Lomɛ́ŋ 14
14
Nudigélényí bɔsɔ́gɔ́ gá buóny bá manyán
1Nudiábɛ́kɔ́ŋá ebe bádiábiánáná guádáb gugúnínán bese, nudɛsɛ́gɛ́nán sɔ́b ɛmbɛ́dágɛ́dɛn. 2Bulinsi ebue, mɔnd gúbɛ́dága ká unyɛ wagúnyánan buanda gidigid, ɔwɔ́ guádáb gág nyá fágɔfág nyánan gɔɔ́g bigud. 3Sɔ́gɔ́ únyánaná buanda gidigid dɛgúbianan ká úsɛ́gɛ́nan ewe udiáyánaná buanda gidigid. Nɛnama nímoom sɔ́n udiáyánaná buanda gidigid diábiánáná ká ugélenyi ewe únyánaná buanda gidigid, gágual ká Gɔdányá dɛɛ́gubɛ́sáŋɔ́n wɔ́. 4Anyɛ ányá ká égélenyi eŋél buol wɔ́ sɔ́gɔ́ e? Ta wala buol bese ɔ́gɔ ká bɔbɛ búgulɛ́ŋa mása waga. Eŋeli buol uwaány gala bese gágual ká Ɔgúnɔ́ gedúgúne wɔ́ ká wala bese. 5Mɔnd gubídága ubiɔ́yɔɔn ká mɔɔ́s móndodió nyɛ na mfí gudɔ́mb móndodió, agá ondodió, mɔɔ́s nyɛ́ buanda búmoom. Nsɛ́ sig mɔnd a lɛns bese na bese buanda ubú ɔdɛm wág gédenyé. 6Ewe ubídáganá ká mɔɔs gúdɔ́mbanɛn guála nɔ́ gá guéŋen Ɔgúnɔ́ nukany, ta ewe únyánaná buanda gidigid, uguála nɔ́ góbusió bá Ɔgúnɔ́, gagual ká uguéŋen Gɔdányá nukany góbusió bá manda ɔmɔ́ únyánaná. Ewe udiányánaná buanda gidigid, uguála nɔ́ góbusió bá Ɔgúnɔ́, uwɔ́ sɔ́n uguéŋen Gɔdányá nukany. 7Búnyɛ́ ká, mɔnd digúsɔ́dɔn gág gá bɛ́muát, udigúguénén sɔ́n gág gá bɛ́muát. 8Dɛ́mɔ́sɔ́dɔɔn, dɛgúsɔ́dɔɔn góbúsió bá Ɔgúnɔ́, díméguénen, digúguénen góbúsió bá Ɔgúnɔ́ sɔ́n. Kányɛ gɔg gúnyá ká, ta disɔ́dɔɔn ta ɔ́g ká digúguénen, dinyɛ bá Ɔgúnɔ́. 9Gágual ká, Kilíse megú uwond uwanyɔg agá ebeguén ká ubá Ɔgúnɔ́ wa ebeguén na ebe bányá bɔgɔ́s. 10Aŋuá gɔg, góbusió bá giág egélenyé sɔ́g mɔnda e? Aŋuá gɔg, giág asɛ́gɛ́naná sɔ́g mɔnda e? Basuá bem gɔg, digedélímin ogóbusió bá Gɔdányá ká udigélenyi. 11Búnyɛ́ buɔ́ŋɔ́n ká: Mmábɛ́lia, yaŋuá Ɔgúnɔ́ inyá ɔgɔ́s, band gidigid geguns enú agám góbusió, bónd béngúmenyi yaŋuá Gɔdányá#14.11 Alɛ́ŋɛ́d Eso 45.23; 49.18 (Fil 2.10-11).. 12Anaány mɔnd gidigid gonuódinonyi gá bielínyélínyé bág gidigid aga Gɔdányá.
13Anyɛ́ búnyá anaány, nsɛ́ dɛ́dɔ́mb gugélenyinyi basuá na basuá. Dɛ́sɔ́mb ká didibúbényi ta ɔ́gɔ ká dididídígín mɔnd ká wál gɛfal. 14Anɛ́ inyá abɛ́ládán na Ɔgúnɔ́ Yésu, ngúlɛnsaan bese na bese ká, ta buanda búnyá gilegélég búdɛ́ba. Mɔnd gɔg mábɛ́dágɛd ká buand búmodió nyɛ gilegélég, buanda ubuány guɛ́yaan gilegélég gág góbúsió. 15Émésígilenyi ɔdɛm wá endimen wɔ́w wa guádáb na gunyánan buanda ubú ɔwɔ́ udiányánáná, adiguánda anyɛ́ ɛlɛga ɔ́yɔnɔ́. Bɛ́nyáŋányáŋ ká mɔnd ɔwɔ́ Kilíse méegú gág góbusió dɛfɔ́f góbusió bá manyán ɔmɔ́ anyánaná. 16Ubú aŋuá alɛ́ŋaná bese dɛgúbianan ká búbá nŋili ya gual ká bɔsɔ́gɔ́ ɔyɔ́ bɔbɛ́ gɔ́w. 17Gágual ká Bufuŋ bá Gɔdányá dɛbá buóny bá ɔnyɔ́ na nɛfuá. Búnyɛ́ busi, bumbén na ɛyayɔ́. Manda amaány gidigid gúlenin agá Ɛsamb yá Mefúny. 18Ámála buol bá Kilíse nɛnama iniány, agasɛmaan Gɔdányá, band gɔgugɔ́lɔɔn sɔ́n giant gá buanda. 19Kányɛ gúnyá ká, diámba buanda buálaná ká dísɔ́dɔɔn agá bumben buónd buála ká dɛ́gɔ́nɛ́n ɔlɔŋ agá guádáb.
20Adɛsɛŋɛ́n buol bá Gɔdányá góbúsió bá manyán. Búnyɛ́ meliŋítas dɛnyɛ na nŋili yá gunyánan manyán gidigid, gɔg ká, gunyánan manda mányá mégúbúbényi mɔnd dɛbá bese. 21Buanda búnyá bese nyɛ ká, adiál buanda búnyá bégúbúbényi sɔ́g mɔnd a, ta buál gubá gunyánan bulɔg, ta gubúwánan magɛ́b. 22Ɔ́gɔ agúlɛnsan ká anyɛ wa gúnyánan buanda gidigid, ta ɔ́gɔ ká adɛbá wá gunyá, lɔbɔ na bú ɔgɔ́w gá ɔdɛm, nɔw na Gɔdányá nulɛnsaná. Bese giod na ewe udiɔ́bísɔ́mɔ́nɔ́ gá manda ɔmɔ́ walaná ta ɔmɔ́ udiáláná. 23Ewe ubiananá nsuŋié gigúl únyánaná buanda, Gɔdányá gúgélenyi wɔ́, gágual buanda walaná, udiguála bú agá giondiɔdɛ́mɔ́. Buanda gidigid búdiábiáláná agá giondiɔdɛ́mɔ́ nyɛ gɛfal.
လက္ရွိေရြးခ်ယ္ထားမွု
Lomɛ́ŋ 14: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ