आ का़ 17
17
थेस्सालोनिकिरे
1आदो पावल आर सिला़स आमपलिया़तुस आर आप्पोलोनिया़ तालाते दाँड़ाँ इदिकेत्ते थेस्सालोनिकिरेको सेटेरेना। ओने ओकारे जिहुदिकोवाक् मित्टेच् सुना़गोग ताहेंकान। 2आर पावल दो आयाक् चा़लि लेका ओनको ठेने बोलोयेना आर पे जिरा़उक् माँहाँ हा़बिच् सोसतोर रेयाक् ओनको तुलुच्ए आपठा आ़पठिक्कान ताहेंकाना। 3भेद भाङगाव आरे बुजहा़वात्कोते, बाङमा मा़सि दो दुक जोजोम आर गोच्को खोन जिवेत् बेरेदोक् जा़रुड़गे ताहेंकानताया मेनकेदाय, नुय जिसु ओने ओकोय रेयाक् इञ ला़इयापेकान उनि कानगेयाय मा़सि दो। 4आर ओनको मोदरेन आदोमको दोको पा़तिया़वेनते पावल आर सिला़स तुलुच्को सेलेत्एना। आर इसोर भोकति जुना़निको मोदरेन आ़डि गादेल होड़ आर भोदरो मायजिउको मोदरेनको ढेरञोक्को हों। 5जिहुदिको दो हिसका़तेको पेरेच्एना आर बाजार खोन बादमास होड़को माङगावकाते गादेल होड़को जारवाकेत्कोवा आर नागराहारे हुलको जानाम ओचोकेदा खानगे जासोनाक् ओड़ाक्तेको दानदानाव सेनेना आर ओंडे पावल आर सिला़सको तोलास बाड़ाकेत्किना। जेमोन तुदरा़ होड़ाक् बा़इसि सामाङरेको ओडोक इदिकिन। 6मेनखान बाको ञामलेत्किन खान जासोन आर आदोम आदोम बोयहाको नागराहा चाक्लावको ठेनको घाचघाचाव इदिकेत्कोवा, नोनका होहोवाते, नोको धा़रतिको गुलमाल आकात् होड़ दो नोंडे होंको हेच् आकाना। 7आर जासोन दो ओनकोय आताङ आदेरकेत्कोवा। आर ओनको सानामको दो का़इसा़राक् हुकुम बिरुदको का़मिकेदा, ओनेको मेनेत्ते बाङमा जिसुको मेताय मित्टेच् एटागिच् राज मेनाया। 8आर ओनाको आँजोमकेत् खान गादेल होड़ आर नागराहा चाक्लावको दोको तोरासेना। 9आर जासोन आर सारेच्को जा़मिनको तेङगोकेत्कोते ओनको दोको आड़ाक्कात्कोवा।
बेरिया़ रे
10खानगे बोयहाको दो ञिंदा़गे पावल आर सिला़स बेरिया़तेको कोल गोत्कात्किना। उनकिन दो ओंडेकिन सेटेरेन खान जिहुदिकोवाक् सुना़गोगतेकिन चालावेना। 11नोंडेनको दो थेस्सालोनिकिरेनको खोन बा़ड़ति भोदरोगेको ताहेंकाना। नोको दो खाड़ा मोनते काथाको आताङकेदा, आर दिना़म हिलोक् सोसतोरकोको डुन्ढा़वेत् ताहेंकाना, भाला नोवाको दो ओनका कानगेया से बाङा। 12ओनाते ओनको मोदरेन आयमा होड़को पा़तिया़वेना, आर मानोतान जुना़नि मायजिउको आर हेरेल होपोनको मोदरेन हों ढेरञोंक्गे। 13मेनखान थेस्सालोनिकिरेन जिहुदिको दो बेरिया़रे हों इसोराक् काथा पावले ला़इयाकोकाना मेनतेको बाडाय ञामकेत् खान, ओंडे हों हेच्एनते गादेल होड़ आ़उला़उ आरको तोरास ओचोकेत्कोवा। 14खानगे बोयहाको दो साटमेनते पावलको कोल गोत्कादेया, जालापुरि, आड़े हा़बिच्ए चालाक्आ मेनते। मेनखान सिला़स आर तिमोथि दो बेरिया़रेकिन ताहेंयेना। 15आर पावल इक्दिको दो आथेन्स हा़बिच्को इदि सेटेरकादेया। आर सिला़स आर तिमोथि आच्ठेन उसा़राकिन हेच् होदोक्आ मेनते हुकुमको ञामकेत् खानको रुवा़ड़ चालावेना।
पावल आथेन्स रे
16आदो पावल आथेन्सरे उनकिने ता़ङगियेत्किन ताहेंकानरे, उनियाक् जिउ दो आच् भितरिरे जालजालावेनताया, नागराहा मुरहुत्कोते पेरेच् आकाने ञेलकेत्ते। 17ओनाते सुना़गोगरे जिहुदिको आर इसोर भोकतिको तुलुच्ए आपठा आ़पठिक्कान ताहेंकाना, आर हाट टा़न्डिरे दिना़म हिलोक् ञापामोक्कानको तुलुच् हों 18आदो इपिकिउरि आर इसतोइक पोंडेतको मोदरेन आदोम उनि तुलुच्को ञापामेना। आर आदोमको दोको मेनकेदा, चेत् बाङ रोरोड़ सानायदेकान, नुय बोकोड़ बोकोड़िच् दो एटाक्को दोको मेनकेदा, आ़ना़डि बोङगाकोरेन ला़इ जा़क्हिरिच् लेकाय आ़इका़उक् काना एनते उनि दो जिसु आर जिवेत् बेरेदोक् रेयाक्ए पोरचारेत् ताहेंकाना। 19आदो उनि सोङगेकाते आरेयोपागोसतेको इदिकेदेया, मेनकेदाको, बाडाय दाड़ेकेयाले, आमेम ला़इएत्कान नोवा नावाँ सिकना़त दो चेत्काना मेनते? 20एनते आ़ना़ड़ियाक्कोम आँजोमाले काना, ओनाते बाक्डाय सानायेत्लेया, ओनाको रेयाक् माने दो चेत्काना मेनते 21सानाम आथेन्सरेनको आर ओंडे बासाआकान उपरिया़को दो जाहान सालास काथा ला़ला़इ से आँजोम छाडा आर जाहान एटागाक् ला़गित् दो आकोवाक् गोटा आ़जा़उड़ि ओकतेको खेमावेत्कान ताहेंकाना।
22आदो पावल आरेयोपागोस तालारे तेङगोयेनतेये मेनकेदा, ए आथेन्सरेन होड़को जोतोवाक्कोरे बा़ड़ति देब माक्नावको लेकाञ ञेलेत्पेया। 23एनतेञ सेन पारोमोक्रे आर आपेपे सेवावाक्कानाक्कोञ आ़रिबा़न्धियेत् ताहेंकानरे मित्टेच् पिंड होंञ ञामकेदा, ओने ओनारे नोवा ओलाक् ताहेंकाना, बाङ बाडाय आकादेयिच् इसोर ला़गित्। आदो एनडेखान ओकाटाक् बिन बाडायतेपे सेवावाकोकान, ओनागे इञ दोञ ला़इयापे काना। 24इसोर ओने उनि धा़रति आर ओनारे मेनाक् जोतोवाक्कोय बेनावआकात्। उनि दो सेरमा आर धा़रतिरेनको प्रोभु हुया़ँते तिते बेनावाक् कोयजोङ ओड़ाक्कोरे दो बाय ताहेनकाना।#१ रापाजको ८:२७; आपोस का़मि ७:४८ 25आर मानवाकोवाक् तिते हों बाय साप्सोर ओचोक्काना, जाहानाक् जा़रुड़ायकान लेका, आच्गे सानामाक्को जियोन आर साँहेंत् आर सानामाक्ए एमाकोकानते। 26आर उनि दो मित्टेन खोनगे मानवाकोवाक् मित्के मित् जा़तरेनको गोटा धा़रतिरेनको ताहेना मेनतेये बेनावआकात्कोवा, ओनकोवाक् ताहेन ठा़ँइ रेयाक् सिमा़को होंए बाँधावआकादा। 27जेमोन इसोरको ञाम बाड़ाये, पासेच्रे पासेच् टा़मडा़उ आरको ञामकेदेगे, आबो मिमित् होड़ खोन सा़ङगिञरे बा़नुगिच् रेहों। 28एनते उनिरेगे जिवेत्बोन ताहेनकाना, आर बोन लाड़ावक्काना, आर मेनाक्बोना। आपेरेन आदोम आदोम सेरेञ जोक्ड़ावकोको मेनआकात् लेका, बाङमा उनिरेन बोंस हों एनते कानगेयाबोन, 29एनडेखान इसोररेन बोंसकानतेबोन, नोवा मेमेन दो बाङ लेकताबोना, बाङमा इसोरतेत् दोए, सोना से रुपा़ से धिरि लेकाना, ओने ओका मानवा रेयाक् का़रिगोल आर हुदिस बुनदिसतेको कुँदा़उआकात् मुठा़न कान। 30ओनाते इसोर दो बिन बाक्डाय रेयाक् ओकतेकोय ञेल गोत्कात्ते, नितोक् दो मानवाकोय हुकुमाको काना, सानाम टा़न्डिरेन इसतोक होड़को मोनको आ़चुरताकोवा मेनते। 31एनते मित्टेच् दिने नेन्डावाकादा ओने उनरे धा़रतिरेनको सा़रियाक्तेये बिचा़रको मित् होड़ होतेते ओने उनिये टारहाव आकादे, ओने ओना रेयाक्गे सानाम होड़े सा़बुत आकावात्को, गोच् खोन उनिये जिवेत् बेरेत्केदेते। 32आदो गोच्को जिवेत् बेरेदोक् रेयाक्को आँजोमकेत् खान, आदोमको दोको लानदा धुत्आदेया, मेनखान एटाक्को दोको मेनकेदा, नोवाको रेयाङ दो आरहोंले आँजोमतामा। 33ओनकाकाते पावल दो ओनको ताला खोने ओडोक चालावेना। 34मेनखान आदोमको दो उनि साँवेनतेको पा़तिया़वेना, ओनको मोदरेगे आरेयोपागोसरेन डियनुसियस, दामारिस ञुतुमान मित्टेन मायजिउ आर साँवते आर आरको होंको ताहेंकाना।
လက္ရွိေရြးခ်ယ္ထားမွု
आ का़ 17: NTSPt25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament Books in Santhali Language © The Word for the World International and Santhali Translation Project, Nepal, 2025