Luka 6
6
Yesu ni Bambu wa lichuwa lya Kupumulila
Matayu 12:1-8; Maliku 2:23-28
1Limonga lya lichuwa lya kupumulila, Yesu pamonga na wavulwa ghaki wawelili wangutyanga kumatawa gha ngano. Na wavulwa ghaki wakatumbula kuvetula mahoji gha ngano, na wakahumisa punji ghaki kwa mawoko, wakalyegha. 2Mafalisayo wamonga wawakonyili wavulwa, “Ghuli mngughola mghalu upalwa ng'ogha kugholeka lichuwa lya kupumulila?” 3Yesu akawayanga, “Ghuli, msomili ng'ogha vila agholili Daudi pamonga na waghanja ghaki lipindi wawelili na njala? 4Daudi ayingilili kulighuta lya Sapanga, akatola hila mibumunda ivikilwi kuulongolo gha Sapanga, akalyegha na kuwapegha ghanja ghaki. Kahela kukovekela laghilo, kwaikiva katu mundu kulyegha mibumunda hila ila watambika weka.” 5Hinu Yesu akawalongela, “Mwana wa Mundu ndiwa Bambu wa lichuwa lya kupumulila.”
Yesu angumlamisa mundu avili na liwoko lipola
Matayu 12:9-14; Maliku 3:1-6
6Lichuwa lya Kupumulila lighangi, Yesu ayingilili kulighuta lya kukonganika Wayahudi, akavula. Na mula mghati pawelili na mundu avile liwoko ghaki lya kulihila liwelili lipola. 7Wavula wa laghililo lya Musa na Mafalisayo wahakulili kulola njila gha kumsitaki Yesu na nagha wawelili wakilindila ili waloli yiwa atemlamisa mundu lichuwa lya kupumulila. 8Ila Yesu amanyili mawachilo ghao, akamlongela yula avili na liwoko lipola, “Utandamki, ugholoki paghati gha weni.” Yula mundu akayenda kugholoka paghati. 9Hinu Yesu akawalongela Wavula wa laghilo na Mafalisayo, “Ninguwakonya, Ni kyani laghilo lya twenga tungupalwa kukovekela kulaghilo tugholi lichuwa lya kupumulila, ni maha kughola lilando maha lichuwa lya kupumulila au kughola lilando lihakata, kumlamisa mundu au kumleka ahovi?” 10Yesu akawalola wogha wawelili pala, hinu akamlongela yula mundu, “Ulangihi liwoko lyako.” Na mweni akaghola handa alongilwi, liwoko ghaki bwitu likavile likomu kangi. 11Ila wala wahyomili nesu, wakalongelana njila gha kumgholela Yesu mahakata.
Yesu anguhaghula wandumindumi ikumi na ivili
Matayu 10:1-4; Maliku 3:13-19
12Lichuwa limonga Yesu ayendili kulitumbi kuyupa, na kulikala kula kwa uhiku wogha akiyupa kwa Sapanga. 13Kilau ghaki awakemili wavulwa ghaki, na kulipinga lila awahaghulili wandu ikumi na ivili akawapegha lihina limonga Wandumindumi. 14Simoni, yula Yesu ampeghili lihina Petelo na Andelea mlongo ghaki Simoni, Yakobu na Yohana, Filipo na Batolomayo, 15Matayo na Tomaso, Yakobu wa Alifayo na Simoni akemilwi Zelote imanyika mundu alihumisili kulitova kwa mlima ghaki, 16Yudasi mwana wa Yakobu na Yudasi Isikalioti yula avile kuulongolo ahikili kumhyuka Yesu.
Yesu anguvula na kuwalamisa wandu
Matayu 4:23-25
17Yesu ahulukili kuhuma kulitumbi pamonga na wavulwa ghaki, na kugholoka kumahala kuwelili kulandala. Pala kuwelili na lipinga likulunga lya wavulwa ghaki pamonga na lipinga likulunga nesu lya wandu wahumili kummbwani Yelusalemu, kumlima Yudasia hyogha na pandi zya mmbwani Tilo na Sidoni mmbali mwa bahali. 18Wandu wala wahikili kumhyoghanila na kulamiswa mavina ghao. Na wala wahakililwi na lihoka walamisilwi. 19Wandu wogha wapalili kumyavisa, kwaikiva makakala uwelili ukihuma mghati ghaki na kuwalamisa wogha.
Highili na chondi
Matayu 5:1-12
20Hinu Yesu akawalola wavulwa ghaki na kulonga,
“Mhighilwa mwenga mvile wakapuku,
kwaikiva unkosi wa Sapanga ni wa mwenga.
21Mhighilwa mwenga mvile na njala hinaa,
kwaikiva mteyukutiswa.
Mhighilwa mwenga mlila hinaa,
kwaikiva mtehekelela kwa luheku. 22Mhighilwa mwenga ikiva wandu wawapala ng'ogha, watewaleka, watewalighu na kuwayalamisila lihina yiwa mwenga ni wahakata kwaikiva gha nenga Mwana wa Mundu. 23Pala dahile mambui wa mwenga wawagholili hilahila walota wa Sapanga, payahumila hagha, mhekeleli kwaikiva mvikilwa hupo ngulu kundumba.
24Ila chondi mwenga wanahisa,
kwaikiva mlindili mbaka mpatili kala manemu.
25Chondi mwenga myukuta hinaa,
kwaikiva kuulongolo mtekolwa njala.
Chondi mwenga mhekelela kwa luheku hinaa,
kwaikiva kuulongolo mtelumbilila na kulila.
26Chondi mwenga lipindi wandu wogha pawawakwilikiha, kwaikiva wambui ghao wawagholelili walota wa uhwangi hilahila.
Kuwapala wahakata
Matayu 5:38-48; 7:12
27Ila ninguwalongela mwenga mngunihyoghanila, muwapali wahakata wa mwenga, muwagholeli ulungwana wala wawapala ng'ogha. 28Muwayupili kwa Sapanga wahighilwe wala wawalapilili. Na muwayupili wala wanguwagholela mahakata. 29Ikiva mundu kakutova linganja limonga, umlongele akutove hilahila mbandi yingi. Ikiva mundu kakupoka lihabiti lyako, umlekeseli atoli na likoti hilahila. 30Mundu paakuluwa kindu umpeghi na mundu paakupoki hindu ghako ukotoho kumpala akuhyisili. 31Muwagholeli wandu ghangi hilahila handa mpalili mwenga wawagholeli. 32Na ikiva mnguwashukwile hela wala wawapalili mwenga, mtepokela hupo niki? Kwa ikiva hata wavela na sambi huwapala wala wawapala. 33Kangi ikiva handa mtewagholela lilando maha wala hela wawagholela maheli, watewashukwile niki? Hata wavile na sambi ughola hagha. 34Na ikiva mnguwakopesa wala weka mnguwachila yiwa wawahyisili, watewashukwile kwa niki? Hata wala wavile na sambi huwakopesa wavile na sambi ghangi ili wawahuyisili homoso lilalila. 35Ila mwenga muwapali wahakata wa mwenga na kuwagholela lilando maha, muwakopesi na ng'ogha kulindila kuhuyisilwa na hupo gha mwenga litevile ngulu, na kwa kughola nagha mwenga mtevile handa wana wa mweni kuwela kunani Sapanga wangupalwa kughola. Kwaikiva anguwagholela maheli kwa wala wavile ng'ogha na kushukwile na wavile wahakata. 36Mvile na luhungu handa Tati wa mwenga avile na luhungu.
Kukotoho kuwalamula waghangi
Matayu 7:1-5
37Mkotoho kuwatosa waghangi, na Sapanga atewatosa ng'ogha mwenga. Muwalekeleli waghangi na Sapanga atewalekelela mwenga. 38Muwapeghi ghangi hyogha wayapalili, na mwenga mtepokela. Kangi, mtepokela hupo ngulu imemeswili nesu hata kumwaghika. Kwa ikiva mtevikilwa na Sapanga hupo hilahila muitumila mwenga kwa wandu ghangi.” 39Yesu akawalongela kangi wavulwa ghaki mlandano hau, “Angali mihu anguwesa kumlongosa angali mihu mghangi? Kwa nagha wogha waivili wateyingila ng'ogha mulyoghu.” 40Mvulwa kawesa ng'ogha kuvile kunani gha mvula ghaki, ila paayomola mavula ghaki, atewesa kuvile handa mvula ghaki. 41“Ghuli unguwesa kulola kibiki kinung'una kivile kulisu lya mlongo ghako na kangi bahala uloli ng'ogha libau limlisu lya wenga?”
42Au ghuli unguwesa kumlongela mlongo ghako, “Mlongo, ulindili nikuhumisi kibiki kulisu gha wenga, na kunu uloli ng'ogha libau liwelili mu lisu ghako mweni?” Mmbindingu wenga. Utumbuli kuhumisa libau livili mulisu lyako, na baha ndiwa utewesa kulola maha ghuli utehumisa kibiki kivile mlisu gha mlongo ghako.
Libiki humanyika kwa matungula ghaki
Matayu 7:16-20; 12:33-35
43Libiki lya maha lilela ng'ogha mahiliwi mahakata, hilahila libiki lihakata lilela ng'ogha mahiliwi maha. 44Wandu humanya libiki kwa matungula ghaki. Wandu wakonyoli ng'ogha matungula gha tini kunani mwa kiputila hilahila wakonyola ng'ogha zabibu kumbigili. 45Mundu maha uhumisa yavile maha kuhuma kuluhanja maha luvili mumoyu ghaki, na mundu mhakata uhumisa yavile mahakata kuhuma kuluhanja hakata ivile mumoyu ghaki, kwaikiva mundu ulongela kuhumila na yala yamemili mumoyu ghaki.
Wachengaji wa njila ivili
Matayu 7:24-27
46“Ghuli mngunikema ‘Bambu, Bambu,’ na mwenga mghola ng'ogha yala niwalongelili? 47Nitewalangiha mlandano wa mundu anikovekela nenga, anguhyoghanila milando gha nenga na kuyaghola. 48Hayu alandine na mundu anguchenga lighuta, avile kahimba pahi na kuvika mtumbula ghaki kunani gha liganga, kukahumila kumema kwa masi ngoo gha lweni, masi gha lweni yakahika kutova lila lighuta, ila iwesili ng'ogha kutikanyika, kwaikiva iwelili waichenga maha. 49Ila yoyose apikanila milando gha nenga na aghole ng'ogha chochose, hayu angulandine na mundu achengili lighuta kunani mwa kulutupi na kakotoho kuvika mtumbula. Kumema kwa masi ngoo kukihika, masi yakatova lighuta lila, likagua na kuyalamika nesu.”
လက္ရွိေရြးခ်ယ္ထားမွု
Luka 6: NTMbBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbunga @The Word for The World International and Mbunga Language translation, 2025. All rights reserved.