Matyáasa 24
24
Yésusu a ojámó anáá yanje yá Irɔŋgɔ é né baábaŋgámó
(Már 13:1-4; Rúk 21:5-7)
1Yésusu a ma ré húmé na yanje yá Irɔŋgɔ anáá a enda, kó vihoóhóná vyáá ví ma kerá berebe náá ombótá ójó anáá vá me tíhíye páyéná éjé vá ma háá yanje mwané. 2Yésusu a ma járá nawó anáá: «Kesí no enámó wandá omówo wimé? Ŋgo nó ojánámó na vatɔ́ɔ́tɔ́ anáá homó owó wó mó cánámó cí na cí yanje eméye yimé é mó baábaŋgámó.» 3Amo Yésusu a ma ríi indindíi na máná ra yene yá marété ámá vá béráanámó anáá Orívyá, vihoóhóná vyáá ví ma me keréná o mo súsé vá ríi ndéndéŋge anáá: «O só ojánámó itíndíkáná íjí wandá mwané wó né eŋgavenámó, kó na ndeme éjé e né tíhíyámó wuré wɔɔ́ na mamana má cí.»
Ndeme ra mamana má cí
(Már 13:5-13; Rúk 21:8-19)
4Yésusu a ma wó wúndíyé anáá: «Kéríkyáno anáá moto ka nó déŋgyé pé. 5Esené vato mbunu vá mó urámó na niyó namé kó vá mó járámó anáá: Noó kójo Irɔŋgɔ a ma ijátá! Kó vá mó déŋgyámó vato mbunu pé. 6No né ovámó vá járá anáá vitá ví ámó na vidɔŋgɔ vimó kó hée anáá vitá ví urámó, vinó o kéríkye! Vinó ka tíné esene éyé wó géremenámó anáá mamba mwané má jíne, wójerií anáá wó ta mó rií mamana má cí káamáma. 7Edɔŋgɔ emó é né nywaanámó na eye emó, kó noyɔŋɔ nomó nó né núbaanámó na noyɔŋɔ enomó, njeŋge e né riyámó na pandó mbunu, kó cí e né veéryámó na pandó na pandó. 8Mamba amáma mimé má né riyámó makésyé wa nkonkore. 9Kaá vá né nó kávámó anáá vá nó tuúriye kó vá né nó onámó, mayɔŋɔ mimé má né nó bénámó na wusó wá ebérááná yámé. 10Ɔ́wɔ́ ombunu rá vato ó né céŋgítyámó ŋgɔ́téééna kó vá né vákávaanámó vámwané na vámwané owunde ovábénaana vámwané na vámwané. 11Ombunu rá vambé vá vahúmíye maró vá né uránámó onde jeénye ombunu rá vato. 12Wobé wó né gónámó kó wó né mandéenámó andiŋgé rá ombunu rá vato. 13Wó je rií anáá ojo a né menevámó ondo húmé na mamana, Irɔŋgɔ a né me sótyámó. 14Usi wa Cómó wa Edɔŋgɔ éyé na máná omójo a né ojavenámó na cí iŋgime, ombótá ojó anáá mayɔŋɔ mimé má ová, kaá na nímé raá kówo mamana má cí má né urámó.»
Yésusu a ojámó anáá vato vá né enámó etɔɔ mbunu
(Már 13:14-23; Rúk 21:20-24)
15«Ará no né enámó ojo vá béráanámó anáá Ombé wa asasona, a rií na pandó éjé mwáŋ mwáŋ ámó ahúmíye maró ójó Danyéere a ma járá, ojo a ráŋámó a geremenamó wová wandá mwané wusi na wusi! 16Na itíndíkáná mwané, ava vá mó riyámó na Yúdeyá vá mó géremenámó obwɔ́nɔ́nɔ naáté yá eŋgené. 17Ojo a mó riyámó na masasa má yanje, a ta eŋgá iŋgáana na yanje anáá a wɔ́rɔ́mó wandá, 18ojo a mó riyámó na kondo, a ta eŋgá wunde na nimé anáá a endámó wɔ́rɔ́ cunú raá. 19Noóŋgó na vakótó ává vá mó riyámó na vaná na ambúmu, na ava vá mó nwíyámó váná mabáné na metúú mwané! 20Ovásóóríyámáno ombótá ójó anáá ará mamba mwané má né jinámó, no rií ka bwɔ́nɔ́ na itíndíkáná rá meŋgɔ, ítɔɔ hónó isí yá ihuwe. 21Makáná má mó riyámó kána éjé má ma eŋgá má árɔ́wɔ́ ká rií okésyé ówó na ebondéná yá cí ohúmé tetee ojó, kó ukú rá makáná mwané ó ta mó ne rií hé isí emó. 22Kó Irɔŋgɔ a ma eŋgá a ríi ka sómbá metúú mwané, moto a ta ma eŋgá a sɔ́tɔ́, wó je rií anáá, na wusó wá ava ómwané maté a ma ijátá kówo a ma sómbá metúú mwané. 23Ŋgé moto a járá na vinó anáá: Enáno! Ojo Irɔŋgɔ a ma ijátá a ámó ará, ŋgé hónó anáá: A ámó nanyá vinó ká atɔ́wɔ. 24Esené vato vá mó urámó vá tɔ́ŋɔ́ anáá Irɔŋgɔ a ma wó ijátá ndeke viváná kó hónó vahúmíye maró vá viváná vá mó urámó kó vá mó eŋgámó mamba má okémbyé na masimbá ukú ójó anáá vá déŋgyé vato pé. Wá ríi wandá mwané wó ámó weŋgavena, vá mó hítyámó honó odéŋgyé tɔɔ ava Irɔŋgɔ a ma ijátá. 25Kóomówo ŋgo mána okésyé o nó bémbétena.»
26Ŋgé sɔ́ vá nó ojáná anáá: «Mwaná moto ojo naáté yá ekwété yá edɔŋgɔ ojó, vinó ka enda, ítɔɔ anáá: Kóojójo na pandó íjí ndaaŋ, vinó ka atɔ́wɔ!»
Wuré wá Mwaná moto
(Már 13:24-31; Rúk 17:23-24; 21:25-31)
27«Wó je rií anáá séem ámó ineŋgí yá mbemberitye é sárámó máná okésyé ówó pere éjé oŋgóná ó páanámó ondó húmé pere éjé oŋgóná ó vétémanámó, naná kówo wuré wá Mwaná móto wó mó riyámó. 28Homó wimé ówó mbimbe e ámó ɔ́wɔ́ kówo monóoní úmú mó nyámó mbimbe mó mó váwónjéenámó. 29Metúú ómwané, vato vá mó tímbaanámó na ombunu rá makáná. Ikɔkɔ ka tómbá, na nimé ra makáná, mbínó e mó butyáanámó oŋgóná, ohé ka ne pa, mukeekéní mó mó urúkyánámó na máná wobana na cí, kó ŋguru íjí na máná í mó baábaŋgámó. 30Ɔ́wɔ́ kówo ndeme ra Mwaná moto e mó húmámó na máná, kó mayɔŋɔ mimé ámá na cí má mó seétanámó na mbií, na nimé raá, vá mó enámó Mwaná moto a enda uré naáté vyá viyásá vyá máná, na ekáné yá ŋguru na niimí. 31Kó ará cévá e mó tɔŋgétámó, a mó tómámó va éŋgerese váa na visɔɔtyá vyá cí íví bííní anáá vá wónjéena ava a ma ijátá owɔ́rɔ́ ówó na iseri yá máná emó ondo húmé na eyomó.
32Ováno wusi na wusi ehoóhona éyé tíné ra ndɔ́ɔ́ yo eréenámó, ará párá ráá í késyámó oneŋgena owunde obyá twané, no jembámó anáá bwaá wó etá berebe. 33Séem mwané kójo ará no mó enámó mamba mwané mimé, vinó ojembe anáá Mwaná móto a etá na ehótó ra vínó. 34Ŋgo nó ojanámó na vatɔ́ɔ́tɔ́ anáá, okará rá vato ójó ó ta né tómbá anáá mamba mwané ka eŋgavena. 35Máná na cí mo ne tómbámó, wó je rií anáá epeŋge ye amé é te me tómbá.»
Moto a ta ijímé isí éyé Okí a mó urámó
(Már 13:32-35; Rúk 17:26-27; 17:34-35; 12:39-40)
36Yésusu a ma járá hée anáá: «Isí mwané na itíndíkáná mwané, moto a ta ijímé, tɔɔ va éŋgerese ává na máná, tɔɔ Mwaná, ka na moto, bɛ́ŋ Tetáŋgá móka kójo a ijímámó. 37Wanda ówó wó ma tómbávéná na itíndíkáná rá Nówe wó mó éŋgavenámó hónó isí éyé Mwaná moto a mó endámó etá, 38esene éyé na itíndíkáná mwané, hɔrɔ́ ekáné yá nowórá ná endééré nó árɔ́wɔ́ ka sowa, vato vá katé nyá, vá wényú, vá baána kó vá eréénana ŋgwande rawó na tobá hwɔs isí éyé Nowé a ma iŋgááná naáté yá ekáné yá ŋgɔmbe. 39Vá katé rií ka bísí na wandá, hwɔs ámó nowórá ná endééré nó ma uré o wó oná bimé. Náná honó kówo wuré wá Mwaná moto wó mó riyámó. 40Wó mó riyámó anáá vato vává na apúú, omwesií owɔ́rɔ́vena, ojomo omicevena. 41Vakótó vává vá mó riyámó na ogora ówó nkɔɔ́, omwesií owɔ́rɔ́vena, ojomo omicevena. 42Kúráno sɔ́, esene éyé no ta jembé isí éyé Okí wa vinó a mó urámó. 43No jembámó anáá ŋgé moto wa yanje a ijímé itíndíkáná rá wutúú íjí oŋgúbí a né urámó, a vaŋgámó okuré ombótá ójó anáá oŋgúbí ka borona mpimi raá ra yanje. 44Na wusó mwané kówo vinó hónó no geremenámó ováheéhenda esene éyé no ta ijímé itíndíkáná íjí Mwaná moto a né urámó.»
Yeŋga manɔnɔwɔ éyé é ndéndámó na mbéndɔ́
(Rúk 12:42-46)
45«Eyáté Yeŋga manɔnɔwɔ sɔ́ kéye é ámó kírítítí é wúnde orií na peyɔ? Ó ámó ojo mása a ma me tírímíyé anáá a beerye vasɔ́ɔ́ veŋga manɔnɔwɔ a wunde o wó hwá manyá na mpaŋá ra itíndíkáná. 46Vitaka na yeŋga manɔnɔwɔ éyé mása ará a né endámó etá, a né me etíyámó hɔrɔ́ a eŋga manɔnɔwɔ mwané. 47Ŋgo nó ojánámó na vatɔ́ɔ́tɔ́ anáá másá waá a né me hwámó ekúmé ráa eŋgímé anáá a beerye. 48Wá je rií ombé wa eŋga manɔnɔwɔ, a né késyámó ojárá naáté yá otémá ráa anáá: Mása wame a ta vaŋgá osoŋgíye ondo etá, 49kó a né késyámó onúbé vasɔ́ɔ́ veŋga manɔnɔwɔ, kaá ómwané onuumana a nyá a vényú orɔŋgɔ na vinyá mɔwɔ́. 50Jembáno anáá, mása waá a né endámó etá isí éyé ómwané a ta né me gíré kó honó na itíndíkáná íjí a ta né ijíme. 51Kó a né me gúnámó owunde o me hwá ipéyé yá vato vá mpimbirí, ɔ́wɔ́ kówo mbií í mó riyámó na vikárátá vyá wandona.»
လက္ရွိေရြးခ်ယ္ထားမွု
Matyáasa 24: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL