1 Korénte 7
7
Pooro a wundiyámó cucáná ijí na wusó wá nobá
1Tetee ojó ŋgo nó wúndiyámó na até éyé no ma járá name naáté yá kárate ójó no má tírána. Na wusó wá onómótó, wó ámó wusi anáá a teŋge timbe okótó. 2Vedá ukú ójó anáá to vásaára ombé esɔ́tɔ́, ámó moto a geremenamó otimbé okótó wáá, ámó okótó honó a geremenamó otimbé onómótó wáá. 3Onómótó a geremenamó otimbaaná wusí na egé, kó okóto hónó a geremenamó otimbaana wusi na enémé. 4Okótó a ta piti weŋga wanda owó a diŋgámó na nótó ráá, esene éyé nótó ráá é ámó na wusó wá enémé. Onómótó hónó a hiti weŋga wanda ówó a diŋgámó na nótó ráá, esene éyé nótó ráá é ámó na wusó wá egé. 5Vinó ká váráŋga anáá no ríi ndata vinó na vinó. Mámó siki anáá no mó aváana anáá no túmbyé itíndíkáná imó na mbásóóríyé. Na nimé raá vinó owunde orɔŋgɔ ukú ójó anáá nótó ra vinó ka nó bísíye, kaá índi saátana a bákéna ɔ́wɔ́ a no bóbóra. 6Owó ŋgo no jánámó ówó o ta ámó mbéndɔ́, vedá ŋgo eŋgámó na vinó bɛŋ anáá wó ámó wandá ówó wó ámó weŋgavena. 7Cakámó odiŋge anáá moto uŋgimé a irií ámó noó, vedá ámó moto a timbámó vandá womó wá Ireréŋgi ówó Irɔŋgɔ a ma me hwá. Oojó wandá owó, ojomo wandá owíi.
8Njárámó sɔ́ na ava vá ta ámó mbéná orɔŋgɔ na kúsú anáá: Ŋgé no a dyeené ámó noó, wó ámó usí wa wandá na wusó wá vinó. 9Vedá ŋgé no ta hítí ogíyé otémá, vinó obaána! Otómbá anáá no gwe nisó. 10Ava vá ámó mbéná ŋgo wó hwámó mbendɔ́, mbendɔ́ mwané e ta uré na noó, yo urámó na Okí. E ámó anáá: Okótó a teŋge sa na onomoto wáá 11Ŋgé a sá naá, ómwané ka ne enda na nobá núnjyé, wó a ríi ka rií naná ómwané ohéndá enjárá na enémé. Kaá onómótó hónó a ta geréméná ogúné egé. 12Na avámó, nóo kójó njárámó tetee ojo wó ta ámó Okí: Ŋgé atɔ́wɔ omo a timbe okótó ójó a ta ámó kiritene, okótó mwane a atɔ́wɔ́ anáá a enda na wusó na osɔtɔ́ ówó náá orɔŋgɔ, o mwane ká me guné. 13Ŋgé okótó ojó kiritene a timbe onomoto ojo a ta ámó kiritene, onómótó omwane a je atɔ́wɔ anáá a enda na wusó na osɔ́tɔ́ ówó naá, ómwané ka guné enémé. 14Wó jé rií anáá, onómótó ójó a ta ámó atɔ́wɔ a ámó berebe na Irɔŋgɔ, esene éyé anáá a ámó ndata na okótó wáá. Okótó ojó a ta ámó kiritene a ámó bérebe na Irɔŋgɔ, esene éyé a ámó ndata na onomoto wáá. Wo a ríi ka rií nana váná va vinó vá mó éŋgá vá rií ayáá vá ta ámó berebe na Irɔŋgɔ, na vatɔ́ɔ́tɔ́ tetee ojó, vá ámó berébe na Irɔŋgɔ. 15Vedá, ŋge omo ójó ná vámwané vává, ójó a ta ámó atɔ́wɔ a diŋgé anáá a sá na ojomo, ómwané wenda. Táma mwané, ojo a ámó atɔ́wɔ, onómótó tɔɔ okótó, a ta ne rií ndata na ojomo, esene éyé anáá Irɔŋgɔ a nó beranámó anáá no sɔ́tɔ́ naáté yá dɔ́ŋgɔrɔ́ɔ́ŋ. 16Mámó ójó okótó ójó o ámó atɔ́wɔ, ye ojembámó ŋgé o mó sótyámó onómó? Káá mámó ojo onómótó ójó atɔ́wɔ, ye ojembámó ŋgé o mó sótyámó ogɔ́nɔ́?
Ŋgáno to no dyeene na ndiímíyé éjé to ma timbé ará Irɔŋgɔ a ma só bérááná
17Ará Irɔŋgɔ a ma no berana, no kate sɔ́tɔ́ na ndiímíyé éjé Oki a ma nó hwá. Kaá ŋgo a uryé até éyé ŋgo ré késyé ojárá, ámó moto a geremenamó wenda na wusó na osɔ́tɔ́ ówó naáté yá ndiímíye raá mwané. Tévéré éjé ŋgo eréenámó na mowónjá mwá vatɔ́wɔ mwimé kéeméje. 18Yé o ma rií anjé anjé ará Irɔŋgɔ a ma wo bérááná? Kaá dyeené sɔ́ anjé anjé! Wó a ríi anáá o ta ma rií anjé anjé, dyeené ka anjavena! 19Orií ówó anjé anjé wó ta ámó wandá, orií ówó ka anjavená hónó wó ta ámó wandá. Até éyé é ámó na mpí é ámó weŋga ówó até éyé Irɔŋgɔ a súsámó. 20Amó moto a geremenamó orií rií na pandó éjé a katé rií ɔ́wɔ́ ará Irɔŋgɔ a ma me bérááná. 21Yé o ma ríi mbékí ará Irɔŋgɔ a ma wo bérááná? Mámó ka yéráná! Vedá ŋgé wo a timbé pé ra obúndé ówó pirí, mámó ka mice! 22Esené mbékí éjé Okí a ma bérááná yo etá pirí: A etá í wa Okí. Moto ójó pirí, ójó Okí a ma bérááná a etá mbékí ra Kirítú. 23Irɔŋgɔ a ma nó kusé díyá nasesi ukú ójó anáá no rií pírí. Vinó ká búndé sɔ́ mbékí rá vato. 24Va mbísó, ámó moto a geremenamó odyeene na aŋgísó rá Irɔŋgɔ na ndiímíyé éjé a ma ríi ɔ́wɔ́ ará Irɔŋgɔ a ma me bérááná.
Maró wa vato ává vá ta ámó mbéná na kúsú
25Na até éyé é néménámó vato ává vá ré rií ka baána, ta timbe ŋguru na Okí. Veda ŋgo eréenámó ŋgénéná rame: Wo ámó ŋgénéná ra moto ójó a geremenamó na ipití, esene éyé Okí a ma me ená noóŋgó. 26Aaná kówo mbuŋganámó: Na wusó wá vindíndíŋ íví tetee ojó, wó ámó wusi anáá ámó moto a dyeene ámó a ámó. 27Ye o timbámó okótó? O ta eŋgá sɔsɔ anáá o sa naá. O ta timbé okótó? O ta eŋgá sɔsɔ anáá obaána. 28Wó je rií anáá, ŋgé wo a bá okótó, o ta eŋgá wobé. Kó ŋgé ŋgwande ra okótó yo endá na nobá, a ta eŋgá wobé. Vedá vato ává mbéná vá mó tímbámó ombunu rá vitɔɔ na esɔ́tɔ́ yáwó éyé mesí mimé, kó noó, ndiŋgámó anáá indi ŋgo nó vásaárena mamba mwané.
29Va mbísó, ŋgo nó ojánámó anáá itíndíkáná yó cáná dekétií. Okésyé ówó tetee ojó, ava vá tímbámó okótó vá géremenámó osɔ́tɔ́ mámó weŋga anáá vá ta timbé. 30Ava vá váŋgámó vá geremenámó osɔ́tɔ́ mámó weŋga anáá vá ta vaŋgá. Ava vá ámó na visaŋgena vá geremenámó osɔ́tɔ́ mámó weŋga anáá vá ta ámó na visaŋgena. Ava vá kúsámó motéé vá géremenámó osɔ́tɔ́ mámó weŋga anáá motéé úmú vá ma kusé mó ta ámó ímwáwó. 31Ava vá tímbaanámó na mesi ámá na cí ejé vá geremenámó osɔ́tɔ́ mámó weŋga anáá vá ta timbááná namá. Esené cí ra ndono éjé wusí owó e ta né ne rií téé. 32Ndiŋgámó anáá no rií ka timbe meríŋgí na otémá, esene éyé ojo a ta ámó mbéná a wɔ́rɔ́mó ŋgava na mamba má Okí, a sɔsɔmó anáá a wɔ́tɔ́ Okí. 33Vedá ojo a ámó mbéná a wɔ́rɔ́mó ŋgava na mamba ma cí ra ndono, a sɔsɔmó anáá a wɔ́tɔ́ egé, 34káa táma mwané, a etá ŋgava íbé. Okótó ójó a ta ámó mbéná, ítɔɔ ŋgwande ra okótó vá wɔ́rɔ́mó ŋgava na mamba má Okí. Vá sɔ́sɔmó anáá vá rií íváa na wandá wimé kó vá váneénámó ka cé wandá. Vedá okótó ójó a ámó mbéná a wɔ́rɔ́mó ŋgava na mamba ma cí ra ndono, a sɔsɔmó anáá a wɔ́tɔ́ enémé. 35Ŋgo nó ojánámó naná ná wusó wá wusi wá vinó, até anáá ŋgo nó támbéna itámbó. Támámó anáá índi no ijata até éyé é ámó taátá, índi no váwótéena na Okí bɛ́ŋ ómwané moká.
36Ŋgé ombwene rá moto omó ó cákámó otámá ŋgwande ra okótó éjé e timbámó tánó ra nobá naá, a je ená anáá a ríi ka me bá a me eŋgámó wobé, ómwané weŋga ámó a diŋgámó, vámwané váváné obaána, ombwene rá moto omójo ó ta eŋgá wobé. 37Vedá naáté yá otémá ráa, a hítyámó osómbá kpát anáá a ta bááná, kó hónó anáá a ta né vété na ŋgwande éjé a timbámó tánó ra nobá na ejé. Ŋgé a timbé mwané cómbéná maté na otémá ráá, ka na obiriki a wunde omándéena vitámáká vyáa, a eŋgámó wusi anáá a rií ka baána. 38Naná wó etá anáá ojo a baánámó na ŋgwande éjé a timbámó tánó ra nobá naá a eŋgámó wusi, vedá ojo a ta bááná naá a eŋgámó hée taáta.
39Okótó ójó mbéná a ámó ndata na enémé itíndíkáná íjí enémé mwané a ré hwené. Ŋgé enémé a gwé, a ámó pirí kó a hítyámó hée obaána na moto ójó a diŋgámó, vedá moto mwané a geremenamó orií atɔ́wɔ. 40Wó je rií anáá, na ŋgénéná rame, okótó mwané a né cakámó orií wusi ŋgé a dyééné ámó a ámó. Kó mbuŋganámó anáá noó hónó, timbámó Ireréŋgi yá Irɔŋgɔ!
လက္ရွိေရြးခ်ယ္ထားမွု
1 Korénte 7: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL