Mui Psalm 51
51
1God, manatamu ke diana hunieu tola isulie amasinge ioe: oke usuri asie haitohelaku tola isuiie malumunge ioe ko ta otoi hungehungaa.
2Oke loto asi mangoa mu tataalanga mwaanieu: oke haarereau mwaanie orahaanga ineu.
3Ana noko haahoue haitohelaku: na mu orahaanga ineu e io ue i naoku.
4Nou orahaala hahio tae ioe maraamu, nou deu aela oto i maamu: aena hunie o kei odo mahole oko ere, o kei manola maholo oko leilei.
5Lo kau, nou hute oto peie tolaha aela: a nike e hiehie aku na orahaa oto.
6Lo kau, o sae tooana walaimolinge i laloi sae: oke haaliosaieu ana saenanaunge i laloi ie.
7Oke tatataai hahieu eni hissop, na nesi huhurerea: oke lotohieu nesi rerea oto mwaanie snow.
8Oke da neke rongoa ilenimwaenga na saediananga: hunie mui suisuli o makasii ke sului maemaetani.
9Oke lio aopa mwaanie orahaanga ineu: oke usuri asie mu tataalanga ineu.
10Oke holaie nakue nga mei sae ke rerea, God: oke haahaalue aku maurihaai ngeingedi.
11Mwane o sisikerainieu mwaanie maamu: na mwane o taasie mwaanieu lioa maai ioe.
12Oke haapuasie lou hunieu ilenimwaenga ana haauringe ioe: oke haahalahalau ana sae alaha.
13Hunie nesi haausulie kira orahaala ana tala ioe: kira tatakalo ke hei eliu lou takoio.
14Oke toliasieu mwaanie apu, God, ioe God haaurileku: nge meaku ke totolongainie odotainge ioe.
15Lord, oke rokasie ngiduku: wawaku ke unu tahangainie tarohamu.
16Ana o kaa saetooana ike ununge: ana uri oke saetooana haala neke niie taau: o kaa harihunie ike mu ola ni ununge.
17Maurihaai maoioi ununge saana God: God, o saa leledie ike mei sae e maoioi na e mariirii.
18Oke haadianaa Sion sulie manatamu e diana hunie: oke para honosie Jerusalem.
19Oto ana maholona osi saetooana mu ununge odotai, mu ununge su na mu ununge haileku: ana maholona kire ke unue mu keu mwane ilengine ora ni unuunu ioe.
လက္ရွိေရြးခ်ယ္ထားမွု
Mui Psalm 51: apbPSA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First published as part of the Anglican Prayer Book by the Melanesian Press, 1946.