1 Korénte 12
12
Até éyé Mwáŋ mwáŋ wa ireréŋgi a eréenámó
1Va mbísó, na até éyé é néménámó mamba ámá Mwáŋ mwáŋ wa Ireréŋgi a eréenámó, ta diŋgé anáá no tatará wandá womó ɔ́wɔ́. 2No jembámó anáá na póná no ta ma ré jembe Irɔŋgɔ, no katé byɔɔŋɔ va sambé vá vihekere ává ka járá kó no ta ma ré hítí o wó káŋgéna. 3Wandá mwané kówo ndiŋgámó anáá ŋgo nó ojána anáá: Moto ójó a timbámó Ireréŋgi yá Irɔŋgɔ a ta hítí ojárá anáá: «Ŋgá Yésusu a rií na iyɔɔ!» Kó moto a ta hítí ojárá anáá: «Yésusu a ámó Okí!» Wó a ríi ka rií anáá Ireréŋgi yá Irɔŋgɔ kéye é mó me púsyé anáá a járá naná. 4Mamba ámá Ireréŋgi yó eréenámó má ámó kána kána, vedá Ireréŋgi ímwéesií kéye yó eréenámó mamba mwané. 5Ŋgeŋgéná manɔnɔwɔ í ámó kána kána, vedá to nɔnɔwenámó Okí umwesií. 6Manɔnɔwɔ má ámó kána kána, vedá Irɔŋgɔ umwesií kójó a eŋgámó anáá manɔnɔwɔ mwané mimé má rií na bimé. 7Mwáŋ mwáŋ wa Ireréŋgi a eréenámó ámó moto wandá, kó na wandá mwané kówo a vátíhíyámó ukú ójó anáá bimé vá rií wusi. 8Omo, Ireréŋgi é me whámó anáá a járá na peyɔ, ojomó, Ireréŋgi mwané émwéesií o me hwá anáá a eŋga anáá vato vá jémbe Irɔŋgɔ. 9Séem wa Ireréŋgi mwané umwesií a eréenamo omo ŋgɔ́tééná éjé kírítítí, ojomo o me hwá anáá a ondónana vinɔ́. 10Omo hée, o me hwá anáá a eŋga mesimbá, ojomo a járá na niyó ná Irɔŋgɔ, undyé a jembe cená na até éyé yó urámó na Irɔŋgɔ na até éyé é ta endá uré na Irɔŋgɔ, kaá omo a jembe ojárá ówó káná kána rá enjárá, ojomo a keriye. 11Wó ámó Ireréŋgi émwéesií moká kéyé yó eŋgámó mamba mwané mimé, kó na ndiŋgáná raá é téŋgíyámó ámó moto ŋgeŋgéná éjé ka rií sɛ́ɛm na í ra sɔ́ɔ́.
Vikava vyá nótó nyetete nótó emwesií
12Ŋgáno to no wɔ́rɔ́ eheyá, nótó e ámó emewsií, wó je rií anáá e timbámó vikava nyetete. Kó ítɔɔ ámó vikava imíví ví ámó nyetete, ví eŋgámó bɛ́ŋ nótó emwesií. Wó ámó sɛ́ɛm wa wandá na Kirítu. 13Esené visó bimé, tɔɔ o ámó Yúdene, tɔɔ ka rií, tɔɔ o ámó mbékí tɔɔ o ámó pirí, visó bimé to ma duwáná naáté yá Ireréŋgi émwéesií ukú ójó anáá to bundé nótó emwesií, kó bimé to ma vényú até éyé yó endámó uré na Ireréŋgi émwéesií. 14Esené nótó e ta ámó bɛ́ŋ na ekeva émwéesií, nótó e ámó na vikava nyetete. 15Ŋgé oŋgoró wó a járá anáá: «Noó, ta ámó ombɔɔ́, ta ámó ekava yá nótó.» Ye oŋgoró omójo ó né tɔwɔmó sɔ́ orií enama yá nótó? 16Ŋgé utú wó a járá anáá: «Noó ta ámó nisó, ta ámó ekava yá nótó,» ye utú omójo ó né tɔwɔmó orií ówó ekava yá nótó? 17Wó a ríi anáá nótó e ma ríi bɛ́ŋ nisó, e ma eŋgá yo ová na até? Kó wó a ríi anáá e ma ríi bɛ́ŋ utú, e ma eŋgá yo ová inumbú na até? 18Vedá Irɔŋgɔ a ma vááná vikava vyá nótó ámó a ma diŋgé. 19Nótó e ta hítí orií ɔ́wɔ́ ŋgé ekava yó a ríi bɛ́ŋ émwéesií. 20Vikava ví ámó sɔ́ nyetete, vedá nótó emwesií. 21Nisó nó ta hítí ojárá na ombɔɔ́ anáá: «Noó ta wo vaŋgá!» Kó ucé ó ta hítí ojárá na eŋgoró anáá: «Noó ta nó vaŋgá!» 22Otómbá honó naná, vinama vyá nótó íví ví némáanámó mámó weŋga anáá ví cakámó orií vihota ví ámó na mpí. 23Kó vinama íví to enámó anáá ví ta caká ogeremena na urukú, vinama mwané kíví to cakámó orukye. Iví vá ta geréméná wenéye, to beeryámó wusi na wusi. 24Pandó rá notó ra visó íjí vá ámó wená í ta súsé anáá vá cáka obeerye naná. Vedá Irɔŋgɔ a ma eŋgá notó káná éjé e ámó anáá vinama íví vá ta rukye ví tímbe urukú. 25Táma mwané, cená e ta ámó naáté yá notó, vedá na raaté wa vinama, ámó moto a né yéránámó na sɔ́ɔ́. 26Wó a ríi anáá enama émwéesií é ámó na etɔwɔ, vinama ivyomó bimé orií na etɔwɔ orɔŋgɔ neyé, kó wó a ríi anáá enama emwéesií e mó tímbaana na niimí, vasɔ́ɔ́ bimé osaŋgena orɔŋgɔ neyé. 27Vinó, no ámó notó ra Kirítu kó ámó moto ójó na vinó a ámó enama yá notó mwané. 28Naáté yá iwónjá rá vatɔ́wɔ, Irɔŋgɔ a ma tírímíyé na makésyé enásá ra Yésusu, tii waá vahúmíye maró vá Irɔŋgɔ, tii waá hée vayéere, tii waá ava vá eŋgámó mesimbá, tii waá ava vá ondónanámó vinɔ́, tii waá ava vá akámó vasɔ́ɔ́ na ava vá tíríyámó, kaá na mamana, ava vá járámó enjárá éjé moto a ta ová. 29Bimé vá ta ámó enásá ra Yésusu, kó bimé vá ta ámó vahúmíye maró vá Irɔŋgɔ. Bimé vá ta ámó vayéere kó bimé vá ta eŋgá mesimbá. 30Bimé vá ta ondónáná vinɔ́, bimé vá ta járá enjárá éjé moto a ta ová kó bimé vá ta keríyé. 31Sɔsɔ́no sɔ́ anáá Irɔŋgɔ a nó hwá ŋguru ra weŋga ówó mamba ámá má tómbámó motéé umúmu mwimé. Vedá tetee ojó, mbaŋgámó o nó tíhíye pé éjé e tómbámó wandá wimé.
လက္ရွိေရြးခ်ယ္ထားမွု
1 Korénte 12: tii
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024, CABTAL