Yohánese 6
6
Yésusu a toŋyámó vato
(Mat 14:13-21; Már 6:30-44; Rúk 9:10-17)
1Na nimé raá, Yésusu a ma endá mbóró ra ekáné yá esɔ́ éyé na Gariréya. Vá wúndámó obéráana esɔ́ mwané anáá esɔ́ yá Tiberyáde. 2Ncumbí wa vato a katé me byɔɔnɔ, esene éyé vá ma ená mesimbá ámá a katé eŋga, a ondónana vinɔ́. 3Yésusu a ma náátá na yene, kó a ma nuumáná orɔŋgɔ na vihoóhóná vyáa. 4Wó ma ríi hɔ́rɔ́ ibínó yá va Yúdene éyé vá béráanámó anáá pásáka yó etá berebe. 5Yésusu na máná ra yene a ma nɔɔ́ aŋgísó wená ncumbí wa vato a me uréna kó a ma járá na Híripi anáá: «Héní kówo to né kusámó manyá anáá vá nyá?» 6Yésusu a ma járá naná anáá a ová até éyé Híripi a né wundyámó, ndeke ómwané a katé ijíme até éyé a vaŋgámó weŋga. 7Híripi a ma me wundíyé anáá: «Tɔɔ vikpama vyá mwení motete móvá ví tá né geremena ukú ójó anáá ará to né kusámó beréte, ámó moto atimbe mwaná wa pumbú.» 8Ehóóhona yá Yésusu índyé ebérááná anáá Anderéya, navéne Símono Pyéere a ma járá na Yésusu anáá: 9«Mwaná wa maŋgájó onómótó a ámó ará a timbámó va beréte vá vawora vátáánó na cwí ibé, kó wó hítyámó weŋga até na ncumbí wa vato ojó?» 10Yésusu a ma járá anáá: «O wó núúmíyámáno.» Ihuwe e ma ríi mbunu pandó mwané. Vato vá ma nuumáná, vanómótó vá ma ríi wandá ámó vato tɔɔ́sini ísáánó. 11Kó Yésusu a ma wɔ́rɔ́ va béréte ává vátáánó, weréena Irɔŋgɔ ŋgáŋgó kaá otéŋgíye vato. A ma eŋgá hónó sɛ́ɛm wa wandá na cwí kó a katé eréena ámó moto ŋgava éjé a katé vaŋga. 12Ará vá ma obéyáná, Yésusu a ma járá na vihoóhóná vyáa anáá: «Tótáno pumbú íjí í mó cáná ukú ójó anáá wandá ka dáŋgá.» 13Vá ma tótá pumbú íjí í ma cáná na va béréte vátáánó ává vato vá ma nyá, onwíyé visáŋgá vyábɔ́t na vívé. 14Ará vato vá ma ená mesimbá ámá Yésusu a ma eŋgá amáma, vá ma járá anáá: «Na vatɔ́ɔ́tɔ́, moto ojó a ámó Ahúmíye maró wa Irɔŋgɔ ójó a ma geréméná wuré na cí ra ndono.» 15Amó Yésusu a ma jembé anáá vá váŋgámó ondo me wɔ́rɔ́ na ŋguru anáá vá me nuumiye ahumu, kó a ma bwɔ́nɔ́ hée moká, wenda na yene.
Yésusu a ndendámó na máná ra matéyá
(Mat 14:22-27; Már 6:45-52)
16Ará enéŋgá é ma húmé, vihoóhóná vyá Yésusu ví ma wɔsɔ́ na kɔ́ŋgɔ́ ra esɔ́. 17Kó vá ma náátá na ekáné yá ŋgɔmbe wenda ówó na Kaperenahumu mboró ra esɔ́ ejomo. Mbínó e ma ríi yo óba kó Yésusu a ma ríi a arɔ́wɔ́ ka enda wó etíye. 18Ekáné yá puŋgi e ma ré ruŋge kó ombúkíyé ó katé naátana. 19Vihóóhóna ví ma bosá wandá ámó méta toósini isáánó ohúmé ámó toósini rácátó, kaá vá ma ená Yésusu a ndenda na máná ra matéyá a kerana berebe na ŋgɔmbe, kó wokótó wó ma wó ambááná. 20Yésusu a ma járá nawó anáá: «Vinó ka tíné, wó ámó noó!» 21Vá ma diŋgé anáá va me wɔ́rɔ́ na ŋgɔmbe, vedá vá ma ríi vá ohúmé na pandó éjé vá katé enda.
Yésusu a ámó beréte wa esɔ́tɔ́
22Míveri máá, ncumbí wa vato ává vá ma cáná mbóró ra esɔ́ ejomo, vá ma ijímé anáá ŋgɔmbe e ma cáká emweesií, kó Yésusu a ta ma endá orɔŋgɔ na vihoóhóná vyáa, ví ma endá vaká. 23Wó je rií anáá ŋgɔmbe índyé í katé enda urána na oŋgórá ra Tiberyáde ondo jinana berebe na pandó éjé vato vá ma nyá beréte hɔrɔ́ Okí Yésusu a omána otéŋgyé Irɔŋgɔ na wusó wá beréta mwané. 24Ará vato vá ma ená anáá tɔɔ Yésusu, tɔɔ vihoóhóná moto a ta ámó ɔ́wɔ́, vá ma náátáná na ŋgɔmbe imíji ondo sɔsɔ Yésusu na Kaperenahumu. 25Ará vá ma me etíyé mbóró ra esɔ́ ejomo, kó vá ma me súsé anáá: «Oyéere, itíndíkáná ijaté iji mámó o mó húmé ará?» 26Yésusu a ma wó wúndíyé anáá: «Na vatɔ́ɔ́tɔ́, na vatɔ́ɔ́tɔ́ ŋgo nó ojánámó anáá, wó ta ámó esene éyé no mó ená mesimbá ámá ŋgo mó éŋga kówo no ncɔcɔmó, no ncɔsɔmó esene éyé no má nyá beréte wobéyána. 27Vinó ka nɔnɔwɔ na wusó wá manyá ámá má ndeéranámó, nɔnɔ́wɔ́no na wusó wá manyá ámá má ríiríyámó má wúnde weréena esɔ́tɔ́ éyé kɔ́rɔ́tɔ́tɔ́. Manyá mwané, Mwaná moto a né nó hwámó esene éyé Irɔŋgɔ ójó Tetáŋgá a ma me váá ndeme.» 28Kó vato amáva vá ma súsé Yésusu anáá: «Até kéye to geremenámó weŋga ukú ójó anáá to nɔnɔwɔ manɔnɔwɔ ámá Irɔŋgɔ a diŋgámó?» 29Yésusu a ma wó wundíyé anáá: «Manɔnɔɔ ámá Irɔŋgɔ a gírámó anáá no eŋga má ámó anáá no atɔ́wɔ moto ójó a ma tómá.» 30Kó vá ma járá na Yésusu anáá: «Ajaté asimbá kája o hítyámó o só tíhíye ukú ójó anáá to wo atɔ́wɔ, até kéye o né eŋgámó?» 31Vakókó vá vísó vá ma nyá manyá na ekwété yá edɔŋgɔ vá beráana anáá mána ámó aŋgɔŋgí á járámó anáá: «Irɔŋgɔ a ma wó hwá beréte ójó a endámó uré na máná ukú ójó anáá vá nyá.» 32Yésusu a ma járá nawó anáá: «Na vatɔ́ɔ́tɔ́, na vatɔ́ɔ́tɔ́ ŋgo nó ojánámó anáá, wó ta ámó Mósese ojo a ma nó hwá beréte ójó a ma endá uré na máná, wó ámó Tetáŋgá kójo a nó hwámó tɔ́ɔ́tɔ́ wa beréte ójó a endámó uré na máná. 33Esené beréte ójó Irɔŋgɔ a neénámó a ámó ojo a endámó uré na máná kó a neénámó cí ra ndono esɔ́tɔ́.» 34Kó vato amáva vá ma járá naá anáá: «Okí, o só hwámó beréte mwané itíndíkáná iŋgímé.» 35Kó Yésusu a ma járá nawó anáá: «Noó kójó ndo ámó beréta wa esɔ́tɔ́, moto ójó a urámó na noó a ta mó ová njeŋge, ojo a ŋgatɔ́wɔmó a ta mó ová nití. 36Vedá ŋgo má mámána járá na vinó: No má ená kó no ta atɔ́wɔ́. 37Vato bimé ává Tetáŋgá a pwámó vá né urámó na noó, kó ojo a urámó na noó, ta né me váráŋga. 38Esené ŋgo ma uré na cí, até anáá ŋgo eŋga até éyé diŋgámó, ŋgo ma uré ondo eŋga mbaŋgéná ra moto ójó a ma tómá. 39Mbaŋgéná ra moto ójó a ma tómá e ámó anáá ndií ka déŋgyé umwesií na ava a ma pwá índi ŋgo a wó hetíyé na raaté wa vigwé isí yá mamana. 40Naná kówo wó ámó mbaŋgéná ra Tetáŋgá: A vaŋgámó anáá moto uŋgimé ójó a enámó a wunde watɔ́wɔ Mwaná, moto mwané a timbe esɔ́tɔ́ éyé kɔ́rɔ́tɔ́tɔ́, kó noó, ŋgo mó me wundyámó na esɔ́tɔ́ isí yá mamana.»
41Na itíndíkáná mwané, va Yúdene vá ma késyé woŋguŋgure esene éyé Yésusu a ma járá anáá: «Ndo ámó beréte ójó a endámó uré na máná.» 42Kó vá ma uswíyé anáá: «Noó anáá Yésusu ojó a ámó ombwene rá Yóseve? Kesí to jembámó isyé na netí? Twiiŋí sɔ́ kówo a hítyámó ojárá anáá: Ŋgo ma sisé ondo uré ówó na mána?» 43Kó Yésusu a ma járá nawó anáá: «Tɔɔ́no woŋguŋgure ówó vinó na vinó! 44Moto a ta hítí wuré na noó ŋgé Tetáŋgá ójó a ma tómá a ríi ka me ture, kó noó ŋgo mó me wundyamó na esɔ́tɔ́ isí yá mamana. 45Wó ámó tirétíré na va kárate vá vahúmíye maró vá Irɔŋgɔ anáá: Irɔŋgɔ a né wó yeérámó bimé. Moto aá moto ójó a ovámó Tetáŋgá a wunde watɔ́wɔ ehoóhona yáa a urámó na noó. 46Moto a arɔ́wɔ́ ka ená Tetáŋgá, bɛ́ŋ ojo a endámó uré na Irɔŋgɔ. Ómwané a ma ená Tetáŋgá. 47Na vatɔ́ɔ́tɔ́, na vatɔ́ɔ́tɔ́ ŋgo nó ojánámó anáá, ojo a atɔ́wɔmó a timbámó esɔ́tɔ́ éyé kɔ́rɔ́tɔ́tɔ́. 48Ndo ámó beréte ójó a eréenámó esɔ́tɔ́. 49Va kókó vá vinó vá ma nyá mána na ekwété yá edɔŋgɔ, kó vá ma gwááná. 50Wó je rií anáá moto ójó a né nyámó beréte ójó a endámó uré na máná a ta né gwé. 51Ndo ámó beréte ójó a hwenámó, ójó a endámó uré na máná. Ojo a né nyámó beréte mwané a né sɔ́tɔ́mó na kɔrɔ́tɔ́tɔ́, kó beréte ójó ŋgo né eréenámó, wó ámó notó rame, ŋgo eréenámó notó mwané ombótá ójó anáá cí ra ndono e timbe esɔ́tɔ́.» 52Ojárá ówó Yésusu a ma járá naná, va Yúdene vá ma késyé osáŋgá vámwané na vámwané vá járá anáá: «Twiiŋí kówo moto ojó a hítyámó o só hwá nótó raá anáá to nyá?» 53Kó Yésusu a ma járá sɔ́ nawó anáá: «Na vatɔ́ɔ́tɔ́, na vatɔ́ɔ́tɔ́ ŋgo nó ojánamó anáá, ŋgé no a ríi ka nyá notó ra Mwaná moto, no wunde ovényú miné máa, no ta né timbe esɔ́tɔ́ na vinó. 54Moto ójó a nyámó notó rame owunde ovényú miné mamé a timbámó esɔ́tɔ́ éyé kɔ́rɔ́tɔ́tɔ́, kó isí yá mamana noó ŋgo mó me wundyámó na esɔ́tɔ́. 55Esené notó rame e ámó mpaŋá rá manyá kó miné mamé má sómbámó nití mpaŋá na mpáŋá. 56Moto ójó a nyámó notó rame a wunde ovényú miné mamé a né riíríyámó na noó, noó hónó na ómwané. 57Kó ámó Tetáŋgá ójó a ma tómá a hwenámó kó a eŋgámó anáá cɔtɔ́, naná honó kówo ŋgo né eŋgámó anáá moto ójó a nyámó a sɔ́tɔ́. 58Beréte ójó a endámó uré na máná a ta ámó amó ojo va kókó vá vinó vá ma nyá, vámwané vá ma gwááná, vedá ojo a nyámó beréte ojó a né sɔ́tɔ́mó na kɔ́rɔ́tɔ́tɔ́.» 59Ehoóhona éyé Yésusu a ma erééná na yanje yá mbásóóríyé éyé na Kaperenahumu kéeméye.
Vipéŋgé vyá esɔ́tɔ́ éyé kɔ́rɔ́tɔ́tɔ́
60Ará vá ma maná ovátɔ́rɔ́, ombunu rá vihoóhóná vyá Yésusu ví ma késyé ojárá anáá: «Vipéŋgé imíví ví kánáanámó, ané kójo a hítyámó omeneve ukúkú rá enjárá mwané?» 61Amó Yésusu a ma ijímé anáá vihoóhóná vyáa ví katé uŋguŋgure na wusó wá maró mwané, a ma wó súsé anáá: «Enjárá mwané e nó kánámó na etémá? 62Kaá ŋgé no a jé ená Mwaná moto a naáta homó ówó a katé rií na póná no né járámó eéné? 63Ireréŋgi yá Irɔŋgɔ kéye yó eréenámó esɔ́tɔ́, moto moká a ta hítí weŋga wandá, enjárá éjé ŋgo mó nó ojána e ámó Ireréŋgi éyé Mwáŋ mwáŋ e wunde orií esɔ́tɔ́. 64Wó je rií anáá avámó ává na vinó vá ta atɔ́wɔ́.» Maró omójo a ámó anáá Yésusu a katé jembe vato ává vá ta ma ré atɔ́wɔ owɔ́rɔ́ ówó na makésyé, a wunde ojembe honó moto ójó a ma geréméná o me sérá. 65Kó a ma uswíyé anáá: «Wandá mwané sɔ́ kówo ŋgo má járá na vinó anáá: Moto a ta hítí wuré na noó ŋgé Tetáŋgá a ríi ka me hwá ŋguru.»
66Okésyé ówó na itíndíkáná mwané, ombunu rá vihoóhóná vyá Yésusu ó ma pómbówáná otɔwɔ ondenda ówó naá. 67Kó Yésusu a ma súsé vihoóhóná vyáa íví vyábɔ́t na vívé anáá: «Vinó honó no diŋgámó anáá no endana?» 68Símono Pyéere a ma me wundíyé anáá: «Okí, na áné undyeé kówo to né endámó? O timbámó vipéŋgé íví ví eréenámó esɔ́tɔ́ éyé kɔ́rɔ́tɔ́tɔ́. 69Visó to atɔ́wɔmó kó to ijímámó anáá o ámó mwáŋ mwáŋ ójó a endámó uré na Irɔŋgɔ.» 70Yésusu a ma wó wundíyé anáá: «Kesí noó maté kójo ŋgo ma nó ijátá vinó ává vábɔ́t na váváné? Wó je rií anáá umweesií ójó na vinó a ámó ombé!» 71Yésusu a katé járá náná na wusó wá Yúdasa ombwene rá Símono Isikariyóto. Ítɔɔ ámó a ma ríi umweesií ójó na vábɔ́t na vává, ómwané kójo a ma geréméná osérá Yésusu.
လက္ရွိေရြးခ်ယ္ထားမွု
Yohánese 6: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL