YouVersion လိုဂို
ရွာရန္ အိုင္ကြန္

Máákuusə 12

12
Fuʼno mbəb ŋgaŋafaʼ kəpɔŋ
(Mat 21:33-46; Lúk 20:9-19)
1Yěsô pó máʼ pɛ fuʼno ne pɔ́b ŋgâ: «Cyó ŋɔŋ kɛ núŋu taʼ faʼ, mvé nsó yɛ́ ntáá mé fɛ́ yoʼ nɛ́ ndzóó. Ŋkwód kaŋ ndzyɛ faʼ yéré núŋ. Nteŋe ywoʼ ŋkáá yoʼ. Ŋkwód ywoʼ psibɛ́váá ŋkuʼu fɛ́ nsó. Ntéé pwó ghaŋá tɛŋɛ́ yoʼ, ŋgâ pɔ́b tse ndiŋɛ́, ŋgú ntsěnyi. 2Ŋkhoʼ yɔ̂ mɔ́b kuʼu, a twɔ́ taʼ mkpaŋ yé ŋgâ a ghú mkpéé pé mɔ́b pɛ́ faʼ kɛ tóó nɛ́, pwó pɔŋ pɛ́ pɔ́b kɛ pɛ faʼ nɛ́ ŋkʉ́yó núŋ. 3Ŋgaŋafaʼ gbáá wé, gbíí wé, nuʼɔ wé mbɛ́d mbwó. 4Ŋgaŋáfaʼ ké mbó ntwɔ́ cyó mkpaŋ yé ŋkʉ́rʉ́ né pɔ́b. Ŋgaŋafaʼ ké mbó gbáá yé ywoʼ ŋkʉ́rʉ́ gbíí, ntswé tó yé, ntó wé. 5A ké mbó ntwɔ́ cyó. Wéré, pɔ́b nɔ́ʼɔ́ wé. A ké mbó ntwɔ́ pe zááme ŋkʉ́rʉ́. Pɔ́b gbíí pecyó kaʼatɛ, mbó nɔʼ pecyó. 6Kaʼatɛ a ké ntsʉ́ʼ ndaʼ Mɔ́ŋ yé wé tʉŋɔ ndɔŋ. A ghɛmbɛ ne njʉyǐ a twɔ́ wé pfúŋɔ́ pɔ́b, ntsɔ́ ŋgâ: “Njʉ́, a Mɔ́ŋ ya nɛ́ pɔ́b ŋguʼɔ wé.” 7Tsʉ́ʼmbé ŋgaŋafaʼ tsɔ́ tsetsɛrɛ pɔ́b ŋgâ: “Yɔŋ ndzóndáb yé. Puŋ kʉ́yó, piŋi gbáá wé nɔ́ʼ, faʼ cʉ́ʼɔ́ ne piŋi”. 8Pɔ́b gbáá Mɔ́ŋ nɔʼ, sú pfɔ́ yé, ntwɔ́ núŋ faʼ, maʼ.» 9Yěsô Psírɛ́ wɔ́b ŋgâ: «Puŋ zhʉ́ yuŋ ŋgâ tɛɛmbɛ ŋgaŋafaʼ wɔŋ ŋkʉ́yó ŋgyɛ́ níŋ? A ŋkʉ́yó gbáá pɛ ghaŋá tɛŋɛ́ yoʼ nɔ́ʼɔ́, fɛ́ faʼ pwó pecyó pɔŋ. 10Puŋ kâ kɛ fú nsó wɔŋ ndzó póʼ ŋweʼe yáŋme pó?
Ngɔʼ yɛ́ ghaŋákúrɔndáb kɛ máʼ nɛ́,
A tsʉʼ yéré ntsʉʼ ŋgɔʼ ntɛ́ɛ́ndáb.
11A yéré mbé faʼ Ntsɛɛpɔŋ.
A ndáá shʉrɛ́no ne míí miŋi.»
12Pɛ ntsɛ́ssó Ndámboʼmvé kɛ táʼá ne gbǎne Yěsô. Ntsʉʼmbé, ntsé mbɔ́ɔ́ míí pɔŋ. Pɔ́b kɛ tsʉyǐ ndzóʼ ŋgâ Yěsô kɛ máʼ yéré fuʼno kɛ́ʼɛ́, ŋkyě wɔ́b. Néré, pɔ́b tee Yěsô, ŋgú yɔ́b.
Fuʼno ndúŋú pê sebe
(Mat 22:15-22; Lúk 20:20-26)
13Pɛ ntsɛ́ssó Ndámboʼmvé twɔ́ pɛ Farízya pwɛ pecyó pɔŋ pɛ́ pwɛ Erodə tsɔ́ ndzoʼo nɛ́, pfúŋɔ́ Yěsô. Kɛ́ʼɛ́ ne mveréne wé ndzɔ́ʼɔ́ nsó yé gbáá wé. 14Pɔ́b ghú mbzirɛ́ Yěsô ŋgâ: «Kéʼeyáŋ, psi zé ŋgâ wo ŋú no sísíŋ, kii tiŋɛ́ ŋgʉyétsuʼ mbɔ́ɔ́ míí mé. Wo tsé mbé tiŋɛ́ njʉ́ pɔŋ ghú nɛ́ pó. Wo nyóʼó mɛndɔ́b Mboʼmvé pé njʉ́ a zɔŋɔ nɛ́. Sɔ́ŋɔ́ ywí: “Ɔ́ŋɔ́ kii ŋgáŋ! Á psyɛ́ ŋgâ, tɛɛmbɛ pe péé sebe pwó fɔŋ pɛ Roma? Psi péé kii psi ndɛ mbéé?”» 15Ntsʉʼmbé Yěsô zé ŋgâ pɔ́b ghaŋá ŋgɔ́b, ntsɔ́ ne pɔ́b ŋgâ: «Puŋ pfɛrɛ wě síŋ mo ŋkyé kɔ́? Puŋ kʉ́yó ne taʼ mbób ghɛ́ pɛʼɛ!» 16Pɔ́b kʉ́yó núŋ, Yěsô psirɛ́ wɔ́b ŋgâ: «Záŋ yɔŋ pú ŋweʼe yɔŋ yé wɔ́?» Pɔ́b pód ŋgâ: «A yé fɔŋ pɛ Roma!» 17Yěsô tsɔ́ ne pɔ́b ŋgâ: «Puŋ fɛ́ yɔ́b fɔŋ pɛ Roma pwó yé, fɛ́ yé Mboʼmvé pwó Mboʼmvé.» Pód yɛ́ Yěsô kɛ fɛ́ nɛ́, tsɛ́ɛ́ wɔ́b kaʼatɛ.
A kɛ́ʼɛ́ pɔŋ ŋkʉ́yó njʉyɛ́ ne vó?
(Mat 22:23-33; Lúk 20:27-38)
18Pecyó pɛ Sadúkayə kʉ́yó pfúŋɔ́ Yěsô. Pɛ Sadúkayə pɔŋ pɛ́ pɔ́b kpaŋa ŋgâ pɔŋ ŋkʉ́yó njʉyɛ́ ne vó nɛ́ pó. Pɔ́b psirɛ́ wé ne no yɔŋ ŋgâ: 19«Kéʼeyáŋ, Mǔsê kɛ ŋweʼe ntéé ne psi ŋgâ: “A pɛ́ɛ́ yɛ́ mɔ́ŋmɛ́ wo zɔʼ məŋgʉ́yé, mpfó kii yɔ́b nɛ́, mbǒ wo ndɔ́ɔ́ pfʉ́ʉ́ ye, puŋ yé pfé pɛ mɔ́ŋ ne tíí yé.” 20Pɔ́ŋmɛ́ pe pésambáá kɛ pɛ yóʼó. Sɔ́ ye zɔ́ʼ, pfó kii yɔ́b. 21Mbɛ́rɛ́ yípáá yɔ́ɔ́ pfʉ́ʉ́ yé ké mbó pfɔ́ yé kii pú yé tséʼé mɔ́ŋ, mbɛ́rɛ́ yíkyéd ke mbɛ́ɛ́ néré, 22Kaʼatɛ pɔŋ pe pésambáá pɔŋ pfó náá kii tséʼé mɔ́ŋ. Njʉyi ghɛ́ mbɛ, məŋgʉ́yé ké mbó mpfɔ́ yé. 23Ŋkhoʼyɛ́ pɔŋ ŋkʉ́yó zhʉyɛ́ ne vó nɛ́, a náʼá mbɛ́ɛ́ ŋgʉyé wɔ́ tsetsɛrɛ pɔ́ŋmɛ́ pesambáá péré. Njʉ́ ŋkɔŋɔ wɔ́b kɛ yɔ́ɔ́ wé náá ne ŋgʉyé wɔ́b nɛ́?» 24Yěsô tsɔ́ ne pɔ́b ŋgâ: «Puŋ zé yɔ́b yɛ́ a ndzó ŋweʼe yáŋme nɛ́ pó! Kii pó ndzé tʉ̌ŋ Mboʼmvé. A zhyɛ́ yéré puŋ pɛ́ ndzɔ́ʼɔ́ fwɔ̌ne. 25Ŋkhoʼyɛ́ pe njʉyɛ́ ne vó nɛ́, pe pé zɔʼɔ ndáá pó. Pe pɛ́ɛ́ njʉ́ pɛ aŋgere pɛ a pépéé nɛ́. 26Ŋgɛ ŋkhú ne njʉyɛ́ne ne vó, puŋ kɛ́rɛ́ fú no ndúŋú, ndzó póʼŋweʼe Mǔsê, ywoʼ yɛ́ a tsɔ́ no ntsóʼgháŋ yɛ́ á kɛ kpii kii pwó nɛ́. Mbziʼe njʉ́ Mboʼmvé kɛ tsɔ́ pwó yé ŋgâ: “Mo, Mə Mboʼmvé Ábraham, Mboʼmvé Izaʼ mbó mbé Mboʼmvé Yakɔb nɛ́.” 27Ntsʉʼŋgɛ mbɛ Mboʼmvé pe pɛ́ɛ́ wé pfɔ̂pɔŋ pó. A Mboʼmvé pumɔ́b#12:27 Yéré zɔŋɔ ntsɔ̌ ŋgâ a síŋ Mboʼmvé, pɔŋ pɛ pɔ́b kɛrɛ pfó nɛ́ ké mbɛ́ɛ́ mɔ́b., puŋ tsé shaŋa kaʼatɛ.»
A yɛ́rɛ́ kaŋ tsɛ́ɛ́ pecyó?
(Mat 22:34-40; Lúk 10:25-28; 20:39-40)
28Taʼ ŋgaŋákeʼekaŋ zóʼó njʉ́ pɔ́b kɛ mɛ́ʼɛ́ ntswee nɛ́, ndzé ŋgâ Yěsô kɛ pód sʉ́ʼʉ pwó pɛ Sadúkayə. Á suʼú mbəb yé fɛ́ pfúŋɔ́ yé, mbzirɛ́ wé ŋgâ: «A yɛ́rɛ́ kaŋ mbé sɔ́ yé a ndzɔ́ʼɔ́ ŋkɔŋɔ pɛ kaŋ náá?» 29Yěsô pɔ́rɔ́ ne pɔ́b ŋgâ: «Sɔ́ yé pé nɔŋ: “Issayɛ, zóʼó, a ndaʼ Ntsɛɛpɔŋ Mboʼmvé wíŋi mbé Ntsɛɛpɔŋ. 30Wo tsɛʼɛ ne nkʉyéne Ntsɛɛpɔŋ Mboʼmvé wo ne ŋkɔŋɔ ndzɔʼ yo náá, ne ŋkɔŋɔ méne yo náá, ne ŋkɔŋɔ kpaŋató yo náá, pwɛ ŋkɔŋɔ tʉ̌ŋ mó náá.” 31Mbɛ́rɛ́ yípáá pé nɔŋ: “Kʉ́yé mɔ́ŋmɛ́ wo njʉ́ wo kʉyě tómbəb wo nɛ́. Cyó kaŋ yóʼó tsɛ́ɛ́ péré pó.”» 32Ŋgaŋákeʼekaŋ tsɔ́ pwó Yěsô ŋgâ: «A pú kaʼatɛ kɛ Kéʼeyáŋ. No yɛ́ wo nsó nɛ́ no sísíŋ. A ndaʼ yé, cyó yóʼó njʉ́ yé nɛ́ pó. 33Ŋkʉyěne wé ne ŋkɔŋɔ ndzɔʼ náá, ne ŋkɔŋɔ zɛ́no wo náá, pwɛ ŋkɔŋɔ tʉ̌ŋ náá, mbó kʉ́yé mɔ́ŋmɛ́ njʉ́ tómbəb wo nɛ́, tsɛ́ɛ́ ntɔ̌ŋne shʉ́ pwɛ fɛ́ne shʉ́.» 34Yěsô zhʉ́ ŋgâ ŋgaŋákeʼekaŋ kɛ pód ne zé. Néré a tsɔ́ pwó ye ŋgâ: «Ntaŋ wo sáá nɛ́ ne Nofɔŋ Mboʼmvé pó.» Ŋɔŋ pó mbé mwɔ́ mbzirɛ́ wé né no ŋkʉ́rʉ́ pó.
Kristo Mɔ́ŋ mbó mbé Ntsɛɛpɔŋ pwó Ndavíd
(Mat 22:41-46; Lúk 20:41-44)
35Yěsô yɔ́ɔ́ nsó fɛ́ ntʉ́ʉ́ ndámboʼmvé, mvírɛ́ wɔ́b ŋgâ: «Ghaŋákeʼekaŋ zhyɛ́ níŋ ntsɔ́ ŋgâ Kristo Mɔ́ŋ Ndavíd? 36Kɔ́ʼɔ́ tómbəb fɔŋ Ndavíd, Zhʉye Yáŋme kɛ zhyɛ́ a nsó ŋgâ:
“Ntsɛɛpɔŋ tsɔ́ pwó Ntsɛɛpɔŋ ya:
Kʉ́yó ŋgɔ́rɔ́ ne ndzáʼ pwó ya yé maʼ.
Kaʼatɛ kékáŋ mə ŋgyɛ́ wo nyí mbəb ghaŋákepeŋe pó
Pɔ́b tsʉʼ ywoʼɔ tíí kpee mó.”
37Tómbəb fɔŋ Ndavíd fú wé ne Ntsɛɛpɔŋ. A mbɔ́rɔ́ ŋgyɛ́ níŋ mbɛ Mɔ́ŋ yé?» A kɛ ghɛ́ pɔŋ zááme pɛ yóʼó, ndzóʼó wé ne ndebéne.
Puŋ ndɛ ŋgyɛ́ njʉ́ ghaŋákeʼekaŋ nɛ́
(Mat 23:1-12; Lúk 20:45-47)
38Yěsô kɛ tsɔ́ ndzɔ́ʼɔ́ ntʉ́ʉ́ yé ŋgâ: «Puŋ zhyaŋa! Puŋ ndɛ ŋgyɛ́ɛ́ njʉ́ ghaŋákeʼekaŋ nɛ́. Pɔ́b kʉ́yé ŋgbêne pɛ mɛ́mɛ́ ndzwé ŋkɛ́rɛ́ núŋ, ŋkʉ́yé ŋgâ pé pwó síŋ pɔ́b ndzɔ́ʼɔ́ pɔŋ ntsɛ́ʼɛ́ wɔ́b kaʼatɛ, 39ŋkʉ́yé ne ndɔ̌ne sɔ́ ywoʼ ndzó pɛ ndántéré pɛ Yúda, pwɛ ywoʼ ndebéne kaʼatɛ. 40Pɔ́b pɛ́ pɔ́b yɔ́ɔ́ ŋgɔ́b mkpéé mwɔ́ pfʉ́ʉ́pfʉ́ʉ́ pɛ́, a ntsʉʼɔ ne pɔ́b nɛ́, mbó ntsɛ́ʼɛ́ Mboʼmvé kyáŋá ndúŋú. Mboʼmvé ŋkʉ́yó mbɔ́rɔsé wɔ́b kaʼatɛ ntsɛ́ɛ́ pecyó pɔŋ.»
Shʉ́ yɛ́ pfʉ́ʉ́ məŋgʉ́yé kɛ fɛ́ nɛ́
(Lúk 21:1-4)
41Yěsô kɛ ghɔ́rɔ́ ndámboʼmvé, pfúŋɔ́ ŋkɔbshʉ́ ndiŋɛ́ njʉ́ pɔŋ kɛ kʉ́yó níŋɛ mbób ndzǒ nɛ́. Pɛ foʼ kɛ níŋɛ mbób zááme. 42Taʼ pfʉ́ʉ́ məŋgʉ́yé pɛ yóʼó mbé mbɔ́ŋ, ŋkʉ́yó níŋɛ yé pé mbób yípáá yɛ́ a zyé mbé kúʼú cyó yɔ́b nɛ́ pó, yɛ́ a zyé mbé tséʼé mbɔŋɔ ghebe nɛ́ pó. 43Yěsô fú ŋgíŋgye pé, ntsɔ́ ne pɔ́b ŋgâ: «Kpaʼ sísíŋ mə sɔ́ŋɔ́ wuŋ ŋgaŋaŋgəʼo mpfʉ́ʉ́ məŋgʉ́yé wɔŋ fɛ́ kaʼatɛ ntsɛ́ɛ́ ŋkɔŋɔ pɔŋ náá. 44Ŋkyé ŋgâ ŋkɔ́ŋɔ pecyó pɔŋ náá níŋɛ yɔ́b yɛ́ a tséʼé ghebe ne pɔ́b nɛ́ pó. Ntsʉʼmbɛ ne məŋgʉ́yé wɔŋ a záŋá ŋkɔŋɔ yɔ́b náá nɛ́, a yɔ́ɔ́ ŋkɔŋɔ yɔ́b yɛ́ a tsɛ́ʼɛ́ ne ntsǒne mvé núŋ náá nɛ́, níŋɛ ndzó ŋkɔb.»

လက္ရွိေရြးခ်ယ္ထားမွု

Máákuusə 12: XMG

အေရာင္မွတ္ခ်က္

မၽွေဝရန္

ကူးယူ

None

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ