Matyáasa 21
21
Yésusu a iŋgáánámó na Yérusareme
(Már 11:1-11; Rúk 19:28-40; Yoh 12:12-16)
1Ará vá ma rii vá etá berebe na Yerúsareme na kɔ́ŋgɔ́ ra edɔŋgɔ éyé anáá Betepagéya na yene ra maráte a ma vá béráanámó anáá orívyá, Yésusu a ma tómá vihoóhóná vyáa vívé. 2Aye nawó anáá: «Ndanó na edɔŋgɔ éyé émó na wusó wá vinó, bɛ́ŋ ámó no vaŋgámó ojine, no waŋgámó wetiyé ekótó yá eyekása woté wóté na mwaná. O me hurúnámáno no ŋguréna nawó. 3Ŋgé moto a no súsé wandá, vinó ówó wundiyé anáá: Okí kó ójó a waŋgámó. Vá waŋgámó no mityé na enda kwakwa.» 4Wanda mwané wó ma eŋgávéná náná ukú ójó anáá até éyé ahúmíye maró a ma járá wo eŋgávena. 5A ma járá anáá: Ojánánó ŋgwandé éjé Siyɔ́nɔ anáá: Éná! Ahumu rɔɔ́ yó urámó na mámó, a ovásísye nóto kó a ámó indindíi na máná ra ekótó yá eyákása na mwaná waá. 6Kó vihoóhóná ví ma enda ámó Yésusu a ma járá nawó, 7kó vá ma uré na eyákása eméye na mwaná wáa, o wó táryáana cunú rawó ukú ójó anáá Yésusu a nuumana. 8Ncumbí vá vato a kate ta cunú ra awó na máná na ojɔŋɔ, vá ámó vá háhona vaná párá ra marété vá bisáná pé na pé. 9Vato ává vá katé ndenda na wusó na ava vá katé byɔɔnɔ na nimé, vá katé rúme na ŋguru anáá: «Niimi na Mwaná Dáviti! Ŋgá Irɔŋgɔ a utana ŋgáŋgó na ojo a urámó na ebérááná yá Okí! Niimí na Irɔŋgɔ Ojo urehí na máná!» 10A ra Yésusu a ma iŋgaana na Yerúsareme, oŋgórá oŋgime o katé veérye kó vato vá katé súsé anáá: «Wó ámó ané?» 11Kó vato vá katé wó wúndiye anáá: «Wó ómó ahúmíye maro Yésusu ójó na Nasaréte ójó na Gariréya.»
Yésusu a gúnámó vato vá mékíte na yanje yá Irɔŋgɔ
(Már 11:15-19; Rúk 19:45-48; Yoh 2:13-16)
12Kó Yésusu a ma iŋgaana naáté yá yanje yá Irɔŋgɔ okésyé ogúné vato ava vá katé sera motée na ává vá katé kuse. Obúŋgúnana vá dévere vá ava vá katé céndíye mwení na vá síye vá vasérá emeŋgá. 13Aye nawó anáá: «Irɔŋgɔ a ma járá na kárate waá anáá: Yanje yámé é ámó riyámó béráánérí anáá yanje yá mbásóóríyé kó vinó no búndyámó yó etá asɔɔ́ rá vaŋgúúŋgúbí.»
14Byewu na vato ává vá céŋgámó va ma me keréná naáté yá yanje yá Irɔŋgɔ kó a ma wó rɔ́ndɔ́. 15Vagónó vá vacekiye mómí na vayéere vá mbéndɔ́ vá ma ená mamba má okémbyé ámá Yésusu a ma eŋgá, owunde wená ámó vaájó vá katé rume na yánja yá Irɔŋgɔ anáá: «Niimi na Mwaná Dáviti!» Kó vá ma késyé wová orúndú. 16Kó vá ma járá na Yésusu anáá «Ye wovámó wandá ówó vá ma járá?» Yésusu a ma wó wúndíyé anáá: «Eeŋ, no ma eŋgá no a ré rií ka bana na kárate wa Irɔŋgɔ anáá: Wó ámó na uŋgúté rá vaájó na mubɔbɔkɔ kówo o ma váhéehédéná esawo ra igúmíye?» 17Kó a ma wó kútyé hɔ́rɔ́ ohúmé wenda na edɔŋgɔ yá Betaníya, ɔkɔ́ kówo a ma endá vété.
Yésusu a sememó tíné ra mpaŋganá
(Már 11:12-14; 11:20-25)
18Kó Yésusu a ma owa njeŋgé a ra kate nde eta na oŋgórá rá Yérúsareme míveri máa ibéési cúcú. 19Kó a ma ena tine ra mpaŋganá na kɔŋgɔ ra pé, a ma kerá berebe ka etíye wandá bɛ́ŋ twané na twané kó a ma járá na tiné ra mpaŋganá eméje anáá: «O ta né ne umé vibomá!» Ikɔ́kɔ́ ka tómbá tiné ra mpaŋganá e ma ŋgwé. 20Kó a ra vihoóhóná bi ma ena vá te kembye vá yáá: «cwíní kó ówó tiné ra mpaŋganá í ma hyána ugwé bɛ́ŋ a mo a me járá?» 21Yésusu a wó wúndiyamó anáá: «Wó ámó vatɔ́ɔ́tɔ́ ŋgo nó ojánámó, ŋge na timbé ŋgɔ́tééná isí emo vinó ka je timbe mpétɔ́ naaté yá otémá, vinó hónó no hítyámó weŋga até éyé ŋgo ré eŋga na tiné ra mpaŋganá kó hónó tɔɔ na oŋgéné no ámó ojárá anáá: Urúkyé hɔ́rɔ́ ondo vánɔ́ naáté yá máŋá, kó wó né eŋgavenamó. 22Wimé ówó no ne susámó Irɔŋgɔ naáté yá mbasóóriye na ŋgɔ́tééná no waŋgámó otimbé.»
Ŋguru ra Yésusu yo endámó uré háá
(Már 11:27-33; Rúk 20:1-8)
23Ará Yésusu a ma iŋgaana naáté yá yanje yá Irɔŋgɔ kó vagónó vá vacekiye mómí na vagónó vá edɔŋgɔ vá ma kera na itíndíkáná íjí a kate yéére kó vá ma járá náá anáá: «Na ŋguru ra ane kó owó weŋgámó mamba mwané? Kó ane ójó a mo hwá ŋguru mwané?» 24Kó Yésusu a wo wundiyámó anáá: «No hónó, ŋge ne susámó cucáná mwéesíí bɛ́ŋ? Ŋge na ŋgundiyé no one ojáná moto ójó a géréénámó ŋguru anáá ŋgeŋga mamba mwané. 25Áné kójo a ma tómá Yohánese anáá a dwe vato? Irɔŋgɔ kee vato.» Kó vá ma késye onyimama vámwané na vámwané anáá: «To a járá anáá Irɔŋgɔ, a né járámó na visó anáá na wusó wá até sɔ́ kówo no ta ma atɔ́wɔ Yohánese? 26Ŋge ta járá anáá wó ámó vato, hee to geremenámó otíné cumbi a vato ojó, esene éyé vato bimé vá buŋganámó anáá Yohánese a ámó ahúmíye maro.» 27Kó vá wundiyámó Yésusu anáá: «To ta jembé.» Ómwané hónó aye nawó anáá: «No hónó, ta hítí o no ojáná moto ójó a ŋgéreénámó ŋguru anáá ŋgeŋga wandá mwané.»
Nkaná ra embwene ebané
28Yésusu a ma járá nawó anáá: «Vino no mbugámó ne? Moto a ma timbé embwene ebane. Kó a ma járá na makésyé wáá a mwaná anáá: Mwana wa ame nde nɔ́nɔɔ́ wusí owó na kondo. 29Mwaná ame wundiyámó ámó anáá: No ta enda. Na nimé éjé wɔ́ɔ́, ava sumiyámó kó endámó. 30Kó isyé a ma járá sɛ́ɛm a wandá na ombwene ráá ójó tií. Kó mwaná me wundiyámó anáá eeŋ, bábá ŋgo endámó. Kó a ta ma enda. 31Na váná vavane mwané ójó ate a ma eŋga mbaŋgena ra isyé.» Vá me wundiyámó anáá: «Mwaná wa makésyé.» Yésusu aye nawó anáá: «Ŋgo no jánámó wo omó vatɔ́ɔ́tɔ́: Va séra tásá na vakótó imbamba vá no jovámó wiŋgaana naáté yá Edɔŋgɔ yá Irɔŋgɔ. 32Yohánese a ma uré o nde ne tihiye pe ra ndíŋgirííŋ kó no ta ma me atɔ́wɔ́, vá sera tásá na vakótó imbamba vá mwané vá má me atɔ́wɔ́ to a me no ma ena motyé mwané kó no ta ma cendé étéma rá vinó anáá no mo atɔ́wɔ́.»
Nkaná ra vambé vá vanɔnɔɔ
(Már 12:1-12; Rúk 20:9-19)
33«Óváno nkaná indyeé. Moto a ma atá njáná, kó anovámó iruŋge o kɔ́ŋgɔ́ o kɔ́ŋgɔ́, otímé yuru, ohaá yanje yá megíré kó a ma erééná vanɔnɔɔ njáná mwané na tú petí kaá wenda na oŋgendɔ́. 34Ará itíndíkáná ra mabuwé e ma humé, kó a tomámó vato waá wa manɔnɔwɔ na vato ává a ma wó hwá njáná na tú petí anáá vá me tóména ŋgava raá ra mebuwe. 35Kó vato vá tú petí vá ma ambááná veŋga manɔnɔwɔ vá mása wawó, ogite oojó nkɔŋdɔ́, woná ojomo, otwáná hée ojomo atááné o me oná. 36Kó moto apúú a wundámó otomá hée vato a mɔnɔnɔ́ɔ́ vendyé mbunu otómbá ivá wusó kó a má a wo turiyé sɛ́ɛm. 37Na mámáná, a tomámó mwaná wáá mate a buŋgana anáá vá né me rukyámó. 38Vato amɔnɔnɔ́ɔ́, wa ená ówó vá má ená Mwaná moto apúú vá te ojárá vamwané na vamwané anáá: Mwaná wa mbíinde ómó uránó to mo oná to cáná na mbíinde. 39Kó vá ma ambaana ome titiyé na cúú rá apúú káá o mo oná. 40Ará moto apúú a ne endámó éta a ne eŋgámó cwíini vato va manɔnɔwɔ mwané?» 41Váye na Yésusu anáá: «A né onámó vambé vá vanɔnɔɔ amáva ka na noóŋgó kó a né wɔ́rɔ́mó njáná raá weréena vanɔnɔɔ véndyé na tú petí ává vá né ma hwámó mebuwe na itíndíkáná íjí í géremenámó.» 42Yésusu ayé nawó anáá: «Na ra ríí ka bana na kárate wa Irɔŋgɔ anáá:
Itááné éné vahaá byanje vá ma váráŋgá,
nó ma búndé itááné éné nó tímbámó yanje yimé?
Wó ámó manɔnɔwɔ má Okí,
wó ríi hée ekáné yá usi wa wandá na aŋgísó rá visó!
43Ŋgo no jánámó, Edɔŋgɔ yá Irɔŋgɔ é mó no urikyénámó na embɔ́ɔ́ káá werééna noyomo ene ne no umámó viboma. 44Ojó a no obámó o máná rá itááne a ne manjeyámó ójó itááne no ne mobenámó o máná ane gorowenámó.» 45Ará vagónó vá vacekiye mómí na va parisene vá má ová nkáná mwané, vá ma jembé anáá até éyé Yésusu a katé járá é katé wó néména. 46Kaá vá ma késyé osɔsɔ anáá vá me ambaana, wó je rii anáá vá katé tiné cumbi a vato, esene éyé vá kate wɔ́rɔ́ Yésusu a ma humiyé maaro.
လက္ရွိေရြးခ်ယ္ထားမွု
Matyáasa 21: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL