MALAKO 14
14
Waango kela balyake Yesu
(Lenda la nde Mat 26, 1-5; Luk 22, 1-2; Yow 11, 45-53)
1Etikalaki biina bepe kela eyenga e Pasika la e mampa iipa la bote ekite. Nkanga i benkondi la balaki ba bobeko batilɛ ndenge babute Yesu la lyanya i bobe mpe baboliyake. 2Bayahangelɛ: «Tatokelake lobo lɔkɔ buuna bo ntɛkɔ, itina banto tabaoyolya boyongo.»
Buunto ɔmɔɔ autumolɛ Yesu balahi nde bɔtɛ
(Lenda la nde Mat 26, 6-13; Yow 12, 1-8)
3Yesu ayalaki Betani, nde botumba booki Simo, ɔnɛ oyalaki la behale; aiko ɛlɛ nde, Buunto ɔmɔɔ aɔtwɛ aiko la bolangi bo alabatɛ#14, 3 alabatɛ eyali balahi ba mpimbo boyoli la balahi ba mpimbo mpe ba botuya. Abolɛ bolangi mpe autumolɛ balahi baiko nde bɔtɛ booki Yesu. 4Bamɔɔ baki ibɔ baɛnɛki bobe mpe bahangaki: «Itina nɔ iyopita balahi ngauko? 5Tɔpɔɔtɛkɛ balahi baiko la bɔhɔlɔ buuke bopenda benkama behato mpe tokapela bɛmbɔlɔ!» Mpe bapɔndɔlɛ buunto uuko mpendja. 6Mpe Yesu atepelɛ: «Lobohena. Itina iibotungya nyo nɔ? Angokokyɛ lobo lo bɔlɔti itina iki emi. 7Itina biina benkuma loyali nyo la bɛmbɔlɔ, mbala inkuma inga nyo lolange, lɔɔhɔ yobakelela bɔlɔti, yaa emi tatongoyala emi la nyo biina benkuma. 8Buunto ɔnɛ angokelɛ imba nde aɔhe: la ngauko, angobangɛ botako yuutumola byonge biiki emi balahi baahingaka ibɔ bonto ntondo eeki babokunde. 9Ndohangela nhɔhɔlɔ: ndye inkuma inga Nsango e Bɔlɔti elakeme nde bokili bonkuma, bangotepelakɛ inɛ inga buunto ɔnɛ akelɛ mpe bangoboendjelakɛ.»
Yudasi alanga atɛke Yesu
(Lenda la nde Mat 26, 14-16; Luk 22, 3-6)
10Yudasi Isikaliɔtɛ, ɔmɔɔ oki bakɛndi lyomu la bape, atɛ eka Nkanga i benkondi itina iiki yɔtɛkɛ Yesu eka ibɔ. 11Anɛ eokɛ ibɔ ngauko, bayalɛ la ibulwako mpe babolakoyɛ bɔhɔlɔ. Mpe Yudasi Isikaliɔtɛ atilɛ ndenge yokapa Yesu nde bɛbɔ beeki ibɔ.
Yesu alɛ elambo e Pasika nde la bakɛndi la nde
(Lenda la nde Mat 26, 17-25; Luk 22, 7-14. 21-23; Yow 13, 21-30)
12Buuna bo lontondo bo ntɛkɔ e mampa iipa la bote, buuna bɔnɛ bolyakaka ibɔ mpata itina i Pasika, bakɛndi la Yesu babuubolɛ: «Olanga totu itɔkɔɔhɔyɔ elambo e Pasika nko?» 13Yesu atindɛ bakɛndi la nde bape, mpe ababelɛ: «Lɔkɛndɛ nde imonga; lokoponana la bonto ɔmɔɔ angobilɛ ibuka i bahi, loboyelaka, 14mpe eka nde atwa, lobelaka bɔmɛlɛ botumba: “Bolaki aubola: empulu e botumba eeki emi eka emi ndɛ elambo e Pasika emi la bakɛndi la emi eyali nko?” 15Mpe akoolwɛnia empulu e bɔnɛnɛ nde liko ɛbɔngyɛ ibɔ, eyali la binkuma: eyali mpiko enga nyo lɔtɔhɔye itina i elambo.» 16Bakɛndi la nde balangwɛ mpe batɛ nde imonga ikɔ; batanɛ inkuma nko nga bobabelaki Yesu, mpe babɔngyɛ elambo e Pasika.
17Anɛ ekitɛ ikɔlɔ, Yesu ayɛ nde la bakɛndi la nde lyomu la bape. 18Aiko ekihi ibɔ mpe ɛlɛ ibɔ nde mesa, Yesu ahangɛ: «Ndohangela nhɔhɔlɔ: ɔmɔɔ okinyo ɔlɛ la emi angɔtɛkɛ.» 19Bakɛndi la nde baokɛ bobe, mpe babuubolɛ ɔmɔɔ la ɔmɔɔ: «Eyali emi?» 20Yesu abaunoyelɛ: «Eyali la ɔmɔɔ okinyo nde lyomu la bape ɔlɛ la emi saani ɛmɔɔ. 21Bona oki Bonto aoli iwa nko ndenge eetepela Nkɔti itina iikinde; ihɛi la bonto onga Bona ooki Bonto akapeme itina ikinde! Ɛbɔngɔki bonto uuko tabotwake la mbotwa nde bokili!»
Elambo
(Lenda la nde Mat 26, 26-30; Luk 22, 14-20; 1Ko 11, 23-25)
22Aiko ebanga ibɔ yɔlɛ, Yesu akɔhɛ mampa; lombuha lo yɔtɔmɛya bekako, apupolɛ ɛkɔ, mpe apɛ bakɛndi la nde, ababelɛ: «Loma, ɔnɛ eyali byonge biikimi.» 23Mpe akɔhɛ mbongo e vino, atotyɛ Ndjakomba, abapɛ ɛkɔ, mpe bamɛlɛ ibɔ bankuma. 24Yesu ababelɛ: «Ɔnɛ eyali bakila bakimi, bakila ba Boheka booki Ndjakomba, bangutumwɛ itina iki banto buuke. 25Ndobela nte nhɔhɔlɔ, ntingounwa lenkina yɔmɛlɛ vino, tii buuna bonga emi mɛle vino e ntɛmu nde Bonkumu booki Ndjakomba.» 26Anɛ eheyɛ ibɔ yeemba nyembo, balangwɛ yota nde ngomba e ba Olive.
Yesu aebyɛ mbɔ Petelo angoboangana
(Lenda la nde Mat 26, 31-35; Luk 22, 31-34; Yow 13, 36-38)
27Yesu ababelɛ: «Nyo bankuma lɔngɔkɔ, itina ɛkɔtɔmɛ mbɔ: “Ngokula bɔbɔkɔli, mpe mpata ingotyangwa.” 28Nga nsookundwa, ngɔlɔndia lontondo lookinyo Ngalilaya.» 29Petelo abobelɛ: «La nga banɛ bankuma bangokolotɛ, emi ntingokohena.» 30Mpe Yesu abobelɛ: «Nkobela nhɔhɔlɔ nko botyo bɔnɛ bo lɔlɔkɔ, ntondo eeki nkɔkɔ ebeke mbala ipe, okoonyangana mbala ihato.» 31Mpe Petelo abobelɛ la nguya: «Ntingokwangana la bona o ema, la nga ɛɛli mbu emi la wɛ.» Mpe ibɔ bankuma batepelɛ nko ngauko.
Yesu abɔndɛlɛ Ngesemani
(Lenda la nde Mat 26, 36-46; Luk 22, 39-46)
32Anɛ ekitɛ ibɔ nde ndye ɛnɛ eta ibɔ Ngesemani, Yesu abelɛ bakɛndi la nde: «Lokiha anɛ elaka iiko e oli emi itɔbɔndɛlɛ.» 33Akɔhɛ Petelo la Yakɛ la Yowane. Abangɛ yooka bɔɔmɔ mpe la yoyatungya. 34Ababelɛ nde ambɔ: «Botema bokimi boyɛ la ihɛi i ntombi nde iwa; lotikala anɛ mpe lwɛtɛtɛlɛ.» 35Atɛ bona o botale, ayahuloyɛ nde babu mpe abɔndɛlɛ itina iiki, nga ɛbɔngɔ, elaka iiko eume ntute la nde. 36Yesu atepelɛ: «Aba#14, 36 Aba eyeli lina i iiki Banto ba Alami ilakania lina iikii ihe eebota bonto ootepela laa ɔnɛ otepela ibɔ iitina iikinde., Ihe eekimi, ɔɔhɔ yokela mbo inkuma, umola mbongo ɛnɛ e lyale ntute la emi! Endaka, teyalake nga bolanga emi, yaa nga bolanga wɛ.» 37Mpe Yesu aunwelɛ bakɛndi la nde, abatanɛ balaali, abelɛ Petelo: «Simo, olaali! Tuuha ywɛtɛtɛlɛ nkya ngonga ɛmɔɔ! 38Lwɛtɛtɛlɛ mpe lɔbɔndɛlɛ, kela talɔkɔɔke nde lomeko. Bolimo boyali la nguya, yaa byonge biyali bɔɔlu.»
39Yesu atɛ lenkina bona o botale mpe abɔndɛlɛ lenkina nko ndenge ɛbɔndɛlɛki nde. 40Yesu ayɛ lenkina eka bakɛndi la nde mpe abatanɛ lenkina balaali; bayalaki la ilɔ nde baiho. Mpe tabaeba la lobo lo yobobela. 41Aunwɛ mbala ɛnɛ e ehato, ababelɛ: «Lolaali nko ndaala? luutya! Anɛ mbo yoohila. Elaka yooyela! Aiko eekeko, Bona ooki Bonto angokapemɛ nde bɛbɔ beeki banto ba bahumu. 42Lwemala, tɔkɛnde! Lenda, bonto ɔnɛ ɔntɛkɛ angoyɛ.»
Mbutama eeki Yesu
(Lenda la nde Mat 26, 47-56; Luk 22, 47-53; Yow 18, 3-12)
43Mpe nko aiko etepela Yesu, Yudasi, ɔmɔɔ oki bakɛndi lyomu la bape, ayɛ nde la banto buuke babuti babaka la bɛmbɔndu. Nkanga i benkondi la balaki ba bobeko la bingambi babatindaki. 44Yudasi, ɔnɛ obatɛkɛlɛki Yesu, abapaki elembetelo ɛnɛ: «Bonto uuko opotamelɛ emi, eyali nde. Lobobutaka, lobotombaka mpe lɔbɔhɛndjɛlɛkɛ bɔlɔti.» 45Anɛ ekitaki Yudasi, ayaundjɛ ntute la Yesu mpe abobelɛ: «Bolaki!» Mpe abopotamelɛ. 46La mbala ɛmɔɔ, banto baayaki bakandɛ Yesu, mpe babobutɛ. 47Nde baiko bayalaki aiko, ɔmɔɔ oki ibɔ aolyɛ ibaka, akɔtɛ bohali booki Nkanga e bonkondi mpe abopupolɛ itoi. 48Yesu ababelɛ: «Nsookita bonto boyongo kela loye yombuta la babaka la bɛmbɔndu? 49Mboyalakɛ emi la nyo biina benkuma mpe mboolakakɛ nde tɛmpɛlo, talombuta. Yaa inɛ yookelama kela Nkɔti ikokyame.» 50Bakɛndi la nde babolotɛ mpe bayabɛlɛ lobango. 51Bolangala bɔmɔɔ ayeelaki Yesu, alɔtɔki nko imputa. Balangɛ babobute la nde, 52yaa nde ahenɛ imputa mpe alotɛ nko bo mpo nko bo mpɛkɛhɛni.
Yesu nde ehambelo e bɔnɛnɛ
(Lenda la nde Mat 26, 57-68; Luk 22, 54-55. 63-71; Yow 18, 13-14. 19-24)
53Batɛ la Yesu eka Nkanga e bonkondi, ndye ehokamaki Nkanga i benkondi inkuma la bingambi la balaki ba bobeko. 54Petelo ayeelaki Yesu la botale mpe aɔtwɛ nde inkana iki Nkanga e bonkondi. Akihɛ ndye ɛmɔɔ nde la bahɛndjɛli, mpe aɔkɛ ntyɛ.
55Nkanga i benkondi la banto bankuma ba ehambelo batilɛ itatoli inɛ ipa ibɔ Yesu ɛkwa kela babopaa etumbo e iwa, yaa tababata. 56Banto buuke baolaki la mbo yobolimbela, yaa imba batepelakɛ itikwanaki. 57Bamɔɔ bayɛ kela babolimbele ikambo mbɔ: 58«Tobookaki atepela: “Ngɔkɔyɔ tɛmpɛlo ɛnɛ etongaki banto, mpe nko la bɛkɔlɔ behato ngotonga enkina epa tengokelama la banto.”» 59Yaa nkya ngauko, iitepelaki ibɔ itikwanaki. 60Nkanga e bonkondi aemalɛ ntondo e banto, aubolɛ Yesu: «Opala mbuto nde iiko inkuma ikopunda ibɔ?» 61Yaa Yesu apilamaki, tapaa la mbuto ɛmɔɔ. Nkanga e bonkondi abuubolɛ lenkina: «Oyali Masiya, Bona ooki Ndjakomba etwakwamɛ?» 62Yesu aunoyɛ: «Ɔɔ, ndjali Masiya, mpe lɔngɔyɛnɛ Bona ooki Bonto akihi nde lɔbɔ lo loome looki Ndjakomba ɛnɛ nguya; lɔngɔbɔɛnɛ mpe aoye nde batute ba liko.» 63Nkanga e bonkondi aatolɛ bihenda biikinde mpe ahangɛ: «Topooyali lenkina la itina la nyɛnɛki! 64Longookɛ ndenge enga nde atukɛ Ndjakomba. Lokanena nɔ?» Mpe ibɔ bankuma ibɔ ambɔ: angɔkɔ ikambo mpe aɛli la iwa. 65Banto bankina babɔtwɛ nhɔi, babolipɛ elongi, babokulɛ mpakata mpe bahangɛ: «Ebaka bonto oombookokule!» Mpe bahɛndjɛli bakɔhɛ Yesu, baboatɛ ntaka.
Petelo aanganɛ Yesu
(Lenda la nde Mat 26, 69-75; Luk 22, 56-62; Yow 18, 15-18. 25-27)
66Aiko eyalaki Petelo nde inkana, bosali bɔmɔɔ bo buunto boki Nkanga e bonkondi ayɛ. 67Aɛnɛ Petelo aɔkɔ ntyɛ, abohihimyɛ mpe abobelɛ: «La wɛ oyalaki wɛ la Yesu, bonto uuko o Nazalɛti.» 68Petelo aanganɛ nde ambɔ: «Mpwebe mpe mpotingole iiko ilanga wɛ otepele.» Nde ɔnɛ oolɛ mpe atɛ nde yɔtwɛlo i botumba. [Mpe nkɔkɔ ebekɛ.] 69Yaa bosali buuko bo buunto abɔɛnɛ mpe abelɛ banto baayalaki aiko: «Bonto uuko ayali ɔmɔɔ oki ibɔ!» 70Petelo aanganɛ lenkina. Baiko bayalaki aiko babelɛ Petelo lenkina: «Eyali nko nhɔhɔlɔ, oyali bonto ookibɔ, itina la wɛ mpe oyali bonto o Ngalilaya.» 71Petelo ahimbɛ bohai la bitio: «Mpwebe bonto uuko ombela nyo.» 72Nko nde elaka iiko, nkɔkɔ ebekɛ mbala e bape, mpe Petelo abopwɛ inɛ ibobelaki Yesu: «Ntondo eeki nkɔkɔ ebeke, ongonyangana mbala ihato.» Alelɛ.
လက္ရွိေရြးခ်ယ္ထားမွု
MALAKO 14: lol
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)