Matayu 10
10
Yesu anguwalaghila wavulwa ghaki ikumi na ivili.
Maliku 3:13-19; Luka 6:12-16
1Hinu Yesu akawakema wavulwa ghaki ikumi na ivili, akawapegha uweso wa kuwawinga mahoka na kulamisa mavina wekaweka. 2Mahina gha wala wandumindumi ikumi na ivili ni hagha; wamtumbulo ni Simoni akemilwi Petelo na Andeleya mlongo ghaki, na Yakobu mwana wa Zebedayu na Yohanamlongo ghaki; 3Filipu na Batulumayu na Tomaso na Matayu awelili mkungula usulu na Yakobu mwana wa Alifayu na Tadei; 4Simoni mkola mlima wa kanani, na Yudasi Isikalioti yula amhyukili Yesu.
Lihengu lya wandumindumi ikumi na ivili
Maliku 6:7-13; Luka 9:1-6
5Yesu akawalaghila wala wandu ikumi na ivili na kuwalongela nagha, “Mkotoho kuyenda kwa wandu Wayahudi ng'ogha, na kangi mkotoho kuyingila kummbwani wa Samaliya.” 6Ila myendi kwa wandu wa Izilaili wayaghamilile handa kondolu. 7Pamyenda mkatangasi nagha, “Unkosi wa Kundumba wa pabehi.” 8Muwalamisi wavina, na muwahinduli wahovili, na muwaghululi wenikuwela na ukalawa, muwawingi mahoka. Mpeghwa yaghi hela, na mwenga mpeghi yaghi hela. 9Mkotoho kutola zahabu na lidini lya feza na hata saba, 10mkotoho kukola mhaku wa mwanja, hilahila likoti lya nyongesa, na hata hilatu, hata hyatu. Kwaikiva mghola lihengu angupalwa apeghwi hupo ghaki.
11Pamuyingila kummbwani wowosi au kimbwani, mumuhakuli mundu mweni kupala kuwapokela, na mtami haku mbaka lipindi lya kuhuka. 12Pamyingila ukaya muwajambusi nagha, “Sapanga awahighili mwenga.” 13Na paikawela kuwela na wandu wamaha Sapanga atewahighila. Ila paikawela kwahela wandu wamaha Sapanga ateleka kuwahighila. 14Handa mundu kuwapokela ng'ogha au kalema kuwayughanila, hinu pamuhuka kulighuta hali au mmbwani hau, myapundi malifu mmaghulu. 15Chakaka ninguwalongela, lichuwa lya utoso mmbwani hau utepokela uhakili mkulunga kupiti yawakolile wandu wa mimbwani gha Sodoma na Gomola.
Mahakilo yenikuhika
Maliku 13:9-13; Luka 21:12-17
16“Hinu, nenga ninguwayegha mwenga handa kondolu paghati gha wa ghalumhitu. Muweli na umanyi handa njoka na wanyali nyali handa ngunda.” 17Mkali mihu na wandu, kwaikiva watewayegha mwenga kunjenga kaya na kuwatova hyatu kumighuta ghao gha kukonganila Wayahudi. 18Mteyeghwa kuulongolo gha vilongosi na wankosi kwaikiva mngunikwinila nenga, kukamulwa kwa mwenga kutewela njila gha mwenga kuwalaongela habali zyangu hagha wankosi na wandu Wayahudi ng'ogha. 19Hinu, pawawayegha mwenga kutoso, mkotoho kutila mtelonga kyani, kwaikiva mtepeghwa lya kulongela lipindi lila lila. 20Kwaikiva ng'ogha mwenga mtelongela, ila Mpumulo wa Tati wa mwenga mwenikulongela mghati gha mwenga,
21na mlongo atemhyuka mlongu ghaki akomwi, na tati hilahila ateghola nagha kwa mwana ghaki, na wana watewahyuka walela ghao na kuwaghola wahovi. 22Wandu wogha watewapala ng'ogha mwenga kwaikiva gha kunikwinila nenga. Ila yula ategangamala mbaka mwihu, atekombolwa. 23Pamgholelwa mahakata na wandu wa mmbwani mmonga, mtuwili kummbwani mghangi. Chakaka ninguwalongela, pambila gha kuyomola kutangasa kumimbwani hyogha gha Izilaili Mwana wa Mundu nitewela nihika kala kuwatanga.
24“Mvulwa kanguwesa ng'ogha kuwela mkulunga kupiti mvula ghaki, hilahila na mtumikila kanguwesa ng'ogha kuwela mkulu kupiti Bambu ghaki.” 25Hinu ingukwila mvulwa kuwela handa mvula ghaki, hila hila mtumikila aweli handa bambu ghaki. Paikawela nenga mkulu wa lighuta wangunikema, “Mkulu wa mahoka,” handa wanikema nenga nagha, ghuli, watewakema ng'ogha mwenga mahina mahakata nesu?
Yula wa kutilwa
Luka 12:2-7
26“Hinu mkotoho kuwatila wandu hagha. Kwaikiva kwehela kyeni kulihigha kikasindwa kugubutulwa, wala kwahela kifisu kyeni kusindwa kumanyika.” 27Lila ninguwalongela mkiwela weka yenu, mwenga mkalilongeli palwagha, na lila mnguliyoghanila likitangaswa kwa kupwepwa mwenga mlitangasi kwa lilowi. 28Mkotoho kuwatila wala wenikukoma higha, ila wanguwesa ng'ogha kukoma upumulo. Mwenga mngupalwa kumtila Sapanga mwenikuwesa kukoma higha pamonga na upumulo hinu akatagha mpumulo kulyoto lya kujimika ng'ogha. 29Mbalama waivili wanguwuswa kwa sendi imonga hela. Ila kwahela hata mmonga wa weni akaguwa pahi na Tati wa mwenga akasindwa kumanya. 30Hata hwila kumutu gha mwenga Sapanga angumanya utangala ghaki. 31Hinu mkotoho kutila kwaikiva mwenga ni wamaheli nesu kuulongolo gha Sapanga kupiti hagha mbalama watangala.
Kumjumila na kumlema Kilisito
Luka 12:8-9
32“Ila mundu mweni kulonga kuulongolo gha wandu yiwa mweni ni mvulwa wa nenga, na nenga nitemlongela handa nahagha kuulongolo gha Tati ghangu mwenikuwela kundumba.” 33Ila yeyosi mweni kunikanila kuulongolo gha wandu, na nenga nitemkanila kulongolo gha Tati ghangu mwenikuwela kundumba.
Niwayeghela ng'ogha kuponga bali lipanga
Luka 12:51-53; 14:26-27
34“Mkotoho kuliwachila yiwa nihika kuyegha kuponga mumlima wogha. Ila nihika ng'ogha kuyegha kuponga bali niyegha lipanga. 35Kwaikiva nihika kuyegha makologhanyo paghati gha mwana na tati ghaki, paghati gha biti na nyongo ghaki, paghati gha mkamwana na nyongo mkwahanu ghaki, 36Na wandu weni kukupala ng'ogha ni wandu wa ukaya ghako.
37Yoyosi mweni kumpala tati au nyongo ghaki kupiti nenga hayu kanguwesa ng'ogha kuwela mvulwa ghangu, na hata yula mweni kumpala mwana au biti kupiti nenga hilahila kanguwesa ng'ogha kuwela mvulwa ghangu. 38Mundu yula katola ng'ogha lipingika lyaki na kunikovikela, hayu kanguwesa ng'ogha kuwela mvulwa ghangu. 39Yula mwenikupala kulamisa ukomu ghaki ateuyalamisa, ila yula ateyalamisa ukomu ghaki kwaikiva gha nenga, ateulola.
Watepokela hupo
Maliku 9:41
40Mundu yeyosi mweni kuwajumila mwenga, hayu kanijumila nenga na yula angunijumila nenga kamjumila yula anilaghilili. 41Mundu yeyosi angumpokela mlota wa Sapanga kwaikiva ni mlota, atepokela hupo hilahila kavikilwa mlota, na mundu kangumpokela mundu mwenikughola ghala angupala Sapanga atepeghwa hupo hilahila atepeghwa mundu yula mweni kughola ghala angupala Sapanga. 42Mundu yeyosi paampegha hata kikombi kya masi mmonga wa hayu mnung'una kwaikiva ni mvulwa ghangu, hayu atepokela hupo.”
လက္ရွိေရြးခ်ယ္ထားမွု
Matayu 10: NTMbBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbunga @The Word for The World International and Mbunga Language translation, 2025. All rights reserved.