लु 9
9
जिसु गेलबार चेलाकोय कोलेत्को
(माथ 10:5-15; मा़र 6:7-13)
1आदो जिसु ओनको गेलबारको होहो जारवाकाते जोतो भुतको चेतानरे आर रोगको बोगे ला़गित् दाड़े आर एकतिया़रिये एमात्कोवा। 2आदो इसोराक् राज पोरचार आर रुगि होड़ बोक्गेये कोलकेत्कोवा, 3आरे मेतात्कोवा, “होरते ला़गित् चेत् हों आलोपे इदि तोराजोङा, ठेङगा हों आलो, खुति हों आलो, पिठा़ हों आलो, टाका पोयसा हों आलो आर बाबार गोटेच् आङगरोप हों आलो ताहेंनतापेमा। 4आर जाहाँ ओड़ाक्रेपे बोलोक्; ओंडे बाड़े ताहेंनपे आर ओंडे खोनगे ओडोक चालाक्पे। 5आर तिना़क् होड़ बाको आताङ दारामपे, ओना नाङगराहा खोनपे ओडोक चालाक्रे आपेयाक् जाङगा खोन धुड़ि हों धुड़ि कोटा गिडि ओटोकाक्पे ओनको उपा़रते गोहा ला़गित्।” 6आदोको ओडोक चालावेना आर आतो आतो दाँड़ाँकाते सानाम टा़न्डि भागे सोमबातको आँजोमात्कोवा आर होड़को बोगेकेत्कोवा।
हेरोदे आ़न्दुक् मा़न्दुगोक्कान
(माथ 14:1-12; मा़र 5:14-29)
7आदो गा़लिलरे राजा हेरोद दिसा़म चाक्लाविच् ओनाको जोतो होयोक् कानाक्ए आँजोम ञामकेदा आर आ़डिये आ़न्दुक् मान्दुक् एना, एनते आदोम आदोम होड़को मेनेत् ताहेंकाना, बाङमा, जोहानगे गोच्को खोने जिवेत् बेरेत् आकाना, 8आर आदोमको दो बाङमा, एलिया़गेये सोदोराकान आर आदोम होड़ दो, बाङमा, सेदायरेन ना़बिको मोदरेन मित्टेने जिवेत् बेरेत्आकाना। 9हेरोद दोए मेनकेदा, जोहानमा इञगेञ माक् ओचोलेदे, मेनखान उनि दोए ओकोय काना ओने उनि रेयाङ नोनकानाक्कोञ आँजोमेत्कान? आर जिसु ञेञेले खोजकान ताहेंकाना।
जिसु मोंड़ें हाजार होड़े जोमबि ओचोयेत्को
(माथ 14:13-21; मा़र 6:30-44; जोहा 6:5-13)
10आदो आपोसतोलको रुवा़ड़ हेच्एनते ओकाकोको का़मिआकात् ओनाको जिसुको ला़इयादेया, आदो ओनको सोङगेकेत्कोते बेथसायदाको मेताक् नाङगराहा सेच् एसकारगेये सेन फाराकेना। 11मेनखान गादेल होड़ दो ओना बाडाय ञामकेत्तेको पाँजाकेदेया आर उनि दोए आताङ दारामकेत्कोते इसोराक् राज रेयाङे ला़इयात्कोवा आर बोगे ओचोक् रेयाक् जा़रुड़ ताहेंकानताको होड़ दोए बोगेकेत्कोवा। 12आर बेर दोए फेड आकान ताहेंकाना, खानगे ओनको गेलबारको दो हेच्सोरकातेको मेतादेया, “नोको गादेल होड़ दो बिदा़काकोमे, जेमोन बेड़हायतेयाक् आतो आर दिहा़तकोते सेनकातेको डेराक् आर जोमाक्को ञामजोङ, एनते नोंडे दो हाहाङकार जायगारे मेनाक्बोना।” 13आदो जिसुइ मेतात्कोवा, “आपे बाड़े जोमाक् एमाकोपे” ओनकोको मेनकेदा, “मोंड़ें गोटेच् पिठा़ आर बारया हाको खोन बा़ड़ति दो बा़नुक्ताबोना, बाङ दो नोको जोतो होड़ ला़गित् जोमाक्ले किरिञ आ़गुके?” 14एनते मोंड़ें हाजार गान हेरेल होपोनको ताहेंकाना। आदो जिसु आच्रेन चेलाय मेतात्कोवा, “मोंड़ेंगेल गानकाते मा पानते पानते दुड़ुप् ओचोकोपे।” 15आदोको ओनकाकेदा आर जोतोको दुड़ुप ओचोकेत्कोवा। 16आदो जिसु ओना मोंड़ें गोटेच् पिठा़ आर उनकिन बारया हाको आताङकाते सेरमा सेच्ए बेङगेत् राकाप्केदा आर ओनाको ञुतुमते इसोर सारहावकेदेतेये केचाक्केदा आर ओनको गादेल होड़ दोहो इदियाको ला़गित् चेलाकोय एम इदियात्कोवा। 17आदोको जोमकेदा आर जोतोको बियेना आरको जोम सारेच्केत् केचाक्आक्को दो गेलबार फा़तिया़क्को हालाङ जारवाकेदा।
पातरासाक् आङगोच, जिसु दो मा़सि कानाय
(माथ 16:13-19; मा़र 8:27-29)
18आदो नोनका होयेना, जिसु एसकाररेये कोयजोङकान ताहेंकानरे चेलाको उनि तुलुच्को ताहेंकाना; आदोए कुलिकेत्कोवा, “गादेल होड़ दो ओकोय कानाञ मेनतेको मेनेदा?” 19ओनको दोको रोड़ रुवा़ड़ादेया, “जोहान बाबा़प्तिसिच्गे, आर आदोमको दो, एलिया़ आर आदोमको दो सेदायरेन ना़बिको मोदरेन मित्टेने जिवेत् बेरेत् आकाना।” 20आदोए मेतात्कोवा, “मेनखान आपे दो ओकोय कानाञ मेनतेपे मेनेदा?” पातरासे रोड़ रुवा़ड़केदा, “इसोररेन मा़सिगे।”#9:20 ख्रिस्ट:- ओजोक् ओचोवाकानिच्, बाछाव बेगार ओचोवाकानिच्, बिसेस का़मि ला़गित् सुनुम ओजोक्काते बाछाव बेगार आकान
जिसु आयाक् दुक साक्हाव आर गुजुक् रेयाङे ला़इ लाहायेत्
21खानगे जिसु दो का़जिया़उँकातेये हुकुमात्कोवा जेमोन ओना दो ओकोय हों आलोको ला़इ बाड़ावाको, मेनकेदाय, 22“मानवा होपोन दो आ़डि ओकोच् दुक जोजोम आर मुरुबिको आर माराङ नायकेको आर आ़न गुरुको ठेन निहा़ँत ओचोक् आर गोच् ओचोक् आर पे माँहाँ हिलोक्रे जिवेत् बेरेदोक् होयोक्ताया।” 23जिसु दो जोतोकोय मेतात्कोवा, “जाहाँयगे इञ तायोमते हिजुक् सानाये खान, आच् दोए हिड़िञोक्मा, आर दिना़मगे आयाक् कुरुस गोक्काते इञे पाँजाञमा। 24एनते जाहाँयगे आयाक् जिवि बाञचाव सानाये, उनि दो ओनाय खुवा़वा; आर जाहाँयगे इञ इया़ते आयाक् जिविये खुवा़उ उनि दो ओनाय बाञचावताया। 25एनते जाहाँय होड़ गोटा धा़रतिये लाबले आर आच्गेये खुवा़उलेन से नोसटोलेन खान, चेत् पोरहो होयोक्ताया? 26एनते जाहाँयगे इञ आर इञाक् काथा इया़तेये लाजावक् खान, मानवा होपोन हों उनि इया़तेये लाजावक्आ, आयाक् आर आपाताक् आर सोनोत दुतकोवाक् ठोनोकरेये हेच्लेनरे। 27आर सा़रिगेञ मेतापेकाना, नोंडे तेङगोवाकानको मोदरे आदोम होड़ मेनाक्कोवा ओने ओकोय इसोराक् राज आ़उरिको ञेल हा़बिच् मोरोन दो बाङगेको चाखाया।”
बुरुरे बोरोने फेरावक्कान
(माथ 17:1-8; मा़र 9:2-8)
28आदो जिसु नोवाको काथाय रोड़केत् इरा़ल दिन गान तायोम, पातरास आर जोहान आर जाकबतेको सोङगेकेत्कोते कोयजोङा मेनते बुरुतेये देच्एना। 29आरे कोयजोङकान ताहेंकानरे उनियाक् मेंत्हाँ दो ञेलोक्रे एटाक् लेकायेना, आर उनियाक् किचरिच् हों पिंड़िंत् पिंड़िंत् पोंडेनताया। 30आर ञेलपे, बार होड़ उनि तुलुच्किन गालमारावकान ताहेंकाना, मेताक्मे, मोसे आर एलिया़गे। 31ओने उनकिन ठोनोकरे सोदोरेनते उनियाक् ओडोक चालाक्#9:31 ओडोक चालाक् गुजुक्, जिवेत् बेरेदोक् आर सेरमाते राकाप् चालाक् रेयाङ किन गालमारावकान ताहेंकाना नोवा धा़रति खोन चालाक् बाबोततेकिन गालमारावकान। रेयाङकिन गालमारावकान ताहेंकान, ओने ओकाटाक् जेरुसालेमरेये पुरा़उ ला़गिदोक्कान ताहेंकान। 32पातरास आर उनि तुलुच् ताहेंकानको दो झाप झाप दुदड़ुमेत्को ताहेकाना; मेनखानको बेङगेत् फारनावकेत् खान जिसुवाक् ठोनोकको ञेलकेदा आर उनि तुलुच्किन तेङगोवाकान उनकिन बार होड़। 33आर उनि खोनकिन बेगारोक्रे पातरास दो जिसुइ मेतादेया, “ए गुरु, आले नोंडे मेनाक्ले दो आ़डि जुता; पेयाले कुमबा़या, मित् दो आम ला़गित्, मित् दो मोसे ला़गित् आर मित् दो एलिया़ ला़गित्।” ओकाटाक्ए रोरोड़कान ओना दो बेगोर बाडायतेगे। 34आर नोवाकोय रोरोड़कान ताहेंकान जोखेच् मित्टेच् रिमिल राकाप्एनतेये उमुल एसेत्केत्कोवा आर रिमिलतेको एसेदोक् जोखेच् दोको बोतोरेना। 35आर रिमिल खोन मित्टेन आड़ाङ आँजोमेना, “नुयगे इञरेन होपोन, उनि बाछाव आकानिच्गे उनियाक् आँजोमतायपे।” 36आर आड़ाङ आँजोमोक्कान ताहेंकानरे दो जिसु एसकारगेये ञेल ञामेना। आर ओनको दो हापेगेको ताहेंयेना आर आकोको ञेललेत्आक्को दो ओनाको दिनरे ओकोय हों बाको ला़इ बाड़ावात्कोवा।
बा़ड़िच् जिउ मेनायतायिच् कोड़ाय बोगेयेदे
(माथ 17:14-18; मा़र 9:14-27)
37आदो दोसार हिलोक् जिसु आर पेया चेलाको बुरु खोनको फेड हेच्एन खान, आ़डि गादेल होड़को दारामकेदेया। 38आर ञेलपे, गादेल होड़को मोदरेन मित् होड़ होहोवातेये मेनकेदा, “ए गुरु, आम ठेनिञ नेहोंरोक्काना, होपोनिञ बाड़े बेङगेत्आयमे, एनते साधेर होपोन कानतिञाय। 39आर ञेलमे, मित्टेन बा़ड़िच् जिवे साबेया, खान आचकागेये किकिया़उ गोदा, फोतो फोतोयेयाय आर मोचड़ा मुचड़ियेयाय आर गाराल गाराल हुरुड़ ओचोकाते बा़गिवाया। 40आर ओडोक गिडिये ला़गित् आमरेन चेलाकोञ नेहोंरात्कोवा, मेनखान बाङको ओडोङ दाड़ेयादेया।”
41आदो जिसुइ रोड़ रुवा़ड़केदा, “ए बेपा़तिया़उ आर पेड़ता पिड़हिरेनको, तिस हा़बिच् आपे ठेनिञ ताहेना आर इञ साहावकातापेया? दिनि होपोनमे नोंडे आ़गुयेम।” 42आर उनिये हेच्सोरोक्कान तुलुच्गे उनि भुत दोए ओर रिपिरिपिकेदेया आरे मोचड़ा मुचड़िकेदेया। जिसु दो उनि बेसाफा जिवे धोमकावकेदेया आर उनि कोड़ाय बोगेकेदेया, आर आपात ठेने जिमा़कादेया। 43खानगे जोतो होड़ इसोराक् माराङतेत् इया़तेको भाड़ोयेना।
जिसु आयाक् गुजुक् आर जिवेत् बेरेदोक् रेयाङ आरहोंए ला़इ लाहायेत्
(माथ 17:22-23; मा़र 9:30-32)
आर सानाम होड़ ओकाकोय का़मिकान ताहेंकान जोतो रेयाङको हाहाड़ाक्कान ताहेंकानरे जिसु आच्रेन चेलाकोय मेतात्कोवा, 44“नोवाको काथा दो आपेयाक् लुतुररे रेबेत् दोहोयपे; मानवा होपोन दो होड़कोवाक् तिरेये सोपरोत ओचोक् ला़गिदोक् काना।” 45मेनखान नोवा काथा दो बाको बुजहा़उलाक्आ आर ओनको खोन दानाङगे ताहेंकाना आलोको बाडाय ओरोमा मेनते। आर नोवा काथा रेयाङ कुलिये दोको बोतोरोक्कान ताहेंकाना।
माराङिच् दो ओकोय
(माथ 18:1-5; मा़र 9:33-40)
46आदो ओनको तालारे मित्टेच् हुदिस राकाप्एना, आको मोदरे ओकोयटाक्ए माराङा मेनते। 47जिसु दो ओनकोवाक् मोन रेयाक् हुदिसे बाडायकेत्ते मित्टेन का़टिच् गिदरा़ आ़गुकाते आच् ठेने तेङगोकेदेया, 48आरे मेतात्कोवा, “जाहाँयगे नुय का़टिच् गिदरा़ इञ ञुतुमतेये आताङे, उनि दो इञगेये आताङिञा; आर जाहाँयगे इञे आताङिञ, उनि दो कोलआकादेञिच्गेये आताङेया; एनते आपे जोतोको मोदरे हुडिञ उता़रिच् उनिगे जोतो खोने माराङा।”
ओकोय आपे बिरुदरेने बाङकान उनि दो आपे सेच्रेन कानाय
49आदो जोहाने रोड़ रूवा़ड़केदा, “ए गुरु, आले दो मित् होड़ आम ञुतुमते भुतको ओडोक गिक्डिकानले ञेलकेदेया आर आबो तुलुच् बाय सोङगेक्कानतेले मानाकेदेया।” 50जिसु दो उनि आर एटाक् चेलाको होंए मेतात्कोवा, “आलोपे मानायेया; एनते ओकोय आपे बिरुदरेने बाङकान, उनि दो आपे सेच्रेन कानगेयाय।”
जिसु सा़मा़रि रेयाक् मित्टेन आतोरे बाको आताङलेदे
51आदो जिसु आयाक् सेरमाते राकाप् ओचोक् दिन सोर इदिक्कान ताहेंकानते, जेरुसालेमते चालाक्ए मोने मुरुककेदा। 52आर आच् लाहाते पाठाउनाकोय कोलकेत्कोवा। आर ओनको दो सेनकाते सा़मा़रिकोवाक् मित्टेच् आतोतेको बोलोयेना तेयार हाताड़ाय ला़गित्। 53मेनखान ओनको दो बाको आताङलेदेया, जेरुसालेमते चालाक्ए मोहंडावाकान ताहेंकानते। 54आदो उनिरेन चेला जाकब आर जोहान दो ओना ञेलकातेकिन मेनकेदा, “हेंदा प्रोभु, सेरमा खोन सेङगेल ञुरुक् आर नोको डाहाव चाबाकोलिञ हुकुम दोम ञामकाना?” 55मेनखान जिसु दो आ़चुरेनतेये धोमकावकेत्किना आरे मेतात्किना, “आबेनरे चेत्लेकान जिउ मेनाय बाबेन बाडाया? एनते मानवा होपोन मानवा नोसटोको ला़गित् दो बाय हेच् आकाना, बिचकोम बाञचावको ला़गित्।”#9:55 आदोम मारेनाक् तिते ओलाक् कोरे नोवा काथाको जुटुच् आकादा। 56आदो जिसु आर आच्रेन चेलाको दो मित्टेच् एटाक् आतोतेको चालावेना।
जिसु पाँजा रेयाक् मोन
(माथ 8:19-22)
57आर होरतेको चालाक्कान ताहेंकानरे मित् होड़ उनिये मेतादेया, “जाहाँतेगेम चालाक् इञ पाँजामेया।” 58जिसु दो उनिये मेतादेया, “तोयोको दो भुगा़क् आर चोटरेन उडा़उक् चेंड़ेंको दो तुका़ मेनाक्ताकोवा, मेनखान मानवा होपोन दो बोहोक् आठड़ेंताय ला़गित् ठा़ँइ बा़नुक्ताया।” 59आदो एटागिच्ए मेतादेया, “देला पाँजाञमे।” उनि दोए मेनकेदा, “ए प्रोभु, सेनमाड़ाङ ओचोवा़ञमे आ़पुञ तोपाये ला़गित्।” 60मेनखान जिसु दो उनिये मेतादेया, “गोच्को दो आकोरेन गोच्को तोपा ओचोवाकोमे, मेनखान आम दो सेनकाते इसोराक् राज ला़इपासनावमे।” 61आदो आरहों एटागिच्ए मेतादेया, “ए प्रोभु, आम इञ पाँजामेया, मेनखान इञ ओड़ाक्रेनको ठेन बिदा़ माड़ाङ ओचोवा़ञमे।” 62जिसु दो उनिये मेतादेया, “काँड़बारे ति चापोकाते तायोम सेनाक्कोय बेङगेत्आक्कान होड़ दो इसोराक् राज ला़गित् ओका काजरेन होंए बाङ काना।”
လက္ရွိေရြးခ်ယ္ထားမွု
लु 9: NTSPt25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament Books in Santhali Language © The Word for the World International and Santhali Translation Project, Nepal, 2025