Ŋgengéná 22
22
1Ayáá: «Va mbísó na va tataá, óváno tetee ojó até éyé timbámó anáá njárá ukú ójó anáá ŋgo váháŋgána.» 2Ará vá ma ová Póoro a járá enjárá rawó, vá ma ne wúnde hée o ne caka orií cók kó Póoro a ma endá na wusó na enjárá ayáá: 3Ndo ámó mwaná wa va Yúdene, ŋgo ma byánávéná na oŋgórá rá Tárasa na edɔŋgɔ yá Ciricíyá vedá ŋgo ma góná na Yerúsareme eéná, kó Gamariyére kójo a ma ríi oyéere wame. A ma njéére wusi na wusi mbéndɔ́ rá vakókó vá visó. Ŋgo ma ríi táásé na wonotó na wusó wá Irɔŋgɔ sɛ́ɛm ámó no ámó wusí owó. 4Ŋgo ma re túúryé woná hée vato ává vá ma ré byɔɔnɔ pé ra Okí naná kówo ŋgo katé eŋgá anáá vá ambaana na vakótó na vanómótó vá wó nɔ́ɔnɔ na mboo. 5Ogónó wa vacekiye mómí na iwónjá rá vagónó ává na edɔŋgɔ vá ámó okamasana enjárá éjé njárámó ejé, esene éyé vámwané káva vá ma pwá va kárate na wusó wa va mbísó vá visó ará ŋgo ma endá na oŋgórá rá Damása. Ŋgo ma diŋgé anáá ŋgo ambaanana vatɔ́wɔ ává ɔkɔ́ ukú ójó anáá ŋgo enda nawó na Yerúsareme índi vá wó pwénísye.
Póoro a ojámó mbérááná raá
6Ŋgo ma ríi ŋgo arɔ́wɔ́ na onjɔ́ŋɔ́, hɔrɔ́ ŋgo etá berebe anáá púmé na Damása, wandá ámó twéfe, ŋgo ma buuwé ekáné yá ineŋgí ondo uré ówó na máná e ma ŋgéndétyé okésyé onoma. 7Noó ovádúme na cí kó ŋgo ma ová mií emo e járá name anáá: Sóoro, Sóoro, na wusó wá até kówo o ntuúriyámó? 8Kó ŋgo ma súsé anáá: Mámó áné Okí? Kó mií e ma ŋgundíyé anáá: Ndo ámó Yésusu ójó na Nasaráte, noó kójo o tuúriyámó. 9Vato ává vá ma ríi orɔŋgɔ name vá ma ená ineŋgí, vedá ka ová mií éjé e ma ré járá name. 10Kó ŋgo ma súsé sɔ́ anáá: Ŋgeremenámó weŋga twiiŋí Okí? Kó Okí a ma járá name anáá: Hatééná wo enda na Damása, ɔkɔ́ vá né wo ojanámó até yimé éyé o né geremenámó weŋga. 11Amó ineŋgí mwané é ma nomá nasesi, kó é ma káá bwewu, kaá vato ává vá ma ríi orɔŋgɔ name káva vá ma turé na ombɔɔ́ ondo húmé name na Damása.
12Moto omo a ma ré rií ɔ́wɔ́ anáá Ananíyasa, moto mwané a ma ré diŋge Irɔŋgɔ a wunde hée a beerye mbéndɔ́, kó va Yúdene bimé ává na Damása vá ma ré járá wusi na wusó wáa. 13A ma uré ondo ŋgétíye aye name anáá: Sóoro mbísó, ŋgá aŋgísó rɔɔ́ á wúnde obunuwe Na itíndíkáná mwané hónó, aŋgísó ramé a ma híráná obunuwe kó ŋgo ma me ená. 14A ma endá na wusó na ojárá aye name anáá: Irɔŋgɔ wa va kókó va visó a ma wo ijátá kɔ́ɔ́m ukú ójó anáá o jembe diŋgáná ráa, índi wo ená ójó ndíŋgirííŋ móká, kó wová hée mií raá maté. 15Esené o geremenámó orií wúsinete waá anáá woja na aŋgísó rá vato bimé até éyé o né enámó, na até éyé o né ovámó. 16Kó tetee ojó, na wusó wá até o ne giré gire? Hatééná, o duwana, nyéŋgé rɔɔ́ honó í sówavena na ebérááná yáa.
17Ará ŋgo ma wundé na Yerúsareme, ŋgo ma endá vásoóriye isí emó na yanje yá Irɔŋgɔ, ndií na ovásoóriye naná, kó Okí a ma vátíhíyé na noó. 18Ará ŋgo ma me ená kó a ma járá name anáá: Kwakwa, sɔ́ŋgíyé worúkye na Yerúsareme, esene éyé vato ává ɔ́wɔ́ vá ta né atɔ́wɔ matíseenye mɔɔ́ na wusó wamé. 19Ŋgo ma wundyé anáá: Okí, vá jémbámó wusi na wusi anáá noó kójo ŋgo káté iŋgáanana na byanje vyá mbásóóríyé, ŋgo ambaanana vato ává vá wo atɔ́wɔmó, ŋgo wó túné nkásá, ŋgunde o wó nɔ́ɔnɔ na mboo. 20Kó ará vá ma oná Ítyene ójó a ma ríi wúsinete wɔɔ, noó honó ŋgo ma ríi ɔ́wɔ́, ndií mií na vato ává vá ma ré me oná kó ŋgo ma vétééná honó cunú ráwó. 21Kó Okí a ma járá sɔ́ name anáá: «Ndá, esene éyé noó ŋgo wo tómámó oyává na vidɔŋgɔ vyá va hayídene.»
Póoro na ogónó wa jwé wa visimbi ójó na Róma
22Va Yúdene ává vá ma vátɔ́rɔ́ Póoro ondo humé ará a ma járá vipéŋgé imíví vá ma késyé orume anáá: «Híndyáno moto omójo, o me onámáno! A ta geréméná anáá a sɔ́tɔ́ na cí ejé!» 23Amó vá katé rɔnɔ, vá umbána cunú ráwó vá wúnde otéyána ombuuru vá nɔ́ɔnɔ na máná, 24ogóno wa njwé wa visimbi wa va Roméne a ma súsé anáá vá iŋgíiye Póoro naáté yá okáŋá ráwó índi vá me núbé wusi na wusi, ukú ójó anáá a oja vatɔ́ɔ́tɔ́ na até éyé vato vá katé rume na wusó wáa. 25Vá ma ríi vá omana wótá Póoro mbéné anáá vá me túné mpkama, kó Póoro a ma járá na onásá rá njwé wa visimbi ójó a ma ríi ɔ́wɔ́ anáá: «Ye no timbámó ŋguru éjé anáá no núbé mwaná ójó na Róma ka mana o me jósyé?» 26Ará a ma ová vipéŋgé mwané, kó onásá rá njwé wa visimbi a ma maná wenda ondo ojana ogónó wa njwé visimbi maté aye naá anáá: «O mó éŋga anáá wo eŋga até? Moto omójo a ámó mwaná wa va Roméne!» 27Kó ogónó wa njwé wa visimbi a ma uré na kɔ́ŋgɔ́ ra Póoro o me súsé anáá: «Ŋgojánámó, o ámó mwané tɔ́ɔ́tɔ́ mwaná wa va Roméne?» Kó Póoro a ma me wundye anáá «Ɛeŋ.» 28Kó ogónó wa njwé wa visimbi a ma járá sɔ́ anáá: «Noó ŋgo má yáákána ekáné yá mwení ukú ójó anáá mbúndé mwaná wa va Roméne.» Kó Póoro a wundyámó anáá: «Noó ndo ámó na ebyánávéná yámé mwaná wa va Roméne.» 29Isímí mwané, ava vá ma diŋgé anáá vá me núbé ombótá ójó anáá a járá vá ma me micé, kó ogónó wa njwé wa visimbi maté a ma ríi a etá tíné ámó a ma eŋgá anáá vá wótá Póoro céne wó je rií anáá a ámó mwaná wa va Roméne.
Vá endámó na Póoro na yanje yá jósi yá va Yúdene
30Ogónó wa njwé wa visimbí a ma ré diŋge anáá a jembe até maté éyé vá Yúdene vá ma ré sɔ́mɔ́nɔ Póoro neyé, wandá mwané kówo míveri máa, a ma eŋgá anáá vá me sútúnana céne, kaá a ma bérana vagónó vá vacekiye mómí na iwónjá ra vasómbá ntóró rá va Yúdene, kó a ma byaá Póoro na aŋgísó ráwó.
လက္ရွိေရြးခ်ယ္ထားမွု
Ŋgengéná 22: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL