जोहा 3
3
जिसु आर निकोदेमुस
1फा़रिसि मोदरेन मित् होड़े ताहेंकाना, ञुतुमताय दो निकोदेमुस। जिहुदिकोरेन मित्टेन मुखिया़गे, 2उनि दो ञिंदा़ उनि ठेने हेच्एना, आरे मेतादेया, “ए रा़ब्बि आलेले बाडाया आम दो इसोर खोन हेच् आकान मित्टेन गुरु कानाम, एनते आमेम का़मियेत्कान नोवाको चिनहा़ दो ओकोय हों ओहोय का़मि दाड़ेलेया, इसोर उनि तुलुच् आलोय ताहेन खान दो।” 3जिसु दो उनिये रोड़ रुवा़ड़ादेया, “सा़रि सा़रिगेञ मेताम काना, जाहाँय होड़ दोसार कारते बाय जानामलेन खान, इसोराक् राज ओहोय ञेल दाड़ेलेया,” 4निकोदेमुस दो उनिये मेतादेया, “होड़ दो चेकालेकातेये जानाम दाड़ेकोक्आ हाड़ामकाते दो? बाङ दो दोसार कारते एङगात कुखिरे बोलोक् आरे जानाम दाड़ेकोक्?”
5जिसुइ रोड़ रुवा़ड़केदा सा़रि सा़रिगेञ मेतामकाना, “जाहाँय दाक् आर जिउ खोन बाय जानामलेन खान इसोराक् राजरे ओहोय बोलो दाड़ेलेना। 6जेल खोन जानाम आकानिच् दो जेलगे आर जिउ खोन जानाम आकानिच् दो जिउगे। 7दोसार कारते जानामोक् होयोक्तापेया मेतात्मेते आलोम हाहाड़ाक्आ। 8होय दो ओकासेच् सानायेदेये होया आर ओना रेयाक् साडेतेत्एम आँजोमा, मेनखान बाम बाडाया ओका खोन हिजुक् काना आर ओकाते चालाक्काना। ओनकानगेयाय जिउ खोन जानाम आकान मित्के मित् होड़ हों।”
9निकोदेमुस दोए रोड़ रुवा़ड़ादेया, “चेकाते होय दाड़ेयाक्आ नोवाको दो?”
10जिसु दो रोड़ रुवा़ड़कातेये मेतादेया, “आम दो इसराएलकोरेन गुरु कानाम, आर नोवाको बाम बाडाया, 11सा़रि सा़रिगेञ मेतामकाना, आले दो बाडायाक्ले रोड़ेदा आरले ञेल आकात् रेयाङ गोहाले एमेदा, आर आलेयाक् गोहा दो बापे आङगोचेदा। 12धा़रति रेयाक्कोञ ला़इयापेरे बापे पा़तिया़उक्कान खान सेरमा रेयाक्कोञ ला़इयापेरे दो चेकातेपे पा़तिया़उकोक्आ? 13आर सेरमाते दो ओकोय हों बाको राकाप् आकाना, सेरमा खोन फेडेनिच् मानवा होपोन छाडा, ओने उनि सेरमारे मेनाय। 14आर चेत्लेका मोसे दो हाहाङकाररे उनि बिञे राकाप्लेदे, ओनकागे मानवा होपोन हों राकाप् ओचोक् होयेनताया। 15जेमोन पा़तिया़उक् मित्के मित् होड़ उनिरे जायजुग जियोन ताहेनताको।”
16“एनते इसोर दो धा़रतिरेनको नोनकाए दुला़ड़केत्कोवा, आच्रेन एसकार जानाम होपोनगेये एमकेदेया जेमोन उनिरे पा़तिया़उक् मित्के मित् होड़ आलोको नोसटोक्, बिचकोम जायजुग जियोन ताहेनताको। 17एनते इसोर दो आच्रेन होपोन बाय कोललेदेया, धा़रतिरेनको बिचा़रको ला़गित् दो, मेनखान जेमोन धा़रतिरेनको उनि होतेतेको बाञचावक्। 18उनिरे पा़तिया़उक्इच् दो बाय बिचा़र ओचोक्आ, बाङ पा़तिया़उक्इच् दो नित होंए बिचा़र ओचोक्कानगेया, एनते इसोररेन एसकार जानाम होपोनाक् ञुतुमरे बाय पा़तिया़उक् काना। 19आर बिचा़रतेत् दो नोक्ओंय, मारसालतेत् दो धा़रतिते हेच् आकाना आर होड़को दो मारसाल खोन बिचकोम ञुतगेको दुला़ड़केदा, एनते ओनकोवाक् का़मि दो बा़ड़िच्गे ताहेंकानताकोवा। 20एनते बा़ड़िच्आक्ए का़मियेत् मित्के मित् होड़ दो मारसाले कुरुदाक् काना। आर मारसाल ठेन बाय हिजुक् काना, जेमोन उनियाक् का़मिको आलो निसड़ा़उक्ताय। 21मेनखान सा़रियाक् का़मियिच् दो मारसाल ठेने हिजुक् काना, जेमोन उनियाक् का़मिको दो इसोररे का़मि आकाना मेनते सोदोरोक्ताय।”
जिसु आर जोहान
22नोवाको तायोम जिसु आर उनिरेन चेलाको जिहुदा़ टोठातेको हेच्एना, आर ओंडे ओनको तुलुच्ए ताहेंयेना आर होड़े बा़प्तिसेत्को ताहेंकाना, 23आर जोहान हों सालेम सोर रेयाक् आयनोनरे होड़े बा़प्तिसेत्को ताहेंकाना, एनते ओंडे दो ढेर दाक् ताहेंकाना आर होड़को दो हेच्कातेको बा़प्तिस ओचोक्कान ताहेंकाना। 24एनते उन हा़बिच् जोहान दो हाजोतरे बाय भोराव ओचो आकान ताहेंकाना।
25ओना ओकतेरे जोहानरेन आदोम चेलाको आर मित्टेन जिहुदि होड़ तालारे साफाक् बाबोतरेको रोपोड़ कान ताहेंकाना। 26आदो जोहान ठेन हेच्कातेको मेतादेया, “ए रा़ब्बि, जोरदान ओनपारोमरे आम साँवते ताहेंकानिच्, ओने उनि रेयाङ गोहाम एम आकात्, ञेलमे उनि दो होड़े बा़प्तिसेत्कोवा आर सानाम होड़ उनि ठेनगेको चालाक्काना।”
27जोहाने रोड़ रुवा़ड़केदा, “चेत् हों ओहोय हाताव दाड़ेलेया सेरमा खोन बाङ एमआकावादे खान। 28आपे निजेगे चोङ इञ रेयाङ गोहापे एमेत्, इञिञ मेनलेत् इञ दो मा़सि दोञ बाङ काना मेनखान उनि लाहातेञ कोल ओचोआकाना मेनते। 29बा़हु मेनायतायिच्गे जाँवाँय दो मेनखान जाँवाँयरेन लोमता कोड़ा, ओने उनि साँवतेये तेङगोनकान आरे आँजोमेत्ताय, उनि दो जाँवाँयाक् आड़ाङते आ़डितेत् ए रा़सका़क् काना। ओनाते नोवा इञाक् रा़सका़ दो पुरा़उ आकानतिञा। 30उनि दो माराङ इदिक्तेगे होयोक्ताया, मेनखान इञ दो हुडिञ इदिक्गे लेकतिञा।”
उनि ओकोय सेरमा खोने हिजुक्कान
31चोट खोन हिजुक्कानिच् दो सानामको चेतानरे मेनाया, धा़रति खोनिच् दो धा़रतिरेन कानाय आर धा़रति रेयाक्गेये रोड़ेदा, सेरमा खोन हिजुक्कानिच् दो सानामको चेतानरे मेनाया। 32ओकाटाक्ए ञेल आकात् आरे आँजोमाकात् ओना रेयाङगे गोहाय एमेदा, आर उनि रेयाङ गोहा दो ओकोय हों बाको आङगोचेदा। 33उनियाक् गोहा आङगोच आकात्इच् दो नोवाय मोहोर छाप आकावादा, इसोर दोए सा़रिगेया मेनते। 34इसोर ओकोये कोल आकादे, उनि दो इसोराक् काथाकोय रोड़ेदा, एनते जिउ दो सोङकाते बाय एमेकाना। 35आपात दो होपोनतेत्ए दुला़ड़ेदेया आर जोतोवाक् उनि तिरेये एम आकादा, 36होपोनरे पा़तिया़उक्इच् दो जायजुग जियोन मेनाक्ताया मेनखान होपोन रेयाक् बेबाक्ताविच् दो जियोन ओहोय ञेललेया, बिचकोम इसोराक् एदरे उनि उपा़रते ताहेनकाना।
လက္ရွိေရြးခ်ယ္ထားမွု
जोहा 3: NTSPt25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament Books in Santhali Language © The Word for the World International and Santhali Translation Project, Nepal, 2025