लु 11
11
जिसु कोयजोङे चेत्आकोकान
(माथ 6:9-13; 7:7-11)
1आदो जिसु मित्टेच् जायगारेये ताहेंकाना कोयजोङकान आरे थिरेन खान उनिरेन चेलाको मोदरेन मित् होड़े मेतादेया, “ए प्रोभु, कोयजोङ चेत्आलेमे बाड़े चेत्लेका जोहान हों आच्रेन चेलाकोय चेत्आत्को।” 2आदो जिसुइ मेतात्कोवा, आपेपे कोयजोङरे मेनपे,
“ए बाबा,
आमाक् सोनोत ञुतुम मानोतोक् ताममा,
आमाक् राज हिजुक्मा।
3आलेयाक् जा़रुड़ जोमाक् दिना़मगे एमालेम।
4आर आलेयाक् का़इको इका़कातालेम,
एनते आले हों आलेयाक् दोदोसको ले इका़काकोकाना
आर बिडा़उते आलोम आदेरलेया।”
5आदो जिसु आच्रेन चेलाकोय मेतात्कोवा, “आपे मोदरेन ओकोय होड़ मित्टेन गातेये ताहेंनताय आर ताला ञिंदा़ उनि ठेन सेनकातेये मेताय, एहो गाते, पाञ्चाते पेया पिठा़ एमा़ञतालाङमे। 6एनते इञरेन मित्टेन होरतेनिच् गातेये हेच् आकावादिञा आर जोम ओचोये ला़गित् चेत् हों बा़नुक्तिञा।”
7आर उनि दो भितरि खोनगे रोड़ रुवा़ड़कातेये मेन, “आलोम आ़ड़िसिञा, एनते नितोक् दो दुवा़र सिञ आकाना आर गिदरा़को इञ तुलुच् आटेत्रे मेनाक्कोवा, एमाम ला़गित् ओहोंञ बेरेत्लेना।” 8मेतापेकानाञ, गाते कानतायते एमाय ला़गित् बाय बेरेत्रे हों एनरेहों आ़डिये जिगिरकानते बेरेत्काते तिना़क् जा़रुड़ायकाने एमायगेया।
9आर इञिञ मेतापेकाना, “कोयपे, आदो एमापेया, ञाम बाड़ायपे, आदोपे ञामा, ठोप् ठोप्पे, आदो झिच्आपेया। 10एनते मित्के मित् कोकोयिच् दो मिला़वाया आर ञाम बाक्ड़ायिच् दोए ञामा आर ठोप् ठोपेत्कानिच् दो झिच्आया।”
11“आपे मोदरे ओकोय आपातोक् होड़ होपोनतेत् पिठा़इ कोयलेरे धिरिये चालआया? से हाकोय कोयलेरे हाको बोदोल बिञे चालआया? 12से बेलेये कोयलेरे किदिञकाटकोमे चालआया? 13एनडेखान आपेपे बा़ड़िच्रे हों आपेरेन गिदरा़ भागे भागे दान एमाकोपे बाडायगे खान, तिना़क् आरतेत्गे सेरमा बाबा दो आच् कोयेकानको सोनोत जिवे एमाकोवा।”
जिसु आर बेलसेबुल
(माथ 12:22-29,43-45; मा़र 3:20-27)
14आर जिसु मित्टेच् भुत ए ओडोक गिडियेदेकान ताहेंकाना, आर उनि दो गुङगा़इ ताहेंकाना। आर भुत ए ओडोक गिडियेन खान उनि गुङगा़ दोए रोड़केदा आर गादेल होड़को हाहाड़ायेना। 15मेनखान ओनको मोदरे आदोम होड़को मेनकेदा, “भुतकोरेन मुखिया़ बेलसेबुल होतेतेगे भुतकोय ओडोक गिडियेत्कोवा।” 16आरको बिडा़वेया मेनते सेरमा खोन चिनहा़ जिसु ठेन खोनको खोजकान ताहेंकाना।
17मेनखान जिसु दो ओनकोवाक् मोनेजोङ बाडाय ओरोमकेत्तेये मेतात्कोवा, “आच् उपा़रते भिना़भिनि आकान मित्के मित् राजोसटि दो उजा़ड़ोक्आ आर ओड़ाक् चेतान ओड़ाक् दो रुबोक्आ। 18आर सायतान हों आच् उपा़रतेये भिना़भिनि आकान खान, उनियाक् राज दो चेकाते टिका़उक्आ? एनतेपे मेनेदा बेलसेबुल होतेते भुतकोञ ओडोक गिडियेत्कोवा। 19इञगे बेलसेबुल होतेते भुतकोञ ओडोक गिडियेत्को खान, एनडेखान आपेरेन होपोनको दो ओकोय होतेतेको ओडोक गिडियेत्कोवा? ओना इया़ते ओनकोगे आपेरेन बिक्चा़रकोको होयोक्आ। 20मेनखान इसोराक् दाड़ेते भुतकोञ ओडोक गिडियेत्को खान इसोराक् राजगे हेच् सेटेर आकावात्पे चोङ।”
21“दाड़े होड़ खानडाभानडावानते आयाक् दोलान होरहोलेरे, उनियाक् धोन दा़उला़त दो रुखिया़गे ताहेनताया। 22मेनखान उनि खोन बा़ड़ति दाड़ेयानिच् हेच्कातेये भागावलेरे दो उनिये भोरसाआकावात् जोतो खानडाभानडाये रेजेया आर लुटाक्कोय हा़टिञताया।”
23“इञ सेच्रेन बाङ कानिच् दो इञ बिरुदरेन कानाय आर इञ साँवते बाङ सासामटाविच् दोए छिटिया़वा।”
बा़ड़िच्जिउ रेयाक् रुवा़ड़ोक्
(माथ 12:43-45)
24“बेसाफा जिउ दो होड़ खोने ओडोकलेनरे खाङगोट जायगाकोरेये दाड़ाना जिरा़उ ञाम ञामते आर बाय ञामलेरेये मेनेदा, इञाक् ओड़ाक्तेगेञ रुवा़ड़ चालाक्आ, ओने ओका खोनिञ ओडोक हेच् आकान। 25आर रुवा़ड़ सेनकाते जोक् चिका़ँड़ आर साजावाकात्ए ञामेदा। 26खानगे सेनकाते आच् खोन आरतेत् बा़ड़ति बा़ड़िच् एयाय गोटेच् एटाक् जिवे गाते दाराजोङा आर बोलोकाते ओंडेको मा़न्डिया़उक्आ आर उनि होड़ाक् मुचा़त् दोसा दो पा़हिलाक् खोन आरतेत् बा़ड़िच् होयोक्आ।”
सा़रि सुक
27आदो जिसु नोवाकोय रोरोड़कान ताहेंकानरे गादेल होड़को मोदरेन मित्टेन मायजिउ होहोवातेये मेतादेया, “भा़गानगेयाय दोहोलेत्मे कुखि, आरेम नुनुलेत् तोवाकिन दो।” 28मेनखान जिसुइ मेतादेया, “हें, बिचकोम मेनमे, इसोराक् काथा आँजोमको आर दोक्होकोगेको भा़गाना।”
चिनहा़को खोजकान
(माथ 12:38-42)
29आदो गादेल होड़ जिसु ठेन बेड़हायते लादलादको जारवाक्कान ताहेंकानरे जिसु रोरोड़े धुरा़उएना, “नोवा पिड़हिरेनको दो। मित्टेन बा़ड़िच् पिड़हिरेन कानाको। चिनहा़को खोजकाना आर जोना रेयाक् चिनहा़ छाडा एटाक् चिनहा़ दो बाको ञामा। 30एनते चेत्लेका जोना दो निनवेरेनको ला़गित् मित्टेच् चिनहा़इ होयलेना, ओनकागे मानवा होपोन हों नोवा पिड़हिरेनको ला़गित्ए होयोक्आ। 31दा़खिन दिसा़मरेन रा़नि दो बिचा़ररे नोवा पिड़हिरेन होड़को तुलुच् बेरेत्काते दुसिये टारहावकोवा। एनते उनि दो धा़रति मुचा़त् खोन सुलेमान रेयाक् आकेल आँजोमे हेच्लेना आर ञेलपे नोंडे दो मित् होड़ मेनाया ओकोय दो सुलेमान खोन होंए माराङा। 32निनवेरेन होड़ दो बिचा़ररे नोवा पिड़हिरेनको तुलुच् तेङगोकाते दुसिको टारहावकोवा। एनते ओनको दो जोनावाक् पोरचारते का़इ खोनको कासतावेना आर ञेलपे, नोंडे दो मित् होड़ मेनाया ओकोय दो जोना खोन होंए माराङा।”
होड़मो रेयाक् मारसाल
(माथ 5:15; 6:22-23)
33“ओकोय हों दिउहे जेरेत्काते दानाङरे बाको ओकोकाक्आ से खा़चला़क्ते हों बाको हा़रूबा, बिचकोम दिया़ड़ा चेतानरेगेको दोहोया, जेमोन भितरिते बोलोक्को ओना मारसालको ञेल।#माथाय ५:१५; मा़रकुस ४:२१; लुक ८:१६ 34होड़मो रेयाक् दिउहे दो आमाक् मेंत्गे। आमाक् मेंत् निरोलागेताम खान आमाक् गोटा होड़मोको हों मारसालगेया। मेनखान बा़ड़िच् गेताम खान, आमाक् होड़मो हों ञुतते एसेदोक्आ। 35ओनाते मेन सोनतोरोक्मे, जेमोन आमरे मेनाक् मारसाल दो आलो ञुतोक्मा। 36आमाक् गोटा होड़मो मारसालगेताम खान आर ओका हा़टिञ हों बाङ ञुत खान, एनडेखान, ओना गोटा दो मारसालोक्आ, दिउहे डिगडिग जोलोक्रे मारसालाम लेका।”
जिसु फा़रिसिको आर सोसतोर बाडायकोय दुसियेत्को
(माथ 23:1-36; मा़र 12:38-40)
37आदो जिसुइ गालमारावकेत् खान मित्टेन फा़रिसि दो आच् सोङगे माञजानोक्ए देलावादेया। आदो बोलोकाते जोम ला़गित्ए दुड़ुप् एना। 38खानगे उनि फा़रिसि दो ञेलकातेये हाहाड़ायेना माञजानोक् आ़उरिरे बाय उम माड़ाङलेनते।
39आदो प्रोभु उनिये मेतादेया, “आपे फा़रिसिको दो बा़टि आर था़रि रेयाक् बाहरेतेत्पे साफायेत्आ, मेनखान आपेयाक् भितरितेत् दो लुलुट आर बा़ड़िच्ते पेरेच्आकाना। 40ए बेबुजको बाहरेतेत् बेनावलेत्इच् दो भितरितेत् हों बाय बेनावलाक्आ? 41मेनखान भितरि रेयाक्को दान एमोक्पे, आदो ञेलपे, जोतोवाक्को साफाक्तापेया।”
42“मेनखान हाय आपे फा़रिसिको दो, एनते पुदिना आर आ़रुद आर मित्के मित् आड़ाक् साकाम रेयाक् गेल हा़टिञ खोन मित्के मित् हा़टिञपे एमेदा, मेनखान बिक्चा़र आर इसोर दुक्ला़ड़ दोपे एतोमकाक् काना, नोवाको का़क्मि आर ओनाको आलो चिंडा़लगे लेक ताहेंकानतापेया।”
43“हाय आपे फा़रिसिको दो, एनते सुना़गोगकोरे लाहा दुड़ुप्आक्को आर बाजारकोरे जोहार ओचोक्पे बा़सुताक् काना।”
44“हाय आपे दो, एनते बाङ ञेल ओरोमोक्कान कोबोरको लेका कानापे आर ओनाको चेतानते ताड़ाम पारोमोक् होड़ दो बाको बाडाया।”
45खानगे आ़न गुरुको मोदरेन मित् होड़े रोड़ रुवा़ड़ादेया, “ए गुरु, नोवाकोम मेनेत्ते आले होंम बेमानोतेत्ले काना।”
46जिसु दोए मेनकेदा, “आपे आ़न गुरुकोरे हों हाय हाय, एनते आपे दो बा़ड़िया़को गोक् दाड़ेयाक् बोजहा होड़कोपे लादेयाको काना, मेनखान आपे निजे दो आपेयाक् मित् का़टुप्ते हों ओनाको बोजहा दो बापे जोटेत् एदा।”
47“हाय आपे दो, ना़बिकोवाक् कोबोरपे तोलेदा आर आपेरेन हापड़ामको दो ओनकोको गोच्केत्कोवा। 48एनडेखान आपे दो आपेरेन हापड़ामकोवाक् का़मि रेयाङ गोहाको कानापे आर ओनाकोरेपे रा़जिगेया, एनते ओनकोमाको गोच्केत्को आर आपे दो ओनकोवाक् कोबोरपे तोलेदा। 49ओना इया़तेगे इसोर दो आयाक् आकेलतेये मेन आकादा, ना़बिको आर आपोसतोलको ओनको ठेनिञ कोलकोवा आर ओनको मोदरेन आदोम दोको गोच्कोवा आर आदोम दोको खेदकोवा। 50जेमोन धा़रति रेहेत् खोन जोतो ना़बिको रेयाक् माँयाँम नोवा पिड़हिरेनको ठेन हिसा़ब हातावक्। 51हाबेल रेयाक् माँयाँम खोन उनि साकारिया़ रेयाक् माँयाँम हा़बिच्, ओने ओकोय पिंड आर कोयजोङ ओड़ाक् तालारेये गोच् ओचोयेन, हें मेतापेकानाञ ओना दो नोवा पिड़हिरेनको ठेनगे हिसा़ब एमोक् होयोक्ताकोवा।”
52“हाय आपे आ़न गुरुको दो, एनते बा़क्डा़इ रेयाक् का़ठिपे हात आकादा, आपे निजे हों बापे बोलोलेना आरको बोलोक्कान ताहेंकानको होंपे आकोटकेत्कोवा।”
53आदो जिसु ओंडे खोने ओडोक चालावेन खान ओनको आ़न गुरुको आर फा़रिसिको दो बेबा़ड़िच्को साकड़ाकेदेया आर एमानतेयाक्को रेयाङ रोड़ हारा हा़रि कुलिको एहोप्केदा। 54आर उनियाक् मोचा रेयाक् जाहान काथा साब ला़गित् आ़तको ञामकान ताहेंकाना।
လက္ရွိေရြးခ်ယ္ထားမွု
लु 11: NTSPt25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament Books in Santhali Language © The Word for the World International and Santhali Translation Project, Nepal, 2025