Maliku 8
8
Yesu anguwapegha mulyo wandu ielufu inne
Matayu 15:32-39
1Ku machuwa ghala, lipinga likulunga lya wandu walikunguliti kangi na wavile ngʼogha na mulyo. Yesu akawakema wayitikila ghake, na kuwalongela, 2“Ninguwawonela luhughu wandu hagha kwa ikiva wavile na nenga kwa machuwa itatu, wavile ngʼogha na mulyo. 3Nikiwaleka wayendi ukaya na njala wakiva mnjila watehyunga kwa njala, kwa ikiva wamonga ghao wahumilile kutali.”
4Wayitikila ghaki wakamkonya, “Baha mmwitu tutetola kugha mibumunda gha kuwayukutisa wandu hagha wogha?”
5Yesu akawakonya, “Mvile na mibumunda mininga?”
Wakamyanga, “Tuvile na mibumunda isaba.”
6Hinu, akawalongela wandu watami pahi. Akaitola yila mikati isaba, akamhighila Sapanga, akaimetula, akawapegha wayitikila ghaki wawapeghi wandu, na weni wakawapegha. 7Vilavila wavile na vihomba vimayaghani. Yesu akavihighila, akalonga muwapeghi wandu hilahila. 8Wandu wakalyegha, wakayukuta. Wakakungula vihighalile wakamemesa vibeja isaba. 9Na weni walyeghilile wavile wandu ielfu inne, Yesu akawatahula. 10Lipindi lilalila akakwela mu whatu pamonga na wayitikila ghaki, akayenda mmuji wa Dalimanusa.
Mafalisayo wangupala Kilangihi
Matayu 16:1-4
11Wamonga wa Mafalisayo wakahika wakatumbula kulongelana na Yesu kwa kumyesa, wakampala agholi makangaso kulangiha yiwa uwesa ghaki uhuma kwa Sapanga. 12Yesu alolile luhungu mmoyu ghake akalonga, “Ghuli kiwelekwa haki kingupala makangaso? Unagha ninguwalongela, kiwelekwa haki kitepeghwa ng'ogha makangaso yoyosi.”
13Hinu akawaleka, akayingila kangi mghati gha whatu, akatumbula mwanja kuyenda mwambu gha ipili gha lihiwa.
Kilungu gha Mafalisayo na Helodi
Matayu 16:5-12
14Wayitikila ghaki wavile waliwasuwa kutola mibumunda, wavile na lbumunda mmonga hela ku whatu. 15Yesu akawalongela, “Mliloli maha nesu, mlikali weka na chilungu kya mafalisayu na chilungu kya Helodi.”ʼ 16Wayitikila ghaki wakatumbula kulongelana weni kwa weni, “Angulonga nagha kwa ikiva tuvile ngʼogha na mibumunda.”ʼ
17Yesu akamanya malongelano ghala, akawalongela, ghuli mngulongelana kwa kuvila ngʼogha na mibumunda? Ghuli, mmbila mmanya ng'ogha? Ghuli mioyu ya mwenga ni mitopehu?
18Ghuli, mvile na mihu na mlola ngʼogha? Mvile na mapulukilo na mngalikuyughanila? Ghuli, mkumbuki ngʼogha? 19Lipindi lila panimetula hila mibumunda itano na kuwapegha wandu ielfu itano? “Mkungulile vibeja vininga vya vihighalile.” Wakamyanga, “Ikumi na ivili.” 20Na panimetula hila mibumunda isaba na kuwapegha wandu ielufu inne, mkungulile vibeja vininga vya vihighalile? “Wakamyanga, Isaba.”
21Hinu, akawakonya, “Mmbila, mmanya ngʼogha?”
Yesu angumlamisa mundu angalimihu wa Betisaida
22Yesu ahikilile ku Betisaida pamonga na wayitikila ghaki. Kula wandu wakamyeghela angalimihu, wakamluwa amyavisi.
23Yesu akamkola yula angalimihu liwoku, akamyegha panji gha kimbwani. Akamuhunyila mata ku mihu, akamvikila mawoku kumihu, akamkonya, “Ghuli, unguwesa kulola kindu?” 24Yula angalimihu akalola, akalonga, “Ninguwalola wandu wawoneka handa mibiki ingutyanga.”
25Hinu Yesu akamvikila kangi mawoku ghaki ku mihu gha yula mundu, na mweni akakwinjula mihu maha. Mihu ghaki ilamile, na kuwesa kulola vindu vyogha lipalalipala.
26Yesu akamlongela ayendi ahuyi ukaya ghaki, akimlaghila “Hata ukotoho kutyangatyanga ku kimbwani baha.”
Petelo angulonga lipala Yesu yiwa Kilisito
Matayu 16:13-20; Luka 9:18-21
27Hinu, Yesu na wayitikila ghake wayendile pabehi na vimbwani vya Kaisalea Filipi. Pa wavile mnjila Yesu awakonyile wayitikila ghake, “Wandu wangulonga nenga ni ghani?”
28Wakamuyanga, “Ghangi wangulonga yiwa wenga ni Yohana Mbatisa na ghangi Elia na ghangi mmonga wa walota.”
29Na mweni akawakonya, “Na mwenga ghuli, mngulonga nenga ni ghani?” Petelo akamyanga, “Wenga ndiwa kilisito ahaghulilwi na Sapanga kuvile Mnduna.”
30Hinu Yesu akawalaghilila, “Mkotoho kumlongela mundu yeyose lilando hali.”
Yesu angulongela milandu gha kuhova na kuhinduka kwa mweni
Matayu 16:21-28; Luka 9:22-27
31Hinu, Yesu akatumbula kuwavula wayitikila ghaki, akilonga, “Ingudahilwa mwana wa Mundu ahakilwe na kukanilwa na wagholokela wa wandu, wakulu wa watambika pamonga na wavula wa ulaghililo. Atehova na machuwa gha itatu kuulongolo atehinduka.” 32Mweni awalongelile milandu hila lipala lipala. Hinu Petelo akamkema Yesu mmbali akatumbula kumkalipila. 33Ila Yesu akaghalambuka na kuwalola wayitikila ghaki na kumukalipila Petelo akilonga, “Uhuki baha pabehi na nenga wenga lihoka, kwa ikiva mawachilo ghako ngʼogha gha Sapanga ni gha kimundu.”
34Hinu akalikema lipinga lya wandu pamonga na wayitikila ghaki akawalongela, “Ikiva mundu yoyose angupala avile myitikila wa nenga, akotoho kujigholela mihalu ghakimweni, ila atole lipingika lyaki anikovekeli.
35Kwa ikiva mundu apalile kuulokola ukomu ghaki, ateulamisa, ila mundu ayalamisile ukomu ghaki kwa ikiva gha nenga na kwa ikiva gha Lilandu lya Maha, atehuka kuhuma mu uhakata. 36Ghuli, Mundu atepokela nyongesa ghani ikiva atepokela vindu vyogha vya mlima wogha, ila akayalamisa ukomu ghaki? 37Kwahela kindu unguwesa kuvika badili gha ukomu 38Mundu yoyose kukiwelekwa haki kihakata kivile ng'ogha na ukwinila kwa Sapanga, yula aniwonela honi nenga na mavula ghangu, Mwana wa Mundu atemwonela honi mundu yula, lipindi pahika Ukulu wa Tati ghaki pamonga na watumikila wa Sapanga wa kundumba.”
လက္ရွိေရြးခ်ယ္ထားမွု
Maliku 8: NTMbBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbunga @The Word for The World International and Mbunga Language translation, 2025. All rights reserved.