यहुन्ना 19

1तब पिलातसले येशुजन लाङस्यु कोर्ला लाहौ आपरिङवाङ। 2ओटन सिपाइयाङै ज़ुल मुकुट लएस्यु ओलं ङएट रांजाटौ, ओलजन धुङल्याइन्या रङला क्वा रांक्वाटौ, 3ओटन येशु ल्योङ रा:स्यु ऐराढोव, “जडौ, यहूदीयाङल रय!” ओटन नकाङै ओलजन रालप्ट्याहौ। 4फरि पाखाल पलिईस्यु पिलातसले नकाङजन ऐआढोवाङ, “खिम्चिते, ङा इकाजन जेल्योङ पाखाल ङाहोनज्याङु, ओटन जेजन आका पानस्याऔ ङारोअङु, इकाल नैज दोस माडोटङदी।” 5तब ज़ुल मुकुट सनर धुङल्या#19:5 धुङल्या रङ=बैजनी रङ रङला क्वा क्वाएसिन्या येशु पाखाल रांऔ, ओटन पिलातसले नकाङजन ऐआढोवाङ, “खिम्चिते, ईका रुजन!”

6जब मुख्या पुजाउरोयाङ सनर पाल्याङै येशुजन रांरङौ, नकाङ ऐलेस्यु चिचच्याहौ तअसिवाङ, “नकाजन क्रूसतं केपचिते, नकाजन क्रूसतं केपचिते, पिलातसले ऐलेऊ, ङा इकाल नैज दोस माडोटङदी!” 7यहूदी अढिकारीयाङै पिलातसजन जबाक रांयोव, “गेमि तोलोअ ब्यबस्थाला नियाम लेया, ओटन नका ब्यबस्थाला अनुसार ईका सिऊजपरिया, दानाङभन्या इकाले ओलझन्जै परमेस्वरलं ज़ा ऐलेन्या जिग्राइ ढाज्याया।”#लेवी २४:१६

8ईका छेन थएस्यु पिलातस झन्जै छ्याटौ। 9ओटन फरि येशुजन महल भितरलं लाङस्यु आगिनौ, “नङ काङा हो?” तर येशुले नकाजन नैज जबाक मायोडा। 10ऐताइस्यु पिलातसले ओलजन ऐआढोव, “नैति नङ ङासकाए माछ्योङना? नङजन राइन्या अढिकार ङासं लेया, ओटन नङजन क्रूसतं केपन्या अढिकार बै ङासकाए लेया ऐलेन्या नङजन थाह मालेऊ?”

11येशुले जबाक आयोव, “नङजन परमेस्वरङन मायासिकन ङाजन नमी नैज अढिकार माताइन्यालेऊ। नैताइस्यु ङाजन नकुईत सुम्पिन्या अझै भ्याई पापल दोसी लेया।” 12नकाल छिन्ट पिलातसले येशुजन राइन्या भ्याई जोर आढोव। तर यहूदी अढिकारीयाङ ऐलेस्यु कलिऊवाङ, “यदि नङ ईका रुजन रांनकन नङ कैसरलं न्हाए माङडी। नाले ओलजै ङा रय ज्या ऐलेस्यु जिग्राइ ढास्यु कैसरलं बिरोदत च्याङज्याया।”

13पिलातसले ईका छेन थएस्यु येशुजन पाखाल आहोनौ, ओटन ओ “लुङल पाटी” ऐढासिन्या पोल (जोजन हिब्रूङन गब्बथा ऐढासिया) निया ढान्या पोत चुङौ। 14नका समाय निस्तार-पर्बल तयारील दिन लेऊ। लाअका छ्योअ बारं बजिस्यु लेऊ। पिलातसले यहूदी अढिकारीयाङजन आढोवाङ, “खिम्चिते, जे रय!”

15तर नकाङ ऐलेस्यु चिचच्याइवाङ, “नाजन सएचिते, सएचिते, लाङस्यु क्रूसतं केपचिते!” पिलातसले नकाङजन आगिन्वाङ, “नैति ङा जे रयजन क्रूसतं केपन्या।” मुख्या पुजाउरोयाङै जबाक रांयोव, “कैसर बाहेक अपुर काङ्काई गे रय माल्दी।” 16तब नकाले येशुजन क्रूसतं केपौ नाल्ट नकाङल कुईत आसुम्पिऊ। ओटन सिपाइयाङै येशुल जिम्मा राहोनौ।

येशुजन क्रूसतं राकेपौ

मत्ती २७:३२-४४; मर्कुस १५:२१-३२; लूका २३:२६-४३

17येशुले आक्रूस ओलजै वुरस्यु खप्पऱ्या ऐढासिन्या पोल हिनौ, जोजन हिब्रूङन गलगथा ऐढासिया। 18नल नकाङै येशुजन क्रूसतं राकेपौ ओटन ओलसं अपुर नेंलोअ रुनेंजन बै राकेपौ, तोलोअजन आङन सनर छुट्टैजन हुङन ओटन खार्ल येशुजन। 19पिलातसले तोलोअ दोस पाटी बै आसरौ, ओटन क्रूसतं राचप्काहौ। नकाल ईकाइ सरसिज्याऔ, “नासरतला येशु, यहूदीयाङल रय।” 20आब तबर यहूदीयाङै ईका दोस-पाटी परिवाङ, दानाङभन्या येशुजन क्रूसतं राकेपन्या पो सहरल नेराकै लेऊ। ईका हिब्रू, ल्याटिन सनर ग्रीक छिन्ङन सरसिस्यु लेऊ। 21यहूदी अढिकारीयाङल मुख्या पुजाउरोयाङै पिलातसजन ऐराढोव, “यहूदीयाङल रय, ऐलेन्या माङडी तर ईकाले ङा यहूदीयाङल रय ज्या ऐलेऊ लेस्यु सरते।” 22पिलातसले जबाक आयोवाङ, “ङा जो ङासरङु, ओ सरदुङा।”

23जब सिपाइयाङै येशुजन क्रूसतं राकेपौ, तब नकाङै येशुल क्वा हिनस्यु सोगलै सिपाइजन त-त बठा ताइन्या हिसापत चार भाअ रांजाटौ। आमि बाहेऱ्या क्वा बै राहोनौ, तर ना क्वा मारुफ्सिन्या हरङन वान्ङ समन रअसिन्या थानजै लेऊ। 24ईका कारनले नकाङै रारांल ऐलेवाङ, “ईका क्वा चिइन्या माङडी, बरु गे इकाजन चिठ्ठा झोअया ओटन काङ्काजन परिऊ।” पबित्रशास्त्रलं सरसिन्या बचन पुरा ग्याताइत्या ऐलेस्यु जै ऐताहौ। “तब नकाङै बाहेऱ्या ङा क्वा रारांल चिठ्ठा राझोकौ।”#भजनसङ्ग्रह २२:१८

25ओटन नका पाल्याङै नैताइन्या काम राढाज्याऔक, येशुल क्रूसल नेराक आअमा, सनर आअमाल बैना, क्लोपासलं मेएमा मरियम सनर मरियम मग्दलिनीने च्याङस्यु ब्याएज्यावाङ। 26जब येशुले आअमा सनर ओलं मया आढान्या सिइ नेराकै नेंच्याङज्यान्या आरङौने, तब येशुले आअमाजन ऐआढोव, “ऐ ज़ामा, खिम्ते, न ज़ा!” 27तब नका सिइजन बै येशुले ऐआढोव, “खिम्ते, नाअमा!” नवाए बेलाकै नका सिइले मरियमजन आझिमल आराइनाङौ।

येशुल सिइकाल

मत्ती २७:४५-५६; मर्कुस १५:३३-४१; लूका २३:४४-४९

28येशुले आब सोगलै छेन खेम्दा ऐलेन्या सनस्यु पबित्रशास्त्र पुरा ग्याताइत्या ऐलेऊ, “ङा री ङाओइज्याङु।”#भजनसङ्ग्रह २२:१५; ६९:२१ 29ओक तोलोअ जाल तफाङ अङ्गुरल रस नाएसिज्याऔ। ओटन तोलोअ वारल#19:29 सिर्का=कान्या रस, स्पन्ज=रुवा, हिसप=वार टुप्पात रुवा पोअस्यु फाङताइज्यान्या कान्या रस येशुल याह्‌ल नकाङै राझोअस्योव। 30जब कान्या रस आओव, तब येशुले ऐलेऊ, “आब खेम्दा,” ओटन आङए बेनजाएस्यु आपरान आराहौ।#लूका २३:४६; मर्कुस १५:३७

येशुल कोखाल भालाले रारुपिन्या

31नका छिम्क तयारील दिन लेऊ। नैताइस्यु यहूदी अढिकारीयाङै शबाथत, (खास ईका सबाथल जो महत्वला लेऊ) सिन्याङ बुल क्रूसतं तालज्यारत्या ऐलेस्यु पिलातसजन बिन्ति रांढोव, ओटन नकाङल खङ कलाएस्यु नकाङल बुल ग्यालाङरत्या लेस्यु नीवाङ। 32तब पाल्याङ रा:स्यु ओलसं क्रूसतं केप्सिन्यानेलं खङ राकलाटौ, हादेए तोलोअल, ओलं छिन्ट छुट्टैल। 33जब नकाङ येशु ल्योङ रांवाङ, तर ओलं हादेए जै सिदा रैस, ऐलेस्यु रांरङौ, ओटन आखङ माकलाएरदी। 34तर पाल्याङ्ङन तोलोअले आकोखाल भालाले आघोचच्याहौ, ओटन ओचोएटै जी सनर री पलिहौ। 35जे बै बिस्वास ढाऔ ढुदुचिते ऐलेस्यु ईका रङन्याले गवाइ आयांन्या हो ओटन ओलं बयन सत्य लेया, ओटन सत्य छ्योङ्ङा ऐलेस्यु ओलं ऐसन्वा। 36“नकाल नैज रूई माकलादी” ऐलेन्या पबित्रशास्त्रला बचन पुरा ग्याताइत्या ऐलेस्यु ईका छेन ताइरा:औ।#प्रस्थान १२:४६; गन्ती ९:१२; भजनसङ्ग्रह ३४:२० 37ओटन फरि छुट्टै पन्डाल पबित्रशास्त्र पान्वा, “जोजन नकाङै घोचच्याइस्यु लेवाङ, नकाङै ओजन खिमन्या लेरा।”#जकरिया १२:१०; प्रकाश १:७

येशुजन रींनन्या काम

मत्ती २७:५७-६१; मर्कुस १५:४२-४७; लूका २३:५०-५६

38नकाल छिन्ट अरिमाथियाला योसेफ, जो यहूदीयाङल छ्याइले गर्दा गोप्यल याएज येशुल सिइ लेऊ, नकाले पिलातसजन येशुल सिन्या बुल लाङौ ग्याडोटङत्या ऐलेस्यु बिन्ति आढोव, पिलातसले अनुमति योंवापाइना। तब नकाले रा:स्यु येशुल सिन्या बुल आलाङौ। 39ओटन हादेए आल्योङ रिउल रांन्या निकोदेमस बै छ्योअ तिस किलो मुर्र#19:39 मुर्र=सेन्ट सनर एलवा#19:39 एलवा=घिऊकुमारी भामसिन्या द्रब्य#19:39 द्रब्य=चान्या स्युउ नमन्या तीइ हिनस्यु नल रांऔ।#यहुन्ना ३:१-२ 40ऐलेस्युई येशुल बुल यहूदीयाङल चलन अनुसार रींनन्या कामल नाल्ट आस्युउनमन्या द्रब्यस गजनाल#19:40 गजनाल क्वा=सुति, मलमल क्वात रांपोकौ। 41ओलजन क्रूसतं राकेपन्या पोल तोलोअ बारी लेऊ। नका बारील खकैज काङ्काईजन रांमानाएन्या तोलोअ छार ऊई लेऊ। 42दानाङभन्या नाछिम्क यहूदीयाङल तयारील दिन लेऊ, ओटन ना ऊई बै नेराकै लेऊ, ओटन नकाङै येशुजन नकाई ऊईल रांनाटौ।

လက္ရွိေရြးခ်ယ္ထားမွု

यहुन्ना 19: NTSKm25

အေရာင္မွတ္ခ်က္

မၽွေဝရန္

ကူးယူ