Matayo 17
17
Yesu iseduka wuso
Maliko 9.2-13; Luka 9.28-36
1Pefichumbile figono sita, Yesu akavanyamula Peteli na Yakobo na Yohani lukolo vake Yakobo na kuvasindika pakyanya lya kidunda kitali ukoya vakali weka hela. 2Ukoya, Yesu akaseduka wuso pautalo lyao, wuso vake ukang'alile ngita lichua na myenda gyake ikali ivalafu ngita welu. 3Baho, vachulila vadatu vakavawene Musa na Elia vakilonga na Yesu. 4Baho, Peteli akamlongiye Yesu, “Mtwa, ndingiba nefwe kusigala baha! Ngita wikela ndichenge fibudi fidatu, kimwi kya veve na kimwi kya Musa na kingi kya Elia.”
5Peakali ilonga, lifunde leling'ala likagubika na kyowo ikapulikika kuhuma mulifunde, peilonga, “Uyu nde Mwana vangu yendimkeliye, mumpulikiche mwene.” 6Vachulila pevapulike ago vakaguwe lufuma, vakaogwipe hilo. 7Yesu akavahelelie, akavapyasa, akavalongela, “Mwime, mbihile kuogofya!” 8Pevalolile pakyanya sevamuwene munu yungi ila Yesu hela.
9Pevakali vikwika pakidunda, Yesu akavalongile, “Mbihile kumlongela munu lukani ulu chemuchiwene mbaka mwana va munu peichulubichwa.” 10Bao, vachulila vakamuhucha, “Wuli, vawulanichi va malagilicho vilonga kuva ing'ang'wa Elia ache tandi kabula lya Kilisito?” 11Yesu akavahigile, “Ndakyene, Elia ikwacha kuvika unofu makani gyonda. 12Ila ndikuvalongela, Elia achile suwe vanu sevakamcheliye, ila vakamgitiye makani manjanganifu ngita pevakakeliye.” Mwana va Munu igudwa ndenindeni pamawoko gyao. 13Baho, vachulila vakachelile kuva akali akuvalongela pakyanya lya Yohani mbatisa.
Yesu akumnanicha mdimi yeagehe na lihoka
Maliko 9.14-29; Luka 9.37-43
14Pevafikile kangi palila lipinga, munu yumwi akamuheleliye Yesu, akamfugamila, 15akalongile, “Mtwa mwonele lusungu mwana vangu kwakuva agehe na kilibisi, kangi iguda hilo, mala cholofu mwene igwila mulyoto na mumalenga. 16Ndikamsindike kwa vachulila vako ila sevavesile kumnanicha.”
17Yesu akamuhigile, “Nyenye kilelo mwihela ludikilo, kyekigitile nongwa! Ndikala na nyenye mbaka paliki? Ndikuvahuvilila mbaka pandili? Mumlete baha uyo mwana” 18Yesu akalikabusa ilyo lihoka likamuhega na yula mwana akananile bahobaho.
19Baho vachulila vakamuheleliye Yesu pono pahela vanu, vakamuhuchile, “Kwa liki nefwe setukawesile kumuhecha lila lihoka?”
20Yesu akavahigile, kwakuva semukumudikila Nguluvi. Ndakyene ndikuvalongela, ngiba mumuidikile Nguluvi ludodo ngita mbeyu lya linunu likemelwa haladali, muvecha kukilongela kidunda iki, hege baha helele kula, nakyo kihega. Kwihela kyokyonda sekiwesekana kwa nyeye. 21Lihoka lya endena selihechwa ngita endena ila kwa kusuka na kwikanila kilya.
Yesu iywanga kangi makani gya kufuwa kwa mwene
Maliko 9.30-32; Luka 9.43-45
22Pevakali pamwi ukoya Galilaya, Yesu akavalongile, “Mwana va Munu ilekwa abatwe na vanu. 23Navo vakumdocha, ila kigono kya udatu ichulubuchwa.” Vachulila vake vakasogwime hilo.
Kuhomba kodi lya kaye lya Nguluvi
24Suwe, pevafikile Kapelanaumu vanu vevilundasa kodi lya kaye lya Nguluvi vakamuheleliye Peteli, vakamuchile, “Wuli, muwulanichi venu seihomba kodi mukaye lya Nguluvi?”
25Peteli akahigile, “Ena, itaula.” Baho Peteli peingiye mugati lya kaye lyake, peakali sealongile kinu, Yesu akamuhuchile, “Simoni veve wilola wuli? Vang'achale va muinyi iyi vidumula kodi kuhuma kwa venekaye awu kuhuma kwa vagenji?”
26Peteli akahigile, “Kuhuma pavagenji.”
Yesu akamlongela, “Suwe, ngita yigehe ndeni vana vawo valekilwe kutaula kodi. 27Ila neke tubihile kuvavipicha vanu ava, helele ku lihiva kalowe somba, nyamule somba va kwanja yeigomela, dindule mulomo vake na mugati lya mulomo vake ukuilola sendi. Inyamule ukahombe kodi lya nene na veve.”
လက္ရွိေရြးခ်ယ္ထားမွု
Matayo 17: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.