युहान्ना 13

येशुयि खुरि लोब्टुबे काङबा टुटुइबा

1निस्तार कालापसोलले ताङला धि संसारने बिदा च्युङदे आकि तेहा ढोयापयि भेला लेप्तु नाङान येशुयि हा:कोदुलो, तेहि संसारला होएता खुरि मितेबे करि क्याइरे ख्युइ हतिबाला सिनसिन थु राङ करि क्याइसोङ।

2येशु राङ येशुयि लोब्टु कमुइ ङ्योपाला दियाबलसयि सिमोनयि पिजा यहुदा इस्करियोतयि समला खोला सुङदु झ्युयापयि विचार ताङलाने राङ क्याइ छारतु। 3आकि क्यु पोरो येशुयि लाला टोए छारतुलो, राङ खो कजसुबाने लेलेबा ना, राङ कजसुबे तेहा राङ ढुन नाङान येशुला छ्या होतो। 4तेहि खो ङ्योपा साइरे लाँरेलो, राङ फिला कोहिला यि च्हिला पोरते रुमाल झि रेँ केप्पाला च्यीसोङ। 5तेहि ख्युइ भाटाला छ्यु च्योसोङ, राङ लोब्टुबे काङबा ठुताला छेलसोङ, राङ ख्युइ रेँ कोकोनि रुमालयि हतिबे काङबा फिकाला छेलसोङ। 6जब खो सिमोन पत्रुसयि तेहा लेप्ते, ख्युइ येशुला नाइसोङ, “प्रभु, च्हि ख्योए ङाहि काङबा ठुच्ये?”

7येशुयि खोला जवाक पिन्सोङ, “ङा च्हि किन थाल्ला खेला छ्या मेता, हिन्नाङ च्येला हा:कोङान ना।” 8पत्रुसयि खोला नाइसोङ, “ख्युइ ङाहि काङबा नामयाङ ठुच्याइ मिखुबा।” येशुयि हतिला जवाक पिन्सोङ, “ङाहि माटुइना ख्योए ङाहि लोब्टु मिहा।” 9सिमोन पत्रुसयि खोला नाइसोङ, “हे प्रभु, ङाहि काङबा मात्रा माना हिन्नाङ ङाहि लाक्पा राङ घोबो याङ ठुइ।” 10येशुयि हतिला नाइसोङ, “ठुइ क्याप छाछाराला मिइ काङबा माना स्यान च्याङ ठुइकोइ मिहा, धि पोरो चाङमा राङ धु। तेहि खे पोरो चाङमा धु, हिन्नाङ पोरो ता माना।” 11चिचालानाना खोला धोका तेरङानते येशु ङोस्येदु। हतिचाला ख्युइ नाइसोङ, “खे पोरो चाङमा मिदु।” 12हतिबे काङबा टुइ चारते च्येला रेँ खो फि कोहिला कोन्दे खो याङ त्येसोङ। तेहि येशु हतिबाला नाइसोङ, “च्हि खेला छ्या होतो, ङाहि खि चाला च्हि क्याइरे?#लुका २२:२७ 13खे ङाला ‘गुरु राङ प्रभु’ नेन्दु, धि खे तेम्बा नेन्दु, चिचालानाना ङा हति राङ ना। 14तेम्बारे खि गुरु राङ प्रभु च्युङदे ङाहि खि काङबा टुटुइबा हिन्ना खि याङ चिकि च्यियि काङबा ठुइ कोहि हुन, 15चिचालानाना ङाहि खेला प्ये झि मात्रा तान्दे, राङ च्हिरु ङाहि खि चाला क्याइरे। खे याङ हति च्वरा कि। 16तेम्बारे ङा खेला नाज्याइ, यक्पुवा ख्युइ ताक्पो ले छे मिहा, तेहि तेङलायि लोन खेरङान लोन कुरङान ले छेया मिहा#मत्ति १०:२४; लुका ६:४०; युहान्ना १५:२० 17तेम्बारे खि धि तेम्बा ताम हा:कोरे राङ क्याइना, खे धन्य होङान ना।”

18“ङाहि खे पोरोयि भारेला नानाइबा माना, ङाहि सुला धाम्दे हतिला ङाहि ङोस्येयिन। हिन्नाङ पवित्रशास्त्रा पुरा होङ नाइरे धि च्युङसोङ, कि ‘ङाहि लोटा साङानयि ङाहि थोला तोति क्यापसोङ।’”#भजनसंग्रह ४१:९ 19“धि होङज्याइले ताङला राङ ङा खेला नाज्याइ, तेहि जब हति हुन, ङा हति राङ ना नाइरे खेला हिछे होङ।#युहान्ना १४:२९ 20तेम्बारे ङा खेला नाज्याइ, ‘सुला ङा चोँङिन, हतिला हिना नाइरे खाला ङ्यानङानला ङा याङ हिना नाइरे खाला ङ्यानज्याइ, तेहि ङाला हिना नाइरे खला ङ्यानङानयि ङाला चोँङानयि मिला याङ हिना नाइरे खाला ङ्यानकिन।’”#मत्ति १०:४०; मर्कुस ९:३७; लुका ९:४८; १०:१६

येशु खोराङला धोका तेरङानयि भारेला ङोन्सेखिखिला

मत्ति २६:२०-२५; मर्कुस १४:१७-२१; लुका २२:२१-२३

21धि ताम नाइछारते येशुयि सम तुसोङ राङ ख्युइ साछि तेरिन राङ नाइसोङ, “तेम्बारे ङा खेला नाज्याइ, खि नाङने च्हि कि ङाला टायि लाला सुङदु झ्युङान ना।” 22येशुयि धि सुला नानाइबा ना नाइरे हा:माकुवा लोब्टुतेबा चिकि चिला तारे क्याइसोङ। 23ख्युइ लोब्टुबे नाङने येशुयि करि किङान झि ख्युइ धुनला ङेरे रेँ त्येतु। 24तेहि सिमोन पत्रुसयि खोला मिता क्याकिन राङ टिसोङ, खोला टि “ख्युइ धि ताम सुइ भारेला नानाइबाना?” 25तेहि हति लोब्टु येशुयि टाङला जु क्याइरे ङेरे राङ खोला टिसोङ, “प्रभु, हति सुना?” 26येशुयि जवाक पिन्सोङ, “सुला ङा लोटायि तुबु पहारे तेरच्याइ, खो हति राङ ना।” तेहि ख्युइ लोटायि तुबु पासोङ, राङ तोन्दे सिमोनयि पिजा यहुदा इस्करियोतला पिन्सोङ। 27लोटायि तुबु खेरछारते तुइ हति नाङला स्युसोङ। तेहि येशुयि हतिला नाइसोङ, “ख्योएला च्हि किसोम होए, सो घ्योबो कि।” 28हिन्नाङ येशुयि हतिला च्हि नानाइबा ना नाइरे ङ्योपा सारु ताताति सुइ याङ हा:माकोसोङ। 29चिचालानाना रेनरेनयि धि नाइबा क्याइरे लो, कि यहुदाला आलाइयि किउ होतो, हति येशुयि हतिला कालापसोलयि चाला कोइबा आलमाल ङ्योयोङ, अर्थात हति टाङनाबाला चिगा पिनोङ नानाइबा ना। 30तेहि लोटायि तुबु साइरे यहुदा इस्करियोत हो:प्तामेला फिला थोन्दे पुइसोङ। हति तुना छाम्मु च्युङछरतु।

सारबा आदेश

31जब खो फिला पुते तेहि येशुयि नाइसोङ, “ता मि पिजायि छे तेतेका च्युङ छारते, राङ कजसुबा हतिला छे तेतेका च्यङछारते। 32तेम्बारे कजसुबा हतिला छे तेतेका च्युच्युवा होएना कजसुबा यि खोराङला छे धेङान ना, तेहि हतिला थाल्ला राङ छे धेङान ना।”

33“च्यिबा टिमाबा, टिझि थु ङा खे ङ्याबो हुन! खि ङाला फे ङान ना, राङ च्हिरु ङाहि यहुदि आङकिङनबाला नाइरे, ता ङा खेलाङ नाज्याइ, ‘का ङा ढुन, खे होङ मिङ्युइबा।’”#युहान्ना ७:३४ युहान्ना ७:३४ 34“ङा खेला आदेश सारबा झि तेरच्याइ :खे चिकि च्हिला करि कि। खेला ङाहि च्हिरु करि क्याइ, खेयाङ हति च्वरा क्याइरे करि कि।#युहान्ना १५:१२-१७; १ युहान्ना ३:२३; २ युहान्ना ५ 35तेम्बारे खि चिकि चिला करि क्याइना हतिने राङ हा:कुन कि खे ङाहि लोब्टु ना।”

येशुयि पत्रुसयि माना नानाइबि भारेला ङोन्सेखिखिला

मत्ति २६:३१-३५; मर्कुस १४:२७-३१; लुका २२:३१-३४

36सिमोन पत्रुसयि खोला नाइसोङ, “हे प्रभु, ख्होए काँहा ढुन?” येशुयि जवाक पिन्सोङ, “ङा काँहा ढुन थाल्ला खि होङ मिङ्युइबा, हिन्नाङ च्येला खे ङाहि च्येला होङान ना।” 37पत्रुसयि खोला नाइसोङ, “प्रभु, ङा चिचाला थाल्ला राङ ख्युइ च्येला होङ मिङ्युइबा? ख्युइ चाला ङाहि उ तेरच्याइ।” 38येशुयि जवाक पिन्सोङ, “च्हि ख्योए ङाहि चाला उ तेरच्ये? तेम्बारे ङा ख्योएला नाज्याइ, ख्युइ ङाला लाम्मा सुमला माना मानाइबा ताङला च्याबो मिभोता।”

လက္ရွိေရြးခ်ယ္ထားမွု

युहान्ना 13: NTTL25

အေရာင္မွတ္ခ်က္

မၽွေဝရန္

ကူးယူ