1 Korénte 9
9
Twiŋí kówo Póoro a ojámó Usi wa Cómó
1Noó honó, ndo ámó pirí anáá ŋgo eŋga até éyé mbaŋgámó. Ye ta ámó onásá rá Yésusu? Ye ta ma ená Yésusu Okí wa visó? Ye no ta ámó mebuwe má manɔnɔwɔ ámá ŋgo ma eŋgéná Okí? 2Ŋgé na wusó wá avámó, ta ámó onásá rá Yésusu, na vinó ndo ámó onásá ráa. Esené no ámó ndeme éjé anáá ŋgo ma eŋga manɔnɔwɔ mamé má onása wusi na wusó wá Okí. 3Ŋgaráná rame na ava vá cɔ́mɔ́nɔ́mó kéejé: 4Yé to ta yáaná anáá to nyá to vényú na wusó wá manɔnɔwɔ ámá to eŋgámó? 5Yé to ta géréméná anáá to rií ncámbá na okótó ójó atɔ́wɔ? Vasɔ́ɔ́ enásá, va navéne vá Okí na Pyéere vá eŋgámó náná! 6Kee ye Baranabása na noó to ámó vaká avá vá géremenámó onɔnɔwɔ na osɔsɔ ówó esɔ́tɔ́? 7Táma éjé moto a ámó na visimbi, ye a yáákáná wandá ukú ójó anáá a eŋga manɔnɔwɔ máa? Táma éjé moto a béeryámó werété, a ta nyá vibomá vyáa? Kó honó táma éjé moto a beeryámó mutíri, a ta vényú mabáné má mutíri mwané? 8Ye ŋgeŋgéná mwané í ámó bɛ́ŋ na ntumu ra vato? Ye mbédɔ́ e ta járá sɛ́ɛm wa wandá? 9Esené naáté yá mbéndɔ́ ra Mósese wó ámó tiré tiré anáá: «Táma éjé ndɔne e nɔnɔwɔmó na itíndíkáná rá mebuwe, mámó ka me váráŋgena anáá a nyá ncɔ́ íjí yó obanámó. Ye Irɔŋgɔ a bísyámó na ndɔne?» 10Kesí na wusó wá visó vaká kówo a járámó? Ɛɛŋ ó ámó na wuso wá visó kówo maró amáma má ma tirévéná. Ojo a wutámó a geremenamó owute na ipitííjí anáá a né timbámó ŋgava raá na mebuwe. Ojo a nɔnɔwɔmó na itíndíkáná rá mebuwe a geremenamó opiti anáá a né timbámó ŋgava raá. 11To ma nemá mesi má Mwáŋ mwáŋ wa Ireréŋgi na vinó. Kaá ŋgé to a búwe ŋgava emo ra ekúmé rá vinó rá embɔɔ́, ye to mó bísíye? 12Ŋgé vámó vá yáanámó anáá vá eŋgá naná ná vinó, visó to námó yáana hée o wó tómbá vámwané! Vedá to ta járá anáá ámó to yáanámó, ŋgáno to no eŋga ámó to enámó. Vedá to menevámó wimé ukú ójó anáá wandá womó ka hɔ́mbɔ́kɔ Usi wa Comó wa Kirítu anáá e rií ká enda na wusó. 13No ta jembe anáá ava vá nɔ́nɔwɔmó na yanje yá Irɔŋgɔ vá nyámó na yanje yá Irɔŋgɔ? No ta jembé anáá ava vá nɔ́nɔwɔmó na iburúutu yá mómí vá tímbámó ŋgava rawó na mómí mwané? 14Sɛ́ɛm mwané kójo Okí a ma erééná ŋguru anáá ava vá ojámó Usi wa Cómó vá géremenámó osɔ́tɔ́ na Usi wa Cómó. 15Vedá nóo ta ma neména mamba amáma mimé kó ta nó tíréná ukú ójó anáá cúcé wandá womó ówó wó ŋgúdenámó. Taátá a ámó anáá noó ogwé! Mbéndɔ́, moto a ta né mbɔwena até éyé é pwámó iŋgúŋú. 16Na noó, woja ówó Usi wa Cómó wó ta ámó wandá wá ováneétye, wó ámó esene éyé ndo ámó na obiriki. Eyáté etɔɔ namé ŋgé ŋgo a ríi ka oja Usi wa Cómó! 17Wó a ríi anáá noó kójo ŋgo ma ijátá manɔnɔwɔ amáma, ɛɛŋ noó ogeremena anáá timbe ipéyé. Vedá ámó ndo ámó na obiriki, ŋgo eŋgámó bɛ́ŋ até éyé ŋgeremenámó weŋga. 18Até sɔ́ kéye é ámó ipéyé yámé? Ipéyé yámé é ámó anáá ŋgoja Usi wa Cómó na sásáá, kó ŋgo ojámó Usi wa Cómó mwané ka sɔsɔ anáá timbe motéé úmú moto ójó a ojámó Usi wa Cómó a geremenamó otimbe.
19Moto omo na raaté wa vinó a ta hítí weŋga anáá ŋgo eŋga wandá womó na obiriki. Vedá ŋgo ma vábúndyé mbékí ra bimé ukú ójó anáá ture ombunu rá vato na Kirítu. 20Ará ndo ámó na va Yúdené, cɔ́tɔ́mó ámó mwaná wa va Yúdene ukú ójó anáá ture va Yúdene. Ará ndo ámó na ava vá béeryámó mbédɔ́ ra Mósese, noó obeerye mbéndɔ́ ukú ójó anáá ture ava vá béeryámó mbéndɔ́, wó je rií anáá ta ámó obiriki anáá mbeerye mbéndɔ́ mwané. 21Ará ndo ámó orɔŋgɔ na ava vá ta jembé mbéndɔ́ ra Mósese, cɔ́tɔ́mó mámó weŋga anáá ta timbé mbéndɔ́ mwané, ukú ójó anáá ture ava vá ta jembé mbéndɔ́. Ndeke timbámó mbéndɔ́ ra Irɔŋgɔ esene éyé mbeeryámó mbéndɔ́ ra Kirítu. 22Ará ndo ámó orɔŋgɔ na va atɔ́wɔ ává vá kénjámó, noó osɔ́tɔ́ mámó weŋga anáá kénjámó ukú ójó anáá ture ava vá kénjámó. Ŋgo váneénámó na wusó wa bimé ka cé wandá ukú ójó anáá cótyé váámó ka ebyé. 23Kó wimé omówo, ŋgo eŋgámó na wusó wá Usi wa Cómó ukú ójó anáá noó honó timbe ŋgava na mesi máa.
Vakúré otétá vá géremenámó ováméníye
24No ta jembé anáá na naŋgáté ra enjɔjɔnɔ, vakúré otétá bimé vá kúrámó otétá, vedá umwesií bɛ́ŋ kójo a dɔmó deési wa otétá mwané? Kaá sɔ́, kúráno otétá ukú ójó anáá no dɔ. 25Vakúré otétá bimé vá váméníyámó kó vámwané maté vá váhwámó muki na mamba mbunu ka eŋga embyárá. Vámwané vá eŋgámó naná ukú ójó anáá vá tímbe ipéyé eyé é ta ríi rií, vedá visó to eŋgámó naná ukú ójó anáá to timbe ipéyé éyé kɔ́rɔ́tɔ́tɔ́. 26Wandá mwané kówo noó, kúrámó otétá, vedá até ámó uŋgewu. Ndo ámó amó atwánáana víkúte, kó ta nɔɔnɔ́ vikúte na ehɔ́. 27Vedá pwénísyámó notó name na ayɔɔ eŋgímé kó ŋgo me mándéenámó. Ŋgo a ríi ka eŋga náná, noó ójó ŋgo ma ojáná vasɔ́ɔ́ cómó, ndo ámó obwiye anáá vá o ŋgúryé.
လက္ရွိေရြးခ်ယ္ထားမွု
1 Korénte 9: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL