Yohana 3
3
Nikodemo khomogendelaa Yesu
1Aleapwale muntu yomwi pi idale la Mafalisayo, lina lakwe angile Nikodemo, nanoyo angile mokhombe kho ivanza ikolo la Vayahudi. 2Nsiko yemwi Nikodemo aleamopetela Yesu otikho amowelaa, “Molaangi, khomanyile kete ogwegwe ole molaangi yunaa opumile khwa Matuunda, kho nguno khotopo muntu yunaa nokhokhowola khonoja matuntumu ganaa ogwegwe khonojaa ninga mbe Matuunda atapoya palomwi nanoyo.”
3Yesu amowelaa, “Nkhokhoweela khapanga, khotopo muntu yunaa nowaa kho wami wa Matuunda, mbe akhalelwa kho mala ya owele.”
4Nikodemo amowolyaa, “Kekhowolekha mbi muntu yeyensi alelwe panaa awagaa mokolo? Mbi muntu nokhowolaa khwingela mondaa ya nyinya no kholelwa khanke?”
5Yesu amowelaa, “Nkhokhoweela khapanga, mbe muntu akhalelwa kho meje no kho Moye wa Matuunda, khotopo iikhale kho wami wa Matuunda. 6Muntu kholelwaa keontu khopuma khwa valeli vakwe, no muntu yunaa alelagwa khwa Moye wa Matuunda khowaa no wome wa kemoye. 7Okhakumye venaa nakhowelaga, okhopogiwaa olelwee mala ya owele. 8Iputa lekhoputa khopeta khwekwensi khonaa letogwile. Okhoitegela lolii lwakwe, ila okhamanya khonaa opumile ninga panaa okhopeta. Avyenee venaa ipwale khwa muntu yunaa alelwagwa kho Moye wa Matuunda.”
9Nikodemo amowolya, “Mbi ega gensi gakhokowolekha mbi?”
10Yesu amowelaa, “Ogwegwe ole molaangi kho nse ya Izilaeli. Mbi ega gensi okhagamanya? 11Nkhokoweela khapanga, osweswe khokovaweela ganaa khogamanyile no khopaala ganaa khogawine, ila onywenywe mokhosiita egoo ganaa alekhwagawona no khovaweela. 12Mbe okhakhongoomba panaa nkhokhoweela mpola ja paliwelelo, olangomba mbi, mbe ndakhoweela mpola ja pachanya pa Matuunda? 13Khotopo muntu yunaa aleatantaa khopeta khochanya pa Matuunda, ila topo Mwana wa Muntu, yunaa atelemokha khopuma khochanya khwa Matuunda.”
14“Kete venaa Musa aleapagikhaa njokha ya shaba no khomonyanyola pachanya pitenengwa, avivyoo no Mwana wa Muntu venaa khopogiwa apagikwe khochanya pa mosalaba, 15ili kela muntu yunaa khomogombaa awee no opanga wa nsiko jensi. 16Gechoo Matuunda aleavatogwa vantu va liwelelo lensi ninga amopumya Mwanaakwe aleemwi, ili kela muntu yunaa khomogombaa akhapwele, ila awee no opanga wa nsiko jensi. 17Kho nguno Matuunda aleakhamotoma Mwanaakwe paliwelo ili avatengemeke vantu, ila aleamotomaa ili avapon'ye vantu va paliwelelo khopuma kho mabe.
18“Muntu yeyensi yunaa khomogombaa no khwisowelela Mwana wa Matuunda akhakhotengemekhwa, ila yunaa akhakhomogombaa khatengemekhwa, kho nguno aleakhamogomba Mwana aleemwi wa Matuunda. 19Itengemekho yenee ayenee eye, welo wijaga kho vantu va paliwelelo, ila vantu vakhotogwa kiiti khokela welo, kho nguno manoji gawe a mabe. 20Kela muntu yunaa khonojaa mabe khosimbila welo, akhakhwijaa kho welo, kho nguno akhatogwa manoji gakwe giigele. 21Ila muntu yeyensi yunaa khonojaa ganaa gakhapanga, khwijaa kho welo, ili egoo ganaa aganogajaa giigele kete Matuunda avapelaga olaala wa khonojaa.”
Yohana Mobatiji khopalela mpola ja Yesu
22Panaa alegakela egoo, Yesu palomwi ne vahemba vakwe alevapeta kho ihala ikolo la Yudea, no okhoo Yesu aleikhalaa palomwi ne vahemba vakwe, no okhoo angile khobatijaa vantu. 23Avivyoo Yohana alekhobatijaa vantu okhoo Ainoni pepi ne ihala la Salemu, kho nguno okhoo angile khole meje minki. Vantu vinki angile vakhomopetela kho nguno ya khobatijwa. 24Kho ituungo eloo Yohana angile akhale akhatungwa mo khandulunge.
25Nsiko yemwi vamoonga va vahemba va Yohana no Moyahudi yomwi angile vakhwisitelya kho mpola ya khokalawa ili khonojwaa khomokumbekha Matuunda. 26Apenee vahemba evoo alevamopetela Yohana no khomoweela, “Molaangi, muntu oyoo yunaa angile alepalomwi nagwe kho nkelo ya lweje ya Yolodani, oyoo yunaa alewakhoweela mpola jenaa ojemanyile khomougela omwene, seji nanoyo khobatijaa vantu, ne kela muntu khomopetelaa.” 27Yohana avawelaa, “Khotopo muntu yunaa nokhowola khonojaa kento chechensi, ila topo mbe apelagwa no Matuunda. 28Onywenywe venee momanyile kete alenavaweela, ‘Onenee akha Kilisto, ila natomagwaa khomolongolaa.’ 29Mwenga wa kekhiima amwenee wakwe mwenga wa kegwisha. Molaasi yunaa khomosindekelya mwenga wa kegwisha yunaa apwale pepi nanoyo no khotegelelya ganaa khopalaa, khosekelela modugo panaa khotegelaa lolii lwakwe. Kho nguno eye nsekho yaane yadugamaga. 30Omwene khopogiwa awee molaala mokolo, nane nendelele khowaa modo.”
Oyoo yunaa ijile khopuma khochanya khwa Matuunda a molaala khokela vensi
31Omwenee yunaa asagolagwa khopuma khochanya khwa Matuunda a molaala khokela yeyensi oyoo. Muntu wa paliwelelo khopalaa ganaa agamanyile ga epa paliwelelo, ila Yesu yunaa khopuma khwa Matuunda amwenee khwimelela gensi kho lwande yeyensi eyoo. 32Omwenee khotowelaa egoo ganaa aleagawona no khogategeela pachanya khwa Matuunda, ila khotopo muntu yunaa khogombaa mpola jakwe. 33Ila muntu yeyensi yunaa khogombaa okhombe wakwe, kholagelaa kete mpola ja Matuunda ajenee ja khapanga. 34Yunaa aleatomagwa no Matuunda khopala mpola ja Matuunda topo, kho nguno Matuunda amopelaga Moye wakwe kho winki. 35Daada amotogwile Mwana, nanoyo amopelaga vento vyensi vewee momekhono jakwe. 36Muntu yeyensi yunaa khomogombaa Mwana atite opanga wa nsiko jensi, ila muntu yeyensi yunaa akhakhomogombaa Mwana atokhola opanga wa nsiko jensi, ne gechoo valalekha vakhakembela kesila cha Matuunda.
လက္ရွိေရြးခ်ယ္ထားမွု
Yohana 3: NTKIBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Kimbu @The Word for The World International and Kimbu Language translation, 2025. All rights reserved.