesu amosɔmbedjaka: «Ta dɔngɔ lakɛke mbi, otakimanakeni edɛdi; endolo okimanabini ta masu maduake.» 37Piɛlɛ abalaka na nde: «Kumu, tina edi mbi pɛ bokimana edɛdi nda? Nadi mbuti bopa bomɔ bo mbi tine wɛ!» 38Yesu asɔmbedjaka: «Odi mɛnɛ mbuti bopa bomɔ wɛ tina e mbi! Okobea, nabali na wɛ, edi soti: Boso boo kɔkɔ akɔkɔle, wɛ oinganeakeni mbala isato boo otadjebakani.»
လက္ရွိေရြးခ်ယ္ထားမွု
YOANE 13: ngc
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)