Matayo 11
11
Njowo kuhuma kwa Yohani mbatisa
Luka 7.18-35
1Yesu peamalile kuvalagilicha vachulila kumi na vavili, baho akahegile, akahele kuwulanicha na kudalika mumwani gyao ku Galilaya.
2Yohani yeibatisa peakali mukiwopo akapulike makani gyeakali igita Kilisito. Ndeni, Yohani akavalagilicha vanyigendwa vake vahelele kwa Yesu. 3Vakamuhuche, “Wuli, veve ndi yula yeikwacha awu tumchinde yungi?” 4Yesu akavahigile, “Muhelele mkamlongele Yohani makani gyemupulika na kugalola. 5Vanu vagaya meho vilola, vatenda vigenda, vene ukalavilo vananichwa, vadinda matu vapulika, vevafuwe vichulubuchwa na vahangala vidalikilwa Njowo nofu. 6Afunyilwe munu yula yeasekunivipila nene.”
7Suwe, vala vachulila va Yohani pevakali vihega, Yesu akavangile kugalongela mapinga gya vanu njowo cha Yohani, “Mukahele kulola liki ukoya kuwelu? Wuli, mukali mukela kulola lidete lyelihogoseka na lukala? 8Suwe, mukahele kulola liki? Mukahele kumulola munu yeafwalile myenda minofu? Vanu vefifwala myenda minofu vakwikala mukaye cha vang'achale. 9Suwe, mukahele kulola liki? Wuli, mukahele kumulola mvichi va Nguluvi? Ena, ndakyene mukahele kumlola munu yeagehe mkomi kuchumba mvichi va Nguluvi.
10“Uyo nde yeasimbilwe mumasimbo gya Nguluvi, ‘Lole, nene ndikumlagilicha mnanzi vangu akulongole, mwene daigalanicha ng'asi lyako.’ 11Ndakyene ndikuvalongela, mugati lya vanu vonda yevakalile muinyi, kuhela yewonike kuva mkomi kuchumba Yohani mbatisa. Ata ndeni, yula yeakali mdodo hilo muung'achale va kuluhano kwa Nguluvi, ndi mkomi kuchumba Yohani. 12Kuhuma chipindi cha Yohani mbatisa mbaka neng'uli, ung'achale va kuluhano kwa Nguluvi upatikana kwa kutumila ludali hilo, vanu vene ludali vigecha kunyamula kwa ludali. 13Kwakuva vavichi vonda na malagilicho ga Nguluvi geamgavile Musa vakalaguwe njowo cha ung'achale va Nguluvi dachivecha mbaka chipindi ichi. 14Ngita mwivesa kwidikila kyevalaguwe, suwe Yohani nde Elia yealaguliwe kuva ngaikwacha. 15Mwene masigicha na apulike.
16“Suwe, dandikiwananisa na liki kilelo iki? Ndi ngita vadimi vevikalile palembuka na kuvakemela veyawo na kuvalongela, 17‘Tuvatovile ngoma ila semkakinile!’ Twimbile lusambo lwa kusungwima ila semukakiviliche! 18Kwakuva Yohani akaachila, akayikanile kulya na vala seanyuwe difai, navo vakalongile. ‘Agehe na lihoka.’ 19Mwana va Munu akaachile, ilya na kunyuwa na vene vakalongile. ‘Mumlole uyu, ikela kulya hilo na mgalaji, mganja va vadumula usulu na vene sambi!’ Ata ndeni, uginyange va Nguluvi iwonisile kuva ndi nofu kuchumbila magito gyake.”
Mwani gya vanu sevakudikila
Luka 10.13-15
20Baho, Yesu avangile kuilonga mwani gyeagitile umanyitu golofu kuchumba kungi, kwakuva vanu vake sevakahongiche sambi chawo. 21“Dawilola veve Kolazini! Dawilola veve Betisaida! Kwakuva ngita umanyitu veugitile kwa nyenye ngaigitilwe kula Tilo na Sidoni, vanu vake ngavavalile myenda gya maloboto suwe na kwibaka kifu neke kuwonesa kuva vahongiche. 22Ata ndeni, ndikuvalongela, kigono kya kuhiga nongwa, nyenye damwipata magudo makomi kuchumba vanu va mwani va Tilo na Sidoni. 23Na nyenye vanu va Kapelanaumu, wuli damwinamulwa mbaka kuluhano kwa Nguluvi? Hamu! Damukwiswa mbaka muinyi lya vanu vevafuwe! Kwakuva ngita umanyitu gyegitile paveve ngaigitilwe ukoya Sodoma, mwani ugo ngaugehe mbaka neng'uli. 24Ila ndikuvalongela, kigono kya kuhiga veve wipata magudo makomi kuchumba lya Sodoma.”
Mwache kwa nene mutulule
Luka 10.21-22
25Chipindi ikyo Yesu akalongile, “Ndikuhongecha Daada, Mtwa va kuluhano na inyi, kwakuva uvafihile vene uginyange na vene luhala njowo ichi na kuvagubutulia vadodo. 26Ena, ndeni nde peukeliye Daada vangu.
27“Daada vangu anigavile finu fyonda. Kwihela yeamchela Mwana ila Daada, vala yeamchelie Daada ila Mwana na munu yeyonda yula Mwana ikela kumgubutulila amchele Daada. 28Mwache kwa nene nyenye vonda nyemufwaile kwa kunyamula michigo, nene ndikuvatulicha. 29Mudikile kulongochwa na nene ngita fila ng'ambako yeawopilwe ligongolo, na nyenye mwiwulaniche kuhuma kwa nene kwakuva nene nde mfokomasi na myigafu na nyenye mwipolechwa munumbula chenu. 30Kwakuva daivecha upefu kwa nyenye kuvalongocha nyenye kwakuva mawulanichi gyangu semakangafu.”
လက္ရွိေရြးခ်ယ္ထားမွု
Matayo 11: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.