MALAKO 3
3
Yesu abikyɛ bonto ɔmɔɔ nde buuna bo sabata
(Lenda la nde Mat 12, 9-14; Luk 6, 6-11)
1Yesu aunwɛ yɔtwa nde botumba bo lɔbɔndɔ. Bonto ɔmɔɔ owɛ lɔbɔ ayalaki aiko. 2Bafalisaya balendɛ Yesu kaki aɔhɔ yobobikya nde buuna bo sabata, eyalaki itina iki babate ndjela yobopunda. 3Yesu ayɛ yobela bonto owɛ lɔbɔ: «Emala aiko ntondo eki banto bankuma.» 4Mpe abaubolɛ: «Bobeko botinda nɔ nde buuna bo sabata? yokela bɔlɔti laa yokela bobe? Yobikya bonto laa yobolyaka?» Tababounoya mbeko. 5Yesu abalendɛ la lɔkɛlɛmɔli; aokɛ bobe ywɛnɛ ndenge epa ibɔ tabayali la ihɛi la bonto ɔnɛ oyali la nkandi, abelɛ bonto uuko: «Hembola lɔbɔ lookiɛ.» Nde mpe alohembolɛ, mpe lɔbɔ lookinde lɔbɔngɛ. 6Bafalisaya baolɛ, nko baoyole, batɛ itokela nkuko ibɔ la ekambi eeki Elode kela batile lolenge lo yobolyaka.
Banto buuke bayɛ eka Yesu
7Yesu ayaɔngɔlɛ nde la bakɛndi laa nde bokili bo ndjale. Etuluku e banto eumɛ Ngalilaya, Yudeya, 8Yelusalɛmɛ, Idume mpe nde ibu i mboka i ndjale e Yɔlɔdani, la bihe biituti la bokili bo Tilɛ la Sido. Banto buuke bayɛ eyali Yesu itina baokɛ iikelaki nde. 9Abelɛ bakɛndi la nde babotilele waato itina banto tabaobuuka mpika. 10Nga bobikyaki nde banto buuke, bankuma bayali la nkandi bapuhwɛ looko looyalaki nde itina iki babɔbɛnge. 11Anɛ ebɔɛnɛki belimo be bobe, beyalikɛ nde bekolo beekinde, mpe bebobɛ: «Wɛ oyali Bona oki Ndjakomba!» 12Yesu akokomyɛ belimo be bobe tabaebyake ooyali nde.
Yesu ahɔlɛ bakɛndi la nde lyomu la bape
(Lenda la nde Mat 10, 1-4; Luk 6, 12-16)
13Yesu akondelɛ nde ngomba; aetɛ banto baalangaki nde, mpe batɛ eka nde. 14Ahɔlɛ etuluku e lyomu la bape, baiko abaeta bɛnkɔmwa. Akelaki ngauko itina iki bayale ibɔ la nde mpe itina iki yobatinda yoebya Nsango e Bɔlɔti 15la nguya eki yoolya belimo be bobe. 16Lenda baina baaki banto lyomu la bape bahɔlɔki nde: Simo – abobekyaki Petelo –, 17Yakɛ la bohibotonga ookinde Yowane, ibɔ bayape bana baaki Zebede – Yesu abapaaki lina i Bwanɛngɛ, elimbola wambɔ «bana baaki nkake» –, 18Andele, Pilipo, Batɛlɛmi, Matayo, Toma, Yakɛ, bona oki Alafe; Tade, Simo bonto o Yɛlɔtɛ#3, 18 Yɛlɔtɛ eyali ingomba iiki banɛ batila epanda eeki Isalaɛlɛ., 19Mpe Yudasi Isikaliɔtɛ, ɔnɛ ɔtɛkɛki Yesu.
Bokundi booki Yesu balanga babotombe
20Yesu atɛ nde botumba. Banto buuke bayɛ yohokama, tɛyɔbɔngɔ nde la bakɛndi la nde bale la byomba. 21Anɛ eokɛ botonga bookinde iileka, bayɛ yɔbɔkɔhɔ batu laa nde, itina bahangaki: «Angounguhanɛ!»
Yesu ababutolɛ mbeko nde ikambo imɔɔ ibopundaki ibɔ
(Lenda la nde Mat 12, 22-32; Luk 11, 14-23. 12, 10)
22Balaki ba bobeko baumaki Yelusalɛmɛ, batepelɛ: «Ayali la nguya eki Bezebule#3, 22 Belezebule eyali imɔɔ lina iki satana wambɔ bonkondi booki belimo be bobe!» mpe bahangɛ lenkina: «Aolya belimo be bobe nde nguya eeki bonkondi bo belimo be bobe.» 23Yesu abaetɛ mpe abapɛ ndjɛlya inɛ: «Ndenge nɔ Satana aɔhɔ yopandja Satana? 24Nga bonkumu bɔmɔɔ booyakapola bɔkɔ kiika, bonkumu buuko tabongwemala lenkina; 25Mpe nga bokundi bɔmɔɔ booyakapola bɔkɔ amongo, bokundi buuko tabongwemala lenkina. 26Nga Satana aoyamunia nde amɛlɛ mpe aoyakapola, tangoyunwa ywemala, yoohila itina ikinde. 27Bonto ɔmɔɔ apɔɔhe yɔtwa nde botumba booki bonto o nguya mpe yɔkɔhɔ byomba bikinde binkuma, nko boondola laino behinga; nkamba aopundja binkuma biyali nde botumba. 28Ndohangela nhɔhɔlɔ, basumu bankuma baaki banto bangolibwa la bitooli binkuma binga ibɔ batoole Ndjakomba. 29Yaa bonto onkuma ongotoola Bolimo bo bɔyɛngwa, ihumu iiko taingolibwa, ingoyala botako la botako.» 30Yesu atepelaki ngauko itina babobelaki: «Ayali la bolimo bo bobe.»
Nyango la bahibotonga baaki Yesu
(Lenda la nde Mat 12, 46-50; Luk 8, 19-21)
31Nko aiko, nyango la bahibotonga ba beele baaki Yesu bayɛ; baemalɛ nde bongala, batindɛ bonto aboete. 32Banto buuke babolingaki mpe babobelɛ: «Lenda, nyango la bahibotonga baakiɛ bayali nde bongala bakotila.» 33Yesu ababelɛ: «Ooyali nyango ekimi nɔ mpe baayali bahibotonga baakimi baanɔ?» 34Nkamba alendɛ baakihaki ntute la nde mpe ahangɛ: «Lenda nyango la bahibotonga baaki emi ibɔ banɛ. 35Nyango eekimi mpe bahibotonga baakimi eyali banɛ bakela iilanga Ndjakomba.»
လက္ရွိေရြးခ်ယ္ထားမွု
MALAKO 3: lol
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)