Matayo 14
14
Kufuwa kwa Yohani mbatisa
Maliko 6.14-29; Luka 9.7-9
1Chipindi ikyo ng'achale Helode yeakali mtavala va Galilaya akapulike njowo nofu cha Yesu. 2Suwe, akavalongie vanyigendwa vake, “Munu uyu ndi Yohana mubatisa, achulubwike na agehe na ludali cha kugita njowo cha umanyitu.”
3Helode nde akambatile Yohani, akamwopile ndegeyi cha kyuma mukihopo, kwakuva lya Helodia, mdala va Filipo, lukolo vake. 4Kwakuva Yohani akamlongie Helode kuva, “Seunofu veve kuvecha na mdala Helodia.” 5Helode akang'ang'ile kumudocha Yohani, ila akaogwipe vanu kwakuva kwavene, Yohani akali mvichi va Nguluvi.
6Kigono kimwe palihungu lya kwiwuka kubabwa kwa Helode, muhinja va Helodia akakinile pautalo lya vagenji mbaka Helode akakeduke hilo, 7na Helode akajangile kwa kwilapa kumgavila uyo mhinja kyokyonda kyeikela. 8Nave, akahovelechwa na maye vake, akasukile, “Ndigavile baha muluwelo kituwe kya Yohani Mbatisa.” 9Ng'achale akasugwime hilo, ila kwakuva lya kilapo kyake na kwakuva lya vala vagenji pa lihungu, akaswitiliche agavilwe. 10Suwe, Helode akamlagiliche munu mukiwopo amudumule mutuwe Yohani. 11Kituwe kya Yohani kikaletilwe muluwelo, vakamgavile yula mhinja, na mwene akamsindikile maye vake. 12Vachulila va Yohani vakachile, vakaunyamuwe mvili vake, vakausila. Baho vakahelile kumlongela Yesu.
Yesu akuvagavila kyakula vanu elufu chihanu
Maliko 6.30-44; Luka 9.10-17; Yohani 6.1-14
13Yesu peapulike njowo chechimuhumile Yohani mbatisa, akahegile pono ipo kwa wato, akahelela pono pekwihela vanu. Ila vanu vakapulike njowo icho, vakamfwatile kwa kugenda kwa magulu kuhuma mimwani. 14Suwe, peikile kwivindi, akavawene vanu volofu hilo, akawaonela lusungu, akavananiche matamwa gyawo.
15Peifikikle palumiye, vachulila vake vakamuheleliye na vakamlongiye, “Pono ipa ndi kudasi na muda usilile. Suwe, uvalage vanu neke vahelele mufijiji vakagule kyakula kyawo.” 16Yesu akavalongiye, “Mubihile kuveleka vahege, muvagavile nyenye kyakula.” 17Ila vawo vakamlongiye, “Tugehe na mibumunda gihanu na somba vavili hela.” 18Yesu akavalongiye, “Muniletele baha.” 19Akavalongiye vanu vakale pasi mumisoli. Baho, Yesu akanyamula gila mibuminda gihanu na somba vavili, akalolile kuluhano akavifunyila na kuiketula gila mibumunda, akavagavile vachulila vake mibumunda igo na vachulila vake vakavagavila avo vanu. 20Vanu vonda vakaliye, vakagwita na vachulila vake vakalundasa fyevisigaliye vakamemiche findilu kumi na chivili. 21Vanu vevaliye vakali vagosi elufu chihanu, ila vadala na vana sevavalilwe.
Yesu igenda pamalenga
Maliko 6.45-52; Yohani 6.15-21
22Suwe, Yesu akavalongile vachulila vake vakang'ale muwato valongole kuhelela kumwambo lya lihiva, mwene akali akuvalaga vanu. 23Peamalile kuvalaga vanu, akahelela weka kukidunda kufunya. Peifikile palumiye, Yesu akali ukoya yumwene, 24na chipindi ikyo wato ukali uhelele pepi na ng'umbung'umbu lya lihiva, ila kukali na utumama kwakuva lukala ukali upuga wato. 25Pamiye pepi na kukiya, Yesu akavaheleliye vachulila kuno igenda pamalenga. 26Vachulila vake pevamuwene igenda pamalenga vakaogwipe hilo, vakalongile, “Lingasaga!” Vakatovile kyowo kwa uwogofi. 27Bahobaho Yesu akavalongile, “Muchike, ndi nene. Mubihile kwogofya!” 28Peteli akamlongiye, “Mtwa ngita veve ndakyene ndongele ndigende pamalenga ndache kwa veve.” 29Yesu akalonga, “Wache.” Suwe, Peteli akaikile muwato, akagendile pamalenga akahelela kwa Yesu. 30Ila peauwene lula lukala, akaogwipe, akavanga kudibala, akavembile, “Mtwa, unitange!” 31Suwe, Yesu akakonjolala liwoko lyake, akamkolela na kumlongela, “Veve ugehe na ludikilo ludodo! Wuli, ukaogwipe?” 32Suwe, vakakang'ala wato na lukala ukaleka kupuga. 33Vonda vevakali muwato vakamgundamila, vakalongile, “Ndakyene veve nde Mwana va Nguluvi.”
Yesu akuvananaicha vatamwa ukoya Genesaleti
Maliko 6.53-56
34Pevahagime lihiva, vakafikile inyi lya Genesaleti. 35Vanu va ukoya pevamchele kuva mwene ndi Yesu, suwe vakamusindikile Yesu vatamwa vonda, 36vakamsuka Yesu abihile kuvakanila kubyalisa hela lubindo lwa mwenda vake. Na vene vevabyalise vakananile.
လက္ရွိေရြးခ်ယ္ထားမွု
Matayo 14: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.