Yohana 2

Yeisu la nuwna shnado kwo la zè anamnuwna

1N nyipyei taayii, a pa amwula n Kana dna n Gəlili. Yeisu əya ɓə nyi ń ɓo, 2a ɓə kwu amwula ye pa Yeisu ɓədo n əwo amwutuyii ce. 3She anamnuwna ɓə kwu zo, Yeisu əya wa gna wo, “Anamnuwna kwu ɓa zo.”

4Yeisu wa dnaɓəgbe, “Nyikwoza, knyiyi nu zhni hoi la mi dna n ɓəye a? Əmi əsa to si kpa m.”

5Əwo əya wa gna atnutnuyi, “Fye zhni ɓəhoɓəhoi n wa gna fye.”

6Akwuta-nyikwnu nuwnanya ngwnu-tnanyi ɓə zhi ń wo vyivyiwyi; dəhodəhoi kwoi shi agəluwa shiiba kwoi lo shiita, ado ń Ayahudiyi zhniapma ncei ntu n kwnunu anyazhna ɓo.

7Yeisu wa gna atnutnuyi, “Fye nu anyikwnu ye n nuwnai” Ntulonu ɓa kwu anyikwnu yi nu knaaknà.

8Nlonu wa gna ɓa, “Nsaiye fye tò kwo fya lo awyefna tukwoda ncei.”

Ɓa kwo tò ɓa lo wo ncei, 9nlonu awyefna tukwoda wa tó nuwna yi wo n kwo ɓə la shnado kwo la zè anamnuwna nyi. Wo to ɓə kpe aba əye n kwo ɓə gbmi m, kwo shikwonyi atnutnuyi ń ɓa ɓə tó nuwna nyi, ɓa ɓə kpe aba əye n kwo ɓə gbmi. Nlonu wa yì mwulaɓa gnyi n gnagna, 10wa gna, “Zahozahoyi ga anamnuwna manai nu n abye, jesnu əsa n azhiɓeyi ɓá kwu sni n mwa, wa kpe ɓe n tnadayii; ama əho da ho la manai nu soshi nya nsaiye.”

11Ənya n Yeisu ɓə zhni ń Kana dna n Gəlili nyi, əkwo nu ɓə zhni əznù kpmisnui n kwo ɓə gbmi əwo latu wu; jesnu əwo amwutuyi ɓa kwu gaiciyaga fyi n wo.

12N dəye avnu, wa shnilo Kapanam n əwo əyai jesnu n azajei ɓədo n əwo amwutuyii. Ɓa kwu anyipyei ɓwa fyi n ɓo fyewyi.

Yeisu nya agnyikwognyiyi ya n Dagayipwuwa ashilagyí

13She Ayahudiyi Gnanaznu awyefna əsa ɓə la wo vyivyiwyi, Yeisu wa gwnulo Urishelima. 14Dna n Dagayipwuwa ashilagyí wa gye aza fyi ɓai kwnu anakwo, aknyi, n alukpei, jesnu azaje n sase kpe n agyiwye shnayí atebwul. 15Ntulonu wa pmyi knalufnyi n awnui, wa nya aza ya vnyanya n Dagayipwuwa ashilagyí, aknyi, n anakwoi; waa agyiwye zhnana shnayí gnamyi jesnu wa kwu əɓa atebwul knyianyikwnu. 16Wa gna aza yi n ɓa ɓə kwnú alukpe nyi, “Fye kwnuya ń ya! Fye to zè əmi Dada pwuwa, agnyikwognyi aba m!” 17Əwo amwutuyi ɓa pa nge a ncei kafyilo: “Wyenyi ntu n əho pwuwa ɓo, əkwo nu ɓa gyi mi tukwo.”

18Ayahudiyi ɓa dna wo ɓəgbe, “Knyi əznùi nu n ho ɓa wu yi, kwa wu əho ikwo n aɓo ye vnyanya n ho zhni nyi a?”

19Yeisu wa dna ɓa ɓəgbe, “Mi ɓaa Dagayipwuwa ye myiya, ma mi kwo jesnu dna n anyipyei ngwnu-ata.”

20Ɓa dnaɓəgbe, “Kwo ɓə lá aye shinyi-ceitnanyi nu a mi Dagayipwuwa ye, honyi gna ho ɓa mi kwo dna ń anyipyei ngwnu-ata a?” 21Ama Dagayipwuwa n wo ɓə da əkwo ɓo nyi, əwo nayi nu ɓəi. 22Shi a ɓə la wo laka n əfyi, əwo amwutuyi ɓa pa əɓo ɓo n wo ɓəə kwu da. Nlonu ɓa kwu gaiciyaga n nyakagyigyiyi n aɓədagbmai ń Yeisu ɓəə kwu da nyi.

23Woi ye dna n Urishelima n Gnanaznu Awyefna əsa, bəgyé ɓa gye aznù n wo ɓə gnyi woi zhni nyi, ɓa kwu gaiciyaga fyi n əwo əye. 24Ama Yeisu to ɓə n əwohni kpema n ɓa m, ntuge wo ɓə kpe aza əye vnyanya. 25Wo to ɓə n zanyikwoci dəhodəhoi ɓəgbmi apmai m, ntuge wo ɓə kpe ənya əye n kwo ɓə dna n zahozahoyi.

လက္ရွိေရြးခ်ယ္ထားမွု

Yohana 2: OGNB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi

Biblica® Open Gbagyi Contemporary Bible™, New Testament

‌

“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.

“Biblica” is a trademark registered in the United States Patent and Trademark Office by Biblica, Inc. Used with permission.

‌

See promoVersionInfo in metadata.xml for Creative Commons license.

Biblica® Open Gbagyi Nyizeyenya Baibwulu: Shekwoyi Ɓədagbma အေၾကာင္းကို ပို၍ သင္ယူပါ။