Matayo 26
26
Mupango va kumdocha Yesu
Maliko 14.1-2; Luka 22.1,2; Yohani 11.45-53
1Yesu peamalile kulonga ago gonda, akavalongile vachulila vake. 2“Mwichela kuva pefichumba figono fivili kuvecha na lihungu lya pasaka, na Mwana va Munu daihumichwa neke agudichwe pakipindilihicho.”
3Chipindi icho vatekechi vakomi na vavaha va malagilicho vakatang'ine pamwi palidamwa lya mtekechi mkomi, litawa lyake Kayafa. 4Vakagitile mupango va kumbata Yesu kwa lupwepo neke vamdoche. 5Ila vakalamule kuva lukani ugu libihile kugitwa chipindi kya lihungu, kuvecha lihumile ndewo mugati lya vanu.
Yesu isukulilwa mafuta ukoya ku Betania
Maliko 14.3-9; Yohani 12.1-8
6Yesu peakali ku Betania, kukaye lya Simoni yeakali itamika lukalavilo. 7Maye yumwi yeakali na libochobocho lya yeigelanichwe kwa liganga lyelikemelwa alabasita yeikali na manung'unilo manofu lya sendi ngomi, akamuheleliye pala pamesa peakali ikalie kuliya kyakula, akamsukulila ago manung'ulilo pamtuwe. 8Vachulila vake pevagawene ago vakavipile, vakalonga, “Kwa liki tuyagicha sendi ndeni? 9Mafuta aga ngagaguchilwe kwa sendi ngomi na vahangala ngavagavilwe sendi icho.”
10Yesu akachelile mahocho gyawo, akavalongile wuli mukumnyengema maye uyu? Mwene anigitile lukani lunofu. 11Vahangala vagehe pamwi na nyeye, ila nene sendivecha pamwi na nyenye figono fyonda. 12Uyu maye anibakile mafuta mvili vangu, neke akuniandalisa kwa kusilwa. 13Ndikuvalongela ndakyene, peponda pa inyi iyi daidalikwa njowo nofu, lukani ulu lyeagitile maye uyu dalilongwa kwa kumuwuwika mwene.
Yuda ikwidikila kumkana Yesu
Maliko 14.10-11; Luka 22.3-6
14Kangi Yuda Isikalioti yumwi va vala kumi na vavili, akahelela kwa vatekechi vakomi, 15akavalongela, “Damukunigavila kinu liki ngita ndikuvaletela Yesu?” Vakamvalalie fipande selasini fya sendi, 16Na kuhuma chipindi icho Yuda akali ikela ng'asi lya kumkana Yesu.
Yesu iliya kyakuliya kya pasaka pamwi na vachulila vake
Maliko 14.12-21; Luka 22.7-13,21-23; Yohani 13.21-30
17Kigono kya kwanja peyave lihungu lya mibumunda seivikiwe amila, vachulila vakamueleliye Yesu vakamuhuchile, “Wisaka tukuvikile kwiya kyakula kya pasaka?” 18Mwene akavahigile, “Muhelele kumwani kwa munu tunga, mukamlongele, ‘Muwulanichi alongile, chipindi kifikile kwaveve ndilia pasaka pamwi na vachulila vangu.’” 19Vachulila vakagitile ngita Yesu peavalagiliche, vakavikile Pasaka.
20Peifikile palumie Yesu pamwi na vachulila vake kyumi na vavili vakakalile panyi kuliya kyakula. 21Pekavali viliya, Yesu akalonga, “Ndikuvalongela ndakyene, yumwi venu dakundikana.” 22Vachulila vakasogwime hilo, vakavangile kuhucha yumwi yumwi, “Mtwa! Wuli, nde nene?” 23Yesu akahigile, “Yeachwika libumunda mu libakuli kimwi na nene nde yeakunikana. 24Ndakyene, Mwana va Munu ihelela sake ngita masimbo ga Nguluvi pegasimbilwe, ila dailava munu yula yeakumkana Mwana va Munu! Ngaivecha ngiba kwa munu uyo ngasebabilwe.”
25Yuda, yeakasakile kumkana, akamuhucha “Muwulanichi! Nde nene?” Yesu akavahigile, “Veve valonga.”
Kyakula kya Mtwa
Maliko 14.22-26; Luka 22.14-20; Vakolindo 11.23-25
26Pevakali viliya, Yesu akanyamula libumunda, akamuhongecha Nguluvi, akaudumula, akavagavila vachulila vake akalonga, “Munyamule muliye ugu nde mvili vangu.”
27Baho, akanyamula kikombe kya difayi, akahongecha Nguluvi, akavagavile akilonga, “Munywelele vonda mu kikombe iki, 28kwakuva iyi nde danda lyangu lya yeiwonesa liangano lyangu nde ndakyene, kwakuva lya vanu volofu neke kuvahechela sambi chawo. 29Ndikuvalongela sendinyuwa kangi difai lya msabibu mbaka kigono kila pendinyuwa difai miya pamwi na nyenye mu Ung'achale va Daada vangu.”
30Pevamalile kusomola msambo, vakahegile vakahele pakidunda kya Misaituni.
Yesu ilagula kuva Peteli akumkana
Maliko 14.27-31; Luka 22.31-34; Yohani 13.36-38
31Baho, Yesu akavalongela, “Neng'uli palumie nyenye vonda munyila na kundileka kwakuva mumasimbo gasimbile,
‘Ndikumtova mkwamila,
na lipinga lya kondolo liyaganika.’
32Ila pendichulubuka ndikuvalongola ku Galilaya.”
33Peteli akamlongela Yesu, “Ata ngita vonda vakuleka ila nene sendikuleka.”
34Yesu akamlongiye Peteli, “Ndakyene ndikulongela, neng'uli palumie peave livisi kuvikile, daukundikana mala chidatu.” 35Peteli akamlongela, “Ata ngita nding'ang'wa kufuwa pamwi na veve, sendikukukana ng'odo.” Vala vachulila vangi vonda vakalonga ndeni ndeni.
Yesu ukoya kumgunda mdodo lya Getisamane
Maliko 14.32-42; Luka 22.39-46
36Baho, Yesu akahelela pamwi na vachulila vake mumgunda mdodo va Gatesemane, akavalongela vachulila vake, “Mwikale baha, nene ndihelela pala kusuka.”
37Akavanyamula Peteli na vana vavili va Zebedayo, akavangile kuvecha na luswigimo na kugudaguda munumbula. 38Baho, akavalongela, “Ndigehe na luswigimo mkomi mu numbula ata pepi kufuwa. Mukale baha pamwi na nene, mubihile kuvasa.”
39Suwe, akahelela pautalo ludodo akaguwa lufuma, akafunya, “Daada vangu ubihile kunigita ndihingile mumagudo gegikwacha nondee, ila ibihile kuvecha ngita pendikeliye nene, ila peukeliye veve.”
40Peawuyile kwa vala vachulila, akavawene vavasile. Akamlongile Peteli, “Nde kulonga semuwesile ata kukala meho neke mukale na nene ata lisaa limwi? 41Mubihile kuvasa ila musuke neke mubihile kwingila mumagecho. Kwakuva Muhe usaka, ila mvili ndi msosovafu.”
42Akahelela kangi mala lya uvili, kufunya, “Veve Daada vangu, ikivecha seiwesekana ndibihile kugachumbila magudo aga makomi, suwe, ugite ngita peukela veve.” 43Peawuyile kangi, akavawene vavasile, kwakuva vakali na tulo.
44Suwe, akavaleka, akahelela kangi kufunya mala lya udatu kwa njowo chila chila. 45Baho, akavaheleliye vala vachulila, akavalongela, “Wuli, mwave mugona na kutulula? Mulole! Lisaa liyene ifikile, Mwana va Munu daihechwa kwa vanu vene sambi. 46Mulamwike, tuhelele. Mulolele! Ikwacha yula daakuniseduka.”
Yesu ibatwa
Maliko 14.43-50; Luka 22.47-53; Yohani 18.3-12
47Suwe, Yesu peyave ilonga navo, bahobaho akachile Yuda, yumwi va vala kyumi na vavili. Pamwi nave vakaachile vanu volofu vevanyamuwe mapanga na findonga yevalagilichwe na vatekechi vakomi na filongochi va Vayawudi. 48Yula yeasakile kumkana Yesu, akali avagavile suwe kimanyilo akilonga, “Yula dandikumuhungila kwa kumkumbatila, nde yumwene, mumbate.”
49Suwe, Yuda akamhegeleliye Yesu, akamlongiye, “Kamwene, Muwulanichi!” Baho akamkumbatila.
50Yesu akamlongela, “Mwato, gite kyeusaka kukigita.”
Suwe, vala vanu vakamuhegeliye, vakambatile Yesu na kumuwopa.
51Yumwi va vala vevakali pamwi na Yesu akakolonjola liwoko, akahomola limage lyake, akamtova msutu va Mtekechi Mkomi akamdumuwe lisigicha. 52“Baho, Yesu akamlongela, wise kimage kikomi kyako muhako vako.” “Kwakuva yeyonda yeitumila lipanga daifuwa kwa lipanga. 53Wuli, semuchela kuva ngandivesile kumsuka Daada vangu anitange na mwene bahobaho ngaaniletela mapinga kyumi na gavili vandumindumi vake? 54Ila ngita ndikigita ndeni, wuli masimbo ga Nguluvi ngatimilwe wuli, gyegilonga aga ing'ang'wa kugitwa?”
55Baho, Yesu akaulongela lila lipinga lya vanu, “Wuli, mwachile kunibata kwa limage likomi na findonga ngita nene ndi muhichi? Figono fyonda ndikali pakaye lya Nguluvi, ndikuvawulanicha, ila semukanibatile! 56Ila aga gyonda gagitilwe neke kila kyevasimbile vavichi mumasimbo gatimile.”
Baho vachulila vonda vakamleka, vakanyilile.
Yesu isindikwa pautalo lya lidamwa
Maliko 14.53-65; Luka 22.54-55,63-71; Yohani 18.13-14,19-24
57Baho, vanu avo vakambatile Yesu vakamsindike kukaye lya Kayafa, Mtekechi Mkomi, na ukoya Vawulanichi va malagilicho na filongochi va Vayawudi vakali vayilundese. 58Peteli akamfwatile kwa utali, akaingile mulidamo lwa kaye lya Mtekechi Mkomi pamwi na vadima neke vaveche kulola makani dagivecha.
59Baho, Vatekechi vakomi na vadamwa vonda vakasakile uswida va udesi neke vaveche kumdocha Yesu, 60ila sevapatile uswida vovonda, ata ndeni vakaachile vaswida volofu va udesi. Pambele vakaachile vaswida vavili, 61vakalonga, “Munu uyu akalongile, ‘Ndivecha kulitunyula Kaye lya Nguluvi na kulichenga kangi kwa figono fidatu.’”
62Mtekechi mkomi akaimile, akamuhucha Yesu, “Wuli, seuhiga kinu? Vanu ava vilonga liki kwa veve?” 63Ila Yesu akachika. Mtekechi mkomi akamlongela, “Ndikulapisa kwa Nguluvi yeagehe wumi, tulongele ngita veve nde Kilisito, Mwana va Nguluvi!”
64Yesu akamlongiye, “Veve ulongile! Ila ndikuvalongela, kuhuma nondee damukumulola Mwana va Munu ikalile lubali lwa ndewo lwa yula Mtwa mwene ludali, ikwacha mumafunde gya kuluhano.”
65Baho, Mtekechi mkomi akademula myenda gyake, akalonga, “Amligile Nguluvi! Vaswida va liki? Nondee mupulike maligo gake. 66Nyenye mwiwona wuli?” Vawo vakamuhigile, “Ing'ang'wa kufuwa!”
67Baho vakamfunyila mita kuwuso, vakamtova. Vangi vakali vakumtova mimande, 68vakalonga, “Veve Kilisito, lagule nondee, ani akutovile!”
Peteli akumkana Yesu
Maliko 14.66-72; Luka 22.56-62; Yohani 18.15-18,25-27
69Peteli akalili kwivala lyalukani lya lidamo. Suwe mnyigendwa yumwi va Mtekechi mkomi mkidala akamuheleliye, akalonga, “Veve ukali pamwi na Yesu va Galilaya.”
70Peteli akakanile pautalo lya vonda akilonga, “Sendikichela uywanga liki.” 71Peakali ihuma pa mlyangilo, mchulila yungi mkidala akamwene, akavalongela vala vevali pala, “Munu uyu akali pamwi na Yesu va Nazaleti.”
72Peteli akakanile kangi kwa kulapa, “Sendikumchela munu uyu.”
73Pambeli ludodo, vanu vevakali pala vakamuheleliye Peteli vakamlongela, “Ndakyene veve nde yumwi vawo, kwakuva ata kuywanga kwako kukuwonesa.”
74Baho Peteli akavangile kwikotola na kulapa akilonga, “Sendikumchela munu uyo!” Bahobaho livisi likavikile. 75Peteli akawuwike makani gyealongilwe na Yesu, “Peave livisi kwivika, ukundikana mala chidatu.” Suwe, akahega kwivala na akavemba kwa kukivilicha.
လက္ရွိေရြးခ်ယ္ထားမွု
Matayo 26: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.