Ŋgengéná 24
24
Moto ójó vá béráanámó anáá Tereturúsu a sɔ́mɔ́nɔmó Póoro
1Na nimé ra metúú mátáánó, ogónó wa acekiye mómí ójó Ananíyasa, na vagónó vámó kó na akamana na vato omo ebérááná anáá Tereturúsu, vá ma humé na ŋgɔ́mɔnɔ ójó Ferisí anáá vá sɔ́mɔ́nɔ Póoro. 2Kó Férisí a ma bérááná Póoro, kó Tereturúsu a ma késyé o me sɔ́mɔ́nɔ anáá: «Ogoó, mámó ojó wó eŋgámó anáá to sɔ́tɔ́ naáté yá ekáné dɔ́ŋgɔrɔ́ɔ́ŋ, kó o ma céŋdíyé mamba ukú ójó anáá noyɔŋɔ ná visó nó rií wusi. 3To wo hwámó ncókáná nasesi na wusi wimé ówó o só eŋgámó homó wimé na itíndíkáná iŋgímé. 4Wó je rií anáá ta vaŋgá oture téétéé índi ŋgo déŋgyé itíndíkáná, wandá mwané kówo ŋgo wo súsámó anáá, na usí wa otémá wɔɔ, a só hwá etú mwaná wa itíndíkáná. 5To mó ená anáá moto ojó a béyámó nasesi kó a wáámó induutana na raaté wa va Yúdene bimé ává na cí ra ndono, esene éyé a ámó njwé ra iwónjá rá vato ává na Nasaráte. 6A ma máá honó obyendye yanje yá Irɔŋgɔ, kó to má me ambááná. [ 7] 8Ará mámó maté o né me súsámó cúcáná, o né enámó anáá sɔ́mɔnɔ uŋgimé ojó a ámó vatɔ́ɔ́tɔ́.» 9Kó va Yúdene vá ma járá anáá até éyé Tereturúsu a katé járá na wusó wá Póoro é ámó vatɔ́ɔ́tɔ́.
Póoro a váháŋgánámó
10Ferísi a ma eŋgéná Póoro ndeme na ombɔɔ́ anáá a járá, kó Póoro a ma wɔ́rɔ́ enjárá a ye anáá: «Ogoó, njembámó anáá o ámó róyá na edɔŋgɔ yá visó wó etá maá mbunu, wandá mwané kówo kamanámó na nótó rame na ipitíiŋgímé. 11Mámó maté o hítyámó opyerye, kó o né enámó anáá wó arɔ́wɔ́ ka tómbá metúú mábɔ́t na mává, ŋgo má náá na Yerúsareme na ondo gúmíye ówó Irɔŋgɔ. 12Kó moto a ta ŋgétíyé petaana na moto, ítɔɔ kaá induutana na raaté wa vato na yanje yá Irɔŋgɔ, ítɔɔ na byanje vyá mbásóóríyé, tɔɔ naáté yá oŋgórá. 13Até yimé sɔ́ éyé vato avá vá mó járá na wusó wamé, vá ta hítí otíhíye anáá é ámó vatɔ́ɔ́tɔ́. 14Wandá ówó jembámó ówó pítyámó ojárá na aŋgísó rɔɔ́ wó ámó anáá: Nɔnɔwenámó Irɔŋgɔ wa va kókó vá visó kó mbyɔɔnɔmó pé ra Okí, éjé vámwané vá járámó anáá e ta nyemé, ŋgatɔ́wɔmó até yimé éyé tiré tíré na va kárate vá mbéndɔ́, kó na vahúmíye maró vá Irɔŋgɔ. 15Timbámó ipití na wandá wúmwéesií, tɔɔ vámwané maté hónó ává vá cɔ́mɔ́nɔmó vá tímbámó ipitímwané anáá: Irɔŋgɔ a mó hónonanámó vigwé, tɔɔ vesi, tɔɔ vambé. 16Wandá mwané kówo paatanámó anáá ndenda ndíŋgirííŋ na aŋgísó rá Irɔŋgɔ munú mamé dɔ́ŋgɔrɔ́ɔ́ŋ, noó ka vásɔ́mɔ́nɔ na wandá, kó na aŋgísó rá vato. 17Na nímé ra maá mbunu, ŋgo ma wundé na Yerúsareme anáá ŋgo aka noyɔŋɔ namé na mwení, kó ŋgo eréena Irɔŋgɔ mómí. 18Na yanje yá Irɔŋgɔ ɔkɔ́ kówo va ma ŋgétíyé. Ŋgo má rií ŋgo omana ováhúbyé, vato vá ta ríi naáté yá yanje yá Irɔŋgɔ name tɔɔ induutana í ta ríi. 19Wó je rií anáá va Yúdene vámó ává na Asíya vá má ríi ɔ́wɔ́, vámwané honó káva vá mó hítí otérémena na aŋgísó rɔɔ́ ocɔ́mɔ́nɔ ŋgé ŋgo má eŋgá wandá ówó wó béyámó. 20Ítɔɔ honó, ará vá ma rií name na yanje yá jósi, ŋgá vá ojá ihusí íjí vá má ambááná na nótó rame. 21Ye esene éyé ŋgo má rúmétá ndií eténé na raaté wawó anáá: Timbámó ipitíanáá Irɔŋgɔ a mó hónonámó vigwé, kówo vá cɔ́mɔ́nɔmó na aŋgísó rá vinó?»
22Amó Ferísi a ma jembé wusi na wusi até éyé é néménámó pé ra Okí, kó a ma wundyé enjárá isí índyé aye na va Yúdene anáá: «Ŋgo né sómbámó enjárá ra vinó ará ogónó wa njwé wa visimbi ojó Risíyása a né urámó.» 23Kó a ma járá na ogónó wa visimbi anáá a vaá Póoro na mboo, ka me wótá masóŋó, a wunde omice anáá vato váa vá me beerye.
Póoro naáté yá mboo
24Vaná vá metúú vá ma tómba, kó Ferísi a ma endá uré nawó na egé ójó Durusíye a rií ŋgwande ra va Yúdene. A ma tómá moto ondo wɔ́rɔ́ Póoro ukú ójó anáá a vátɔ́rɔ́ até éyé Póoro mwané a katé járá na wusó wá watɔ́wɔ ówó Yésusu Kirítu. 25Póoro a ma késyé woja ámó moto a geremenamó osɔ́tɔ́ ndíŋgirííŋ, na ogíyé ówó otémá kó hée anáá Irɔŋgɔ a mó jósyámó vato bimé, Ferísi a ma ová wohwaá aye na Póoro anáá: «Maná otírímiye náná wusí owó, ará ŋgo né timbámó itíndíkáná, ŋgo né wo béráanámó hée.» 26Wó je rií anáá, Férisí a katé piti hónó anáá Póoro a né me hwámó mwení, wandá mwané kówo a katé me béráana itíndíkáná iŋgímé na virényi. 27Na nimé ra maá mává, Porosiyúsu Fesetúsu a ma uré na meyiisana má Ferísi, kó ámó Ferísi a katé diŋge anáá va Yúdene vá me ovéna wusi, a ma cé Póoro na mboo.
လက္ရွိေရြးခ်ယ္ထားမွု
Ŋgengéná 24: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL