यहुन्ना 13
13
येशुले आसिइयाङलं खङ आहुरौ
1निस्तार-पर्बल हादेए ईका सङ्सारलन बिदा ताइस्यु बौल्योङ हिनन्या ङा बेला तापरादा ऐलेन्या येशुले आसनौ, ओटन सङ्सारलं आमि भरियाङजन मया ढास्यु परमेस्वरले नकाङजन आखिरी समन मया आढोवाङ।
2ओईका बेला येशु सनर आ सिइयाङ ज्याऔ बेला दियाबलसले सिमोनल आज़ा यहूदा इस्करियोतलं आयिङल कोलोकौ परिङन्या बिचार हादेएज आझोअस्यौ। 3बौले सोगलै ओलं कुईत यांस्यु लेया, ओटन ओलं परमेस्वरङन रांऔ हो, ओटन परमेस्वर लेऊदेए ङाहिनज्याङु ऐलेन्या छेन येशुले सनस्युलेऊ। 4ओटन येशु ज्यास्यु सोव, ओटन बाहेऱ्या क्वा तपोईदेए नाएस्यु, तोलोअ ताऊल्या आकम्बरल आमलिङौ। 5तब ओले पराटल री आटुहौ, ओटन आसिइयाङलं खङ हुरस्याऔ तअसिऊ, ओलं आमलिङसिन्या ताऊल्याले नकाङल खङ सिटौ तअसिऊ। 6जब ओलं सिमोन पत्रुस ल्योङ रांऔ, नकाले ओलजन ऐआढोव, “औ प्रभु, नङ नैति ङा खङ हुरस्याङना?”
7येशुले नकाजन जबाक आयोव, “ङा नैति ङाढाज्याङु नङ आकअ मासनन्दी तचिइ छिन्ट बुजिना।” 8पत्रुसले ओलजन ऐआढोव, “नङ ङा खङ खकै हुरन्यामालेन्दी।” येशुले नकाजन जबाक आयोव, “ङा माहुरनकन नङ ङासिइ माताइदुन्दी।” 9सिमोन पत्रुसले ओलजन ऐआढोव, “औ प्रभु, ङाखङ याएज माङडी, तर ङाकुई सनर ङए समेत हुरस्याङते।” 10येशुले नकाजन ऐआढोव, “हुरसिन्या रुजन आखङ बाहेक अपुर नैज हुरस्यान्या माताइदी, ना चोखाइ लेया। ओटन जे चोखा लेच्या, तर सोगलै ता माङडी।” 11दानाङभन्या येशुले बिस्वासघाट ढान्याजन शईस्युआनाटौ। नैताइस्यु ओले ऐलेऊ, “जे सोगलै चोखा माल्चिदी।” 12येशुले नकाङल खङ हुरस्यौरा पाइना बाहेऱ्या क्वा क्वाएसिस्यु चुङौ, ओटन नकाङजन ऐआढोवाङ, “ङा जे नाल्ट नैङाढोङु नैति जे जेसन्चिऊ?#लूका २२:२७ 13जे ङाजन ‘गुरु सनर प्रभु’ ऐढाङच्या, आका जे ठिकै जेल्चिऊ, दानाङभन्या ङा ओइ ज्या। 14जोमनलेस्यु ङा जे प्रभु सनर जे गुरु ताइस्यु बै ङा जे खङ ङाहूरस्याचिऊ आब जे बै तोलोअले-छुट्टैल खङ हुरौपरिया, 15दानाङभन्या ङा जेजन तोलोअ उदाहरन ङायाचिऊ, ओटन जो ङा जे नाल्ट ङाढोङु, जे बै नाइज ढोचिते। 16ङा जेजन मछ्यु ऐढाच्या, सेवाऱ्या आ साहूतन घिन्या माताइदी, ओटन थाई लाङन्या थाई परिङन्यातन घिन्या माताइदी।#मत्ती १०:२४; लूका ६:४०; यहुन्ना १५:२० 17यदि जे सत्य छेन सनच्योकन सनर ना ढोच्योकन जे बअचान्या ताइच्या।”
18“ङा जे सोगलैल बारेल ङापानज्याङु माङडी, ङा जोजन ङाछेल्ङु नाजन ङा ऐशईङा। तर पबित्रशास्त्र पुरा ग्याताइत्या लेस्यु ईका ताहौ, कि ‘ङामिइज भरेई कैन्याले ङाजन लाट्ट आराहौ।’”#भजनसङ्ग्रह ४१:९ 19“ऐआताहौ हादेए आकैज ङा जेजन ऐढाच्या, ताकि जब नैताइरा, ङा ओइ जै ज्या ऐलेस्यु जेजन बिस्वास ग्याताइत्या।#यहुन्ना १४:२९ 20मछ्यु ङा जेजन ऐढाच्या, ‘जोजन ङा परिङ्ङ, ओजन ग्रहन ढान्याले ङाजन ग्रहन ढाङवा, ओटन ङाजन ग्रहन ढान्याले ङाजन परिङन्याजन ग्रहन ढोवा’।”#मत्ती १०:४०; मर्कुस ९:३७; लूका ९:४८; १०:१६
येशुजन बिस्वासघाट ढान्याल बारेल भबिस्यबानी
मत्ती २६:२०-२५; मर्कुस १४:१७-२१; लूका २२:२१-२३
21आका छेन आपानौ छिन्ट येशुल यिङ छटपट ताहौ ओटन ओले बयन यांस्यु ऐलेऊ, “मछ्यु ङा जेजन ऐढाच्या, जेमध्यलन तोलोअले ङाजन शत्तुरयाङजन कोलोकौ परिङौरा।” 22येशुले काङ्काल बारेल छ्योङज्याऔ ऐलेस्यु रामाखटाइदुऊ ओटन सिइयाङै तोलोअले छुट्टैजन खिम्सिवाङ। 23ओलं आ सिइयाङ मध्य येशुले प्रेम आढान्या सिइआ लेऊदेए घेएसिज्याऔ। 24तब सिमोन पत्रुसले यहुन्नाजन सयान ढास्यु आगिनौ, “येशुले ईका काङ्काल बारेल छ्योङज्याऔ नाजन गिन्ते वन?” 25यहुन्नाले आघेएसिज्याऔकै येशुजन आगिनौ, “प्रभु, ना काङ्का?” 26येशुले जबाक आयोव, “जोजन ङा भरेईल कलाए छोएस्यु योंङ, ना नकाई ज्या।” तब ओले भरेईल कलाए आछोटौ, ओटन हाएस्यु ना सिमोनल ज़ा यहूदा इस्करियोतजन आयोव। 27भरेईल कलाए आचिनौ छिन्ट सैतान नालं भितरलं पसिऊ। तब येशुले ऐआढोव, “नङजन जो ढान्या ताइज्याऔ, ना परेए ढोते।” 28तर येशुले दानाङ नाजन ऐढोव लेस्यु, ज्योङा लेस्यु चुङज्यान्याङ काङ्काईले बै माबुजिदुरा। 29दानाङभन्या काङ्का काङ्काङै ईका रायिङौ, कि यहूदास पैसालं हुइ लिज्याऔ, ओटन येशुले नाजन पर्बल नाल्ट चाहिन्या समान ग्यालङौत्या, अथाबा नकाले गरिबयाङजन कोबाअ ग्यायौरत्या ऐलेऊ। 30तब भरेईल कलाए चिन्वापाइनाई यहूदा इस्करियोत ओचोएटै पाखादेए पलिहौ नवाए बेला रिउ ताइस्यु लेऊ।
येशु पत्रुस आमाभनन्या बारेल भबिस्यबानी
मत्ती २६:३१-३५; मर्कुस १४:२७-३१; लूका २२:३१-३४
छार आग्या
31जब यहूदा पाखादेए हिनौ तब येशुले ऐलेऊ, आब ङा रुल ज़ा महिमित ताइस्यु लेङा, ओटन परमेस्वर ङात महिमित ताइस्यु लेया। 32यदि परमेस्वर ज़ात महिमित ताइस्यु लेकन परमेस्वरले ओलझन्जै महिमित जाएवा, ओटन ओचोएटै रुल ज़ात थन्वा। 33“ऐ ङा लुलल्याङ, ङा तचिइ बेला समन जेसै लिज्याङा! ओटन जोमनलेस्यु ङा यहूदी अढिकारीयाङजन ङापानस्योङवाङ, आब ङा जेजन बै पानस्याच्या, ‘जोङ ङा हिनङ, नङ जे रांऔ माढुदुचिदी नैताइस्यु जे ङाजन रोंकङच्या।’”#यहुन्ना ७:३४ 34“नैताइस्यु ङा जेजन तोलोअ छार आग्या यांच्या जे तोलोअले-तोलोअजन प्रेम ढोचिते। जेजन ङा जोमनलेस्यु प्रेम ङाढाचिऊ, जे बै तोलोअले-छुट्टैजन नैलेस्युई प्रेम ढोचिते।#यहुन्ना १५:१२-१७; १यहुन्ना ३:२३; २यहुन्ना ५ 35यदि जे तोलोअले-छुट्टैजन प्रेम ढोच्योकन, इकातन्जै सोगलै रुयाङै जेजन ङा सिइयाङ लेस्यु शईन्यालेचिरा।”
पत्रुसले आमामानिन्या बारेल येशुल भबिस्यबानी
36सिमोन पत्रुसले येशुजन ऐआढोव, “औ प्रभु नङ कान्देए नहिनज्यानु?” येशुले जबाक आयोव, “ङा जोदेए ङाहिनज्याङु, जे आकअ ङाजन पछ्याहौ माढुदुचिदी, तर छिन्ट जे ङाजन पछ्याइन्या लेच्या।” 37पत्रुसले ओलजन ऐआढोव, “औ प्रभु, ङा दानाङ नङजन पछ्याहौ माढुदुङ? न नाल्ट ङा ङा परान बै योंङा।” 38येशुले जबाक आयोव, “नैति नङ नपरान ङा नाल्ट योंना? मछ्यु ङा नङजन ऐढाना, नङ ङाजन तिन पाला इन्कार नमाढाऔ समन भाल्या कोन्यामाल्दी।”
လက္ရွိေရြးခ်ယ္ထားမွု
यहुन्ना 13: NTSKm25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament Books in Sheshi Kham Language ©The Word for the World International and Sheshi Kham Translation Project, Nepal, 2025